小花園

忙裡抽閒整左個架，小花園即刻靚左好多，心情大好呀！


雞蛋花Ｄ葉好容易有蟲，噴殺蟲水就連塊葉都死埋，有無人識？
Ｄ蟲超細隻，叫紅蜘蛛，依家我日日我用手㯲死佢咋！

新住客

缸魚因為放喺窗台，有陽光自然有青苔，最有效係養條“枇杷“魚，但因體型大，會傷害細魚；金清道夫仲衰，細魚又吸，金魚都比佢吸死；
最斯文係佢。。。小精靈

買左三條，外表比起前兩種可愛，仲鬼咁勤力，返嚟幾個鐘，係咁啜Ｄ玻璃，個肚食到脹卜卜


又買左三條白老鼠，專門捐沙搵野食，仲有就係乜都食，連“垃圾“都照食


缸水嘅清潔靠哂你地啦

樓下開左小甜谷

同一個星期，相隔一條街，兩間甜品店一齊開，小甜谷開正樓下對面，傳媒又勁煲，就試呢間先

呢間叫“西環“小甜谷，開頭裝修掛招牌，仲諗會唔會係冒牌，見佢掛哂明星相，應該係正牌啦啩！裝修企理，應該投資唔少，厨房四個樓面三個伙記，雖然夜晚見佢都幾多人，但條數點計呀？當$8000一個，人工都佔$56000，平均$25一個甜品，都要賣2240碗，計埋租同成本，每日賣150碗至唔駛蝕。。。


計下食物，店長推介，餐牌都無嘅紅豆紫芋西米奶凍，紅豆得幾粒，咁孤寒嘅，西米幾特別，爽架，奶凍perfect，整體都幾得，多三倍紅豆，我比你滿分！

招牌貨之一﹣薑汁潡蛋，奶味重蓋過淡淡薑味，但個蛋真係又滑又香


呢間晚晚滿，隔離冷清清，真係開不逢時

唉！附近咁多好野食，想唔肥都難！

方大同《可啦思刻》

方大同喺我嘅歌手名單已經跳升至第二位，僅次Ｅ神；個碟名又似"疴啦Ｃ黑"，梗要幫趁啦！


題外話：
但原來西環係八無架
1.無starbucks／pacific coffee
2.無ＳＡＳＡ／卓悅
3.無家鄉雞/齎舖
4.無california/physical
5.無BOSSINI/GIODANO／Baleno。。。
6.無戲院
7.無加洲紅／Neway
8.竟然無ＣＤ舖

拖拖拖到上星期至買到，聽完幾次，都係鍾意佢唱國語多Ｄ。。。始終都係聽紅豆，先睇廣告


一句：有屎吼，油屎後；唱出“味道“呀！正！

完

遺忘

原來上回日本番嚟，買落嘅手信剩番兩件，收埋跟住唔記得左，好彩未過賞味時限

小布施買嘅栗子，包裝精美，開左個盒，係個膠杯，拎開杯蓋，仲有拉橫，拉開先見到Ｄ栗子，入面有成粒嘅，又有磨成沙嘅，好甜，清黑嘅開心時刻即刻番嚟！


東京買嘅kitkat，有排未過期，搵日解決佢！


買左唔用唔食唔著擺埋一邊係我嘅壞習慣,呢樣都係。。。
同一個trip買，用左兩次又收埋，而家重見天日啦，搭車遇到嘈日必備


完

我的珍藏﹣傅珮嘉（少女革命）

話說嘉禾開左唱片部，搵左我去幫手攪呢隻碟嘅包裝，由搵拍攝地方跟影相揀衫做阿四陪唱歌執相做稿打歌詞跟埋印刷做海報做阿四出ＡＤ一腳踢，呢隻一定係我最珍嗰隻。咦！反而無簽名喎呢隻！




傅小姐一路都紅唔到，我“鄧“你唔抵架！

最近又開始有機會掂下ＣＤ packing，雖然唔係大路嘢，但好玩嘅job，係辛苦都值架！

係，我食壽司

對於怕腥多過怕Ｘ嘅我嚟講，入壽司舖真係挑戰；十幾年前同幾個朋友去東京壽司店，一入去，空氣瀰漫住魚嘅腥味，坐唔到5分鐘，標出門口嘔野收場。
幾年前跟朋友去元氣，其實幾抗拒，最後又ＯＫ，真係進步；而家間中都會去；咦！我可以食Ｄ乜呢？

我個朵係黃碟殺手，最平嗰Ｄ差唔多都食得，先嚟個蛋，呢個好呀，真係得蛋，有Ｄ懶高級落Ｄ蝦湯，破壞哂


腐皮壽司對我嚟講係十大美食，今次有新野，沖繩黑糖腐皮壽司，正！


繼續新野﹣湯葉，即係鮮腐竹，淡口Ｄ喎


炸蝦，海鮮之中，最接受係蝦，呢個炸埋，Ｄ紫菜唔腥，好味！


呢個極限啦，軟腳蟹手卷，呢間Ｄ蟹無肉，炸到脆卜卜，我ＯＫ架！試過Ｄ貴嘅，好多肉架，好麻煩


咁呢舊又點呢？


做多少少野，又食得


建議出午餐肉壽司，應該好好味！

得嘅唔得＊唔得反而得

星期六舊公司同事又嚟house warming，問細佬借左部Wii。。。其實咁耐我都未玩過


成班大部份都係以前網球班成員，梗係先打網球啦，由電腦配人，我呢組擺明錯配，加上間屋唔夠大，輸哂

接住打保齡諗住win硬，點知兩局都包尾，慘不忍睹

bomber man同以前無分別，都仲可以坐亞望冠

到奧運會，掂呀，標槍跨欄賽跑三級跳樣樣掂

跟住wii fit，現實中平衡力勁差，但原來呢組game完全靠感覺，體操滿分，yoga唔錯，呼拉圈贏到開巷，滑雪同高台滑雪直頭輕鬆都贏一條街呀！個兒戲step直頭一玩就滿分。。。

細佬，我係唔會還機住架！

關於工作

＊七月中開始未停過，做到唔夠瞓；

＊做左大量報紙稿，ＣＤ package, Calendar, Graphic Tees, Posters, Menu Design.....好似好多，但好玩嘅其實唔多，真係可遇不可求呀

＊突然朋友有長工介紹，諗左一陣，都係推左佢，試下自己可以做到咩野成績

＊之前一路忙，未有機會聯絡番之前Ｄ舊客，啱啱清左兩件job，係時候啦。。。

＊約約約，下星期係見客嘅一週

完

麵舖大搜查

下晝唔想食太多，通常會隊碗麵，帶大家睇下屋企附近有乜麵食，呢兩三個街口已經有幾間，仲越開越多，競爭大，自然價錢平兼有質數啦！！

１／家樂麵食
門口大大隻字寫住十蚊碗，我呢碗就＄１７，話係酸辣，但唔夠酸又唔夠辣，湯底用豬骨，勝在夠濃；
但對手實在太多，只得2粒半星


2/新記特式車仔麵，我搬嚟正係佢開張日子，食過咖哩豬皮，辣到過哂火，日頭唔多客，因為隔離間正過佢；
但隔離唔做夜市，所以夜晚佢又其門如市，只要唔點咖哩豬皮，其實佢都ＯＫ嘅。3粒星


3/隔離就係呢間麵食坊，裝修特點係無裝修格局，去親都旺場，勁！勝在湯底，好清，似豬骨，但有隻味食唔出，又唔好意思問老闆。
通常三餸加埋凍飲＄22，咁又一餐啦！4粒星


4/新昌發；又係新開一個月，最出名係潮州魚蛋，等我呢個怕腥嘅潮州怒漢會會佢！
個湯寫明豬腳骨，但有味精，Ｄ魚蛋真係做到有魚鮮但唔腥，魚片頭咬落爽呀！湯面加左炸乾葱同葱花，惹味左;
魚蛋粉＋凍飲又係$22，4粒星


5/權記，喺食蛋tart嘅祥香隔離，門口已經聞到梘水味，咁梗要試麵啦！一碗十雞，雙拼$15；牛筋同鮮牛肉就貴兩蚊；
見枱枱唔係雲吞就係牛筋，第一日食雲吞拼牛丸，雲吞真係多蝦，牛丸拍埋就遜色啦，個麵係靈魂，彈牙同埋係細個食過嘅味道，童年味道真係有錢都買唔到！第二日食牛筋，好膠呀！食左都靚Ｄ，呵呵！又平又好食，5星呀！


食完

Caffe Habitu

未家道中落時，成日會去銅鑼灣間Habitu食Brunch；呢間caffe越開越多，都未幫趁過，睇首映前決定試一次。。。


環境唔錯，裝修幾靚（但個厠所反而無乜裝修），雖然七成嘅枱都有人，但都好靜，正呀！原來Ｄ“曹“生“曹“太“曹“小朋友唔嚟呢間架！


先睇飲品，連朱克力都拉花，又幾靚喎！我呢杯係strawbeery favour ice lemon tea,好味，無攪勻，飲到最後兩啖好甜


食物﹣Bacon & Onion Quiche Square，蛋蛋好滑，Ｄ洋蔥係酸嘅，酸酸地，無咁“漏“；Lasagna係menu唯一無海鮮嘅pasta，都幾好味，雖然有Ｄ礶頭feel，肉醬都太多啦！


未夠鐘，隊多件blurberry cheese cake,飽哂，入場睇爛戲

机器俠

抽到戲飛，今晚去左會展睇首映；



去到展覽廳門口，突然記得以前曾經嚟過，似曾相識嘅感覺，終於醒起原來我上次嚟係用“工作人員“身份睇“安娜瑪德蓮娜“，仲要到最後因為太多觀眾，最後成行自己人讓哂出嚟，終於無睇，所以今次其實係第一次睇首映。（但係真係覺得自己有Ｄ老人痴呆，真係完全無左呢件事）；因為分1及2院放映，明星喺1，我喺2，只係喺入場見到蘇永康同Ｄ噏唔出名嘅奀星，仲有喺尿厠見到阿祖藍


講番套戲。。。

＊無期望都失望，個半鐘睇左十幾次錶
＊特技其實係得嘅，但係故仔。。。聊，有資金可唔可以砌個靚劇本先呢？
＊造型核突，方力申條眼線真係。。。妖
＊女角Ａ。。。娘
＊女角Ｂ。。。仲娘，眼袋大過眼，好天然無加工
＊呢句caption。。。骨痺


＊吳京打功夫係全片最好睇嘅一幕
＊笑料超ＯUT，但又有人笑喎；我笑左一野。。。當鄭中基嗌：哇！屎忽嘅時候
＊曾志偉擺明交行貨，四個表情做哂
＊係一部拍比大陸觀眾嘅戲，全片出現簡體字，國語歌
＊係一部拍比大陸觀眾嘅戲，所以內地應該收一憶，香港就。。。

我要繼續抽戲飛

完

厨房開光

呢牌做到攤攤腰，星期六日都要開工,星期六下晝決定偷一個晏晝出嚟relax吓；

行邊？近近地行鴨脷洲，行outlet，yeah! ＩＴ，ＪＯＹＣＥ，ＬＡＮＥ ＣＲＡＷＦＯＲＤ,
CLUB MONACO。。。等我呀！

結果，衫，一件都買唔到，我都真係超孤寒，行傢俬舖反而有得著，頂樓間tree，行完竟然有野派，個環保袋幾靚之餘，原來內裡有個花樽仔，啱哂我呀！我成日都話我返工都係做花樽架啦！


入正題。。。其中有間意大利超級市場，買左幾件得意野，今晚即刻玩煮飯仔
呢包係即食飯，以前喺加拿大會食，幾好味，睇下過程。。。


1.拆袋
2.倒哂落“獲“
3.加500ml水
4.我加大量白豆
5.間中攪下，但最後5分鐘要不停攪，直到Ｄ水蒸發哂
6.完成圖

好味！


完

無記Ｄ花旦

用高清睇“絕代商驕“，黃子華原來好老，姣佘粉好厚超殘；

曾幾何時，無記花旦陣容強盛，但跟住走下一個，走下又一個。。。

上一代而家剩返鄧萃雯，蔡少芬同宣萱，宣萱仲要一年先一部

關詠荷要湊女，間中拍下
陳慧珊當年扭計唔續約，而家又番嚟玩下
郭可盈攞唔到視后走埋，最近又客串下
張可頤病左要休息
吳美珩嫁人做闊太
黎姿又嫁人做闊太
蘇玉樺去左讀書
陳妙瑛做女強人
蒙嘉慧越做越沉
郭羨妮變大便妮再化身狐妮
簡直係逐個擊破
新一代咩。。。
楊思琦由女主角拍拍下拍入雪櫃
廖碧兒本來好地地又雪埋，不過最近好似話會續左
胡杏兒慘變胡囧囧
而家阿佘都殘埋。。。

唔怪得最近袁靚靚戚美珍關詠荷陳慧珊郭可盈同周海媚番哂嚟啦！唔通靠楊怡法拉子珊茵薇咩？

新房客

無入錯blog，唔係Ｘ粉先養魚架！


已經完全適應新居生活，決定養番魚；阿媽聽到我話準備養魚，即刻叫我攞番走我搬離天水圍時交托比佢嘅幾條魚毛；原來呢個只係佢嘅第一步，跟住有朝，佢連魚缸都送埋嚟，話係屋企多出嚟嘅，咦！個缸幾靚喎！跟住噚晚我番去攞魚，老豆同佢夾手夾腳將佢自己繁殖出嚟嘅幾竇魚入哂落樽比哂我，話我以前鍾意養呢種魚，幫佢地養，等佢養少缸。（佢地仲有四缸）

佢地叫“moon"，尾巴有黑點就叫米奇，熱帶魚，好粗生，呢度至少都四十條，數唔到啦！身長由1cm至5cm，暫時就好靚，再大就唔夠地方啦！


下面三條粉紅斑馬同一條黑燈係天水圍原居民，之前有六條斑馬，而家死剩三條咋！WELCOME BACK AH,四位


阿媽仲送粒黃金螺㖭，食青苔喎！我見佢喺度食紅蟲囉！


同Ｘ粉面對同一問題，有幾條魚仔細細，但個肚已經pump漲左，隔開養，希望開枝散葉啦！其中一條襯我落街食午飯竟然跳左落地，好彩番得嚟快，唔係就一屍十幾命啦！而家搵本書蓋住，無得跳！


完

幻象

人地就話幻聽啫，我呢幾日見到嘅野算唔算幻見呢？

今日踎塔時睇雜誌見到麥記廣告，介紹朱古力批，覺得ＯＫ喎，繼續睇細字。。。


竟然將段字睇成咁。。。


搭巴士見到對面車有雪糕廣告，第一眼又見到咁喎。。。



我諗我聽日都係放自己一日假抖下好啦！

我的珍藏﹣饑饉三十首ＣＤ

點解呢隻會係我珍藏？



＊張學友唱“一起走過的日子“？
＊劉德華唱“每天愛你多一些“？
＊三十隻當時最ＨＩＴ嘅歌？

其實呢，見唔見到好多手呀！有我隻手呀，搵吓啦！當時電台無電腦，仲係人手做稿，猛咁影印Ｄ手逐隻剪逐隻黐；個包裝係玩拆完一層又一層，三個人夾手夾腳，好快攪掂！

呢隻都應該係我第一隻有份參與做稿嘅ＣＤ設計，所以佢一定係“珍藏“啦！

未完，下星期仲有

關於睡眠

成日同人講，瞓覺同去廁所都係我強項；一撻落床幾分鐘就會瞓著，但就一定要夠暖囉，氣溫過低就瞓唔到，不過呢兩晚我都有開冷氣瞓，因為實在無風兼好焗。

最勁係無"生保"床，去旅行都瞓到“curt curt"聲；但酒店冷氣凍就陰公啦，成晚流ＢＴ，流到瞓唔到呀！夏天就瞓八粒鐘都夠,冬天就瞓十粒第二日都遊魂

自從變番freelance之後，而家起身無用鬧鐘，基本上都會8:30-9:30am自動起身，每日可以自然醒真係最大最大嘅福氣

咁,偶然都會強項失手，睇完鬼片，打波太劇烈，或者好似呢牌咁，接太多煩嘅job，又聽到朋友或佢嘅家人接連有事，多野諗咗，瞓差咗！

其實食得瞓得疴得，真係要感恩！唔係姓郭嗰個

完

強力推介﹣豬唉糟

今年至得係呢套，大量特技，雖然有Ｄ位睇到好假，但勝在無冷場，加埋型男索女，係今年唯一一套無睇過錶嘅電影。

中段暴走鬧市至炸毀鐵塔一段，係全片高潮所在，真係打到飛起，咪走雞！

尾段反而無驚喜位，非常正路；個結尾擺明有下集。。。正，我等你！

ps:今晚記得睇王老虎大結局，推佢上50點

完

尖叫先生

佢唔係周秀娜，佢洋名叫scream，四尺高，好型！


但。。。“尖叫先生"唔係沖涼，但點解會浸喺浴缸呢？唔通影寫真？


幾年前箱根買落，一路唔捨得用，噚日得閒，喺床底搵番出嚟，決定吹漲佢成為家中擺設，點知好快佢就漏氣，為求搵到漏氣位，掉佢落水，終於發現原來有個細洞喺正心口，而家暫時貼住張膠紙先。


有無人知用火燒一燒會唔會埋返口？

扮遊客

瞓得唔好，心情麻麻，全日都吽吽地；上晝收到朋友電話，有新客介紹，急急做哂手頭急件，四點約見尖咀；五點幾攪掂，決定搭香港最平,兩種交通公具﹣小輪＋電車歸家！

行過天星碼頭，太陽出番嚟，扮遊客影Ｄ維景相先。。。


今日影得幾順手

1/相遇。。。ＡＩＹＡ,好浪漫ah


2/候船室﹣1。。。影左一堆，越影越有


3/候船室﹣2。。。呢張幾好


4/候船室﹣3。。。呢張仲得


5/城市島。。。上船啦，天璽真係高人一等，有幾多層呢？



6/窗外。。。係唔係好似一幅畫呢？


7/遙遙對望。。。返到西環，天都暗哂，街燈著左，幾有feel


8/日落。。。今日無咸蛋黃落海


9/紅燈區。。。樓下海鮮酒家著哂燈，配黃昏背地，醒神


完