畫

自畢業後都未正式畫過畫，朋友邀請叫我去玩，帶住半緊張心情，不知畫乜情況下，畫左達仔。。。

acrylic。。。完全弱項，無畫功可言，但拎左返屋企，又越睇越鍾意喎，呵呵呵

遲來的達仔月曆

遲就遲左D，邊個想要嘅話，留個言比我啦

2014啦

新一年，今年要努力努力

happy new year

merry christmas

 今年，達仔以三款造型祝大家聖誕快樂

達仔睇醫生

達仔耳仔舊患，其實一路有有水流出嚟，每日幫佢抺

自從天氣凍，耳仔乾爽左，無水流，以為有機會好轉

但早兩日，發現地下有血點，原來耳仔流血水添

卜左今日睇醫生，落樓時佢叫到拆天，搭lift遇正solar阿哥，見達仔叫叫叫，幫阿達仔打打氣呀

早到左診所40分鐘（因為睇開個醫生喺深水埗，預鬆左），診所雖然開左門，但未開燈，職員食緊飯未返

醫生反而喺度，叫我坐坐先

但護士好快就返嚟，仲好快有得睇，原來我之後有個急診（一陣講）

首先呢，達仔重左1kg,去到5.7kg

醫生話未需減肥，但要注意

耳仔呢，耳道無好似之前咁生肉瘤，只有有菌令佢發炎，可能上次殺佢唔死

要種菌，查係乜菌兼查邊隻抗生素打得死呢隻菌

報告要幾日，今日都打兩針，包括一支抗生素

達仔全程鵪鶉無郁無叫，好快攪掂

加埋洗耳水同藥膏

盛惠$905

達仔呀達仔，每次我搵多少少，你就同我洗左佢嘅，你咁叻嘅你
﹣﹣﹣﹣﹣﹣﹣﹣﹣﹣﹣﹣﹣﹣﹣

醫生個急診，聽到姑娘不停打電話比今日預約左嘅寵物主人，盡量改期改醫生，原來。。。

一雙情侶帶隻好可愛哥基入嚟，我多口問佢乜野事，原來生得，穿左羊水，痛到震震震，要做手術生B喎，唔怪得之有得打尖，推哂其他case啦，生仔唔等得呀

希望佢順順利利啦

踏入冰河世紀

動物會用行動話你知已經踏入冬天。。。

呢期，做野好攰，一上床以分鐘就瞓著，連續兩晚，瞓左一陣，就比達仔用鼻大力撞我塊面，我一拎起被角，佢就行入嚟趴喺我心口瞓。。。

真係瞓到天光架；第二朝拎起張被，睇下佢，歎到，我就成身貓毛

趕都唔走呀

開暖爐啦，鬼咁醒，即刻跳上去；但真係好熱架嘛，痴線。。。

搬返個架出嚟隔一隔，本來放哂雜誌，一堆雜誌而家仲喺地下；
睇佢，可以成日喺度唔郁架，我可以專心做野啦

達仔心聲：希望今年冬天快D完啦

達仔之表情

達仔係一個好好嘅攝影對像，因為佢多表情。。。

兩年

時間飛逝，咁就兩年啦

達仔已經跟左我兩年啦，拎左入屋日當佢生日，六歲啦

今年無特別慶祝，咁啱我多野做，整日喺屋企，當陪佢啦

睇下，而家幾靚仔：）

三隻不和的貓

三隻野，阿仔見貓就fea，即使係阿妹，互fea程況嚴重，但佢地識自己喺廰分配位置，不過似係阿仔避阿妹多D 

達仔呢，我要佢跟住我，我喺書房做野就關門，瞓覺就迫佢入睡房，盡量唔比佢地“交手”。。。 

好幾次，達仔一出去，阿仔就fea，我都分隔佢地，但今晚，睇漏眼之下，比阿仔入左房，我趕佢出廳時，唔為意達仔已經快過我，追住阿仔一野爪埋去，實爪中啦，阿仔又fea到癲，我趕返達仔入房後睇下阿仔有無損，好彩無事，全靠我早兩日幫達仔剪左腳甲，好彩。。。

睇下相，阿仔輸哂謝哂皮，我呵返都無用；唔好以為阿妹好溫柔，對住達仔，惡樣盡現，fea fea fea，達仔走開，佢又擺出一副無辜樣。。。

預告：今朝其實發生左件大事。。。唔見左阿仔，最後要叫佢老豆幫手，而我攰到無左半條人命，今晚無力寫（仲要開工），聽日寫

達仔的森林

因為打風，騎樓D盆栽搬哂入廳，八公覺得阻住佢囉

家賊難防

我以前唔會諗到，一隻貓識得開廚櫃攞野食囉～ 

最近經常發生，因為罐頭同貓糧放喺廚櫃入面，佢自己學識用手拉開個櫃門（今次拍唔到）

 條片係我見佢開門入左櫃之後拍嘅。。。  

睇下佢，樣衰衰咁捐逢出嚟～～

好玄﹣同達仔嘅第一次相遇

一路都以為，同達仔嘅緣份始於我經常去嘅一個偏僻地方，如果大家有睇開呢個blog嘅都知，果度有幾隻貓，達仔最叻搶野食，係果度嘅大阿哥。。。



但我噚日執舊相，見到呢張  

我第一次去果個“偏僻地方”係10年11月，而呢張相時間係09年9月，我啱啱搬嚟西環，睇返D相，果日係鬼節，我走左去某公園影相，影到呢隻貓。

從佢眼神，身體比例，坐姿，鼻上面個反光位同耳朵形狀，我好肯定佢係達仔，因為之後我都見過達仔喺呢度出現，佢識行山路過嚟呢度等餵貓阿姐餵食，而捉佢去絕育果個阿姐亦係喺呢度捉佢嘅。。。

但最令我介懷嘅係，佢當時未閹架，未剪耳呢，樣亦都細個D，似啱啱做成貓咁樣咋，如果係咁，可能佢係09年頭出世，而家都未夠5歲～


緣份嘅野果然好奇妙

聖誕快樂：）

幫達仔揀緊相做座枱月曆，有無人想要？

達仔慶生日

達仔入屋一週年啦，今日當係佢生日同佢慶祝。。。  

達：收到包裹喎，咩野嚟架呢？八下先  

達：寫住我個名架喎，比我架喎；係個特大貓抓板呀，可以當床仔瞓架  

達：原來係隔離台意粉姨送比我架，包貓草好吸引喎～  

達：等我擺個舖屎影相先；好鍾意呀，多謝意粉姨～

咦！仲有嘅？原來明仔阿媽聽到我腸胃唔妥，種左一盆貓草比我呀，試下味先～  

晏晝仲有罐罐食，呢隻咪係上次好好食果隻mousse，食左唔影響屙屎果隻？今日乜日子呢？  

達：哇！仲有一舊喎，乜嚟架？原來係貓樹，明仔話等我可以擒高擒低兼磨爪架，多謝哂呀  

生日快樂呀，達仔，最緊要健健康康呀：）

達仔生日？

舊年嘅10月11日，係達仔入屋嘅日子，既然唔知佢嘅正確生日日期，就將入屋日訂為生日啦；

舊年醫生估計佢4-5歲，咁今年生日就當做6歲慶祝啦；

買乜生日禮物比佢好呢？

恩將仇報

病我就帶你去醫

麻醉完，漏屎我就幫你抺

餵你食濕糧啫，唔鍾意食咪算囉，夾硬要走，出埋爪抓我一條血痕咁算點先？

仲要死唔要面當無事發生埋嚟"螺“野食，你比起某高官更厚面皮呀～

日本寄來的舖屎咭

多謝老師，去旅行都有我同達仔心，寄來一張靚靚舖屎咭

你問幾時帶達仔去花見？咁啱嘅，佢啱啱去完喎。。。


達仔之花見喺下面
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。

$6000

政府果$6000，原來拎哂嚟醫阿達仔，由第一次由街執佢去醫腸塞，到今次割耳瘤，總數$7000；好彩呢排多job搵返啫～

今日，放低達仔去診所做手術後，好想食生果，尤其係提子，今晚突然知道點解啦。。。。。。。。。。。。。。。。。。。。。

。。。。。。。。救貓一命，勝食七粒葡萄



想睇達仔手術後情況，請睇呢度，謝

我家的女僕

星期二，帶達仔覆診。。。


首先睇條腸啦，醫生話佢條腸出奇意料地康復得好好，腸入面已經無乾涸嘅宿便，帶去比醫生檢查嘅大便亦正常；體重亦上升至4.1kg，醫生話可以開始減醫生糧（好呀，醫生糧好貴呀），減食糧免太肥（好呀，食少D慳番D呀），理想體重係4.5kg。

從牙仔去估，達仔應該4-5歲，唔算係老貓。。。

醫好條腸，就醫隻耳啦（係呀，佢真係病貓嚟架）；做街貓時已發覺佢隻耳發炎，流血水，當時我用消毒藥水幫佢清潔；到上次睇醫生時，醫生話佢有粒肉瘤，唔影響生命，醫條腸先；但每日佢都抓損個傷口發炎，兼每日都有血滴落地，今日再去醫埋佢。。。


醫生一路用棉花棒清潔，一路解釋（好勁囉，到我幫佢清實比佢走左去）暫時可以做嘅係唔好比佢再抓損，所以佢要戴上大喇叭啦，只要唔再損，個瘤再慢慢處理，因為佢唔贊成做手術，只要個瘤唔再增大，可以暫時不理

醫生話：呢兩星期，你要扮太空貓啦
我話：似女僕多D喎（哎呀，比人知我係宅男㖭）

一番到屋企，開籠，達仔驚啦，想標入梳化底，點知帶左大喇叭，捐唔入，我抱佢番貓屋等佢定番心情先啦，個樣好可憐喔～



但係醫好隻耳，就唔使做病貓啦～

安樂蝸

夜晚天氣轉涼，驚達仔冷親，行下寵物店買張貓床；知道貓鍾意捐窿，想搵個有蓋嘅；其中一間有張個形幾好，但個花好師奶呀，仲要$260㖭～



上網睇，見到有張啱心水，黑灰豹紋架，仲只需$88，點知打去又無貨：（

西環勝在多寵物店，落街再搵，終於見到呢張迷彩嘅，＄88，手工就差D，個係我相信達仔會鍾意囉～
一放底，佢自動波入去瞓，真係好鬼醒架啫～


你睇佢幾舒服，真開心