瓹窿瓹罅新發現-問題篇

又有問答題玩啦，由淺入深，睇下邊個答中最多？ 

難度1級題：噚日出現嘅呢隻眼晴，係乜野動物架呢？  

難度2級題：咁浪漫嘅山頂小屋，究竟係乜用途架呢？  

難度3級題：熱身做完啦，嚟D堅料。。。呢棵D花好似水仙咁嘅，係乜植物嚟架呢？  

難度4級題：最勁最有創意嘅大發現，呢樣野拜年必備呀吓，實比長輩讚有心思呀呢舖。。。蝠土，乜嚟架呢？乜用途架呢？  

難度5級題：強國遊客遊園，攞住盒乜野呢？


聽日開估：）

﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣ 

最後，見到呢兩堆便便，乜動物架呢？野豬嘅？赤麂嘅？人嘅？呢個無答案，有人識話我知

瓹窿瓹罅新發現

繼續嘉道里。。。 嚟過十次八次，影極都唔厭，皆因每次都瓹窿瓹罅摷下有無新發現 

今次十一點已經嚟到，點知磨爛𥱊，影到4：35pm，比人趕，免費車我落山，因為5:00關閘呀

由第一次嚟免費入場，到今次加價到入場費$20，van仔上山要再比$10（我情願用腳行），真係乜都加哂價呀～但我都仲會繼續嚟，hehe

入場，今次先醫肚，試下場內唯一餐廳。。。素食亭，食物同環境都OK架，可以一試：）  

1/摷D特別野影啦，先影水珠；影水珠係好好玩架，要手定，又要睇反射位，又要驚D水彈濕部機，好攰架～  

2/將部機貼住水面嚟影，發現水藻呼吸  

3/roger,roger,發現樹上有個橙色土製菠蘿，乜嚟架呢？  

4/哇，外星人呀～


 5／外星人”lay“埋喺地底呀，伸條觸鬚上嚟，想做乜呢？


 6/原來係示愛呀～
 

7/嘉道里除左係個大花園，仲係一個動物園；睇下，有班議員開緊會，講緊隻狼  

8/但係上頭隻眼開隻眼閉


 9／阿爺直頭睬你都儍  

10／發現太陽花好多肥蜜蜂，狂影  

11／又發現蜜蜂都怕凍，著leg warmer  

12／呢樣好特別，種子唔係喺泥土生架喎  

13／甩剩兩塊花瓣，成就一張靚相  

14／但係甩哂落地，都可以好淒美啊


 15／再淒D都仲得


 16／除左影花，仲可以影紅葉  

17／又紅又綠，馬騮衣服  

ps:明我點解會影咁耐啦，一篇可以出17張呀，仲要係未完。。。好野永遠放最後

開花情報

開花啦，開花啦，嘉道里農場嘅梅花，桃花同鐘花櫻桃都開花啦 

我星期六去，見到一片花海呀，但仲有大量花蕾未開，呢個星期相信係最最最燦爛嘅時期，快D去啦～ 

近大門嘅梅花（佢寫住係梅花，但我成日覺得似桃花），開得燦爛；而近雞舍果幾棵只係零星開左
 

上到1200m果兩大棵，靚爆啦；好少喺香港影到咁嘅花樹環境，有D似去左台灣  

無帶長鏡，只可以影到最低果幾朵  

行到上山頂，見到一片紅，鐘花櫻桃紅爆山頭  

幾十棵任影，成個山頭都係，唔好錯過呀～  

地面佈滿散花，有遊人玩野，整左個松子開花

 最愛嘅一張
 

園內仲有大量靚花等緊你呀～

快獸去左邊呢？

星期六，有節目，帶埋快獸無咁孤獨

我地去左邊樹呢？


主要係影花，乜花嚟架呢？


 聽日開估

我地個政府好嘥錢

政府驚你跳落海，所以起個欄杆圍住海皮，幾細心呀真係。。。  

但係使唔使起個孖呢？  

做乜呢？鐵平呀而家，要三重奏？  

離譜到四重㖭，玩障礙賽呀？欄杆展覽呀？嘥錢呀～

玩新郎，玩兄弟。。。

以前其中一份長工，係婚禮公司嘅美指，其中一個工作係幫新人做相簿，點樣可以執靚佢地，尤其個新娘，最好執左佢都唔覺就最成功。。。

近一年，重操固業，幫相熟攝影師砌婚禮嘅相簿，最大分別係，以前果隻叫pre wedding，呢隻叫wedding day

開頭以為性質差唔多，原來都好多野唔同；pre wedding嘅理應張張係靚相，點砌都唔會太衰，重點放落執靚個新娘

wedding day呢，上頭，奉茶，行禮，擺酒，全日過程齊哂，好多都係影現場氣氛為主

如果佢地揀好多擺酒企定定大合照，就真係好難會靚得去邊

講咁耐，其實想講，最近連做幾本相簿都見到一個現象，玩新新郎兄弟環節，越嚟越癲。。。

究竟係為乜要玩新郎嘅呢？起源係乜架呢？我當年做伴郎，最多都係掌上壓（呢樣我頂唔到，新郎自己嚟）

當年最激係要搵人著女裝底褲喺面（當然都唔係我，我擺明唔盡責嘅）

要隊杯唔知乜野酒（又唔係我啦，我都唔飲酒嘅）

食極酸嘅野，呢樣我非常OK（爭住認頭，噯司）

而家呢，玩完不特只，仲揀鬼咁多張相㖭，咁叫我點砌呢，明明想砌本你地恩恩愛愛，但中間連續幾版都係班兄弟比人玩到皺眉，姊妹笑到反艇果隻

其中嘔心嘅有，成班兄弟帶哂BB帽，口咬奶咀，Yap住尿布，排排企罰影相

另一本呢，全部兄弟絲𧙕幪頭，變哂怪樣對住鏡頭不特只，仲要有個姊妹一手揸住六隻絲𧙕，拉住六個兄弟，好似捉到一群外星人咁

明明張相好核突，但你又揀，仲要揀好多張，即係好鍾意啦，下哇～對住一堆咁嘅相，我都唔知應該放大D定縮細D好

我諗大家見到D相，下次有人叫你做兄弟嘅話，一定會say no囉

鮑魚刷嘅用途

鮑魚刷，第一個印象一定係拎嚟刷馬桶，第二第三個印象都係刷馬桶。。。
每次經過某“名店”，開個玻璃窗燒豬過你睇，見佢地用“鮑魚刷”嚟唔知搽油定搽醬，都笑到反哂艇，諗起佢搽D“海鮮醬”上隻豬度，就莫名興奮 

又諗，佢廁所一定有鮑魚刷，會唔會撈亂左燒豬果枝呢？會唔會幾枝一齊洗呢？會唔會環保重用呢？真係好有思巧價值

再諗，如果老闆想個仔繼承間店，會唔會“鮑魚刷”就係佢地嘅秘方呢，傳仔不傳女呢？甚至係家傳之寶呢？個女嘅嫁妝會唔會有金鮑魚。。。刷呢？ 

最後，點解會諗到用鮑魚刷嚟燒豬，係一個謎。。。

屍體發現案。。。

堤壩旁，有人釣魚，旁邊有幾隻貓，相信係釣魚人會將魚獲分比佢地食啦


究竟搵到條乜野屍？係人？


定係貓？



發現嘅首先係呢副白骨，我有兩秒真係以為係貓，但咁大隻貓？（呢副骨個頭好大架）



行多幾步，見到呢條屍仲大，四尺長，頭大尾細，乜魚嚟架呢？鱸魚？點解貓都唔食呢？ 

大尾篤的黃昏

行去堤霸，有人踏單車，有人放狗，有人放B，有人放紙鳶...  

最特別嘅係淡水湖果邊有個塔，夠膽嘅可以爬上去架～
（而聽日寫嘅屍體發現案發現場就係喺呢樹啦，嗚～～）  

藍天藍水加條勁長堤壩，係呢樹至有架  

時間關係，一跳就嚟左黃昏啦，好多人放鳶呀，會唔會𠝹到單車架呢？
𠝹到嘅話，單車被扯跌定紙鳶斷線定踏單車人血滴子呢？好緊張呀

謝謝你的鳶，我影到張靚野呀～  

但全日至愛係你
 

喺呢個時候，相機又話無電又話爆咭，真係用佢唔熟。。。唯有用iphone啦，但效果差好遠囉，雖然今日有咸蛋黃；亦都係呢個時候，我遇到蚊蟲暴。。。
﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣ 

問答題：屍體發現，乜野嘅屍體呢？聽日開估，嗚～