Saturday, October 31, 2009

關於工作

接到我個客急call,話雖然添左新相機,但係相嘅質素反而差左,想我過去睇睇兼教下佢個新同事影;哇!嚇得我吖!邊有資格教,但點都要睇下部新機咩野事。

去到,公司細細但架生齊全,有燈有機有柔光箱,好耐無玩過!真係喺度玩,終於影左一大堆,最後我只係揀左呢張做下星期出街嘅ad,不過要過佢老闆嗰關!



癮起,係咪應該添器材,撈埋影相呢?

Friday, October 30, 2009

殺塵蟎

討厭嘅鼻敏感,遇到多塵新裝修轉天氣就會係咁打噴嚏;
朋友敎試下用滅蟲噴霧,殺左屋企D塵蟎,可能會好D喎!睇下點!

Thursday, October 29, 2009

好多人都鍾意秋天,我呢,四季入面最憎就係秋天,比冬天更憎;好似等冬天嚟咁,感覺似等死

呢兩日鼻/眼敏感又嚴重番,又要食番鼻敏感藥;一係就鼻水長流,一係就鼻水乾左變BC,撩得多又見血;

越瞓越多,夜晚瞓9個,晏晝又會突然急call,又瞓多一粒;

日日對住D流水作業嘅工作,悶出雀來;乜要D好玩嘅job變得咁艱難!

今日晏晝瞓醒,落街食野兼行個圈,影下野草


影兩野,發下夢又黃昏啦


我睇雀仔睇黃昏,真聊

Wednesday, October 28, 2009

可爾必思勁敵

繼可爾必思後又一新作,雪印出品﹣思敏兒2
正面讀:思想敏捷嘅兒童
倒轉讀:易敏C;


slogan可以係:飲思敏兒,易敏C

Tuesday, October 27, 2009

心目中的宮心計

霸王硬上弓中風洗髮露咪咪特約

Sunday, October 25, 2009

愛情陷阱

埋嚟睇,埋嚟睇,有人跌落愛情陷阱


三位阿sir,究竟邊個遇到愛情騙子呢,從面相睇真係叮噹叮噹有個愛海嘅叮噹馬頭;好難估

Saturday, October 24, 2009

一份過期全餐吖,唔該

今晚無出街,又無買餸,決定清哂屋企D過期貨

先來一客買左8日嘅西瓜,無壞,而家D生果咩構造?擺得咁耐嘅?


加兩大碗噚日飲剩嘅湯


一籠晏晝飲茶食剩嘅馬拉糕


飲品係抽獎嘅咖啡,20號到左期,最後一枝lu


甜品係半個月餅,死未?


~

Friday, October 23, 2009

進補

俗語有云:秋冬要進補;橫掂坐喺屋企做野,煲多D湯水飲下先!

去卜佳超級市場見到補健湯包,哇!$29.5有蟲草呀,實唔係靚野啦,佢寫係草石蠶(地蟲草)喎!
細個飲過一次蟲草,好好味架;封面又寫住養氣生血,滋陰補腎,散熱止咳;終於都買包試下


入面分哂一包包,好整齊,但係見到有巴戟同杜仲,咦!印象中唔好味野嚟架喎!加舊大豬展,慢火煲佢三粒鐘


一煲,藥材味出哂嚟!但我自細係藥煲,鍾意飲苦茶多過魚湯,應該唔怕嘅!
煲好,唔記得落鹽,但試味發覺超濃,唔駛落鹽,但好甘,帶甜,今勻真係苦中一點甜呀,糖蓮子


飲左兩大碗連渣,D蟲爽架喎!飽哂!剩番咁多,聽日繼續

Thursday, October 22, 2009

天氣的錯

下晝,去了旺角update一堆software,點知遇到技術性問題,臨時需要買多個外置hard disk,點知。。。

自己知自己事,已經著左外套,但係商場焗,條街凍,咁就吹親

跟住去中環接job做,已經“溫溫鄧“,好彩食完餃子酸辣湯湯後,回到魂,返到屋企仲趕到睇宮心計,不過我好飽,飯氣攻心計;寫完呢隻字,食粒藥,速瞓。

Wednesday, October 21, 2009

咩野世界呀而家

體育館附近掛滿政府D公民教育banner,唔好亂拍單車呀,唔好椅上躺臥,我都明。。。


但係呢張。。。
吓!唔係咁都要教呀!駛唔駛掛張唔好隨便大便呢?仲有呀,擺明性別歧視呀!投訴呀!

Tuesday, October 20, 2009

流離浪蕩 2

星期日。。。
今朝瞓到六點,凍醒左,瞓唔番;早上八至九,打完羽毛球,飲完茶,本來諗住再瞓;但係出面咁好太陽,決定去HKU行個圈。。。
無乜人,個原來唔係好多野影,知道HKU嘅得呢兩張




一路行一路影,見地圖話有荷花池,去睇下,點知花都無朵;打比ogake,睇下佢有無推介,點知佢話佢喺黃金海岸,我估佢應該又拍緊廣告


oagke介紹:梅堂
成座building都無人,搭lift時諗如果困lift就死火啦!


去完梅堂,繼續上,見到龍虎山晨運徑,見到龍虎兩個字,決定再上睇下見唔見到豹


條路無乜特別,但沿路都有耶穌光,但影相出唔到


下一站松林廢堡,行到索哂氣,但真係無乜料到喎!


沿路好多蝴蝶,廢堡見到呢對,喺附近徘徊左好耐!當時哼住:如何回到當時 拿回時間逆轉的鑰匙。。。


頭頂成日有鷹飛過,唔通前面有傅CC?


終於行左一半,水剩番一啖,個人又唔夠糖,唉!腳軟㖭!得D無糖薄荷糖,頂住先!


可能狀態麻麻,一路都無乜野影,只係影左呢張


到啦到啦,做吓遊客先,第一站入burger king醫肚;噚日啱啱食左漢堡,今日食蘋果批同洋蔥圈先,杯大可樂飲完竟然都唔夠喉


條纜車人龍長到癲兼要$22,改巴士落山,$9.8,平咁多喎!

番到屋企,沖完涼,即大昏迷

Sunday, October 18, 2009

星期六檔案

星期六,無節目。。。原定星期一送嚟嘅電腦提早送到,即開,好靚仔架呢!

試下自己攪掂D上網同電郵,以前好難攪,今次竟然一take搞掂,好彩我用temple;睇下第一封e-mail係邊位先,原來係似有幾分temple沙灘女嘅ogakx。


工作檯變左咁,以後多多合作啦!


有D software要upgrade,去中環朋友office,攪掂佢帶我去擺花街搵野食,佢推介我食burger...
間舖有all day breakfast食,個big big breakfast大到嚇死人,全店一個本地人都無;我點左煙肉burger + chips,好好食,飽到吖!


接到電話夜晚有戲睇,唔駛吽菇;出開嚟,先去剪個髮,再去旺角濕平;
買本2010schedule,唉!咁又一年
天氣乾燥,買枝潤唇膏
再買枝Aquapower,扮金城武
再買幾本書,慢慢K


睇戲,單身大急救,其實幾一般,得啖笑
睇完,食飯,朗姣坊地底食拉麵,對我嚟講,拉麵只係配角,麵餐加$15嘅雪糕至係主角,番石榴味,超正!


喺呢個仲未知,星期日至係吽菇日。。。

Saturday, October 17, 2009

長者

仁者則無敵
醫者父母心
歌者會戀歌。。。

咁長者呢?
長者$2四圍玩

咁要幾“長“呢?無寫嘅?

Friday, October 16, 2009

流離浪蕩

中午。到中環簽字,攞到賣樓嘅大訂,終於可以還錢,舊錢轉手就無左,仲欠一大舊。。。
到中環攝影師朋友office,上網訂新電腦,始終電腦科,佢最強,咁就無左皮幾,始終係搵食用,唔慳得!
見天氣幾好,無乜風,今日又得閒,喺中環行下,無乜目的,見靚就影!


跟陽光行,嚟到終審法院


喺隔離嘅聖約翰座堂,第1次入去,原來幾靚架喎!坐左一陣,感覺平靜哂!


影到唔停手,途經landmark,地下有彩虹喎!


行到IFC,本來想去佢同碼頭之間嗰堆放草地嘅藝術作品,原來無路行去,香港攪藝術,唉!


再去,中環街市;咦!夢中見到嘅鐵線玻璃,呢度有呀!


再上,又到返味道濃郁嘅史蹟徑,發現盂蘭會都有舖架


越行越遠,嚟到醫學博物館;條鐵造樓梯好型呀!


一路都係隨心行,反而行D未行過嘅小路,幾多新野睇,好似呢個,叫勝地,但係廟嚟架喎!
行住D陌生路,出番嚟,原來已經係蓮香居,西營盤啦!


後記:今日嘅天氣=今日嘅心情,表面上陽光燦爛,其實有一大片煙霞,要撥走煙霞,需要一點時間

Thursday, October 15, 2009

MR. BRAIN

從朋友處借來MR. BRIAN,一套八集,分四日煲完;之前一路聽人話係copy伽利略;雖然木村都係做科學家,但成套片陰森好多,有幾集要估凶手,加上大量血漿,我覺得似大人版金田一多D


木村個造型今次真係有D失手,著修身西裝加吊腳褲,真係有D勉強,加埋成日拍埋凌瀨遙凌同水鳩Hiro度,就更變大叔啦!

大綱係講木村因意外,腦部變得比常人發達,做左腦科學家,幫警方查案。


每集故事都編得好吸引,好似第二集。。。講死去嘅殺人犯,幾年後復活犯案,現場留下大量指模。。。呢集極力推薦,睇到有D驚。(呢集客串嘉賓有小雪,GACKT,兩個都好掂)

另一集單位內發現屍體,現場只有一個失憶鋼琴家,佢記憶只有一小時,佢唔記得佢有無殺人。。。

十歲小女孩被縛票,十五年後逃走出嚟,將仇人逐個殺;呢集係講人格分裂。。。(呢集係仲間由紀惠個人表現,亦係我極力推薦)

客串嘉賓非常強勁,除左小雪,GACKT、仲間由紀惠,第一集有廣未涼子,第三集係龜梨和也、相武紗季,第八集係大口仔。
印象中仲間由紀惠同木村無乜合作機會,只有對打成份;有兩季嘅月九,木村嘅對手都係仲間,所以未睇前,一路好期待呢!角色關係,仲間贏哂!睇到有D打冷震㖭!

有機會睇下啦,相信無記都會買嘅,不過可能放唔到合家歡時間啦!

最後,想講唔知點解每次打字想打brian,都會打左brain,今次標題打MR. BRAIN,我又打左MR.BRIAN,好彩出街前發現;
唔通係打字障礙症?

睇落真係唔多覺打錯架
Related Posts Plugin for WordPress, Blogger...