汚染

今日Lunch又係food court,嗌咗炒貴刁；點知竟然有大量蝦米，貴刁點會有蝦米架，離譜！
係咁挑呀挑，令本來15分鐘嘅飯食足半粒鐘。。。
未到二點半，開始作悶作嘔，唔講以為有咗㖭呀！跟住面都青埋又頭痛，第一次幫趁公司個藥箱，食咗粒panadol, 放工搭車都仲想嘔，陰公呀！


好地地一碟河粉，咁就汚染咗，攪到我今日output由口出。

天幕下歎午餐

無乜人緣，日日lunch都吔自己，選擇咗去Food Court, 都算有選擇嘅，有三文治／炒粉麵／pizza and pasta/燒味等
環境優美，喺商場三樓，無電梯去到，每次上去食飯都有行山嘅感覺；


室內有陽光，好開揚，心情都會好Ｄ；茄汁雞絲通 （一般啦）


呢日直頭哂住嚟食，好有渡假feel；咖哩豬頸肉奄列飯（以為係日式嘢，點知係泰國嘢，唔係奄列包住Ｄ飯，而係蛋漿撈飯再炒熟，濕笠笠，有Ｄ怪）


商場而家做緊希臘主題活動，堆小白屋佈景幾靚，仲歡迎影相，得閒嘅嚟睇吓啦！乾炒牛河（夠鑊氣）


行開嚟呢頭就搵我吔飯啦！

shopping魔

有幾樣嘢見親都有衝動想買，完全失控！
1/洗面膏
2/梘液
3/T-shirt
4/雪糕

今日睇下洗面膏存貨。。。一頭住家已經有咁多（雖然有兩枝係奬品），兩頭住家加埋夠用幾年，唔通下意識覺得自己好汚糟？

INPUT

去九龍城德昌食魚蛋粉，十點半已經要排隊


無睇錯，碗魚蛋魚皮餃係我嘅，我都食魚架，吓哇？
咦！今日咁腥嘅；喂！換你碗比我吖


般含道Fusion,牛柳天使麵一般，阿媽個魚柳試咗少少，至少唔腥


大家樂“紐西蘭爵士牛扒“，推介，掂呀！


元朗生記山西刀削麵，間中去元朗都係為咗佢，麵彈牙，湯底好惹味


元朗awakening,午市幫趁，三個餐兩個係海鮮，叫第三個竟然賣哂；唉！老闆，咁就已經話你知咩係受歡迎啦！
唯有散叫，意粉好食但略咸兼已經無乜mood，no comments


input咗咁多，呢牌output海量驚人

Photohunt

新發現（二）

喺吉之島10蚊兜買咗呢個樽，可以將普通梘液變泡沫梘液。。。
之前一路以為泡沬係關Ｄ梘液事，原來關個樽事


大成功，好好玩呢！

真係好攰

預咗新工辛苦，但都超出預期。
四日開五個會，今日解決兩個job但即嚟三個，點拆掂佢呀？

一丁友食飯

經過兩日嘅welcome lunch；今日又因要開會而得番35分鐘食lunch，所以今日食自己，去咗數碼港嘅法國廳。
之前食過焗豬扒飯，今日encore,真係好豬，正！套餐價$68


晚飯繼續孤伶伶，食拮野家


好攰！

慳得一蚊得一蚊

響應環保，少開冷氣，唔用嘅燈全關上，比起舊年平好多呀！
慳埋慳埋可以叫爹哋陪我一個鐘啦！

第一日返工

*竟然緊張到瞓唔著,真係估唔到!
*但至少無便秘
*今日已經解决兩個job,順呀
*但係至少仲排住廿個job
*返エ原來有公司車,可以慳返D
*第一日返エ著恤衫,好扮野

節約用紙

今日同大家講環保，除左用少Ｄ膠袋外，紙巾亦應該盡量用少Ｄ，我地嚟睇吓以下例子




記得慳Ｄ洗啦！

今日

今日繼續hea, 先去Neway Karaoke唱唱K
終於有得唱黑擇明，信心花舍，月球上的人，迷失表參道，仲有酷兒同背叛，勁好玩。


四年前朋友點“告一段落“比我唱，紀錄我工作上嘅轉變，今日自點咗一嘢，星期一返新工，唔做freelance la.
呢隻歌好好玩架，唱親都走音，yeah!


跟住去又一城shop吓ping,食舊雪糕先！新口味芒果＋熱情果，冧哂！


再殺落沙田搵飯食，揀咗Shakey's Pizza,雙人餐包括炸雞，椰菜花忌廉湯，白汁蝦通粉，同Pizza，一Ｐ兩味，左邊香草番茄，右邊辣肉腸，Yummy Yummy, 仲有果茶，飽哂

DHL特約﹣向世界出發

今集有謝老四帶你去東涌。。。
佢話：男人可以口水流，唔可以下流
所以今日去咗Novotel嘅Essence食"普飛"


食咗咁多，一眼睇哂


飽得滯，變咗向男界出發。。。舒服哂

跟住上昂平360
原來NGoNG piNG, 隱藏三個NG,唔怪得之咁多ＮＧ la,真係唔老黎!


星期五喎！都咁多人嘅？


排咗十五分鐘，終於上車


5,4,3,2,1,衝呀！


都唔激嘅！仲搭咁耐，又無冷氣同風扇，sauna咩？


去到昂平廢墟，好唔吸引


心經簡林


最後出場嘅係心口貼住湖南旅遊貼紙嘅四個遊客，佢地發揮湖南衛視舞動全城打不死精神，由隊尾攝吓攝吓咁打足幾十人占，勁！
評判楊楊比你十分



完

新發現 ﹣１續

杯蓋嚟架！咩野SIZE嘅杯都啱用，吸得好實，要拎開就要“鏈“佢個鼻，好盞鬼。


深水埗Ｄ玩具舖買，平嘢都有咁嘅設計，超抵！

新發現 ﹣１

知唔知佢係咩嚟？


聽日開估

四個窿

個冷氣機已經十歲，雖然平時少用，但始終開咗都唔夠涼，要換雪種同大清洗，趁呢幾Day較閒，搵人攪掂佢。
原來要搬走洗，半日先拎番嚟！所以屋企出現四個窿

懵丙

地點：灣仔會展
時間：上星期五下午
人物：粗心大意嘅司機



火影現場直擊報導

上週齊齊玩答案

原來我地加埋係估中哂喎！

没有爛歌，生活仍要繼續

"鬧阿貓，一篤嗌Bra"。。。絕

真係咁瘦咩？

呢個星期成日聽到呢D說話：
喂！你瘦咗呀！上次見你都肥Ｄ
你比我想像中瘦喎
做嘢好辛苦呀！瘦咗咁多嘅？
你咁大食都唔長肉嘅。。。
mmmm......各位，我呢三個月已經肥咗五磅架啦！而家影相塊面已經脹卜卜啦喎！

以前最高磅數同而家相差九磅咋，多九磅就變成咁啦喎，咁樣先叫正常？

街頭超人

今日終於睇咗,套戲好短,得個半鐘....
感覺成套戲比較散,想講嘅野好多;超多特技都只係陪襯;用超人戲包裝,其實係愛情片;大量笑料,原來係大悲劇;真係殺你一個措手不及


最後一提,Will Smith表現幾型,但Charlize Theron變身後仲型
你地有無睇?落雨無節目,聽日去睇功夫熊貓.

點開架？

劉浩龍隻碟，之前睇報導已知好多人投訴唔識開，甚至要拆爛個盒；我開唔開到呢？


右邊有個梯形die-cut，應該係比人從右邊拉嘅，但拉唔出，結果就係比呢個位呃咗；


再嚟搵手指篤個洞，再喺左邊拉出嚟！咁點解個梯形die-cut唔做喺左邊？抵比人鬧！


終於開到，講吓Ｄ歌，同佢以前一樣，每碟都有一兩首好出嘅主打歌，“神啊!求求讓我睡“對我已是今年金曲，但其他真係麻麻，“射程範圍“叫做好Ｄ，“火花不等人“非常一般，“大花面“直頭難聽。唉！師兄，轉公司呢隻碟都唔得隨時玩完架！