媽媽入院了

星期一早上落細雨，媽媽如常落西邊街食早餐，跣低跌倒，好心路人幫手叫救傷車及通知老豆，送進了瑪麗。。。 

到左急症室，安排住院，老豆才通知我，話阿媽跌斷腳，叫我一放得低手頭工作就上去；

上到去，見阿媽精神不錯，腳以外無跌傷其他部位；醫生亦比左個初部評估，骨近腳眼位置斷了，要鑲鏍絲，叻女嘅話住院一週，再慢慢學行路，最快嘅兩三個月康復，先安排星期二朝做手術，手術約一粒鐘。。。 

星期二約11:30，阿媽告知仲未做手術，只叫佢等；我12:00到，都係等，到1:00過左探病時間都未到。。。

姑娘告知手術室上一個病人手術做耐左，唯有等。。。 

夜晚6:00再去，知道阿媽2:30推入手術室，但6:00都未做完，老豆緊張，猛話乜手術要做三粒鐘呀，其實我都緊張啦，不過同佢講，可能推入去唔係即做架嘛，佢似乎又定返D。。。 

到6:30，終於推出返嚟，麻醉藥未過，識講好攰好凍，加左被比佢，諗住等醫生講返手術情況，原來醫生放工兼走左，但講低左明天會比電話講解。。。

 ﹣﹣﹣﹣﹣﹣﹣﹣﹣﹣﹣

想講呢，知道阿媽跌親，個人真係亂哂（雖然老豆已告知無大礙），手頭上有份急稿一定要清埋，用一粒鐘急急清時，又接通知話阿媽竟然無帶身份證，要我去佢屋企攞，但又搵極搵唔到，急到標哂冷汗，去到醫院時，全身濕透，額頭超凍，接住就頭痛啦，好彩食左必理痛襟得到。 

從今次事件得知，平時幾冷靜幾咁有安排，一去到屋企人有事，都係變得亂糟糟，次序錯哂，乜都做漏

遲左8個月的訊息

早兩日，坐喺餐廳好得閒，見facebook隔離果欄訊息寫住有5個訊息未睇，覺得奇怪，因為喺電腦開無話我有訊息未睇未睇架喎。。。

一開之下發現，原來曾經中過戲飛我唔知，嗚嗚，遲開左8個月呀個訊息

大澳。發現

去大澳除左食食食，當然會行個圈影下相；仲有乜野發現呢

發現（1）。。。劉江華張競選海報仲未搣，攞景定贈慶呢？（我見到海報突然好開心喎，呵呵）



























發現（2）。。。今次蝦醬舖好多人，原來係本地街坊旅行團；
聽聞香港因捕蝦問題就嚟無得做蝦醬，個個都嚟趁墟  
發現（3）。。。蜥蜴四腳蛇，同佢影張close up  

發現（4）。。。大螳螂，咪走呀，影張靚相先啦  

發現（5）。。。怪魚；瘦瘦長長，知佢個名話聲我聽，唔該～  

發現（6）。。。倒立怪人，無啦啦喺“少林寺”個假草皮教亞洲女子倒立，唔通佢係少林方仗？


 發現（7）。。。靚黃昏

 完

大澳怒食

又入大澳？係呀，有朋友好耐無去，咁咪做下導遊囉

今次主要係食食食啦～ 都係食果D啦，睇下有乜？

第一樣其實係食超好食嘅沙翁，餓得滯無影相

雪糕豆腐花。。。食完沙翁行幾間舖見有豆腐花食，即食，味道一般啦，無特別驚喜，但有露台茶座睇棚屋景，坐得好舒服
 
糯米糍。。。豆腐花舖出嚟，繼續行吉慶街，有檔糯米糍，呢個好得，真係好得；好軟，帶香蕉味，又多樣食物下次嚟要encore  
炭爐雞蛋仔。。。嚟咁多次都未食過；今次見無人排隊喎；即刻飛奔埋去，點知原來唔止無客，連整餅老闆都唔見，但炭爐開住架喎，頼C唔走

終於老闆出嚟，即刻有人排呀，但我排第一，呵呵呵

食就幾好食，但其實都唔算好特別咋喎  
冰菠蘿。。。好，食完雞蛋仔，下一站茶粿；點知去到阿伯話：唔好排啦，乜都賣哂啦；吓？兩點幾咋喎～ 轉戰冰菠蘿，對面就係，一腔食唔到茶粿嘅怒火靠哂佢降溫啦  
煨魷魚。。。我老豆而家同阿媽間中得閒就入大澳，為嘅係煨魷魚瀨尿蝦同埋有燒扇貝喎

煨魷魚$10兩隻，真係好香口；同行友人甚至將佢列為當日美食榜首

隱姑茶粿。。。影下相行下行下，好快到黃昏，途經隱姑茶粿；都食個補數啦，今次又OK喎，以前試過唔得架真係  

﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣

 好，我食完，到佢地食。。。

 鷺：呢檔魚味豆腐花好新鮮


鷺：呢舊茶粿好有口感

鷺：呢舊雞蛋仔好香呀，排隊都抵呀

鷺：呢舊冰菠蘿好甜呀  

預告：廢話完，但大澳未完

派樂圓屎忽特約﹣本週廢話

星期二晚係family day,會一家人喺老豆阿媽屋企食晚飯

食飯時。。。

細佬：我終於睇哂“推理要在晚餐後”，而家追緊”搖滾大厨“ 

我：“推理要在晚餐後”做完好耐架啦喎

細佬：無時間睇嘛

飯後。。。

細佬離開飯枱，我大力推佢一野

細佬：做乜推我呀？

我：推“你”要在晚餐後



完

希望號

綠色和平希望號嚟左香港，喺過去週末週日及週二公眾假期，喺西環攪左個展覽兼上船參觀，但果三日我都唔喺西環㖭  
今日見佢隻船仲泊喺度，博哂懵行去招商局碼頭，問佢仲有無得參觀；
原來今日係招待團體，比我菠蘿雞跟埋上船參觀
碼頭旁有圖片展覽。。。  

上船睇，有快艇，直升機，衛星都有。。。  

仲有得入駕駛室，船長親自出嚟講解  

宣傳小冊子，講左五類應該避免或減少食用嘅海洋生物，我就一向都少食；但你做唔做得到？







地球已經有病，但香港卻似乎越嚟越離譜

二百歲嘅魚食完一條又一條，仲話好受歡迎

早兩年，投日本一返嚟，排住隊去食

個泥灘明明D水唔適合游水，我地嘅政府企硬要起個沙灘；
一個游唔到水嘅沙灘，起嚟做乜呢？
你話同商家無掛勾，我打死都唔信囉～

我真心相信，大家每人行一步，唔好咁自私，地球，海洋已經會好好多

大X樂的兩公婆

去大X樂食野，真係好有娛樂性，劇情仲寫實過“愛回家”，聽到見到嘅又比查小欣吸引；有得食又有戲睇，真係抵食呀～

今次嘅見聞係發生喺星期二重陽節嘅假期夜晚

我同朋友食扒餐，隔離枱坐左一對年約五十幾嘅兩公婆（應該都係夫妻啦，唔係點頂到）；

當時佢地枱有一個火鍋，一份火鍋食物，而大X樂阿姐正幫佢tart爐

聽到個女人叫個阿姐移過D tart，令我開始注意佢地講乜

女（拎住張類似點心紙）：叫多個肥牛，金錢𦟌，叫多個菜啦，$5咋嘛～
個男嘅就出去買啦；返來時，已攞住果三樣餸

女（責駡語氣）：咁貴架？唔係半價咩？

男：今日假期呀，唔係平日呀

女：咁你唔好買吖嘛，做少少野都唔識，唔要呀

男：你想食吖嘛，買左邊有得唔要架~

女（挑骨頭）：呢碟肥牛肥成咁，點食呀？咁你都要呀？你唔退，我去退，張單呢？

男：張單收左架啦

個女嘅攞住碟肥牛出左去

返嚟時話：呢碟好幾多，無得退喎

男：換就得，退返錢唔得呀

女：你做就乜都唔得，我就乜都得，而家有乜係唔得架！

﹣﹣﹣﹣﹣﹣﹣﹣﹣﹣﹣﹣﹣
見佢地開始食啦，個女嘅又發聲啦。。。

女：你今日都好醒目呀，D豉油落哂辣椒

男：。。。。

女：我同你講過我喉嚨痛呀，點食呀？同我拎過碟啦

男嘅起身做野時，佢又話：呀，都係唔使，比個碗仔我得啦

到真係開始食時，佢又話：個爐都唔猛嘅？
﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
故事完了

但想講兩個位。。。

1/真係有樣睇架，眉頭一路都皺住，苦令紋好深，嘴藐藐咁，一睇就知係好野呀

2/另外，又發現，原來左右同前面三張枱都係二至三人share一個爐，再加料架喎，一定係咁樣平D嘅，因為呢D位，師奶係無死錯人嘅

度小月滷肉燥

度小月嘅肉燥飯／麵，每次去台北都要食
原來兩年無去台灣啦，前排美食博覽，做完野行個圈見到佢。。。罐裝嘅度小月滷肉燥，買左幾罐返屋企


今晚，無飯局，摷下屋企有乜食時，決定今晚食肉燥飯

一開罐，好多“琼”左嘅肥油，拎去蒸蒸先食，淋上白飯面，好香好好食，係咸左D，送飯真係一流；

不過食完唔知又要跑幾耐先至唔使變肥仔啦

咪睇佢細細罐喎，因為好送飯，一個人係食唔哂架，除非你食三碗飯啦～

異形爆倉

當然係唔使錢啦，我最驚睇鬼片嘅（但呢套唔係鬼片嚟架），核突片我都驚架喎，但見免費頂硬上啦

 好彩，唔驚又唔核突（係咪好倒米呀）

故事大概。。。一對情侶分手，第三者同好友齊齊喺迷你倉執野，遇著外星怪獸撞機，異形入左迷你倉（又話全倉無出口，咁佢邊樹入嚟架呢？），展開困獸鬥大屠殺

齋睇故事大概都知厲害啦，咁都諗到

最神最神嘅係靚女果個（左一）唔係女主角，醜果個（左二）先係，醜果個仲要一腳踏兩船，好無說服力呀

同埋呢類戲成日都會有類似嘅犯駁位。。。朋友比怪獸殺左，只會嗌幾野，喊兩野，下一分鐘已經當無事，無事到可以去到咁。。。

最後一幕，生還嘅演員由個倉出返嚟，唔係報警，唔係通知屋企人或死去朋友屋企人，唔係通知報館爆獨家料；

而係。。。 女演員話：你去邊呀？我車埋你啦
男演員：唔使啦，我想行路

呢個世代D人好冷漠喔～

另一個經常見到超犯駁位，隻怪獸大炮都殺唔到佢，最後殺著會係乜呢？有乜好橋呢？好想知架嘛

點知係求其搵枝鐵就插死佢。。。。囉，咁其實使乜咁怕佢呢？

不過，呢套戲優點都真係有嘅。。。真係唔驚架，可放心欣賞，放心搵穿崩位，犯駁位囉：） 完

初吻奶茶

樓下間小食店個menu。。。初吻奶茶，乜解呢？ 
1／甜到漏？
2／好清純？即係少糖少奶少冰？
3／老闆娘個女親自送上奶茶兼送上初吻？
4／老闆娘親自送上奶茶兼送上當日嘅初吻？
5／其他（你諗到乜？）

我決定搵日去挑戰呢杯。。。初吻奶茶

本週廢相﹣開心蛋蛋？

幼稚園門口嘅牆畫，開心旦旦？乜解？定係簡體嚟？開心蛋蛋？咁似講衰野嘅？

阿媽的新寶貝

阿媽養龜，養魚，大量盆栽，最近愛上呢樣。。。黃金螺

之前我都養過，佢地嘅作用都係食下青苔垃圾，但其實有食哂D水草；

但最後都係香哂，始終同魚養埋一齊，終有一日比魚食左，因為間中佢地要換縠

睇下阿媽呢堆。。。佢養到幫D螺生左幾批BB；

呢堆夠唔夠壯觀？


唔夠壯觀？ 咁呢張呢？暈未？最暈係佢地仲繼續生緊。。。

重播

先睇左兩個廣告先




同一個女model，都係扮壽星女，做同一個表情，鏡頭位都差唔多，同一個導演架？

老豆食大閘蟹

阿爸阿媽每個星期鍾意嚟一次西環搵我食飯，次次都係去權發，老豆鍾意食海鮮，我喺我可以食嘅範疇內盡量應酬下啦。。。 
蒸聖子，鮑魚仔，灼海蝦，椒鹽瀨尿蝦呢四樣係我食到嘅，蒸聖子直頭好味呀～  
入正題。。。 上星期五晚，我同阿媽先到權發，我見到門口有張大閘蟹海報，每隻$38，我話：老豆實叫啦，咁抵食。。。

阿媽：唔會啦，屋企浸左兩隻（酒浸）都未食呀。。。 

老豆到，開口就話：$38一隻咋喎，叫兩隻嚟食囉

 媽：屋企仲有兩隻喎

老豆：果D生，呢D熟，唔同食法

 結果叫左兩隻，仲自己出去揀蟹㖭

蟹到；老豆拆嚟食：哇！好多膏呀／哇！靚到吖／哇！公司果頭四十幾蚊都無咁靚／哇！好耐無食咁靚啦。。。係咁哇～

期間，老闆嚟傾計，我問佢，海報寫住堂食$38，外賣$48，外賣係生定熟架？

老闆：生熟都要＄48，因為當招徠，益街坊；一至五就賣$38咋，星期六日就賣$48

老闆走後，老豆繼續自言自語：好正呀

我：咁鍾意咪下星期一，二搵日再嚟囉

老豆：如果係同一批擺到下星期就無咁靚，如果新一批又唔知有無咁靚。。。 

我：咁你咪比多$10買兩隻生嘅返去聽日食囉，如果真係正成咁，貴$10都抵啦

結果。。。佢叫多兩隻，叫人蒸埋，佢話拎返去食；我以為佢聽日食，原來佢話消夜

我當時一定O哂咀 佢又驚人地話佢拎走貴$10喎，叫我拎定個外賣膠袋，蟹一到就入袋再入老媽個環保袋，好似偷野咁，其實以佢同老闆而家嘅交情，我唔信老闆會收佢$10囉

 ﹣﹣﹣﹣﹣﹣﹣﹣﹣﹣﹣﹣﹣﹣

星期日食左屋企兩隻醉蟹，星期一阿媽又整多四隻佢食；

今晚，即係星期三晚，佢主動又嚟，我話佢食得太多啦，佢未到時把口話叫兩隻食下，趁我未到又叫左四隻，唉～

佢話自己膽固敦偏低，兼飲大量醋，唔怕架喎。完全無佢乎

佢食嘅時候，話：估唔到今年咁快就食左十隻八隻。。。

我糾正：星期五四隻，跟住兩隻醉蟹，星期一四隻，今晚四隻。。。。係十四隻呀老豆

佢竟然。。。“炸”聽唔到

小巧的衣著

睇J2見到小巧的衣著，打扮。。。好精彩，真的好精彩




完

童年回憶﹣龍蚤

小時候住華富邨，記憶中夜晚經常一家大細帶桶水落樓下，放桶水喺電燈柱下，就會有呢樣野飛落水。。。 佢叫做龍蚤，唔係曱甴嚟架 

咁就捉佢落另一個桶仔 返屋企，老豆阿媽會灼熟佢嚟食，我就打死都唔食嘅，覺得腥腥臭臭咁

之後幾十年，環境污染，咁多年都無見過佢地啦 但係，今年喺摩星嶺，竟然比我見到幾隻喎


同阿媽講起呢件事，佢個反應係：做乜唔捉返嚟食呀？
我：加埋得果幾隻，你想食到絕種呀？

請問有無人食過？或者見過呢？

豬仔錢罌

我地果代嘅細路，好似一定有個錢罌儲錢架喎，可能係因為銀行當年細路開戶口有錢罌送，每個人都有一隻唐老鴨呀，米奇老C呀，又或者一隻獅子；

但更經典係佢。。。豬仔錢罌，我諗呢樣都係每人有一隻架

最近行經上環見客，見呢間朱榮記雜貨舖將D豬仔錢罌排到通街都係，真係心郁郁想買返隻呀




睇下，整整齊齊排哂隊，幾型～


有大中細唔同size㖭呀；我要搵日去入貨呀

你細個個錢罌係乜款嘅呢？

本週廢相﹣啋～咁都有得租？

咦！前面有野租喎～有乜租呢？
。
。
。
。
。
。
。

。

。

。

。

。

。

。

。

。

。

。

。

。

。

 啋，該煨囉～
 

完，下週再見

COUPON

上晝自言自語：星期一嘅免費報紙係必攞架，因為好多coupon。。。

 美心食早餐平$2

 麥記送雪糕或者平$5

 大快活就送餐湯麵包

 加埋儲開嘅大家樂，食餐平$3

 一個月呀大大話話都慳左一百幾十呀真係。。。
﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣

下晝打比寵物診所：喂！想幫達仔訂一包醫生糧，吓！$270～～～

慳埋慳埋都唔夠比隻衰仔呀～嗚～～

減磅週記

10月1日，喺屋企無野做；搬左嚟三年，屋苑個會所設施都剩係用過泳池，決定gym一gym，減下個肚腩

上次去醫務所磅過約142磅，就set個target135啦

跑加急行40分鐘，消耗左290卡路里咋～  

見有個磅，一磅；咦！138咋喎，幾好喎又～  

10月三日，細佬嚟我果頭睇樓，順便參觀埋會所，乘機又磅下。。。
吓，142?一定係頭先食得太飽啦（姓頼）

今日又去跑過，跑20分鐘，再單車20分鐘，再推下鐵，單車加跑去得250卡路里咋 
上磅，哇。。。136喎，咁咪話咁易就到target，咁輕鬆嘅，但個腩唔覺走左嘅？  

原來可以對住咁靚嘅黃昏做運動，我要嚟多D先得啦～  

同場加演真實對白。。。 返上樓，達仔出嚟迎接 
達：喵
我：你呀，懶到死，淨係掛住瞓，我呀，跑到氣喘呀
達：喵
完