床底寶箱之史前功課﹣梁朝偉畫像

以前讀設計時做嘅功課呢，大部份都掉左；

但原來有部份係有影低相片做紀念，呢張係其中一張。。。 

我記得呢份功課呢，係用marker畫人像，攞明星嚟畫絕對係死蠢嘅，因為係人都知佢乜樣，除非你畫到好似好似。。。

呢張，我記得係好低份架；其實咁多種油彩入面，廣告彩同marker已經叫控得好D，油畫同pastel先係災難； 

亦因為咁，第一年下半年開始，全力攻攝影，hea上drawing，畢業成績表都係靠攝影一科拉起咋～

而家睇返，真係畫得好醜樣~

我屋企有十兄弟

今日得閒，摷佢地出嚟清潔下，除左兩隻快獸，其餘都陪我十年以上 

全部唔係貴野，但紀錄左我小時候嘅嗜好 

我地個年代，個個都鍾意鐵甲萬能俠同三一萬能俠 

仲有鐵人28同埋astro boy，而家睇返都仲係咁型

童年回憶﹣龍蚤

小時候住華富邨，記憶中夜晚經常一家大細帶桶水落樓下，放桶水喺電燈柱下，就會有呢樣野飛落水。。。 佢叫做龍蚤，唔係曱甴嚟架 

咁就捉佢落另一個桶仔 返屋企，老豆阿媽會灼熟佢嚟食，我就打死都唔食嘅，覺得腥腥臭臭咁

之後幾十年，環境污染，咁多年都無見過佢地啦 但係，今年喺摩星嶺，竟然比我見到幾隻喎


同阿媽講起呢件事，佢個反應係：做乜唔捉返嚟食呀？
我：加埋得果幾隻，你想食到絕種呀？

請問有無人食過？或者見過呢？

豬仔錢罌

我地果代嘅細路，好似一定有個錢罌儲錢架喎，可能係因為銀行當年細路開戶口有錢罌送，每個人都有一隻唐老鴨呀，米奇老C呀，又或者一隻獅子；

但更經典係佢。。。豬仔錢罌，我諗呢樣都係每人有一隻架

最近行經上環見客，見呢間朱榮記雜貨舖將D豬仔錢罌排到通街都係，真係心郁郁想買返隻呀




睇下，整整齊齊排哂隊，幾型～


有大中細唔同size㖭呀；我要搵日去入貨呀

你細個個錢罌係乜款嘅呢？

床底寶箱之史前﹣華星中秋節廣告

長假，好得閒，執下野，見到佢，嚇一跳

原來自己做過一個咁嘅廣告，完全喺個腦消失左嘅記憶彈返出嚟

01年嘅中秋，接到通知要做一個雜誌廣告，將我做果堆CD一舖過放哂上去，要有中秋feel；個客畫面都諗埋，搵個月餅罐放CD喎

我記得我即刻要買盒月餅，即日影埋，果陣唔係數碼架，我記得我拎去沖菲林，scan埋即做野，做到呢個稿穩穩陣陣過到關已經好開心，因為根本好難做得靚。。。

我拎返個稿最有興趣嘅係，月餅罐果堆歌星全部離開左華星，咁當時華星仲有乜人呢？

請睇。。。

有鄭俊弘？乜有出過碟咩？


中秋節快樂：）

Skinhead

噚日有人提議不如剪skinhead，其實十幾年前已經試過一次 

當時啱啱甩，髮型師建議不如剪一次光頭或者skinhead，等頭髮重新嚟過，新出會健康D喎 

咁咪剪囉，都想睇下會變乜樣，因為我個頭好扁，驚好醜樣

結果都叫做OK喎，頂得住
摷相簿搵到唯一一張skinhead相，當時出席朋友婚宴，副眼鏡咪就係而家配返鏡片又帶過果副囉，原來咁耐之前架啦喎～

ps:另外一提，老豆阿爺都禿，阿媽亦唔算多頭髮，所以都唔使諗有奇蹟架啦～

床底寶箱之史前 漫畫﹣學生公主

小時候，家姐少有地睇漫畫喎（佢好勤力讀書架），佢買左我自然唔執輸睇埋，印象中我追左兩套少女漫畫，一套小甜甜，另一套就係呢本學生公主（又名淘氣學生妹） 我幾鍾意“學生公主”架，作者庄司陽子畫工靚，分鏡出色，唔多唔少因為佢，令我知道自己對美術設計有興趣架～ 成套本來係齊嘅，又係搬屋時決定掉哂佢，又唔知點解地掉漏一本，第29期，當時係84年，每本賣三蚊
 
大家有無睇過呢？

床底寶箱之史前 徐小鳳全新歌集錄音帶

 
我諗大家都係，搬屋呀裝修呀，又或者移民都會的起心乾掉緊D舊野，我記得我一次搬屋，掉左一鞋嘅錄音帶，當時覺得無機咯，仲要嚟做乜呢，於是只係留返最有紀念價值唔捨得掉嘅入落另一個鞋盒。。。 又另一次，我去左加拿大，我老豆勁鍾意掉野，趁我唔喺度掉我D雜誌，同埋果箱錄音帶，我番嚟知道左想暈。。。 而家我手上得番呢盒錄音帶，係徐小鳳全新歌集，無掉到嘅原因係，因為佢外表唔似係錄音帶，逃過一刧 個名都真係超hea，全新歌集喎，乜之前隻隻都撈D舊歌架唔通？ 個盒打開係咁嘅
 入面有盒帶仲有歌詞書一本
 都真係lasagna(濶面）得好交關，而家反而好似無咁闊喎
 呢隻係82年出品，你地見過未呢？記唔記得有乜野歌？

床底寶箱之史前 十二生肖郵票

床底系列寫左咁耐，有一瓣咁耐都未寫過，因為藏量之多，多到唔知點入手，係乜呢？

以前老師總係叫學生集郵，而我由小學集到中學，中學時更癲到去買D覺得有價值嘅，例如呢套。。。

十二生肖郵票。。。最舊果張係1967年架，係咪好經典呢？



你對呢套郵票有無印象呢？定係見都未見過呢？老實答

舊相﹣澳門遊

由細到大去過澳門不下數十次，細過果陣，跟阿爸阿媽過，佢地賭錢，我同家姐就打機，打足一day

大個啦，同班同學過去旅行兼影相

當年嘅我，風都吹得走


舊年，抽獎抽到免費澳門遊，抽到威尼C人酒店加船飛，開心

今年，竟然有續集喎

朋友參加攝影比賽贏左，得到免費入住銀河入面嘅大倉酒店住房連早餐午餐（無船飛喎），今個星期五去，一定要好天呀，有泳池架～

舊相﹣台灣打工的日子

呢張相係一個長長故事，先講上半部。。。


呢份工，一半時間喺香港，一半時間喺高雄，做嘅係一個展覽館嘅展覽工程，只係做左三個月，但印象難忘

番香港時，要著西裝打呔架，去高雄執定一套見人嘅，其餘都係靚少少嘅tee牛仔褲，點知到機場見其他同事個個由西裝骨骨變就好爛鬼笪笪果隻喎

去到高雄至知，原來個館係未起好嘅，入口係地盆，出入要戴安全帽，又因為地盆很大，所以後期學識揸大膽電單車於地盆範圍行走，呢D都係屋企人唔知嘅

講番張相，點解件衫濕哂？高雄好熱架，日日都34度架啦，兼展覽館係無冷氣架，著靚都無用啦，日日焗桑拿，果期真係肥唔起架

一入去，地盆一樓浸哂水，聽聞前一星期要著水鞋澗水，我第一日到埗時雖然都浸，但踏木板唔駛澗水，但好多好多蚊

但第一日開工即出意外，我諗我死都記得，同事剩係帶我路去到我工作嘅“科學館”，即係上左三樓，經過“兒童館”，但係佢每個館好似會展D展覽咁大，轉左又轉右其實唔認得路，跟住我就喺會場度尺，做左無一粒鐘，突然。。。

停電

黑到乜都睇唔到，好彩我有個蚊型隨身電筒，用蚊型隨身電筒搵我個背包，入面有公司派嘅大電筒，鎮定，嗌救命先，用齊廣東英文加國語都無人理我，當時亦無電話，唯有玩迷宮遊戲，見過呢隻蟻就直行，見到sir滑梯，咦！呢舊無見過，再照，見到個小丑，嚇到叫左出嚟；
成地垃圾，又驚踏錯腳，仆親就死得

玩左20分鐘左右，終於見到光，原來好叻咁行番去樓梯口，跟住行番office（地盆對面），見到所有同事都齊人，問佢地無諗過我唔識路架，竟然原來真係無人諗過兼無人發覺我未番去，我當時即刻知我有幾好人緣啦

﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
下集：點解會番呢份工

床底寶箱之史前 “達明一派石頭記地鐵廣告牌”

床底寶箱之史前XX，簡稱”床史“。。。呢個系列無寫好耐，最近執床底，又搵到寶啦，又可以繼續寫啦：）新讀者可能唔知，我其實係擅長寫”床史“嘅，唔好攪錯係床屎喎

呢幾日Facebook比達明一派演唱會洗板呀，佢地出道25週年，石頭記係第二隻碟，呢塊係地鐵車廂嘅廣告牌，當年我係一個（小）學生，有晚搭地下鐵見到呢張廣告牌喺地下喎，喺地下應該係垃圾嚟嘅，咁我就執左佢啦


24年後由床底出土，石頭都發左毛


睇下歷史嘅見證，當年做稿仲係用植字咪紙，人手貼上個稿度，睇下石頭記個記字，明顯貼低左，係而家電腦做稿唔會發生嘅mistake


摷下床底仲有乜寫先

舊記憶

我又嚟賣感性啦，講下舊事。。。

小時候，每逢放暑假，老豆阿媽都會帶我地入石澳，每次都過夜，我記得有次仲留低我同家姐幾日，點解咁放心，因為表舅婆同幾個表舅父住喺石澳，有人睇住架～

阿公係揸貨車嘅，所以有印象我地係坐密斗車入石澳架，仲要唔係坐車頭，係坐喺後面載貨嘅地方，諗番都幾牙煙喎～

幾個表舅父都係救生員，所以好大部份嘅記憶都係坐喺沙灘砌堡壘，而每次都會有人讚我砌嘅堡壘砌得靚（又係專記埋呢D野），呵呵～

石澳係出名大浪架，所以表舅父係唔比我地單獨落海，尤其係灘嘅右邊，去過嘅都知，右邊你行頭幾步海水只係到你小腿，但突然急斜去到心口架，所以以前石澳係每年都有人浸死架，每年都死一個，好邪架～而其中一次我仲喺沙灘，不過當時太細，唔知發生乜事

表舅婆好錫我架，長大後雖然少見，但有次我跟公司廣告去到石澳取景，撞正佢，佢開心到呢；因為做緊野傾得唔多，隔左一段時間，佢竟然拎左碗湯嚟比我，話日頭太毒，要飲左佢喎，成隊crew同我上司笑到反肚，但好warm囉，但係。。。。果碗係魚湯（表舅婆，咁大整估呀），但我都飲哂佢：）；果次係我最後一次見到佢，之後無耐，佢就走左啦

好，睇下相；睇相簿至知嚟過，我同家姐嘅合照；當年嘅靚仔小朋友


今日已經變左靚仔大叔啦

大地

喺西環後街見到呢張海報。。。


以前， 一人一件大地牌校褸，呢個牌子嘅老闆應該肥到著唔到𧙕囉，而家D細路仲係咪著呢個牌子呢？

買左件校褸，又要去學校買個校徽自己釘上去，釘得靚唔靚就睇你阿媽嘅手工啦(而家係咪賓妹做架呢？）

件校褸一著就成季，無洗架喎，打波又將佢通地放喎，果陣時又得架喎，咁污糟

未到一定嘅溫度就唔比著校褸，所以又要準備多件冷衫，果個年代好多都係手織嘅，我件係阿姨織比我嘅，係完全唔啱身嘅。。。

而家講番，已經係上世紀嘅事，當年嘅死蠢而家已經變左阿叔，只係醒左少少

床底寶箱之史前 “華星產品目錄”

好耐無摷床底，又搵到件寶出嚟。。。“華星產品目錄”


我曾經做過呢間公司嘅job一段短時期，因為方便我做精選碟要搵封面，比左一本產品目錄我呀，比我已經係“巢”架啦，加埋發埋毛，舊上加舊；1996年印嘅，即係由華星一開始到96嘅大碟／CD／LP／VCD等都有齊(未有DVD架）～



目錄係順年份次序嘅，第一張碟係邊張呢？原來係群星高唱，而第一張個人碟係陳美齡嘅漓江曲；仲有阿梅同哥哥


當年，真係粒粒巨星呀，睇下呢幾版。。。憶蓮呀，阿姐呀，羅文呀，梁朝偉呀，sammi呀，郭富城呀，安仔呀，呂方呀，梁漢文呀


最後幾版，會見到華星沒落前嘅兩粒星，陳奕迅同楊千嬅，未見到何韻詩同古天樂，應該係96年後先出唱片啦!


事隔十幾年拎番出嚟睇，除左睇番D封面覺得吸引之外，最正係有齊哂邊隻碟有咩野歌，call番好多回憶呀

西環大變身

噚日答案：賣女裝；哇，咁買果D咪狗乸，搵你去啦真係～

﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣

西環大變身

搬嚟西環一年啦，呢一年，睇住D舖頭不停地一間執一間開，好忙，就知呢區幾咁急速發展；

圖中嘅相，如果你唔睇隔離D字，會唔會知佢係個泳池呢？哇!靚成咁，我真係熱切期待呀～


舊年係一個未有野嘅地盆，而家已經見到雛型


但有IN就有OUT；扒王之王，茶軒呢類連鎖都out，我幫趁開嘅文具店源發做左幾十年，上星期突然結業，有D唔捨得，唔知伯伯老闆去左邊呢？呢類懷舊店舖買少見少啦!

廿年﹣維港夜景

廿多年前，我仲係設計學校嘅學生，其中一個功課，我捉蟲地揀左做一個菲林廣告，需要影一張維港夜景嘅相；

但係，當年影相係用菲林架，未有photoshop，無得執相；托住腳架相機鏡頭十幾磅去到海港城；夜景想影得靚，當年係咁教嘅，先喺黃昏影一張爆光不足嘅相，等天黑齊，用同一格菲林，再長時間爆多一次光，咁個天就會有少少色，而又有燈光啦，但結果。。。

兩星期內去左四次，一次中途落雨，一次影定黃昏果張，我喺度呆等嘅時侯，比個細佬踢到腳架郁左位，一次爆光過哂火， 一次週日去，大廈少左好多燈，結果只可以用張純夜晚爆光嘅

前排，專登去番同一個位置影同一樣嘅相，當然，而家用數碼相機簡單得多；

睇下張相，就知香港廿年嚟變化有幾大；以前，康幾大廈，交易廣場，滙豐係巨無覇，廿年後，變左矮仔；
再萵廿年，維港會唔會直頭無左呢？又或者有條行人天橋行得過去呢？


睇真D，香港夜景，真係一流呀!

999話﹣小總結

多謝大家睇到999篇，寫左近三年，發生好多事；世界不停變，最好嘅紀錄就係影低佢，今日唔影，聽日可能已經無得影

鍾意影相，但寫blog後影多左，試驗性多左，反而有D野麻目左；由攞住部LX1到而家GF1，發覺點樣用部機先至係最緊要，GF1因為本身非常聰明，最近多現影出嚟嘅野變得差唔多，無突破；上星期因為自己嘅大意，影到一半無電，迫自己用電話影，先發覺原來無左D乜filter物function，無左manual，有小小亂撞，反而挑戰性大左，新鮮感仲強左㖭。。。

anyway,呢個blog嘅主角其實係相集，爛gag同其他都只係配角；所以我會繼續比心機影

為寫呢篇砌左下面呢幅圖，逐篇逐篇blog摷相，原來真係勁多，搵嚟一堆有感覺嘅，做1000篇前嘅總結;

有邊張你會仲記得？



多謝收睇 :)

998話﹣快獸出場。。。

快獸點解會出現喺我個blog?

呢樣野以前講過，家姐去日本旅行見到呢隻野，覺得佢似我喎（離哂譜），話買比我，我唔要，留左喺阿媽屋企；跟住阿媽竟然將佢放喺D家庭相。。。我張相隔離，激死呀!

咁有一次，去旅行前，臨出發諗起不如帶隻公仔去影相，結果隨手喺阿媽屋企攞左呢隻快獸;就係咁,快獸就成為左𡃁模；;亦成為我個blog最受歡迎嘅角色...

新讀者可能唔知，其實我係有五隻快獸架（而家有6隻啦），嚟睇下張全家福啦！除左快獸女友外(即係唔同樣果隻），隻隻都去過旅行做𡃁模架啦!


第一次登場。。。倫敦


去過巴黎


做過天水圍導遊


台灣鐵道都有佢


長野賞櫻睇馬騮




大戰北京天壇




勇聞台北101


墾丁發燒之旅


下次，佢會去邊呢？

995話 ﹣ 繼續大事回顧

由07年10月開始寫，有幾個"系列"出現過，令觀賞人數升高

第一個
每日由個位嘅觀賞人數急升上過百，係佢。。。。
多得ogake肯同我癲，每星期花心機聽屋企D碟搵爛歌，其實好受罪，但的確好玩；但最後屋企CD嘅爛歌真係乾塘，想唔停都唔得

其實仲想搵野鬥，但有乜可以鬥呢？有無建議？又有邊個咁得閒呢？諗到話我聽。。。

第二個
床底寶箱系列
唔寫唔知自己儲埋咁多野；a-z擦膠，飛行棋等等，令到我私下收到好多mail問邊度買，我肯唔肯賣等等，賣我就唔賣架啦，以前買嘅地方其實專登現去過，諗住搵到可以幫下人，但結果係執哂粒或者已經無貨啦!

有興趣睇番就去“時光機”睇番啦

但床底仲有貨，不日繼續！

第三個
遊記通常都會多D人睇，但墾丁呢輯令我第一次每日有多過300人入嚟，雖然執相砌圖要用好多時間，但我覺得值喎～



第四個
金鈴系列；無啦啦去睇中醫，無啦啦比人頭頂插哂針，咁就多人睇多人回。。。


（但而家真係再去睇番，主要係調理啫）

最後。。。
海洋公園果排竟然會多人，我都R頭，但破紀錄嘅一篇，突破400，竟然係佢？（因為個個入嚟鬧下？）


。。。