長野私の遊 ~ 第四彈

第三日 長野


太早，餐廳未開門，便利店買三文治，食完已經到長野


本來行程plan左先去雲上殿，但去到巴士站先知原來上晝無車上雲上殿，巴士職員建議我地由善光寺行上去，需時約半小時。。。
咁就去善光寺先啦！
善光寺呢個月做緊徐開帳，排哂長龍入寺，我地無興趣行寺院，只係行佢條表參道影下相兼食下雪糕


寺嘅附近好多櫻花喎！有八重櫻（學得幾快），有粉紅又有白色嘅，仲有混血嘅


白色好靚，影咗呢兩張我好鍾意


越行越熱，開始除衫；噚日就冬天，而家就。。。
吓，秋天？點解突然由櫻花團變左做紅葉團嘅？
仲好靚㖭！影幾張都好滿意


好，影夠，去雲上殿啦！
其實本來係去臥龍公園，目的係睇櫻花嘅，但佢上一個星期已開始花落，最後改為去雲上殿。
雲上殿號稱有650棵櫻花樹，早兩日先開始花落，怕且仲有得睇啩！點知行到氣喘，最後只剩下幾棵，仲少過善光寺
行上去行到好熱，再由秋天變夏天，但勝在空氣好兼無人，影下自己先；之前banner嗰張一幅相幾個我就係呢度影，走嚟走去都唔怕比人笑


跟住行番回頭路去善光寺，做乜？就係為左呢碗戶隱名物蕎麥麵，質地真係有咬口啦，但白色呢pat係乜嚟架？滑潺潺嘅？仲有，真係好咸！


團友做定功課話善光寺附近有火車站去下一站小布施，我信哂佢啦！見佢地圖都唔駛，好似憑直覺咁轉嚟轉去，仲要落條大斜路，我都打定輸數，最多搭巴士或的士返長野站，但行行下竟然見到一個地底車站寫住“善光寺下“，開心到好似中獎呀！
去買飛啦，賣飛阿伯收多我地100yen話係特急，我地照買，奇怪事嚟啦！事後先發覺特急車係唔停呢個站架，而時間表亦無呢班車，驚未？


好！出發去小布施
呢個時候，仲未知跟住落嚟將會發生意外。。。。

長野﹣完

長野私の遊 ~ 第三彈

第三日 輕井澤


搭7:30am JR,本來諗住6:30am至起身，但五點幾已經比陽光照醒；係呀！陽光呀！即起身落街影相！
終於見到酒店全貌，原來幾靚架喎！


亂行一個方向，又比我地去到個靚景，有橋仲有一個好靚嘅湖，個天真係好藍，空氣真係非常清新，仲帶草味㖭


湖嘅隔離有一行櫻花樹，狂影下，最後揀左呢四張放上嚟




近七點，返去攞行李，去車站，見街有架牛奶機，即買，心情靚，飲乜都好味，快獸都推介
原來車站旁都有櫻花樹，但噚日比Ｄ霧遮哂，乜都睇唔到


7:30am上車，去長野啦！

長野私の遊 ~ 第二彈!

第二日 輕井澤


07年10月由立山返東京經輕井澤超凍超大霧，今次又點呢？妖！又係咁大霧嘅，仲要得八度，乜地方嚟架？
住APA HOTEL，資料顯示距離只係兩分鐘腳程，車站都望到，但係大霧到十尺外都睇唔到，酒店你喺邊呀？
心情其實無受影響，仲覺得好好玩，先喺車站買雪糕食，哇！好濃牛奶味呀，正！
雪糕小姐仲指埋酒店方向比我地，好好人架呢！
現場環境直頭諗起套爛戲“霧地異煞“，終於去到酒店，擺低行李，去玩ＬU


第一站，白絲瀑布
巴士上山去到目的地，第一樣見到嘅係。。。雪！頂，唔係呀？四月啦喎！又話地球暖化嘅！
瀑布好袖珍，影幾張相已經玩完，行番出車站等車，見有鹿肉包，買個試下兼暖肚，其實味道似豬肉


好快有車，搭去舊輕井澤銀座；沿路開始落微雨！
搭車無野做,講爛ＧＡＧ：爹地，出嚟見我啦！（我自認係太陽之子嘛）；你係阿坡羅，我係Haagen Dazs;結果...越落越大
落車，突然見到一棵櫻花樹，呢棵係櫻花啦掛，影呀影呀，唔好咁大雨呀！


行左一陣，好凍；搵野咬，揀左呢間食soba烏冬嘅食店
好味但超咸，室內開左暖氣，個暖爐係個水壼，抖返暖個身先


雨,越落越大，要企喺人地舖頭避雨，最後頂唔住，決定快步行番酒店check-in先
題外話：返到酒店2:55pm，酒店女職員話："Solly" ，check in time 3:00pm, five minutes later,我又笑左出嚟，日本果然好守規矩


check完in，搭巴士去下一目的地，千ヶ滝温泉
環境一流，泉水好滑，浸完皮膚都滑左，正！但落住雨浸，就真係有Ｄ騎呢


搭番回頭車返車站，去outlet mall,買左一頂帽咁大把，跟住食晚飯啦；揀左“光州苑“
去日本食韓國燒？無計,因為太大雨，而佢喺outlet隔離;入面一個客都無，（其實個outlet都似死城，加埋都無十個客，sales多個客），點左和牛，豬，雞，菜，再加桃雪糕同士多啤利，水準只是一般；食完番歸早Ｄ瞓，聽朝搭7:30am車去長野啦！


對住酒店放喺床嘅紙鶴，希望聽日唔落雨啦


第二日完

長野私の遊 ~ 第一彈!

搭Narita Express順利由成田到濱町東橫，途中於東京站買明天去輕井澤及後天輕井澤去長野之JR車票，於JR售票COUNTER遇肥仔職員，雞同鴨講，但我早有準備，印定需要班車嘅時間，編號，日期，時間同價錢，諗住萬無一失啦！點你肥仔出左多過十張票，仲係錯嘅。。。去輕井澤就啱，但係其餘包括由“東京去長野“，無啦啦由輕井澤返東京，真係開始頂唔順，決定只買去輕井澤車票。

酒店旁有一個公園，有疑似櫻花物體，需然天開始暗，狂影，事後先知跟本唔係櫻花


今日重點係約左網友black lab飯局，mail同blog就覆得多，食飯都係第一次；見仲有一個鐘頭，去左新宿高島屋tokyu hands同HMV；七點到達約會地點，食飯ＬU


餐館梗係比地頭蟲揀，食豆腐料理，枱頭用電腦自己落單，好過癮，呢晚食得好開心


飯後black lab帶我地去用機買JR往長野車票，唔該哂！

跟住返酒店覺覺豬ＬU

第一日完

出發前

今日先講第一日出發時香港趣聞

1/西北好屎
今次幫東怡買機票，買嘅時候知道Ｄ票係團體票，但有得上網劃位；結果，e-ticket到手，但上網劃唔到位，打去西北話呢隻票無得劃，一定要喺機場櫃面現場做；結果，比開機時間早兩個鐘頭二十分到機場，但個後生男地勤話無窗口又無走廊，咁都算啦！
結果去到過關，發現其中一張直頭唔係我地個名，真係，頂。翻轉頭，佢已經知發生咩野事，即改，但又手忙腳亂，跟住話而家有一齊坐嘅窗口位啦；咁叫佢幫我地劃埋回程位啦，開頭又話得，跟住又點你去第二個窗，但二件肥Ｃ奶，一件聽到劃位就話自己去幫隔離，叫另一件做，另一件望都唔望你，check完對住張枱話44J，我地問咩野叫44J呀？佢話之前有人mark左位，你地分開坐架喎,但我話我打電話比你地公司話唔mark得位，嚟到先至mark，咁即係點？改唔改得？我只係要求一齊坐啫，同埋而家已經夠哂鐘，可唔可即刻做呢？佢冷淡地話：咁你地行啦，我有你地資料，會做架啦，不過無窗口囉！我話ＯＫ，即走！

咁西北咁差架，離譜呀！攪到我食早餐都急，無得嘆！

2/帶水入閘
過海關時，聽到有Ｃ奶同另一Ｃ奶講：唔怕嘅，飲剩少少啫，同佢地講帶入去口乾飲就得架啦！
（真係得你個死人頭，但我笑到出聲囉）

3/港男港女
排Burger King,背面傳嚟一把女人聲，好大聲話：唔食呀，我都唔食呢Ｄ嘅
哇！即刻拎轉睇，女嘅年約三十，黑白班馬衫，無腰，嬲爆爆兇緊身旁男士
男嘅奇貌不揚，肥，細眼，曲髮，細細聲拉住班馬話：哩！有ＡＢＣＤＥＦ餐囉！
女大聲：呢Ｄ都唔係早餐嚟嘅
睇到呢度，我笑得好開心，個女嘅見我望住佢，即刻細聲，跟住男嘅排隊喇！但女嘅又唔搵位，繼續企喺度扮大支野。

我想話，小姐，呢度foodcourt嚟架啫，唔啱食咪自己排隔離嗰間囉！企喺度無用架！
而港男最後堅持食包,好野!

佢地去旅行一定“爆“呀!

回來

玩完番嚟！答番自己旅行前嘅問題。。。

想睇櫻花，會唔會有奇蹟呢？。。。>原來奇蹟真係在身邊
馬騮會唔會唔浸溫泉架？。。。>凍到我想跳埋落去，點會唔浸
會唔會落雨呢？。。。>狗屎都落埋
落雪浸溫泉好似好凄美，但落住雨浸又如何？。。。>呢舖真係烏鴉口
成條街都溫泉，會唔會巢皮呢？。。。>會，好巢
今次玩得慳家Ｄ，會唔會超支呢？。。。>初步估計超左千幾蚊㖭
長野好似仲幾凍，著唔著羽絨好呢？。。。>有Ｄ時間真係後悔無著

＊五日行程，四季天氣齊哂
＊勁多小意外，又符符碌碌過關
＊今次又影左1340張相，上次比人話睇相都唔知我去左邊，今次有注意，似番旅行相多Ｄ
＊番到嚟好攰，老了十歲

醒你地嘅

放假都有好野醒你地,日日都聽下啦!

停blog啟事

星期一出發,五日行程。。。東京>輕井澤>長野>東京

想睇櫻花，會唔會有奇蹟呢？
馬騮會唔會唔浸溫泉架？
會唔會落雨呢？
落雪浸溫泉好似好凄美，但落住雨浸又如何？
成條街都溫泉，會唔會巢皮呢？
今次玩得慳家Ｄ，會唔會超支呢？
長野好似仲幾凍，著唔著羽絨好呢？


停blog幾日，番嚟先寫啦！

六隻襪

點解呢六隻襪;全部得一隻？
係唔係有變態佬吼我哂衫撻左我嘅呢？
定係之前著錯左？漏左喺阿媽屋企？

影張相去阿媽屋企剿剿先

繼續日誌

尋晚：
飯局飲飽食醉，多謝黑生嘅手信；
原來兩大杯啤酒已經ＫＯ我，wing下wing下，返屋企即瞓。

10:00am
又話減腩，但日日有飯局，起身都唔肚餓，飲盒脫脂奶當早餐算啦

11:30am
洗牙，撐大個口郁都唔郁，但求快快攪掂，終於真係唔駛二十分鐘；
可以笑啦

12:00noon
到超市買餸準備午餐，洗完牙，唔想出力“趙“，諗起呢個湯，買左$8.4蘑菇，有九粒

12:30pm
煮湯。。。
蘑菇洗一洗，印乾水
菇柄底部界一刀，用手分開菇蓋同菇柄
煲滾水，約一碗半，落哂所有菇
五分鐘後夾起菇蓋，菇柄再煮十五分鐘
菇蓋切片，放番落煲湯度，滾一滾，落鹽調味，攪掂

好清，但菇味濃，啱哂我，咁又一餐


2:00pm
攝影師朋友問如果有個job“可能“去韓國做，得唔得，有咩野唔得吖，(舌累）飯應啦！
不過接得成先算啦！

3:00pm
舊嘅scanner同printer早排壞哂，買部新嘅，兩樣齊哂，都係$499,
拎嚟印日本行程資料，唉唷，好忙呀真係


6:00pm
約左鄰居兼同學落會所打保齡，鬆一鬆


9:00pm
繼續印旅行資料，終於齊哂，行程好豐富咁喎！

最後：
見到日本長野嘅天氣預測都係密雲有雨，太陽之子今舖睇嚟要失手啦：（

完

開心日誌

尋晚:
層樓要交大訂,開左一張從未開過咁大銀碼嘅支票,又驚寸錯,又驚逗號寫錯位,手震....希望賣家唔好反訂

8:30am:
起身同爸媽飲早茶,好嘆

10:00am:
藍十字個網麻鬼煩,情願走去中環旅行社買,咁都攪左半個鐘

11:30am:
約左舊同事圓坊starbucks見面,早到左,坐低飲冰茶睇報紙,好舒服;
其實出嚟傾公事,最後成功傾成,但本來諗住放假放到五月,但個job要五月頭完成,即係旅行後要即開工;咁...都係好事嚟嘅!


2:30pm:
本來想去曬太陽,但陰天,無所事事,見隻貓咁靚,同佢影寫真




4:00pm
上網見到連長野D櫻花都開緊,家姐姐夫今日出發做先頭部隊,等佢覆最新情報,究竟我仲有無得睇櫻花呢?櫻花屎都留番少少好喎!

7:30pm
有飯局,吹吹水,開心呀!

嘉道理農場-廢噏版

嘩！宗澤呀，簽名呀！


呢個路牌唔係比你睇架，叫隻野豬慢駛咋！


警方蛇類交收處。。。真係咁多蛇？懶蛇咋卦？定阿佘咋？


乜都有得睇，呢Ｄ叫糞便，好益智


點為之咬痕，呢度有詳盡解釋


完

減腩呀！嘉道理農場啦！

假期清閑，見好天，去嘉道理農場啦，又可以行山；又可以影下相。
咪以為真係好輕ken，中間嘅生態徑有成千級樓梯，行完生態徑到達1270ft,喘哂氣；繼續上埋觀音山1812ft，夠哂皮！條褲即時鬆哂。


睇下影左Ｄ乜，一定有花啦


有“蕨“，好靚


仲有好多雀，全部都係有意外後送嚟農場飼養，已經失去野外求生能力




好多動物，好似去左動物園


呢兩隻野豬兄弟簡直歎世界，住嘅地方又大又靚，瞓喺度唔駛做，細個可可愛愛，改個得意名崩耳同花鼻，而家變左咁嘅樣


山腰有個世界方向指示牌，抖下氣，睇下下星期出發嘅東京喺邊先


今次最有感覺嘅三張，
左：倒轉張相，感覺唔同哂
中：現場第二回事，影出嚟好似旅行相
右：市區實在嘈，望住個靜字，希望心境平靜


最後呢張係大自然生物科，見一家三口圍住影，埋去睇，阿叔解釋話係有蜜蜂生左Ｄ蛋喺條蝴蝶幼蟲上面，條蟲命不久已；
開頭條蟲吊喺樹枝，搖嚟搖去,focus唔到，放棄，而佢地用大機，張張靚，激死。
後嚟走左影第二樣，小朋友走過嚟話條蟲上左樹枝，影該focus到，試左好耐，終於影到。係今日最艱辛嘅一張！


完