數碼港飲講食之奧壽司

數碼港真係一個無啖好食嘅地方，foodcourt嘅ＬUNCH廢到無倫，其他就貴到飛起，奧壽司叫好少少，但都要六十幾蚊以上一個ＬUNCＨ。。。門口有近牌衰多口嘅官恩娜海報，食咗會唔會衰多口架？



因為唔食魚同海鮮，可選擇套餐即刻減至得番三個，呢個係吉列豬扒飯，最好食反而係沙律


但沙律即將改為蟹子沙律，即係叫我唔駛嚟；日日無野食真係唔係辦法

廢噏2則

1則
哇哈哈，終於搭到傳說中嘅夢想號姨媽車，好緊張呀！


咦！無人嘅？姨媽呢？
-------------------------------------------------

2則
噚晚番老家邊睇新聞邊同阿媽打牌，睇到edison單新聞，個疑犯叫“史可雋“，我笑到停唔到，我媽問我笑乜，我話：史可“進“即係可退啦，即係縮番入去。。。同時間我打咗隻七索
家姐反哂眼
阿媽無反應，跟住翻牌嗌食，混一色對對糊
我肚都反埋

真係報應


完

LOVE SONG-1

呢牌見ＭＡＫＩＹＯ嚟香港宣傳新戲，哇！乜變咗艷星架！當年，賣點係日本妹唱國語歌,今日賣嘅係32E，唉！


出道時撞正同係新人嘅孫燕姿，一個彈琴唱天黑黑，佢就彈結他谷佢嘅第一ＰＬUG"養我一輩子“，一路比孫襟住砌，到第二ＰＬUG谷“存錢“，有力攞到冠軍歌，我都係因為呢隻歌買佢張碟。。。



睇睇個ＭＶ


再睇睇Ｄ相，好感慨啊


當年純情長腿日本妹，今日變咗谷胸小姨媽，真係女大十八變



川島茉樹代 存錢 （歌詞）

愛上你的那一天　你就叫我開始存錢　一天一塊錢　好計算相愛的時間
你說將來有一天　一定多如繁星點點　因為我們絕不會變

於是每晚睡覺前　總會看著你的相片　存下一塊錢　還存下甜蜜的感覺
每一天每個深夜　不管多累從未停歇　希望能一直到永遠

oh～　我多想問問你　如果我身上還有零錢　你會不會多愛我幾天
oh～　我多想問問你　如果每天存幾塊錢　能不能多愛你幾年

突然有一天我找不到零錢　就在這天深夜　你在電話裡向我說再見
你說已有另一個人從今天開始　為你每天存一塊錢

呢篇應該無人話我爛啦卦

shopping魔的告解

去旅行見野就買已經唔啱，買咗唔用放喺到“嘔"就真係罪過。。。

舊年英國habitat減價貨，燈泡會有花架喎！好靚呀，買！
一擺一年，為咗影呢張相佢終於著咗佢嘅第一次（之後又pack番埋）
之後喺泰國見過Ｄ近似嘅，忍咗手無再買


巴黎買，入面係有味嘅水蓋，“樓“落枝膠樽水度就會變有果汁，呢個月到期，我會飲架啦


上個月高雄買，買咗又唔食，過咗期兩日，我今日會食架啦


07年10月日本買，原封不動，其實我仲有十“令“包茶葉，點好呢？


08年4月曼谷買，貪得意，又係月尾到期


一樣08年4月曼谷買，袋都未拆


呢批都係曼谷，不過係07年，諗住扣喺Ｄ袋呀衫呀，結果不見天日


又係曼谷野的禍，屋企除咗洗面膏，呢樣都係重災區，Ｄ香呀，香精油呀，蠟燭呀咁，多到我諗日日點都要點一年
呢盒當然未郁過，幾時輪到佢吖


未完，呢篇都有續集，羞家

劍橋ＦＥＥＬ的早餐

我四歲之前住喺華富邨，所以留有深厚感情
屋企人得閒就會講番呢個笑話，話我啱啱識行嘅時候，爸媽帶我同家姐落樓，轉眼就唔見咗我，後尾發現我坐咗喺麵包舖門口執地下Ｄ麵包皮嚟食，仲食得好好味咁款。。。

而家因為公司近，每星期會過嚟食一次早餐，最鍾意嚟呢間。。。銀都冰室
覺得佢似層相識，會唔會當年就係喺到執麵包皮呢？


問老闆娘冰室開咗幾耐，答案原來同我同年架。。。
華富人口老化，成間都係伯伯嬸嬸，好有劍橋ＦＥＥＬ


每日開工前食個大早餐，心情會好Ｄ。。。今日食嘅係沙爹牛肉通粉＋煎雙蛋，通粉賣相唔得，但其實好好味架


諗住搵日得閒番去尋根。。。

完

拆利是

新年後忙呀忙，唔得閒拆利是，今日終於有時間，即拆。。。

收獲豐富
利是47封
總數$2880
多謝哂


卡威治問有三千蚊會做乜，咦！差$20咋喎，買乜好呢？辛苦咁耐送樣野比自己都好喎；
我想買。。。
MacBook Pro ﹣要補好多差價喎
相機 ﹣都要補千幾
錄影機 ﹣呢個我唔知價
高清電視 ﹣買唔起喎
換過個電話 ﹣呢個一定得

買齊以上咁多野要幾多錢呢？買哂得唔得呢？

漏咗最大project，想今年換樓搬番出市區，真係要加把勁

花灑

層樓住咗十年，歷盡風吹雨打都無人理，個花灑架鏍絲生誘，都話唔好借力咯。。。
aiya aiya咁就“冧“咗

呢件事發生喺初二，拖到今日落街市買過個新嘅架，換埋個按摩花灑頭，上門裝埋都係$230，果然係屋邨街市


唔寫啦，沖涼嘆番吓先

點隻歌陪我沖

慶祝

海嘯殺到嚟，十一月仲講緊接單成績有進步，十二月即仆到盡。。。公司即時裁走幾個同事，心情難受，保得一個得一個；所以對於上星期嘅會展，事前做足準備，比足心機度橋，計哂十萬個可能性，因為唔希望自己或隔離嗰個成為下個被裁嘅目標。。。


結果成績今日正式公佈，僅僅再好過上次十一月嘅紀錄，真係超超超超超開心，老闆仲開埋香檳慶祝，一開六枝，配埋士多啤莉，好味，添飲再添飲，結果成朝做野慢吞吞。

今次事件我個人有個得著，就係要做一定做到；
由第一次會展只識執枱做阿四，到上次派catalogue拉客比同事，到今次熟讀資料，拉客兼sell埋，最終做到兩單（一單朋友介紹），另外嗰單個客真係唔識㗎喎，做成嗰刻開心到吖！（不過我無佣分，所以送咗比其他同事）

不過三月又有會展，今年要打七場硬仗，各位唔該提供Ｄ減壓嘅方法

改名令性格改變？

見到ogake個blog，玩姓名學個性分析，我又試。。。
但我小學時改過名，有無影響呢？


新名。。。內在想法
*善於思考且非常懂得去摸索及研究
Ｎ：好似係喎
*心思細膩，而且毅力十足
Ｎ：都算係
*善於溝通與說服他人，人際關係良好
Ｎ：一般啦，大部份都良好嘅
*有時想太多讓人覺得優柔寡斷
Ｎ：唔係啦
*個性溫和，表面上會接受他人的意見，但內心還是堅持自己的
Ｎ：中哂

舊名。。。內在想法
*個性比較保守、且內心非常小心、謹慎
Ｎ：唔係
*外表看起來開放、隨和、主動積極有活力，但私底下卻是被動、且思多行少
Ｎ：前半好似中，後半唔多係
*頭腦很好、數字概念很強
Ｎ：我係數字白痴
*太維護自尊，讓人覺得很好強、太愛面子
Ｎ：出咗名唔要面喎
*頭腦清楚、聰明反應快
Ｎ：唔算聰明

新名。。。外在行為
做事情一樣一樣慢慢來，討厭亂七八糟沒有規劃
Ｎ：中哂
*不怕吃苦，是個有責任感的人
Ｎ：中哂
*家庭觀念比較重，保護家族的意識強
Ｎ：中哂
*處事規規矩矩，不會投機取巧，是個好公民
Ｎ：中哂
*是個長輩眼中的好青年
Ｎ：全中喎

舊名。。。外在行為
*一向非常安逸、隨和，相當樂觀
Ｎ：都算
*本身沒什麼憂患意識，總是相信事情到了最後一定有解決的地步
Ｎ：危機感不知幾強
*不喜歡受約束，愛好自由
Ｎ：咁呢樣實係
*做事保守、不容易衝動，會先收集資訊再決定怎麼做
Ｎ：中哂
*理想抱負很多，講得很有自信，但壓力一來逃得比誰都快。
Ｎ：唔係喎

總結係。。。幾中喎，好彩改咗名咋

我的工作-2

同kelly合作過三次，第一次係雜誌封面，第二次係演唱會ＤＶＤ設計，第三次係服裝代言人。。。

今日show個ＤＶＤ出嚟講吓，因為環球賣咗個版權比現代，我呢Ｄ卡拉蘇先有機會接嚟做；
其實其後第三次合作時有諗過拎呢隻碟比佢簽名，但怕瘀，驚佢話："原來你做架，咁ＸＸ"，咁就真係搵“洞“捐


同期仲做咗隻安仔，睇番原來已經係02年嘅事啦！


現代Ｄ job非常多元化，又係得閒至講

關係

佢地係咩野關係？
一齊上巴士樓上，
男嘅坐樓梯前一排，女嘅坐樓梯後第三排，
但係個男嘅又要擰轉面傾計，傾足全程，唔攰咩?


會唔會係。。。
A/個女嘅有心避開個男嘅？
B/偷情驚比人影到相？
C/互相嫌棄大家體臭,要坐開幾行？
D/其他（請註明）



開始投票，廿四小時後截止

囧

同事話我呢牌成日變“ 囧"樣,係咩？唔多覺喎！
但睇番台灣Ｄ相，又真係成日皺哂眉，



咩野原因呢？
A/壓力大？
B/發燒？
C/年紀大？
D/All of the above?

我剩係知今日真係真係好攰

完

露毛寫真

去旅行除咗帶我部pansonic，多數都帶埋架LOMO，貪佢有一份神秘感，似玩具多過似相機，好玩在直頭唔知影咗乜；

以下呢幾張叫做見得吓人：

攝於某一年嘅嘉道理農場


七年前倫敦公幹，無私人時間，張相係搭緊的士時影嘅;去親倫敦都好天架!


一次好滿意嘅布吉旅程，六年前啦


一卷菲林橫跨兩年，左面立山嘅可以用全軍覆沒嚟形容，右邊係新鮮嘅墾丁燈塔


其實多唔多人玩lomo?

借＊還

十月時鄰居兼同學又係朋友打嚟問我借錢，週轉不靈喎，仲要一借就七皮，真係好猶疑囉；試過借完錢唔肯還，朋友都無埋。。。

但係最後都係借，只係開出一個條件，就係要寫借據，要有全名，身份証號碼，幾時借，幾時還，簽埋名。
其實即使係咁都唔係咩野保障，但總算有張借據揸手。

十二日到期日，只係還到一半，今日全數還清，真係開心喎，真係唔係呃我錢，仲請我食飯呀.

鬆哂

高雄墾丁攝影集

旅行好多時都唔係影名勝，影埋好多無無聊聊，比人睇都唔知你去咗邊樹旅行嘅相。。。阿媽話我有問題,你地去旅行唔係咁架咩?

往墾丁途中


摩托1


摩托2


0.95K


鸚鵡


公雞


古老民宿


死狗


最愛三張。。。

花•葉？

>

鏡後


屋頂上的花貓


高雄墾丁全部播影鉛筆，多謝收睇

高雄墾丁海角遊（第四日）

一早起身，好似真係好番喎，食咗簡單早餐，出發去愛河，無野睇嘅？


今日天氣轉涼，見書介紹呢間，聞到都暖胃，梗係食啦！好好味呀，其實似糯米飯，碗湯我自己加咗大量胡椒粉，暖笠笠


今日重點。。。駁二藝術特區；以前係糖廠倉庫，而家發展為藝術家落腳地


見到有職員小弟開呢部機，10台幣就有得玩，即玩，點知職員小弟竟然免費比我試玩，正呀！睇吓我嘅紀念品
職員小弟仲詳細介紹呢個藝術特區，話係參考香港嘅牛棚（唔怪得之無咩野睇），介紹其間，發現佢同我同姓架，親戚呀！


跟住又係食，因為呢區超多小食，呢間就係高雄婆婆冰啦！我啱啱好番Ｄ，都係食經豆沙算啦，不過都試咗兩啖招牌貨﹣李鹹冰，真係好得架


繼續食，阿進切仔麵，又係食到唔停口


下一站，大型商場﹣夢時代，好大大大大大呀


先去“天仁“嘆茶“，跟住直奔上頂樓。。。遊樂場；摩天輪慢吞吞，興趣不大


高空彈跳就唔同啦，話有60公尺，所以當彈高時真係睇哂高雄全景架，嗰吓離心力其實唔算勁，大家不妨試試


行咗一陣，番酒店去機場；

墾丁。。。我會搵次夏天再嚟，等我

完

少飯？

太興見到呢張poster，原本想支持，但係睇清楚。。。


細碗裝多Ｄ，大碗裝少Ｄ。。。點會少飯呀?