Wednesday, February 29, 2012

旅行小意外

第二日行程未寫好,先寫一個小意外。。。

我咁怕凍,偏偏走去日本,仲凍過香港,都知好易hi野;帶哂感冒/傷風/咳/發燒/喉糖,偏偏無諗到呢一樣。。。

第一晚嘅東京好凍,行上野,朋友經過藥房,我睇洗面膏呀暖包嘅時候,朋友竟然係買呢樣,原來佢鼻敏感發作;果一刻,我以為我好叻無事,轉頭一番酒店,房間暖氣,厠所無暖氣一出一入底下,即衰,連環廿個”乞嗤“,即刻用呢樣解救,真係一噴即通鼻,鼻水”乞嗤“都停哂,但,之後每晚都需要佢,唉!

但係出街無事架喎,番香港咁耐亦無事喎,究竟敏感D乜呢?


﹣﹣﹣﹣﹣﹣﹣﹣﹣﹣﹣﹣
第二日所遇到嘅另一個意外,憑呢張相,有無人估到係乜呢?

Tuesday, February 28, 2012

東京.伊豆.輕井澤の旅﹣day1

上網見到有平機票,即訂,跟住先慢慢plan行程,臨出發前都未plan好,只知會去伊豆住一晚,可能去鎌倉。。。



2月18日,出發啦


搭京城快線去上野,只需1000円,需時90分鐘;想快可搭skyliner,約45分鐘到上野,但要2400円;快45分鐘要比多1200円,快獸話情願慳左佢啦


早起身好眼瞓,架車張櫈又會發熱,真係好瞓;全車好多人瞓到豬咁


到上野,酒店cube hotel(平日7000円)喺最旺嘅橫丁附近,由京城上野站行8分鐘左右就到啦


酒店放低行李,出去行lu,行去上野公園。。。門口影左幾張相嘅時候;朋友話:太凍,要番去攞件褸,結果上野公園之行完結了


番酒店途中,見到松屋,入去避寒兼食個早飯lu;
右邊嘅鹽葱豬肉飯係我嘅,好好食呀,但無加隻溫泉蛋,後悔至今


食完飯攞件褸,咁就天黑,行下電器舖橫丁行個圈已經好攰兼好凍,點算呢?


去食壽司,我主力係狂飲熱茶;最後兩個人只係食左三碟,朋友話揀唔到野食喎,我更加唔使講啦,碟蛋已經係我另外order架啦,迴轉上面我無野食到呀,連腐皮都無,都唔知點做壽司舖架真係


番酒店睇電視,執定聽日要嘅行裝,諗住聽朝留個喼喺上野酒店,剩係帶個袋出發去伊豆啦


當時仲未知,最大嘅意外原來已經悄悄咁殺埋身

Monday, February 27, 2012

眼晴想旅行

如果問我十個鍾意去日本嘅理由,呢樣佔其一。。。


日本嘅酒店大部份都裝有呢個設備,今次天氣凍尤其愛上,塊馬桶板係暖嘅,舒服到呢,唔屙都要坐下呀真係;

另外,又有貼身嘅洗眼洒水系統,厠紙都慳番,D水仲要係熱架,正~

ps:明天,遊記開始

Sunday, February 26, 2012

快獸新成員

隔離台駐東京嘅朋友仔幫我搜刮快獸,趁今次日本之旅將佢地帶番香港啦,係咪好Q呢?



番香港至見到原來快獸包裝內暗藏限量版kitkat,多謝哂呀,下次見啦:)

Friday, February 24, 2012

慳。。。答案

機票。。。DELTA 兩人$4744

現金最後用左110000円,已包酒店,食,交通,手信,甚至幫朋友買野都入埋數;無簽咭!

最正係我D円係09年用剩,當時只係兌0.79,110000即係$8690

$8690+$4744=$13434

每人除開唔使$7000,玩足六日,係咪應該尊稱我一聲“慳仔”呢?

遊日雜談

.天氣﹣頭四日好天到不得了,第五日陰哂天,第六日切段大雨後轉晴,最重要離開拖喼去車站時好天,唔使咁論盡,自覺超好運喔~

.隨意﹣本來plan好要去嘅就無去,臨時轉軚去左輕井澤,通地雪,跣舖金嘅~

.乾﹣天氣乾之餘室內暖氣更乾,我用左頭幾十年加埋嘅潤膚膏~

.小意外﹣落錯車出錯閘呢D烏龍野就實有,但點菜要乜無乜,連飛機餐都得海鮮就真係接受唔到囉!

.大意外﹣最後一日食早餐嘅時候,食崩左隻牙,最離奇係食果樣只係薯餅,嗚~~

.凍﹣準備左三件外套諗住替換,結果dayday都係呢件羽絨~



.攝﹣好彩買多張記憶咭同電池,真係用爆哂,濫影左3644張,睇都睇到想嘔,遊記會寫,但要嘔完先~

.慳﹣今次真係慳家得緊要,6日5夜,估下兩個人連機票酒店用左幾多錢?

Sunday, February 19, 2012

伊豆啦

今朝出左小意外,而家去緊伊豆,好好天,希望有櫻花啦

Saturday, February 18, 2012

出發了

執好行李了,電話相機义好電了,準備出發了

睇下天氣先,好似都好凍喎,但我緊張有無太陽多D

呢個係東京嘅


呢個係伊豆嘅


實有人會問,我自已答。。。已安排朋友每日上嚟餵達仔,唔使擔心

我上到網,但打唔到電話;有事請Facebook,或mail我,或呢樹留言,尤其係唐唐最新消息,靠哂你地啦,

Friday, February 17, 2012

抵食推介

加加加,乜都加

而家想搵間環境舒適,食物OK,價錢喺$100內(一個人)係好難架,尤其係尖沙咀。。。

話說上星期喺“THE ONE”睇完套”高山症“之後,落去地底超市行下,喺超市層一個唔超眼嘅位見到佢。。。味吉拉麵館



環境舒適,服務中上,一個拉麵$48起,睇下我食左乜

呢碗朋友嘅。。。鹽味义燒拉麵($58),試左一啖個湯,好OK喎,再點左個餃子,皮係軟軟嘅,好味


呢碗係我嘅。。。牛骨溫泉蛋拉麵($68),好濃味呀,正;
紫菜係另上,無浸落湯,抵讚,加你分,唔好整腥我碗湯吖嘛;但搣左少少食,唔夠脆,扣分呀


最後我食到見底


另外要讚下杯茶,用烏龍,比較濃味,配拉麵一流呀

埋單兩人只係$15X,仲有coupon送,下次食滿$150減$50,我要encore呀

Thursday, February 16, 2012

巴士上的毛蟲

搭巴士歸家途中,前面座位椅背爬出一條毛蟲;

見就嚟落車,執起佢放入紙巾袋,落車放左喺屋企樓下個公園,變左蝴蝶番嚟搵我啦:)

Wednesday, February 15, 2012

點解?點解?

咁醜都可以做(口靚)模?

你睇完會有買嘅衝動咩?

Tuesday, February 14, 2012

高海拔序戀II


先祝各情人節快樂

上星期,一連睇左兩套免費戲,兩套都係愛情片,”愛love“我已經唔會比高分,點知“高海拔序戀II”仲差D㖭

睇完套戲,睇下雜誌影評,竟然比五星,有無咁手鬆呀?

1/點解套片咁唔高清嘅,香格理拉D景真係粗粒同鬆架喎,不可原諒喎

2/鄭秀文喺香格里拉個假髮造型有D醜喎,兼唔連戲,落香港即變“中”髮,趕上大陸即刻長曲番,唔合理喎;但要讚係化粧好淡,雖然對眼細哂,但make sense

3/唔好close up古天樂命埋眼啦,真係見到疑似疤痕喎,驚喎

4/仲有,姡妞姐個鼻攪乜鬼,咁尖嘅?

5/古天樂做大明星兼大歌星,但佢哼歌真係好難聽呀,仲要哼幾場,但變左鄭秀文哼又OK喎,即係唔關作曲果個事

6/去到香格里拉,但拍唔到空氣稀薄或者靚景,雖然兩個主角都有一場高山症戲,但之後又走又跳,鄭秀文繼續佢嘅大動作操兵步伐,另外,大部份時間都係喺木屋附近取景,嘥料,使乜去香格理拉拍呢?

7/劇本係完整嘅,但感人位得最後少段時間,之前笑位又唔係好笑,廢位就多;另外,神父個角色懶係有D野,原來真係咖哩啡;鬼佬呢,原來出場真係為左隻烤羊,無謂~

8/主題曲係OK嘅

Monday, February 13, 2012

咸金桔

好鍾意飲咸金桔,每年秋冬日子,喉嚨不適,佢真係幫到手。。。

而家飲果樽係阿媽浸嘅,多過十年,而家飲剩半樽;而我兩年前自己都浸左一樽,未開過,諗住飲完一樽先開呢樽,等佢浸耐D,有效D

今年,話浸話浸都未做,終於今日做左啦;樽喺吉之島買($12),桔買左一磅($10),用剩三粒(放唔落),鹽($3);總共$25



期待幾年後慢慢歎,cheers~

Sunday, February 12, 2012

逐漸變黑又得,立即黑晒亦得,得左

講嘅係指甲。。。

今朝無食早餐就開工,午飯時發覺指甲變黑了,究竟幾時先凍完架?

Saturday, February 11, 2012

愛love


呢次唔係抽架;milk同電影公司攪左個攝影比賽,以love snapshot做主題,咁應,無理由唔參加;明知想贏冠軍機會微,但其實我目標係佢個三獎,有20份,係首影戲飛;要求唔高,應該得啩!

星期二參加,星期三係deadline,星期三黃昏已收到中獎通知,星期五晚去睇啦~

先睇預告片1


先睇預告片2


卡士夠強呀,想睇阮經天,想睇彭于晏,想睇郭采潔,想睇舒淇,想睇趙又廷,而舒淇同趙又廷仲嚟左㖭呀。。。

套戲人咁多,戲份又超平均,講下呢邊講下果邊,其實係又點散嘅;想帶出愛呢個訊息,又落唔夠藥,臨散場至谷谷谷出嚟,不過睇靚人靚景,就點都唔會失望嘅

講戲份平均,連除衫戲都計哂數,三個男演員一人一場,阮經天之前宣傳果場屙屎戲,劇情做到呢個位,即聽到全院發出細細聲。。。哇,嘻,到啦到啦,噓等雜聲,睇嚟屙屎呢個topic係全世界都受歡迎架

女嘅代表你估係邊個,唔係舒淇喎,都唔係郭采潔,竟然係趙微姨,哇~

同埋呢套野好姐弟戀呀,舒淇配小天,趙微竟然配趙又廷,仲要係咁咀,真係好𡁻呀

另外我鐘意化糞池果場呀,hehe

預告:我抽到高山症之戀,搵日去睇埋佢

Friday, February 10, 2012

南海一號

人物:
舊女同事F(剛從北京番嚟放假)
舊女同事C
舊女同事E(美食專欄作家)
我(靚仔)

舊同事F一個女子上左北京發展,最近番嚟放假,相約食飯,一行四人,其中一個舊同事E身份已從記者妹變左美食家,喺報章寫美食專欄;咁地方當然佢話事啦。。。佢揀左i-square嘅南海一號

佢話未食過,米豬蓮有一粒星,試下喎。。。出事啦~~~

食新派粵菜,環境優美,燈光昏暗果隻,點菜當然交比食家,我地無過問

上左幾碟菜,食緊嘅時候,舊同事E突然話:咦!有鵝肝嘅?我叫九層塔炒牛柳粒喎,九層塔呢?

舊同事F:頭先上菜時,佢聽到上菜waitress話係鵝肝炒牛柳粒

跟住佢想夾,舊同事E阻止,話:唔好食,問清楚先,一陣佢話呢碟野五百蚊咪大劑

叫左waitress(A)嚟問:呢碟係咪九層塔炒牛柳粒呀?

waitress(A):我唔清楚,請等等,跟住叫左waitress(B)嚟

舊同事E:我地叫左碟九層塔炒牛柳粒

waitress(B):呢碟係炒牛柳粒啦

舊同事E:呢碟係九層塔炒牛柳粒?

waitress(B):係呀,你叫左兩碟牛柳粒咩?(撩交嗌喎)

舊同事E:咁九層塔呢?九層塔唔係香料嚟架咩?

waitress(B):九層塔只係一個名。。。。。

我地O哂咀

佢行開時仲要細聲同waitress(A)講:九層塔喎(不屑語氣加面口果隻)

舊女同事F:做乜香港變成咁架?

舊女同事C:如果發生喺茶餐廳就話預左啫,而家米芝蓮一星喎,粒星呃番嚟架?

舊女同事E好嬲,即打比佢餐廳集團嘅公關,講明件事。。。。

幾分鐘後,見到一個男經理同女經理密密傾,跟住女經理走嚟道歉,話佢知個同事語氣差,又話要煮過碟牛柳粒比我地品嚐(我地話唔要,因為真係飽啦);

咁佢話:送個甜品你食吖,我都係話唔要;佢突然好認真咁話:比過機會我地補償啦

從語氣中,我知佢地一定係(hi)鑊啦,我話:好呀,我想食甜品呀。。。。。

坐喺度果個揸筆搵食,唔寫衰你,喺佢個圈子唱幾野都夠你死;

兼食物其實一般,似呃鬼佬菜式,加埋服務咁出色,果粒星點嚟架呢?真係對住維港就加咁多分?

Thursday, February 9, 2012

以油制乾


最憎冬天,除左凍之外,仲因為乾,而我一向都係一個懶人。。。

對於皮膚護理,我一向都差唔多係唔理,以前總會(學人)買埋一枝三枝,最後總係過期收場;而家放喺厠所嘅大部份都係抽獎抽番嚟,又或者都係過期嘅。。。

對皮膚有幾求其?同我去過旅行嘅朋友,同我出過trip嘅舊同事都知,試過嚇死佢地㖭

例子1:上廣州工作,坐直通車時,小腿乾到龜裂,痕爆;袋𥚃只搵到一枝唇膏,於是我隊枝唇膏落小腿捽上捽落,嚇到當時坐我隔離嘅女上司O咀,即刻從佢個袋摷左枝貴野我用

例子2:出trip搭飛機,咀唇乾到出血,個袋得枝酒店嘅潤膚膏,於是我拎嚟搽咀;隔離嘅女同事又嚇到O咀,話有毒喎

例子3:搭巴士時,對腳好乾,今次唇膏潤膚膏都無,點算呢?。。。。。我塊面好油,於是用天然分泌絕不敏感嘅面油嚟搽腳,好環保呀~嚇到身邊朋友唔止O咀㖭。。。。

Wednesday, February 8, 2012

我愛臭腳

執舊相,搵到呢一輯,決定寫一個感人肺腑嘅故事;寫完後,太滿意啦,決定同達仔blog兩台同步。。。

今集由隔離台嘅人氣貓姊妹,家姐主演,阿妹做老臨,另外仲有佢地兩隻(弟)妹客串演出

當時佢地個半月,係天才童星;而另一點值得留意,當時家姐塊面係無咁圓架~

好,故事開始。。。
















多謝收睇。。。完

Tuesday, February 7, 2012

乜都加

過年前D茶餐廳呀,粉麵舖呀都會加價,有D印過D新嘅,等你無咁覺,有D呢,好似呢間咁,搵貼紙貼住個舊價

有朋友曾經天真咁問,係咪過年加咋,過左年會搣番用番舊價架?


呢碗我食開嘅雙併麵,由初$26(包凍飲),到舊年$28,今日$30;雖然比起出面都算平。。。


但我D JOB又唔見有得加價喎,講價就多:(

Monday, February 6, 2012

龍年第一份獎品

BURGER KING星堡一個,得個飽,汽水都無呀


標榜係安格斯架;味道同華堡分別唔係好大囉;雖然上圖係瑞士口味,而我叫紐約口味,但個樣差咁遠嘅,塊牛肉薄過張相一半囉


不過其實自己都做食品包裝設計,我跟果D,張相咪又係咁呃鬼~(配合個客要求咋)

Sunday, February 5, 2012

巴士上聽到嘅廢話

一個師奶大聲講電話,講完一個;又再通第二話。。。

喂!果枝安美露要幾多錢話?

。。。。。。

下?咁貴?

。。。。。。

無,我都唔用呢D野嘅

。。。。。。

收線

我心諗:(超!咁你又問)

Saturday, February 4, 2012

又NG啦

08年寫過呢一篇。。。

話”昂坪360“改壞名,因為NGONG PING隱藏三個NG,難怪佢多番意外,NG完又NG


今次好揀唔揀,揀正初三最凍果日嚟壞,而家話要換啤令,又停用兩個月,都唔知係第N次停駛啦,上要市集做生意就真係陰公啦

改名啦不如

Friday, February 3, 2012

天際一百。。。小插曲

即將離開時,聽到一個師奶發出類似慘叫唬哭的聲音

沿方向望去,見到一個電哂髮嘅長髮師奶話(好大聲):嗚~,原來你拎左,我以為唔見左呀~嗚~~(嗌到拆天果隻)

望向佢講野嘅方向,一個疑似佢老公嘅物體揸住一部相機,而佢自己就摷緊袋;佢老公一臉惘然無出聲。。。

我排緊隊搭lift時,佢繼續嗌,你嚇死我呀你嚇死我呀,我以為唔見左呀,嗚~

入lift後,隔離嘅女生都講呢個師奶,成為大家嘅餘慶話題啦

﹣﹣﹣﹣﹣﹣﹣﹣﹣﹣﹣﹣﹣
自己唔看緊,唔見可以怪邊個,比人偷野就通知職員,報警;喺度大吵大鬧做哂大戲都於事無補架啦,下哇~大家只會當睇戲囉!

Thursday, February 2, 2012

天際100免費遊

舊年剩落嘅抽獎運,有得免費遊天際100,但需要喺1月31日前去;但月尾dayday陰天兼出街似入左雪櫃,終於上週六放晴,即刻仆去啦啦啦~

換左入場券,先經過一條時光隧道,準備搭lift啦


以為架lift有風景睇,點知係密封式,最大賣點係60秒就上到100樓啦;我耳鳴囉!


真係好高呀,雖然大太陽,可惜好大煙霞,睇海港城呢邊還好。。。


港島果邊就。。。為何矇查查,誰時時矇查查


從呢個角度睇,清楚見到西隧入口,對面就係港島西,好神奇嘅感覺呀


從高處向下望,長長嘅堤壩有D似一條屎


香港真係石屎森林,真係好獨特...


獨特到有D恐怖㖭呀


新年特備節目,有哥仔拋波攪下氣氛,點解師奶睇到lam哂脷呢?


呢隻係吉祥物(天仔),幾可愛,但要$178一隻就唔係好可愛


香港排第四,有位阿哥好激動咁話,同上海差兩米咋,點解唔起多兩米呀?


玻璃其實唔夠乾淨,當然知道清潔有難度;


新年加左條龍,影下剪影相,個構圖靚左好多


香港上空有雨雲呀


黃昏啦,龍爪想捉太陽呀


金黃黃昏景,無遮無掩


等到夜晚,諗住影夜景,點知唔掂;
原因一,原來玻璃勁反光,影哂背後D燈出嚟
原因二,當日係星期六,辧公室關哂燈,失左色
原因三,太遠兼大煙霞呀


出口地底有個香港地圖模型,著哂燈,好靚呀~


臨去搭lift時,發生左一個小插曲。。。聽日繼續
Related Posts Plugin for WordPress, Blogger...