萬聖節精選﹣湯寶珍新動向

自從“紅葉瀛風”之後，chok聲珍消失左喎，好失落呀，究竟去左邊呢？


上星期去馬鞍山，終於見到你啦～可惜我唔係呢區吖，無得投你一票呀！


咦！佢真係好鍾意紅色喎～

萬聖節精選﹣魔鬼山有個巴士站

早前再戰魔鬼山，沿另一邊路上，行左40分鐘，差唔多到頂之際，見到。。。


沿途行山徑，點解會有個巴士站嘅？真係好驚囉～起嚟遮陰嘅？但又凳都唔比張喎


個頂有哂logo架，仲有個巴士號碼牌㖭，唔通係夜晚先接載往返兩地嘅“直通”巴士？

萬聖節精選﹣馬鞍山有兩個disco ball

上星期，行上馬鞍山郊野公園，原來個公園喺山腰，條路又長又斜。。。

行行下，山旁竟然有兩個大波波，呢兩個咪係disco 閃閃波嚟，點解會放喺山呢？唔通呢樹開過party？
呢個近村口，隔離係巴士站。。。


呢個喺草叢，日曬雨淋都無人理


直徑近四尺架，其實掛佢喺戶外搵燈射下佢咪好型，戶外的士高呀


預告：臨近萬聖節，遇到怪事一單怪過一單。。。

慳D啦。。。baby

強烈推介Kiehl's個app,兩個星期就送一次贈品，需然要去佢門市攞，但佢多多分行，登記個電話就攞到；呢排有無人覺得我滑溜左呢？

唔止得咁少，有D用左咋～


繼續6:30pm行惠康，今次執到一包船襪，拎上手睇下，哇！$9.9有三對呀，每對著兩三次跟手旅行掉埋都抵啦下話～


滴露沐浴露，平極藥房都要$27一樽（650ml),呢包補充裝（550ml)都係藥房買，全英文，馬來西亞公司但大陸做，你估幾錢？



$12咋，你話個樽幾貴吖，入番落舊樽就用得，較環保又慳錢，一舉兩得呀真係

你地有乜慳錢招，分享下好喎～

車禍現場。。。

一早要開工，8:45AM搭巴士,行左兩個街口，仲見到電車站好多人爭住上車，有個師奶又上又唔上又想搭巴士標過馬路，個心仲諗緊咁樣真係遲早車親呀。。。


再行半個街口，巴士準備埋站，我見有架電車停響度，無人架喎，有個男人面向天半個身瞓左入車底，我仲估佢整車呀，巴士慢慢行正佢面前，見佢暈左，個頭流左兩行血，塊面污糟哂，隔離個女司機個樣好焦急咁，我先知佢撞車呀

奇怪係，電車上無哂人，但無人幫手或圍觀；而佢瞓果個位，即係比車轆過呀？好驚呀；隔左一陣，警察就到啦

而巴士亦離站啦，啱啱上車嘅兩個男人見到撞車，走左去樓上車尾，跟住打比人，對答如下。。。

男：巴士站撞車喎，你見唔見到呀？邊個嚟架？下？阿德嚟架，死囉，梗係追車啦，佢有無事呀？。。。慘囉慘囉（但佢地無諗住落車幫手喎）

收線後佢打番公司。。。

男：喂，門口撞車呀，阿德比電車撞呀，你出去睇下啦；佢今日梗係番唔到啦，仲番到工咩？（公司只係關心有無人番工咋，人情冷暖）

可能嚇一嚇，今日心不在焉，佢個流血樣直頭印左喺腦入面，清楚到畫番出嚟都得，好彩。。。

歸家後上網search呢單新聞，話佢奇跡受輕傷，都安樂D

工作紀錄﹣影靚女呀今次

多得隔離台阿fun介紹，第二次正式影人像啦；今次係國際小姐澳門代表winnie sin,個性活潑又上鏡，呢次合作非常順利

其中呢張大家幾滿意之餘，直頭出埋雜誌稿啦；係我第一張有錢收嘅人像相，yeah~


另外呢張我都幾鍾意：）


見佢勤力又有潛質，拉埋我攝影師朋友同佢公司嘅化粧師落水，再影一輯；大師出馬兼winnie減肥後狀態大勇，效果再好D

幫佢砌左張咭派比大會有關人士，出嚟效果滿意：）



嚟緊都傾緊D影相job，希望成事，做多瓣，好貪心：）

最後，麻煩大家，Winnie正在成都參選國際小姐，投票正式開始，澳門小姐暫時排第四，方便嘅過去幫手投幾野，每一分鐘已可投一次，得閒就投幾野啦，thanks:)

緣

咁多人關心黑仔，先送上佢“幫趁”新貓廁嘅靚相一張，都真係叻喎，唔使教，識自己入去攪掂，聰明


好，繼續講”黑仔“；有D位好奇怪，我記得當佢睇完第一次醫生之後疑似又出事時，我同佢講：喂，我無錢成日帶你睇醫生架，你亂食野你死梗，你想唔想跟我番屋企吖。。。呢一刻，佢竟然咬我，雖然無損，但都痛果隻囉，佢從來無咬過我，我理解為佢唔想跟我番屋企囉；但宜家諗番，可能其實佢係答“好”囉

又，再玄D嘅一個緣；呢本係我09年嘅隨身記事簿，點解會買呢本野，係因為我有個舊同事兼好友叫“noro”，呢隻貓又叫noro，所以諗住送比佢，結果約到4月都見唔到佢，於是自己用左；睇下封面隻貓，仲唔係黑仔，緣份早種呀；


既然養得佢，聽過幾個朋友意見，唔好黑仔黑仔咁叫喎，改個名啦，英文就叫noro啦：）

中文又如何呢？

家姐話唔想黑黑聲就叫相反喎：”白白“
又因為佢已經識聽黑仔呢個名，想改個差唔多嘅，朋友建議：”小黑“
佢成隻豹咁，我又想改做：“豹仔”
佢曬到咁黑，不如叫：“古仔”啦
又因為佢成日屙，佢一屙完我嗌佢：“屎男“，佢識望住我喎
嚟我屋企頭幾日成日放屁，我又嗌佢：“屁男”
如果用英文noro諧音，咁可以叫：”裸露“喎
餵貓阿姐幫街貓改名係攞隻貓D特徵，例如隻貓捲埋條尾就叫捲尾，條尾郁就叫郁尾。。。咁黑仔條腸塞係咪應該叫：“塞腸”呢？
而餵貓阿姐以前一向嗌佢：“烏卒卒”


你地話呢？比D意見啦：）

黑仔近況﹣3-以後跟我啦

接上集，第二朝起身，除左因為個貓廁係一個無蓋櫃桶，佢屙完挖砂撥左D出嚟外，一切安然無恙；不過真係屙好多，臭囉～


又驚佢抓我張梳化，我同佢講，你抓就抓塊貓板，唔好抓我張梳化呀，佢又好似識聽咁喎，佢而家成日都抓塊貓板


我雖然喺屋企做野，但有時都會出去開通頂或者出去玩，咁啱有一日真係要離開24小時，放多左糧同水，比佢自己喺廳活動，第二日番嚟都無事，好乖仔


本來真係無諗住養佢，因為佢同其他貓好friend，但佢又乖又聰明識聽人講野，兼非常痴我，真係唔忍心放番佢出去，驚佢亂食野實短幾年命；
佢鍾意睇電視，當然同我一樣睇無線啦，睇亞線我一早掉番佢出去啦；睇電視時佢鍾意挨住我，隻手仔仲要搭埋上嚟㖭


就算唔挨住，條尾都要搭住我隻手囉


雖然一個人住，但都同屋企人商量交帶一聲。。。黑仔，我決定收養你，以後跟我啦：）

全家福祿壽...住劏房

先講電視果套，荃家福祿壽探案。。。垃圾，真係好垃圾；由扮鬼扮馬喺台慶表演爆左出嚟，到有自己嘅節目，繼續大受歡迎，拍第二輯，拍電影，去埋紅館，一路都過關，今次電視劇，真係慘不忍睹喎，硬滑稽成咁，點笑得出呀，相信呢套電視劇可為福祿壽嘅人氣劃上句號啦：（


再睇下以下呢個全家福祿壽，上星期一場接一場大雨，行經垃圾站兼地鐵地盆門口，見到福祿壽迫喺一個膠盒度，福祿壽都要住劏房，你話係咪慘先，仲要浸哂水㖭，相信果日嘅雨量有四寸呀；堂堂福祿壽比人攪成咁，我拎番佢出嚟排排企面對住條街，而家好威武

黑仔近況﹣2-寄人籬下

10月10日，問義工阿姐借左個貓籠，抱左黑仔入去再去睇醫生；醫生話佢條腸又塞過，不過未去到上次嚴重，要留院觀察兼同佢通便；同時向我建議養佢兩星期，等佢食足藥，食高纖貓糧，同杜絕佢食沙草等雜食。。。

OKOK，第二日，接佢出院，再借個大籠困佢喺我屋企過夜，識喺有貓砂的盒大便，但。。。。好好好臭，果然係宿便

第二日，關哂窗，試下放佢出嚟行下；咦，無發癲識返貓砂盒大便乖乖坐喺梳化喎，好乖；放塊貓抓板喺地下，佢又識抓板唔抓梳化喎。。。

夜晚再困佢入籠，第三日買左張地毯鋪梳化，佢即刻上去坐，好似覇定位咁喎；但同時間，可能食左藥，佢一日屙好多兼繼續勁臭，唉～仲有時因C太稀，個patpat吊住D，我要幫佢“敏”呀陰公，陰公果個係我：（


第三晚佢唔肯入番籠，比個測驗佢，關哂所有門，比個廳佢活動，睇佢有無作反，我就關門瞓，第二朝個廳會變成點呢？

比你地估。。未完

500両金嘅小熊維尼

連續三日金舖開工，今日第一日，攰到呢！

見到呢隻放喺K11嘅展品，人咁高架，好可愛呀，但真金嚟架，好貴呀，500両金架，樓都買到層啦，會唔會真係有人買呢？

買左可以擺喺邊呢？睡房？

廢話午餐

某一個上晝，上左廣告公司接job開左個小會；因為成日有job比我做兼真係幫我好多忙，開完會我請兩位老闆食晏。。。

大家都係廢話人一早知；其中一個老闆，上次我上佢公司時聽聞佢有事入左院，今日當面問侯佢。。。

我：Z，上次做乜入院呀？
P（搶答）：佢係咁架啦，生日呀，有人請食飯，人出錢佢出命，食到入廠呀？
我：下？即係食得太多呀？今日我請，我咪好危險
Z：連食左幾日，日日食得多又飲酒，個胃一向都弱呀；醫生開D胃藥咋嘛
我：哦，胃弱要食胃藥
Z（白我眼）：咁醫生話嚟到順便check埋其他囉（跟住電話響，佢講電話）
P（興奮）：所以醫生順便check佢有無子宮頸癌（Z係男架）
我（好興奮）：哦，食得太多，“屎攻頸”癌，哈哈哈
P（好好興奮）：佢係一個“屎攻頸”男
我：好名呀，yeah~

難得Z聽完電話都覺得“屎攻頸”男呢個名得喎，你話呢D咩野公司嚟架

開心真係好簡單囉，呵呵～

完

黑仔近況﹣1-便乾奇案錄

9月頭，街貓黑仔出院後，我每星期去五至六日，餵佢食藥，餵佢食高纖貓糧


但餵藥情況其實唔算理想，一來每日應該食兩次藥，而家只做到食一次，而每次佢都未必“中計”食哂D藥，好攰！

約九月二十日，佢又開始食少左野，摸佢肚dum，真係又實番咁喎；點好呢？又睇醫生？決定上網搵料先，最後用到呢樣野。。。甘油浣腸劑

以為好難用，第一次趁幫黑仔按摩，一野塞落佢XX度；第二日，佢比我按摩時轉了姿勢，XX向下，好死聰明囉！
但我當然夾硬嚟啦，之後見佢肚皮鬆番，食番野。。。


其他貓都有飲水，唯獨佢好少見佢飲，呢個可能就係個問題；


但9月尾，佢又唔食野兼唔想玩㖭，連塞佢XX機會都唔比我，點好呢？

呢個“便乾奇案錄”會點發展呢？


未完

子貓物語。。。貓B搵人收養最新情況

終於有太陽，可以影下貓B；佢地9月2號出世，45日啦，個樣肥番D，靚仔左；

因為貓B未落地，有D朋友曾經聯絡過我，但最後有D無左消息，有D又已經收養左其他貓，至今只有其中一至兩隻有人肯收養，其他嘅，可以嘅話我都希望幫佢地搵到有緣人，搵住好人家，有興趣收養嘅請聯絡我，謝～

而今日佢地短短露面20分鐘，但我已經影左一輯非常滿意相片，睇下可愛貓相啦

我幫佢地分左號碼，方便記認。。。
3號，呢張我愛死呀


上2號下1號


上2號下1號


上2號下1號


2號，佢可能係最幸運架，有朋友想要呀


3號


左3號右4號，4號應該係仔嚟架


前3號後4號


左起，4,3,2


好少機會可以影貓B，真係一個好好嘅體驗：）

那些年，我們一起追的女孩

朋友抽到星期日優先場戲飛但有事去唔到，我冷手執個熱煎堆呀，yeah~煎堆




想睇有幾個原因，一來台灣大賣，大賣總有理由，二來，睇佢片頭，見D攝影靚喎，景靚喎，人都幾靚喎

柯震東，難得有個新人姓柯，梗係要捧場啦，真係做得好喎～

陳妍希淡粧都幾靚喎，仲有敖犬，兩個人28歲扮十幾，又扮到喎；

香港呢，唔知從幾時開始，D青春片女主角，無論係新星，”口靚“模，歌星，D化粧都硬要加兩把勁大眼睫毛，無倫行街，瞓覺，入醫院都要化個面具粧；呢套陳妍希輕輕化個淡粧做學生妹睇得好順眼！

呢套片有青春又係笑片，又多無聊笑位，同屎屎尿尿gag,我勁like呀～

不過佢無聊都唔夠我無聊，套戲由94年講起，講到幾年後，即係頂籠去到2000年，我發現其中一場男配角“阿和”著住件polo shirt，件衫個logo係2007後先有嘅bossini新logo呀，哼～

那些年，我們一起追的女孩。。。我比92分，勁推介，唔該～

呀，重有，片尾歌後仲有片，唔好走住

【那些年，我們一起追的女孩】電影主題曲


【那些年】 曲 木村充利 / 詞 九把刀 / 演唱 胡夏


又回到最初的起點

記憶中妳青澀的臉

我們終於來到了這一天

桌墊下的老照片

無數回憶連結

今天男孩要赴女孩最後的約




又回到最初的起點

呆呆地站在鏡子前

笨拙繫上紅色領帶的結

將頭髮梳成大人模樣

穿上一身帥氣西裝

等會兒見妳一定比想像美




好想再回到那些年的時光

回到教室座位前後 故意討妳溫柔的罵

黑板上排列組合 妳捨得解開嗎

誰與誰坐他又愛著她




那些年錯過的大雨

那些年錯過的愛情

好想擁抱妳 擁抱錯過的勇氣

曾經想征服全世界

到最後回首才發現

這世界滴滴點點全部都是妳




那些年錯過的大雨

那些年錯過的愛情

好想告訴妳 告訴妳我沒有忘記

那天晚上滿天星星

平行時空下的約定

再一次相遇我會緊緊抱著妳

緊緊抱著妳

狗仔炆鴨

屋邨舊式餐廳牆上見到佢。。。狗仔炆鴨

我真係未聽過，有無人知係乜嚟呢？

執平貨

原來我樓下間惠康每日約6:30都會有堆減價貨推出嚟，日日唔同，有就過期嘅菜，餅乾，雜物等。。。

我試過買梳打餅，仲有三個月至到期，但平一半喎，又試過買慳電膽，燈膽無過期啦啩，都係半價

今日7:30pm去到，見到一班師奶圍住，就知有好野，最大箱係。。。姨媽巾；噢，有另一車，三樣貨我買哂

滴露濆霧：$19.9/紅威寶：＄19.9/滴露衣服消毒劑＄26.9... 全部6﹣7折，平過藥房呀真係


間中較啱時間落去哺下先

怪2集﹣南丫島石排灣異獸戰

噚日怪異集，今日第二集。。。

1/每次，我都會影拿手野，即係花草草咁啦，呢棵係乜花呢？


啊！原來係棵斷樹，上面一點點係乜傢伙呢？


來個close up,哇！乜嚟架，蟻唔蟻咁嘅，幾千隻都有呀～


2/樹上點解有個樹葉波波呢？


原來係蟻竇，咁D蟻搬住白色一粒粒又係乜呢？


3/薑花上有隻“蜘蛛“？定係“烏蠅”？定係混血兒？


4/好大隻黃蜂，仲要背哂光，即影；而家D黃蜂唔係食花蜜架，佢其實捉緊”圖一“果D疑似小芽蟲


轉頭，仲同隻甲蟲對峙，我幾驚佢連甲蟲都落手呀


5/行近海邊，有個草地長滿野花，呢堆疑似黃蜂忙於搵食，但風一起，全部識抓住條草等風停，停低個樣又似甲蟲喎，究竟係乜嚟架呢？


6/模達灣特別多大蜘蛛，今次捕到隻蟬，有排食lu


7/紅色怪蟲與洛神花



邊隻最怪異呢？