Discovery Channel

春天嚟啦，真係好多蟲呀!


聽日預告：有野估。。。

讓我照顧您

聽日預告：影到D勁野，不過需要家長陪同觀看。。。

金鐘食咖喱

行過金鐘，見到有日式咖喱食，仆入去啦!

點知水準同自己開個速食咖喱包無分別，門面得一個女仔，jump茶上菜收銀執枱一腳踢，無其他waitress咩?有呀，另一件高級肥野坐埋一邊唔做野喎

厨房又係得一丁仔做哂，唉。。。。聽執

九龍全景

接到個廣告job需要一個九龍180度全景，上網搵啦，原來香港全景大部份都係由九龍影過香港，甚少由香港果邊影過去；咁咪膽粗粗自己影囉，頂得住喎！

簡單午餐

一丁友，食晏可以食D乜？

我食嚟食去都係果幾間，其中一間係權發，因為我鍾意飲啖茶。。。

兩點至去食，下午茶時段，超抵呀！好似呢碗時菜牛肉河，只賣$12；請留意，雖然話係碗，但同隔離隻正常酒樓碗一拼，你就知其實係一個細窩


剩食一碗又略嫌單寡，嗌多籠山竹牛肉，飽哂


唔食牛？難D。。。

環保。。。

近年環保組織經常提倡食少D牛肉救救地球，話原來飼養牛隻過程中，牛放嘅屁，每年會釋出四噸二氧化碳喎。。。。

但又唔係剩係牛會放屁，你夠放咯!

咁大家都支持環保，唔好放屁啦!（呢個偉論應該可以攞奧斯卡，呀唔係，諾貝爾至啱）

你是誰？

咦！咩野嚟㗎呢？唔通又係外星人？又想嚟侵襲藍星？駛唔駛變身轟轟戰隊呢？


摩星嶺發現，有眼有長鼻，究竟係乜？

如果中六合彩

前言：呢期金多寶咁勁，中左真係可以un un腳，寫呢篇嘅時候仲未攪珠，發下白日夢氹自己開心。。。

中左咁多錢，開心到唔知點算，話唔話比人聽好呢？會唔會有人嚟“喉”我D錢呢？點用好呢？

將獎金分十份，

一份做善事捐左佢，邊個機構好呢？

一份比父母，一份比家姐細佬

半份拎嚟幫朋友

半份請哂一班朋友一齊去旅行同食餐勁嘅（諗起都興奮）

兩份拎嚟開舖，賣自己嘅設計（中左六合彩反而發展事業，幾神奇）

剩番四份留嚟投資＋同另一半養老用

另外，會即刻放假，休息一年；呀!我仲想買多層樓，執下個樣，買鏡頭，買iphone（咦！呢樣其實唔駛等中六合彩）

其實係咪個個人都會發過呢D白日夢？都會諗定D錢點用？中幾多至夠用一世？中幾多就退休？你有無？


後語：請過隔離睇埋ogake同www，今日係三台聯播，勁呀!

Te

最鍾意食意粉，香港餐廳煮嘅成日都淋patpat，呢間話係日本過嚟架喎，開喺isquare，即試啦。。。

購票形式，全店白白淨，無姓鄭；意粉本身好食，但我揀嘅香草實在太素，無乜味


幾日後，約左客食飯，佢竟然又係揀返Te，一入去見到林一峰，個樣似食完好耐，坐喺度聽歌飲野；今次我揀左mushroom+cream+bacon,好味好多～

華富邨三不思議事件

一。八字波

草地出現巨型圖騰，外星人襲華富邨？呢個圖案解作八字波定係無限大？定係無限大嘅八字波呢？真係一個謎！


咦！原來海面都出現同樣圖案，好玄!


二。滿天神佛

海旁放滿福祿壽觀音釋迦牟尼關公多仔佛，對住個海；點解會有咁多？


呢堆仲放到出海，咩野人放架呢？真係一個謎！


三。恐龍襲地球

Over, Over～好大隻紅色恐龍出現南區海旁，一定係想侵略地球，梅比斯，快D嚟拯救南居嘅居民呀！點解恐龍咁多地方唔揀揀南區，咪又係一個謎囉！


有無人解得開呢三個～～謎？

大澳回憶錄﹣賭錢賭斷腳

打牌通常突腳，多數無我份，但十三張呢，我就實參與，因為我第一樣學識嘅啤牌game就係十三張，阿爺教嘅！

而朋友S最鍾意做莊，差唔多次次佢都有斬獲；但呢次。。。

我份人一向帶點邪，順時嚇死人，當然唔順時直頭死人；我5舖牌報到左二舖，加一舖四條，一舖同花順，佢嬲到唔玩，自此打斷腳，無人同我玩十三張，

同樣事件，最近scrabble都出現。。。

拆利是

咦！有D窮㖭，點好呢？呀!我未拆利是

廿九封，對無工返無同事嘅我，已經算多啦


呢個利是封好靚呀!


幾十歲仲有利是𢭃，真係有D面矇


完

買六合彩

我買六合彩。。。。

1. 無金多寶，總係覺得中左都好似唔夠使，唔買

2. 排隊鍾意排4同7號窗

3. 窗口除左揀number,都會睇賣飛個阿姐個樣醒唔醒目

4. 如果前面慢吞吞／買極唔完／插隊，會諗覺得無運行，實唔中啦今次

5. 賣飛阿姐加句”贏多D“，聽落真係開心D

6. 以前MAC機上唔到馬會網站投注，而家係咪依舊？

7. 每次都買電腦七個字複式，真係好貪心

8. 試過同阿姐講電腦七個字，佢比錯電腦六個字，照買，因為。。。“唔通整定頭獎係我嘅？唔買一陣果張中，咁咪衰哂”

9. 覺得自己總會中一次頭獎

10. 成日諗“中左D錢點用好呢？”

11. 每次都好似今晚咁。。。又唔中


以上十一項，你唔中哂都中一半啩？

我的工作網站

重新整理自已歷年工作上嘅作品，勾番起好多回憶。。。

有空過去睇睇，比下意見。。。我的工作網站


ps:多謝朋友幫忙，如果唔係，我整半年都整唔起

一個貓痴的故事

上星期提過一個貓痴，佢隻貓有病(消渴症），佢要每小時餵佢飲水一次，即係瞓落床，一瞓著鬧鐘響又起身，我鬧佢痴鬼線

以前，我，我家姐，佢D朋友去日本旅行，都會幫佢買某牌子貓糧嘅某一隻味，買錯左，佢隻貓係唔食嘅

又試過，佢一定要用某一隻牌子嘅貓沙；一次，貓沙缺貨，換左第二隻品牌，佢話唔去就唔去，攪到貓痴通樹撲貓沙，結果撲入元朗先買到包細嘅，一放落佢個厠所，佢即刻標入嚟，貓痴形容為山洪暴發。。。

噚日同家姐細佬口中得知最新情況，話消渴症已經攪掂，唔駛逐個鐘餵水，但因為佢隻貓已老，又神經質(我話真頭係神經），夜晚唔瞓，貓痴一瞓，佢就起勢meow佢，但佢又聾，meow得好大聲，結果比鄰居投訴，而家貓痴每晚要5:00am至7:00am等隻貓瞓，佢先有得瞓。。。

我同家姐講：係佢先做到，痴線架!

家姐話：咁你要代入同佢諗，佢當佢係屋企人，屋企人有事，點會唔幫

我望住我家姐同細佬：咁我賴屎你係咪幫我執呀？

佢兩個：。。。。。。

而當時我地食緊自助餐，一個食緊咖喱， 一個食緊朱古力蛋糕

撥著大霧默默地在覓我的去路

夜晚過尖咀，見咁大霧，梗係搭小輪睇下咩環境啦。。。
D霧吹到入碼頭，望過對面海，真頭黑鬼掹掹；廣播不停話，船期會疏D，隻船又慢D
揀船頭坐，一開船，環境係咁嘅，對面suppose係尖咀嚟架


啱啱離開碼頭，影返港島係咁嘅


搭左一半，有船經過，對面得番K11


上層職員全程企喺船頭，一見有船，佢就大嗌：左邊有船呀!哇，咁原始嘅！不過，廿尺對外嘅海面真係黑色架!


安全到埗，望返過港島，清楚好多，但睇海面層霧，我地就係入左入面呀!驚呀


回程再搭，又係呢個阿叔喺度嗌，今次仲驚。。。
佢嗌：右邊呀，呢個八號碼頭嚟架

真係奇總旅程，奇異經歷，但而家呼吸心口囈住，關唔關事呢？

A single man

想睇，就抽到飛，勁開心!


＊戲好睇，拍得好靚，粗微粒，close up，慢鏡，簡單color tone,每個鏡頭都可以獨立欣賞
＊主角副眼鏡好正，好想買一副
＊著住白恤衫黑呔踎塔好型，一陣出去買番件恤衫先
＊成套戲好花樣年華，不過一個屬於夜晚，呢套屬於日頭
＊Julianne Moore隻手D雀班真係多如恆星.雀班與正常皮膚比例去到4:6，蔚為奇觀，值得買飛入場
＊sound track要買，開工聽一流
＊中段有悶場，前一行左方傳來強勁鼻鼾聲，笑爆
＊曹敏莉坐我前一行左方，好靚女
＊套戲一完，曹小姐與男伴第一時間走，點知去錯出口，開唔到門，有D𤓓
＊睇完single man,品味都升高(好爛）

呢套我比8分架

霧地異煞

號外


今日原本有太陽，

但下晝開始霧越嚟越濃，

吞食左環球貿易廣場，

喺高層工作嘅人慌忙逃生，

梗係啦，喺度返工好易風濕㗎！



好應景。。。煙霧彌漫

舊老闆請食飯

舊同事北京返嚟，舊老闆決定煮屋企飯嚟招呼佢，咁梗係有我份啦!

7:00pm去到賽西湖，即開餐；有魚有翅有蝦有菜有臘味有紅酒，好豐富，我其實唔好翅架，真心覺得碗仔翅好味D，但乜都唔食又太失禮啦！


飯後甜品仲精彩，朱古力餐，一路睇秋香一路掃，今次肥仔啦!

我的快獸

我其實有5隻快獸，彩色兩隻係一樣嘅，另外兩隻出得比較少；下次旅行帶邊隻好呢？


由第一次貪得意帶佢去倫敦巴黎，影番嚟嘅相除左寫blog外，全家都中意，結果平日出街都帶住佢，去親旅行佢又有份，睇番舊相。。。

原來佢已經去過倫敦巴黎東京長野北京曼谷高雄墾丁，就嚟夠出相集。

GF1 下的阿仔阿妹

餵貓果幾日部GF-1比姐夫借左，食完5/F，上去玩貓兼影相

阿仔今日表現好呀，睇下呢5張，識望鏡頭，超靚仔










阿妹見到老豆，今次又唔理我。。。剩係掛住喪玩鞋帶同瞓住我個袋










-------------
噚晚同愛貓舊同事兼係我姐夫個妹食飯，佢愛貓程度去到咁。。。。
佢隻貓已經16歲，後生時已經癲癲地，老左耳仔“龍”左，而家就仲衰，有精神衰弱，腸胃病；要每個鐘頭餵佢飲一次水，即係話，夜晚佢會較鬧鐘每小時起身一次，OMG

佢以前隻貓又係咁，只肯食某日本先買到嘅貓糧，我去親旅行，半個喼就比左佢。。。

入正題，佢噚日睇完阿仔阿妹嘅相，話阿妹係英國短毛貓嚟架，不過可能混左種囉

另外，佢話佢鍾意喺人個肚行嚟行去，係細貓嘅天性，佢地想按摩阿媽個乳房搵奶食咋喎（咁大劑？）
完

再會了，快獸

一日，快獸見到阿妹


玩得好開心，仲玩騎貓㖭


點知。。。


再會了，快獸

多謝Artman

星期日晚有人請食飯，食5樓；幫下手餵貓啫，咁重手嘅。。。


我食左個3 Courses，D名水蛇春咁長，個黑豬真係好好味呀!
Warm mixed organic mushroom and portobello with garden green salad, balsamic vinaigrette
Grilled U.S. Kurobuta Porkloin (Six Point Farm) with Beans and rosemary sauce
Lemon tart with green tea gelato and sour cream sauce



麵包係得嘅，又比人考用咩粉，一食就知啦，美國粉呀!
Alan問：會唔會係用意大利粉(真係好爛）


Artman都係3 Courses，Alan食Tasting Menu（有6個Courses）


其間講左個笑話，tasting menu即係任由厨師發板啦，咁佢會問你有乜係唔食架？

如果係我，可能寫到10:00pm都未寫完，呵呵!

多謝Artman！（幾咁首尾呼氣呀）