各位blog友，我有野講

先幫個blog做個09總結

觀賞人數﹣151000
followers -26個
最多人觀賞係高雄墾丁海角遊，每日都過200，唔知發乜癲
同一時間個blog最多人同時觀賞係12個...

由無人睇到第一次覺得多人睇左係開始寫”床史“
第二次人數飆升係鬥爛歌
高峰期係墾丁，跟住回落，而家每日都係100-140人左右

數字講完。。。

有D說話想同見過面的blog友講：

老狗：你而家忙成咁，幾時先食到個飯呀!祝你出年（事事）上軌道
朱朋：你就身體健康啦
ogake:隻手快D好返，個人開心D，諗野簡單D（其實唔鬥爛歌可以鬥乜？）
邪留丸：事事順利，心情靚，個樣正
casper:出年游返水，等我（我終於識喺FB add你，好𤓓）
karvitz:喂！K友，我已經癮起，幾時止痕？
意粉：祝你身體健康，去“雲”全日本，缸魚九代同堂，但。。。唔該跟husband做運動
Artman:多謝你比我餵貓，好好玩呀；（等睇KL相）
Alan:你都係，遲D我會仆番場打波架啦
Life is joyous...：你估下次見係你讀完書番嚟定我過去呢？
黑X：你個blog越寫越慢，加個油啦!（去劈酒？我嚟）
Leo:scrabble, yeah!yeah!yeah!
www:其實你OK架，死未？PK仔
F4:下次再唱過，祝你心想事成

即將見到嘅。。。
ellen老師：出嚟要著短褲，唔該；叫埋maymay出嚟吖（要著泳衣）
fun:我等緊台北小姐簽名架，幾時返呀？結冰未呀？

見過未見過漏左嘅（我估一定有漏）：身體健康，出入平安，路路順暢，出年見啦!

2009鳴門大事回顧

一月，去墾丁高雄，點知發燒，一好返就玩彈彈跳


三月，公司cut budget，比人炒魷

四月，買樓（西環）；旅行散心，去長野賞櫻


五月，重操故業，做番freelancer

六月，搬去西環，住又係佢，返工都係佢，成日唔駛見人，口都臭

七月，賣甩住左十一年嘅天水圍舊居，蝕左40個，一天光哂

十月，宮心計

十一月，今年身體明顯差左，睇中醫，回番小小春；冬天無發燒，近十年罕有

十二月，寫左blog兩年，而家先摸到箇中樂趣，多左好多朋友；觀賞人次過左150000，呢個全年最玄，謝過!


諗過停寫，但至少出年都仲會繼續...

餵貓日記-3

今日上晝要開工，1:00pm先去到餵貓，一入門，兩隻野唔見哂，一隻匿喺枱底，一隻匿喺梳化；

原來。。。放貓糧個箱比佢地打開左，貓糧箱係咁嘅（本來放地面架）


結果變成咁（設計圖片）。。。入面本來有兩包貓糧(阿仔食緊減肥糧），唔見左一包


我發哂矛咁搵，唔喺sofa底，枱底，厨房，原來比佢地拉左入厠所，包野變成咁。。。


唔知佢地食左幾多，但明顯阿仔態度有唔同，完全唔望我，我唔理佢呀，佢咁大隻又大力，梗係入你數啦，打左佢幾野，睇下你仲敢唔敢；打完之後，佢怒啤我呀!


我都照餵佢地，但份量減到好少，因為天氣凍，都驚佢唔夠食；佢地食完，一人覇住一個發熱體


見下晝較得閒，瞓喺梳化陪佢地耐D，阿妹跳上嚟玩左一陣，趴喺大脾瞓左


跟住阿仔竟然過埋嚟瞓，仲發出咕咕聲，好似講野咁，見佢地瞓得咁冧，唔起身，我都瞓埋（但，阿仔，你好重）
。。。擁有一個開心時間，耳語

餵貓日記-2

星期六， 一早仆上去，驚亞妹餓親，一開門，未開燈，除鞋，行入個廳，點解濕detdet嘅，地下有一灘幾大嘅水，而厠所門口又有D泡，我懷疑係嘔水，清潔左；攞住包貓糧，阿仔已經即刻”捕“喺厨房等食，阿妹施施然跟住我，今日終於肯食，食完仲望住個碗唔肯走，加多幾粒比你啦!

阿妹高難度示範，請比掌聲


我個袋究竟有乜魔力，兩隻野直頭玩到唔走


掛住玩，夜晚12:00再去，佢地肯定餓啦，一餵就食食食，阿仔食得快，走去搶阿妹D野食，衰公

星期日，天氣轉凍，兩隻野輪住呢個位，梗係啦，暖好多


有input，梗係有output，阿妹知人影佢，頭dupdup


阿仔勁呀，先怒啤，跟住出手打我呀(右圖），迫我關門

餵貓日記

呢篇有D delay，其實係25號嘅事。。。

2A去旅行，自告奮勇幫佢照顧佢兩隻仔女，到佢地飛左，先發現原來有D壓力。。。

下晝4:00pm上去，阿妹竟然唔食野，仲擺出一副呆樣，唔係好啋我，之前都跟我架喎；
阿仔就相反，之前唔蘇我，今日竟然主動嚟“嬲”玩，但我睇穿你囉，你只係餵食，知我餵你，就識嚟討好我，擺出副冧樣

夜晚十點，唔放心，再上去餵阿妹，點知都係唔食，阿仔就搶食，先第一日咋喎，有D担心㖭！

26號朝會早D上去，希望阿妹會食野啦。。。

放兩張今日影嘅相喺度，比佢主人旅行途中上嚟望下

多啦A夢大電影/三槍拍案驚奇

噚晚過左一個名符其實嘅”嘥能厲“，今早起身睇無線“多啦A夢大電影：大雄的貓狗時空傳”


每次大電影都會講環保，今次新D，講遺棄貓狗同約定，走科幻加感人路線，正呀；故事後段嘅世界末日，我直頭懷疑2012抄佢，九成似（佢係04年作品）。
加插左叮噹嘅愛情線，超值；靜香演技越嚟越成熟，可以力爭影后寶座。

﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
晏晝，有個手下敗將”𦧲“玩scrabble，話要報仇；開頭輕敵，比佢襟住，我又大部份時間都攞大量1分牌；後尾憑一個"SQUIB"分勝負，嬲到佢講：diu；啦，呢D咪就係無文化囉
﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
下晝，去alan屋企餵阿妹同阿仔(詳情聽日至寫），artman送來兩張免費戲票，係“三槍拍案驚奇”


係呀，我最怕睇大陸戲，怕“浸”娘味，諗住去到金鐘，即場換到飛就睇，無就行街，結果。。。
今日做三場，間戲院得五行，我都坐到第二行，入場時更加發現其實唔滿

呢套戲有乜好講呢？
個朱古力爆谷好食，我推介
厠所好靚，緊記幫趁擺低幾両
小食部個餐牌唔清楚，投訴
見到有個男人入錯女厠，係呢套戲最大嘅攪笑位
全部演員＋造型都醜樣係呢套戲嘅賣點

完場，我同朋友嘅對話
R：都唔好笑嘅？
我：有個女人識笑喎
R：跣一下腳佢都笑喎
我：我見佢笑，我覺得佢咁都好笑，我又跟住笑，係笑佢囉
R：睇咁嘅戲真係難得，好彩唔駛錢
我：咁爛，真係好難得嘅經驗

今年睇左10套戲，佢排11

完

AVATARIZE YOURSELF

見黑柴玩得咁過癮，諗住用自己嘜頭講聲聖誕快樂，點知。。。咁Q醜樣嘅？

金鈴﹣6

今日已經針第七次，身體喺咁凍呢幾日都仲捱到，無病；近十年，冬天無凍到喉痛發燒，都係第一次囉！但頭髮無進展。。。

阿媽隻腳因為做gym過度而膝頭發炎(係呀，佢做gym架），落樓梯會痛，睇左兩次醫生唔好，今日帶埋佢去；醫師幫佢針，今次仲免費㖭！

把脈後，佢竟然話我阿媽個脈仲好過我

醫師幫佢頭頂施兩針，隔左十分鐘，醫師叫我帶佢出去行幾級樓梯，試下痛唔痛，但我插到成頭針，變左機械人，醫師自己帶阿媽出去行；
行完，阿媽話：都係痛喎!

醫師加碼喺腳加多七針，再加燈熱住；最後阿媽話鬆D，但都仲係有D痛；唯有今晚查埋佢嘅跌打酒睇下得唔得啦!

﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣

今日醫師同一時間處理兩邊病人，幫我同阿媽落針後過左隔離睇另一個女病人；

聽到有個阿媽同阿女講：唔驚架唔痛架

醫師：放鬆，啦，落針啦

疑似女孩：呀，呀!唔好呀!（悽厲程度已為有強姦案）

我以為佢唔知拮邊個位，會好痛啦!點知。。。

醫師：我未拮喎！你咁驚拮唔到架，靠食藥啦艇

佢阿媽：唔好呀，而家好D啦，比多次機會佢啦(哇!衰乜呢，講到咁嚴重，連我自己拮左針都無哂感覺，剩係卦住八）

醫師：其實唔痛架！(講呢句時其實已經落左針，呢招佢用過喺我身上），已經落左兩針啦!

佢阿媽：係咪唔痛呀!

疑似女孩：。。。。。er

隔左幾分鐘，女孩又開聲：我暈暈地

醫師：我同你左D針啦

醫師再解釋：佢本身虛，頭先嚇到(咁都嚇到？）咪覺暈囉!

當兩母女走嘅時候經過我間房，咁我梗係裝下咩野料啦。。。

個女無廿幾都十七，著得潮架，帶哂黑超冷帽legging，仲要阿媽陪睇醫生，兼要嗌到XX咁，真係乜人都有

雜記

1/holiday mood超強，今日完全無做野

2/唔做野做乜，掛住玩scrabble，blog都荒廢，上左癮㖭！

3/晏晝睇完”真情“，夜晚“美麗老解像”監製都係徐遇安，唔怪得之二線嘅咁齊。。。
黃智賢，顏國樑，苑瓊丹，于洋，楊英偉，馬蹄露，馬海倫

4/咁义凍，見到blog友／朋友陸續出發去旅行，變左得孤疑仔。。。諗起

一個風雪晚上，笛聲淒也涼
月是冷 長路更是長

雖然都plan左一月出發旅行

5/早幾篇嘅廢up晚局，ms.H用佢架有美肌功能相機影左呢張相，哇!粉樣到吖！


6/追睇AM730都係為左佢，今日直頭有人問我其實係唔係梁進，因為今日內容我又真係成日講，但。。。我唔係梁進呀!我正經好多架!


完

一pat野

早前講過我有養螺，本來係貪佢會食青苔，點知佢食哂D水草；

而家每日都會餵菜，有菜食，佢地又唔吼水草啦，經過幾個禮拜嘅觀察，佢地最愛豆苗


見唔見到中間果pat野，原來螺係產卵架!但唔明點解D魚會唔食佢地喎

踢館

噚晚同今日都繼續scrabble，大戰三回，全勝

第一仗，又係鬼妹妹，開頭大勝，比佢連連得手，最後都win幾十分


有朋嚟踢館（我已經畫哂黑線遮哂名，唔會比你知係邊個嘅），大戰兩回，戰果如下






等我捉番我家姐嚟玩先，佢以前scrabble高我十班架!

有無人嚟踢館呀？

凍冰冰日記

今日第一次去facebook玩scrabble，自細都鍾意玩，連輸兩舖，第三舖終於發揮得好，砌贏鬼妹，勁呀


玩足一日，點解？皆因凍到唔想郁，今朝瞓到11:45am之後一路坐喺暖爐旁check mail/blog，見到腳甲都發紫，人瑞都走埋嘅日子，仲有無人話香港無冬天呢，唔通真係想人瑞都走哂。。。

唔肯落街，摷下雪櫃有乜餸先，有7-11咖喱魚蛋，凍肉舖嘅獅子狗同燒賣，咁就一煲過啦，“筆”左飯，再成煲上枱，點知好快就飯冰冰


朋友打嚟約睇戲，出面雪櫃咁，點出去呀!

順帶一提，馬桶太凍，唔想坐落去。。。

點心癮

每星期都會有兩日下晝走去樓下嘅“權發”飲茶，茶靚，點心真係好好味，食到而家有D上癮，連老豆返緊工都由上環走嚟食晏（每星期喎）。。。

以下五款點心係我嘅推介

第五位。。。臘腸卷
粉靚，如果我無食錯，應該係用“水仙”粉，特點唔會“痴”牙，臘腸唔算肥，近排我嘅至愛


第四位。。。奶黄煎推仔
皮脆芝蔴香，記得襯熱食，食哂成碟都無問題


第三位。。。鴨腳紥
組合根本係絕配，鴨腳旁加左一件豬肉及芋頭，芋頭次次食都係粉嘅，索哂鴨同豬嘅肉汁，豬肉又帶番芋頭香，過癮


第二位。。。蜂巢芋角
脆皮比食開嘅鬆但挺喎！乾身，唔會食到成口油，好食到不得了


第一位。。。懷舊馬拉糕
又係鬆得緊要，帶蔗糖味，我家姐至愛，佢一個人一次隊左三籠，真係有病


嚟開西環嘅，飲茶吖！

廢up晚宴

以為我一定係寫繼續休息，我偏要寫夠兩篇。。。

人物：MR.D，MR.M，MS.H，我
與朋友灣仔新益晚宴，三男一女，除左MR.D，全部廢話人，勝在夠快兼夠廢

佢三個先到。。。

MR.D問我：頭先去左邊？
我：去左天地睇書
MR.D：下？你睇書架咩？
我：我好有文學修養架，才子嚟架
MR.D：咁你頭先睇咩書？
我：O咀爛gag王
﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
MR.D：你新屋凍定天水圍凍？
我：天水圍凍D，不過新居大風
MR.D：你間房大唔大風？
我：“山”左窗就無風
﹣﹣﹣﹣﹣﹣﹣﹣﹣﹣﹣﹣﹣﹣﹣
我同MR.M講：瘦左喎！
MR.M：我唔會請你食飯

而MS.H 啱啱買左灣仔樓，問佢間屋幾大呀，幾錢尺呀，MR.M全部搶答；
MR.D：做乜你咁清楚架？
MR.M：其實我地結左婚？(當然係假架啦）
我：唔怪得之瘦左
MR.D：下，你地幾時一齊架？（呢件死蠢，竟然當真）
MS.H：仔都生埋，坐喺你隔離
我對住MR.D（低B聲）：Uncle~~~
---------------------------
MR.D：你層樓望唔望到海？
MS.H：望到IFC
我：咁即係望唔望到海呀？
MS.H：望唔到
MR.D：望唔到都六千幾蚊尺？
MS.H：OK架，個景OK架
我：點止OK，樓下仲有seven eleven
MS.H：真係有修養喎，識英文
﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
MS.H行開左，我問Mr.M點解咁耐唔買樓？
MR.M：唔想供得辛苦
我：你個真女友無做野咩？一齊供啦
MR.M：就係未搵到個可以一齊供嘅
MR.D：呢區咁多盤你啱唔啱呀？（講野大動作，隻手指向啱啱番嚟嘅MS.H)
我：佢問你呢個盤你啱唔啱呀？（我指住MS.H）
MR.M：我唔介意二手樓，但樓齡老左D囉，廢事住住下要整下D渠
﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
MR.M：有鎖鑰，帶我地上新樓參觀吖？
MS.H：你地諗住送咩野家電比我先？（好港女呀）
我：keyboard啦，你公司好多，壞左個A字果D
MR.M：我送mouse，櫃桶有隻跛嘅
MS.H：O咀兼怒啤
我：電器呀？我送聖誕燈吖
MR.M：咁我送聖誕樹
MS.H：你地以為聖誕前我入到伙咩？
MR.M：我無話聖誕前送比你
﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
MS.H:你侄女呀!（我同姓嘅女同事），好惡呀，喺公司講電話鬧工人架，姓柯嘅都係咁嘅！
我：我好錫工人架；（扮打電話）Maria,錫錫，啜啜啜啜(我其實無工人）

-----------------------------

啱channel，真係好玩，但MR.D成晚個表情都係咁。。。

雙封面

見到今期U有傅小姐做封面。。。買
點知原來謝XX做另一邊封面，唉！個樣越執越”銀“眼

結果要摵走一邊封面至睇本雜誌

是不是這樣的夜晚才會寫這樣的blog

好凍，是日休息

世界變

以前，搭小巴去銅鑼灣，個牌寫住大丸
而家，大丸執左咁耐，小巴仲係掛住大丸，對新一代／新移民嚟講，係咪七不思議事件呢？



以前，行街邊有咁多籌款，頂多咪禮拜六賣旗
而家，一出地鐵站兩個街口內，又話幫下D老人，呢邊就幫遺棄貓狗，仲有個幫難民㖭！再加埋乞兒，僧多粥少呀，反而越嚟越無動於衷

以前，朋友聚餐，酒樓上菜，大家會嗌：飲杯
而家，大家會嗌：等陣，我未影相呀，跟住就輪住用部機去“scan"D餸菜，你係咪？

床底寶箱之史前 成績表

本來想搵小五嘅成績表，但原來最舊都係得小六

小五係人生第一個轉捩點。。。

細佬出世。。。之後越嚟越失寵，為之後中學後期自閉嘅性格揭開敍幕

改名。。。本來跟族譜排“一”字輩，英文釋名直頭係yatming， 同富貴悶個主角一樣，但細佬出世搵高人改名，竟然連我個名都郁埋，無得”一鳴“驚人

第一次做班長。。。班主任搵我做副班長，以前最多做行長，今次升呢，正班長係農曆新年我老豆口中嘅”阿仔“，我地嘅友情都係由呢年開始

成績開始倒退。。。都關做班長事，原來好多野做架，兼且教學開始勁多英文，個底打得唔好，每況越下

貼堂。。。班主任兼教美術，我亦開始被發掘呢方面專長，美術功課由班房貼到學校大堂，無處不在

我諗比任何家長見到張咁嘅小六嘅成績表，都會以為個仔讀書會一帆風順，但之後果D。。。真係醜樣到你唔信，我都唔敢擺上嚟！
美術得C，OMG，最差果科！發生咩野事？我唔記得

摩星嶺

小時侯，阿公會帶我去晨運，由堅尼地城行上摩星嶺，今日重遊，諗番起佢教嘅一D常識，大家嚟上大自然一課啦。。。

呢隻叫頭暈花，唔好見佢靚就走去索，彩色呢隻係會暈架，白色就無事，佢好甜，如果行山見無力，可以啜佢D花蜜，睇下第二張，有隻蟻食緊啦


呢種好似發毛嘅係地衣，空氣好先有，呌氣索大啖D


見唔見到圖中間係乜野，放大睇啦，係個蟻竇，用樹葉做，入面有隻新蟻后，大蟻好惡，唔好攪佢


呢兩張我都唔識，有無人識？
左：係生野定品種係咁？
右：靈芝？菇？乜菇？


無嚟十幾年，上到山頂，變哂樣，多左呢座野，乜嚟嘅呢？


以前打仗嘅遺跡，今日都係打仗，不過係war game;另有一班帶住𡃁模影相嘅龍友；呢度真係九曲十三彎，夜晚嚟真係嚇死


天氣好，總算都影到幾張靚相。。。

1/幅牆溝左貝殼，有乜野特別用意？


2/似唔似英國個石柱群？


3/似唔似真永遠？


以前嚟過幾次，左圖我先得廿歲，山頂有個小燈塔(我後面果個），今次上嚟諗住探下佢，點知已經拆左（右圖），前面本來一望無濟睇到日落嘅，而家前面D樹標高哂，無囉，乜都無囉

鵪鶉蛋

去CWB利舞台，見到呢張poster；哇!而家咁都可以做model架？唔怪得之某blog主都自稱𡃁模!


剝殼雞蛋？定係未剝殼鵪鶉蛋？

搵雪膚屋啦!

儲印花

前文提要，為左幫blog友及試下自己嘅運氣(係運氣唔係血氣，血氣呢幾日的確扑到行勁左），儲7仔印花換kitty

$20一個，$30兩個，$40三個，咁7仔都係迫你每次買夠$40啦!

我策略係買雜誌，我一星期買三至四本雜誌，其餘就主打買奶同雪糕；而每次都係幫趁樓下果間七仔；上晝會有位後生靚女做收銀，每次都會教我買乜最抵砌夠個尾數

今朝對話如下

收銀：買左幾日，仲差幾個呀？

我：其實差兩個，都睇下買唔買夠$40，不過我想睇下雜誌先，有friend話影左雜誌相但醜樣唔比人知係邊本，我要摷佢出嚟

收銀：咁慢慢啦

我：搵唔到喎！（都唔知係咪影埋D要入膠袋嘅雜誌）咁買呢堆啦，但仲差十”零“蚊

收銀：買薯片啦，多一個印花，又或者買礶芬達啫喱汽水

我：咁就買礶芬達啫喱汽水＋豬肉乾啦!

收銀：其實無可能換齊一套架！（幫公司倒米喎）

我：梗係唔係一套啦，我剩係想要16,18咋，難過中獎呀!15個印花至抽一隻

收銀：佢地話來價貴喎，要$60一隻，16,18靚咩？我覺得30靚D

我：哇！呃鬼咩，呢隻野要$60蚊，純銀呀？

收銀：佢地話似hello kitty自己D product 喎！不過其實我都唔鍾意kitty（又幫公司倒米喎）

我：喂！呢度15個印花啦!點抽架？

收銀：啦!比幾個你揀，2/35機會，睇你啦!

我：你長工嚟架？

收銀：兼職咋。。。

好，由快獸公佈結果：


13號嚟喎，老師你吼唔吼呀？

大煲

天氣凍，最想食煲仔菜；買個新煲，自己得閒整下先；我無某人咁富貴，只係買左個細細嘅瓦煲。。。

但係同某貴煲優點一樣喎！。。。
（好處是不用放太多油煎炒食物，不易黐底，不易生銹，清洗容易，熱度均勻，聚熱效果良好，烹調時間比一般鐵鑊快，通常祗需細火烹調，節省不少能源，沒有化學塗層，吃得健康。還有兩點最重要的，就是能夠美化廚房，以及令入廚者快樂！）

冬菇炆雞，豆瓣醬肉碎，最後就勁啦!

橫掂儲7仔coupon，咪買左兩碗碗仔翅，用煲仔煲滾，魚翅撈飯也!


有十三個印花啦!