芝蔴霜

行經紅磡，見到呢個廣告；比佢吸引住，食左芝蔴霜會有乜功效呢？比15秒你認真諗下。。。（答案喺下面，唔好偷睇）

。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
芝蔴面


有無人答中呢？hehe

北海道牧場餐廳

星期六，比天文台呃，冒住黃雨入左坪洲影相，總算儍有儍福，而家睇緊D相，影到幾張都幾鍾意嘅

夜晚，出番中環，搵野咬，去左呢間。。。北海道牧場餐廳；（記者快獸休息，今日由佢個friend小飛俠介紹）


嚟過一次，知佢出名係蛋治同义燒飯，上次食左蛋治，超巨型；今次我揀义燒飯；讚嘅係义燒夠瘦，燒汁好味，彈嘅係汁真係太多，义燒都太多，變左太咸，下次記得要少汁；朋友嘅义燒通粉＋火腿蛋，佢話好味喎，個蛋用左北海道牛乳炒，好滑；

最令人感動係價錢，中環區，裝修唔錯，坐得舒舒服服，只係三十幾蚊一個餐，味道唔錯食到你飽突，又要珍惜呀～

預告：坪洲相集，等多一兩日

淫審要做野 續集

兒童遊樂場入面，竟然有大咸濕？你見到邊度咸濕嗎？



睇下，係咪離譜先？唔通設計師係丹波哲郎?


完

淫審要做野啦

長洲竟然有個超巨型嘅。。。。該煨囉；淫審，淫審，快D除。。，呀唔係，係拆左佢啦!

珍惜

每次有大新聞發生，都會有聲音提醒：要珍惜眼前人；今次，真係刮醒自己咩野叫珍惜

家人要珍惜，愛情要珍惜，友情要珍惜，食要珍惜，屙要珍惜，瞓覺要珍惜，健康要珍惜，行得走得要珍惜，好天要珍惜，落雨都要珍惜，頭髮要珍惜，地球資源要珍惜，有工返要珍惜，放假要珍惜，有波打要珍惜，有牌打要珍惜，行街影相要珍惜，個blog有人睇要珍惜，乜都要珍惜，唔係就真sick,俞琤你識唔識？

圖片同呢篇無關，不過無幾可成篇都係我嘅相，所以都要珍惜

西九海濱長廊

呢輯相係上兩個星期影落嘅倉底，見前幾日變左熱門話題，趁機推出啦!


又係一處位於市區，多人談論但無乜人去嘅地方；

1/入口近圓方，由入口行去海邊要十五分鐘，無野睇，悶呀
2/呢舊高達物體而家lay左喺地底，有怪獸先出動
3/終於行到大草地，好空曠（即係乜都無）
4/呢個就係太空基地，佢指揮高達出發架
5/最靚係呢度，真係盡覽180度維港景


無野做又無野影，做乜好呢？見有韆鞦，即刻玩下先，十幾廿年無玩過，原來好攰，係帶氧運動嚟架
跟住再無聊D，扮寶礦力廣告


果日就係影得咁多，得快獸張叫做特別D咋；唉!


最後，想講。。。長廊兩邊戙左D畫呀字呀，咁就叫藝術架啦？呢張，字又唔靚，青瓜就話去囊啫，藝術都去廊，點去呢？

。。。。/老豆講嘅故事

今日全香港嘅話題無可避免全部講菲律賓，落街護衛講緊，飲茶枱枱都講緊，想唔聽唔諗都避無可避。。。

網上當然勁鬧，噚日已經見你地盾又唔夠，鏈都無條，個特種部隊仲肥（論盡）過我，都算啦；
但見到呢張相真係即滾，
阿叔，你做乜呢？
你枝槍呢？拎左去賣呀？


今日嘅新聞開始講每個死者嘅身份，背景；真係越睇越心噏；
﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
老豆講嘅故事

今晚全家人食飯，老豆講番一個兩年前佢去菲律賓打籃球比賽嘅舊事，佢話成班人離境時，比海關搜查，海關問佢後袋脹起嘅係乜，我老豆攞出嚟，係一叠大紙(銀紙），個海關竟然公然話：tips；老豆唔肯比，拉我阿媽走，又走到喎。。。

即係咁，我想講嘅係，海關都咁，警察咁嘅水準，有乜奇吖！

講完


﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
本來噚晚知道超級星光大道 閻奕格勝出冠軍應該興奮，上次去台灣第一次聽佢唱已經喜歡，但都變左無哂反應

最後總決賽竟然揀唱廣東歌﹣李香蘭，超大膽。。。

聽下歌啦。。。。4:45先開始唱

現場直播

真係全世界都有病。。。

呢D咁嘅現場直播希望永遠唔好再發生，睇到心臟病，恐佈

。。。。安息

川龍飲茶

兩年前去過，當時係好友老狗揸車去，今次荃灣搭小巴去，去到行左去小巴站旁嘅彩龍，搵唔到端記，飲住先，點知芝麻卷無味，蝦餃雪蝦實在太死，燒賣OK啦，义燒包D义燒要用放大鏡，個皮好旱，麵粉好差；飲完


咁，點算好呢，附近又無乜野行，行去搵端記啦!妖!行低兩步就係啦，結果，再飲過（估我唔到呢）

騎樓掛哂鳥籠，好懷舊呀!茶自已沖，點心自己攞，好玩!
水仙香，雞紮正，鵪鶉蛋燒賣夠懷舊，新界油菜雖然有小小渣，但好味喎～


食飽行個圈影下相


發現呢條毛蟲，超大條，我放隻腳埋去度比例，係咪勁先！

無聊123。。。

阿sammi明明只係飲左7秒（youtube條bar有時間證明），但畫面顯示佢飲左15秒，欺騙消費者呀下




搭巴士，又撞到妹妹，請佢飲茶


知唔知我扮邊個呢？


無聊完

日出茶太

今年夏天，台式奶茶大殺四方，表表姐就梗係貢茶，越開越多，間間企滿人

表表妹呢，就係分店都算多嘅嘅日出茶太，但我今日唔係論茶喎。。。

總係覺得佢個名有問題，又難記；乜解呢？好似未完成咁嘅？


今日終於諗到，咁咪完整囉


完

第一屆金紫荊小姐選舉

香港咁多名勝之中，我諗最多香港人無去過嘅應該都係佢？你有無去過？我就係未去過，諗住黃昏應該會少D人，去馬!

我第一次嚟，現場所見，除左維港景，其實真係得舊金紫荊，同大班遊客，無乜好影


金紫荊影左幾張就收手，吸引我嘅反而係企埋金紫荊嘅遊客，更具特式；大家輪住企埋去到此一遊；個個都咁強，各有千秋，我就睇到眼花撩亂啦。。。

所以為左宣傳金紫荊廣場，令更多人認識呢個地方，特地舉行“第一屆金紫荊小姐選舉”


一號嬌，二號俏，三號呱呱叫；四號丁字腳，五六twins，七號女版吳剛，仲有八號，帶埋老公定老豆嚟拉票

係咪正先？

怕醜草

有無玩過呀？我細個成日玩，印象中好多時都見到，一見佢就掃，一掃佢就縮，幾分鐘後又慢慢開番，跟住我又再掃，樂此不疲。。。

而家，行山都好少見，花墟反而有得賣，$20細細棵呀；遲D係唔係怕醜草都要保育呢？


後記：我比人叻係唔怕黑，但係我都怕。。。醜架～

白泥*塵世美﹣下

前言：自從用GF1後，有好處亦有壞處；
好處，因為佢太聰明，當你同佢熟絡後，佢好似知你諗乜，你亂影都會有見得人嘅相
壞處呢，比佢寵慣，用佢場景效果，越嚟越懶，構圖上懶用心思

今次，相機無電，馬死落地行，用部nokia影，當時同自己講，係唔係咁就影唔到先？

結果，好戲永遠都係在後頭


左邊係雀鳥腳印，右邊係個爛魚網；放大睇其實好多noise，但氣氛同構圖我滿意喎


左邊係樹枝，右邊係等日落嘅攝友，為左影陽光喺水嘅倒影，差D將個電話貼落水


沙灘上有個5，真係give me five,右邊靚在天嘅藍色


呢張，第二至愛，刻意將地平線𠝹開兩半，將電話放到最低，竹枝形成放射線，加埋一對男女印賞夕陽，我覺得似書籤


今日至愛，我諗如果唔講，會唔會知係香港？


大家有時間去行個圈啦～

白泥*塵世美﹣上

上次講到速遊完南生圍，時間尚早，先至一點；決定去元朗食個飯，跟住去白泥繼續影


搭小巴話咁快就去到白泥總站，跟住亂行咁向前行，影呀影呀；但係行極都唔似樣喎，無泥嘅！問人先知行錯路呀


但儍人係有儍福嘅，因為行錯路，見到幾個靚景；第一係第一張嘅藍色棚屋，第二係呢個靚湖呀，D湖水藍藍綠綠，有D九寨溝feel呀


第三呢，見到彩虹喎，雖然係人為嘅，但都好興奮呀


第四，呢隻係乜嘅殼呢？好靚喎


行番出小巴站，去士多飲涼茶兼問路，原來行相反方向五分鐘就到；又覺得好彩喎，唔係行錯嘅，邊拖到近黃昏時間呢？
終於到，金光閃閃令人迷，景真係一流，影到唔停手


影到呢一張，最大嘅意外發生啦...



相機"doo“一聲，無電，SHIT;今日因為係即興嚟影相，無帶後備電；magic hour先嚟無電，點算？冷靜幾秒後，我決定用電話繼續。。。

點去白泥。。。。元朗搭專線小巴33號 ,泰豐街總站，直達上、下白泥

下集預告：magic hour相集(電話version)

CC便利店

呢個名改得好，連細路都識讀，又易記


睇下，百事班友同eason都撐佢呀。。。


史撈梗：“便”便唔順“利”，去”CC“，即刻“掂”。

核突

搭巴士將隻腳放上對面張櫈已經唔啱，放上對面個男人度就直頭核突，而家D人，真係唔知醜架咩？靚就話啫，成隻金華咁，唉!

個男人又咁都肯受，更唉!

豆娘

上星期，提過有一隻蜻蜓飛嚟我屋企。。。

今日清理魚缸時，見到有個透明殼；上網摷資料，先知道原來翅膀合埋嘅其實係豆娘，幼蟲需要脫殼先可以變豆娘架!

但係幼蟲係居住於河流架喎，點解會嚟左我屋企呢？我都叫住好高架喎？真係一個謎。。。

15分鐘速遊南生圍

1000話隆重巨獻。。。。版面大改革，變左鳴門日報呀～～


15分鐘速遊南生圍

點解要速遊？睇落去就知


一早見好天，走嚟南生圍影相；未嚟過，上網搵料，決定去元朗西鐵站，行廿分鐘搭街渡。。。
街渡每程$5，兩分鐘就過左對面；出發明明好天，但南生圍嘅天空比一舊疑似貢茶奶蓋嘅黑雲冚住，算點呀？


一上岸已經見到好多野狗，但諗住你唔攪佢，佢應該都唔攪你；行左五分鐘，見到有棵樹生滿白點，原來又係上次濕地公園見到果隻蟬嘅幼蟲，今次長大左，面目更猙獰；仲有木瓜同茄子，食就食得多，花你見過未？


突然，3隻惡狗走過嚟，對住我係咁吠，露哂尖牙；因為好多年前都遇過呢個情况，所以我一邊大聲喝住佢地，一邊對住佢地向後慢行，同埋我已經隨時將我部GF1當武器，佢一撲埋嚟，一定要打中佢個鼻；
好在有個村民啱啱路過，幫我引開佢地，跟住見另外一個村民餵左D麵包比佢地，就再無理我。

但仲敢喺度咩，梗係走人啦；事後睇番，就係得咁多相啦!呢個地方咁多野狗，唔好叫“南生圍”，叫“比狗圍”啦!


過番河，奶蓋散左，同快獸影下寫真；但咁早玩完，點好呢？同朋友相量，決定去下一站，既然南生圍差唔多白嚟，就去白泥啦!


to be continued...

精選香港遊推介：
隱灘﹣烏溪沙海星灣
塔門。。。尋找香港絕世美景
飛機維修區
白泥﹣滿腳泥濘的攝影旅程
白泥相簿﹣滿腳泥濘的攝影旅程
鹽田梓半day遊
鹽田梓-番外篇
暴風女神。。。汀九麗都灣
香港十大靚景。。。河背浮島
河背。水塘美景靈氣遊
橋咀島遇險全紀錄
橋咀島﹣相簿
米埔＊遊
米埔＊遊。。。相簿
流水響。。。乾塘
獅子會自然教育中心
獅子會自然教育中心-相簿（愛藏版）
寧靜漁村﹣三門仔／陰陽路﹣馬屎洲
牛の近距離接觸
大埔汀角遊
大埔汀角遊下集のF檔案
東平洲生態一日遊
東平洲相簿
香港仔水塘
道風山遊記
馬坑公園。廢談
我在堆填區的日子