Tuesday, July 31, 2012

週日紅屋遊

週日,終於好天,去左栢架山嘅紅屋


由鰂魚涌行山上去,約半粒鐘,以前係太古嘅宿舍,而家係自然教育中心


最靚最值得睇當然係間屋,的確好靚,但其實好細間;一去到,好多人好嘈,原來有天水圍旅行團百幾人喺度,但好彩,原來佢地已經準備集合離開,佢地一走,我就差唔多包館啦


關於自然教育教育,有乜睇?最靚係張畫,由無數畫拼成;另外有魚有蛇咁囉;另外,有電影睇喎,去到阿姐提我話啱啱開場,入到去,全院得三人,原來係播“LIFE",部份之前明珠台睇過,但行到無氣,坐下嘆下冷氣啦


離開先四點,決定再向上行,見到呢個靚景


再上見到大潭水塘


相影得唔多,都係影下花


最特別係呢張。。。崖上波上波


呢期貓”除“強勁,一日見到好多貓,呢堆肯比我影,其中幾張我幾鍾意


流哂D臭汗,夜晚瞓得好好呀,夏天真舒服~

Monday, July 30, 2012

燒魂一。。。呢間唔掂



睇開我blog嘅都知我成日抽獎,前排提過抽到呢間嘅晚餐,好唔掂。。。

一向呢,如果好食,我都會寫出嚟在力推薦,唔好食呢,我會唔寫唔倒佢地米,話哂係免費嘛,但呢間。。。

首先,佢地本身個餐係任食自助餐,但獎品呢,只可以食星期一至四,五點或九點,亦準備好二人份量,無得你點;心諗,都無所謂啦,話哂係獎品嘛;見佢拎D器具埋嚟,其中有飲管,我問,有咩野飲架?部長即收起飲管話:無架,佢地擺錯,飲野就睇個menu嗌啦

唔想白食人嘅,既然茶都無杯,點野飲啦,叫做幫趁下,可樂$16礶,但竟然唔夠凍嘅,再睇佢餐牌,冰係要$5架,鬼唔係唔夠凍啦


食野啦,真係麻麻地囉,點值$399呀?個安格斯一口牛我真係食唔到有乜特別,最後果舊仲要有筋


因為份獎品寫到明值$399,要比加一,即係$39.9,加埋汽水,結果埋單$77左右

唔好食又唔飽,伙計態度又唔好,間舖仲有超濃卡拉OK空氣清新劑味,其實做得呢D promotion,都係想人食過介紹比人或者變熟客啫,今次我都介紹,介紹人唔好去囉

西環食$38韓燒都好食過佢

Sunday, July 29, 2012

踢波學英文

咁都諗到,勁~

但我覺得平時波場聽得最多果句,譯番英文嘅可能係。。。FXXX

Saturday, July 28, 2012

排乜呢?

呢個月,差唔多日日要七點前就出門做野,朝朝都見到呢條龍。。。


由我樓下排到轉彎海皮再一宜排,保守做計,多過200人,平均年齡有70歲,拉低年齡平均中位數係靠班外傭,排乜呢?


原來係排免費報紙,7點開始派,所以堆左咁多人喺度,有次我8點已做完野番嚟,派報紙阿姐已收工,對比其他地區如中環,相當好做,人地派到11:00仲未派完呀,陰公~

好彩我大廈有得攞啫,七點同人爭報紙,咪攪我~

Friday, July 27, 2012

強國人大戰茶餐廳阿姐

早兩日過西營盤食早餐A,歎報紙,突然前面張檯個茶餐廳阿姐發爛。。。

張檯坐左三個小孩,一個B,一個女人(A)(紋左眉),兩個男人(B)(C),操廣州話,個look非常強國

茶餐廳阿姐(D)其實都好強國味,佢話班客用粗口鬧佢

C:香港D服務真係好差呀

B:條你老母

D:你番屋企慢慢條

A(指手劃腳):你D咩野態度呀(講完即餵舊野食比BB)

B:你曲街死呀

D:你行出街比車撞呀,睇下邊個死先?

C:我地走左,一陣番嚟你就知

D:我有乜事係人都知係你地做啦

A:仲搵到我地咩?(講完又餵舊野食比BB)

D比同事勸走,解釋話而家未有水鮫,再問又無雲吞,就比人問候

A(大聲):佢講粗口先架

同事:大家唔好嘈啦,誤會啫;你地又係嘅,郁D就問候人地老母,最焯忌架嘛;話我地講粗口,唔通我地問你:今日食乜銀野咩?唔會咁架嘛,係咪先

睇到呢度,我食完了,埋單走了

總結係,香港咁差,唔好再嚟啦,bye

Thursday, July 26, 2012

$38食韓國燒烤



平時晏晝食得最多就係飲茶同魚蛋牛腩河,最近發現呢間野,之前成日行過但無留意佢;上星期行過見到佢門口貼住個餐牌。。。


$38有燒烤食,即刻叫friend食先。。。(請注意,$48果邊我差唔多全部唔食嘅,想賺多我$10都幾難架)

兩個人叫兩份,D乜呢?

我地揀左牛肉同雞肉,幾大碟喎


有蘿蔔湯,我好鍾意飲呢隻湯架


每份有三小碟伴菜


白飯一碗


熱茶之餘仲有凍菊花茶


最後仲要有啫喱


隔離檯仲追加牛排骨,佢話抵食到四個食五個餐都抵喎

有朋友嚟西環嘅,搵我食晏啦,無理由無啦啦一條友食燒烤架嘛

Wednesday, July 25, 2012

打風過後的大騎樓

星期一早上11:00,天文台仲話日間唔會考慮掛八號波

兩點幾食完飯返屋企已經改口話五點後會掛,終於5:40pm掛八號,5:40pm唔算日間,我知佢實會咁答格

我覺得天文台班友嘅預深仲衰過D風水佬,叫麥玲玲做埋天文台台長都得啦

夜晚11:00,眼瞓,提早瞓

半夜D風好鬼嘈,我雖然醒過,但照瞓,睇下達仔,瞓到豬咁

第二朝紮醒,睇下鬧鐘,哇!9:45am,我真係咁瞓得,但達仔仲瞓緊。。。

出廳開電視,見掛八號,即刻懶懶行,無客會打嚟摧我啦~~~

攤喺梳化,望下個騎樓。。。。水浸大騎樓呀,差D到頂呀,會唔會浸入屋架?


八號波都要出去“畢”水啦,蠢到死仲搵個水喉吸落個桶度,吸吸下,搵個桶直接“畢”快過啦

“畢”左幾桶又發覺,梗係去通個渠等佢自己去水啦,仲“畢”。。。
搵把鐵尺死隊爛隊,終於聽到啵一聲,慢慢去水啦


除左通地泥(有盆栽瞓低左),有蜻蜓喎,一場風奪去好多生命呀。。。

Tuesday, July 24, 2012

推介~香港黃昏靚位

香港影黃昏嘅位唔少,但通常都比較多人,特別推介呢個冷門位,比較少人講過,但的確係A級靚景


位置唔顯眼,睇地圖;油塘地鐵站沿高暉道行出海皮


沿途有大量貨車,比較沙塵滾滾,相信呢個係少人嚟嘅原因
行到去汚水泵房,會見到個碼頭仔,咁就到啦~


左面嘅港島同右面嘅九龍連成一個好靚嘅skyline,係咪值得推介先?

碼頭有樓梯行落水平線架,不過當然要注意安全,小心跣腳;但貼近水面影,先影到呢張天與海1:1嘅構圖呀,hehe


7:00pm,影埋呢張,收工了

Monday, July 23, 2012

(口靚)模定老師呀?

我就接受唔到啦,你呢?


再咁發展落去,D老師會唔會上堂賣寫真架?

Sunday, July 22, 2012

35.5度下敢出汗地係咁出汗

識我嘅朋友都知我非常喜歡“溫暖”嘅夏天

今日,見可能打風,無去行山,只係去左城門谷公園,見溫度計顯示35.5度,呢個溫度平時係無問題嘅,但今日風都無滴,焗到不得了,行上行落之後,透氣都困難呀。。。


一路影相一路滴汗,件衫濕透哂,買礶“敢出汗”飲,之後更加係咁出汗


影左兩粒鐘,決定走人

啊,係呀,今日公園好少人,好寧靜呢。。。

Saturday, July 21, 2012

人體奧妙展

前個星期行山曬燶

上星期再去行山(包住隻臂),行完一睇。。。



想甩未甩嘅皮下入哂汗,變左無數個汗波波,唧又唧唔出,都驚出事,拖到今日完全無事先放上嚟,免得大家擔心(其實無人會擔心,我知嘅)

今日要甩嘅皮甩左八成,唔痕唔痛,好番lu

Friday, July 20, 2012

一個懵仔的故事

上星期四,又去澳門,不過今次係公事;

叫我幫手嘅係一間廣告公司,同行嘅其中一位,識左佢接近廿年,佢外表好宅男,佢枱面放滿figure,仲要係少布果隻,但做野非常交帶妥當;

今次我地一行數人每人負責一至兩間店舖;要喺佢地開舖前完成我地嘅工作

可能溝通出左問題,我果間足足遲左一個鐘,店長知出事,全舖幫我手,我用左20分鐘攪掂應該要60分鐘嘅工作(但心臟病囉)

到我搭的士去第二間嘅時候,中途見到宅男X仲企喺門口,即係佢負責果間都遲到啦,但幫唔到佢,因為我要趕第二間。。。

到做完第二間,我走去幫最近我果位同事,原因係澳門D舖根本無人知我地今日嚟做野,結果間間都都遲哂,兩個人做點都快D,結果又攪掂第三間

到集合地點,廣告公司老闆笑淫淫,宅男X就變左死魚,原來,佢懵到上網check google map;

因為佢見間舖遲左咁耐都無人開門,緊張自己係咪去錯舖,情急下無諗過澳門上網係好貴架。。。

佢check左一分鐘左右,就收到呢個訊息


我同佢老闆講:喂,公事喎,人地驚出事咋喎,係咪應該公司比呀
宅男望一望老闆
佢老闆(非常玩野):唔比,邊有人咁蠢架;我唔會比嘅
我:幫你唔到喎
老闆:你睇真D個訊息,佢話大概四百幾咋,可能唔止架;阿X,你有無開佢呢個訊息嚟睇呀?
宅男X:有
老闆:你開埋咁就實五百幾
宅男X:攪錯呀,咪就係睇佢D訊息囉,呃我錢,佢send咁多嚟

跟住大家即刻研究關哂D流動數據呀,飛行模式之類,因為驚笑人之餘自己都衰埋,呵呵

ps:睇下張相較低地方,佢訂左模型喎,呵呵呵

Thursday, July 19, 2012

尋寶

每次去行山影相,出發時都會諗,今日會見到乜呢?會唔會影到靚相呢?

而除左大自然景色,身邊其實好多野發掘,行嘅時候望多D,細心D,影嘅時候定D,就可能(撞手神)影到靚相架啦~

睇下東龍島影到乜?

1/蒲公英。。。難得有朵完整,天又藍,靚


2/鷹。。。最難係對焦,追住係咁襟襟襟


好, 蝴蝶科先
3/呢隻叫串珠環蝶,集郵又多一員


4/擬旖斑蝶。。。以為影到呢張就滿足


5/擬旖斑蝶。。。呢張仲靚,雖然伏左好耐至影到


6/灰蝶,細隻,身長2cm左右,但勝在成群一齊,一張影到三隻,開心


7/蜻蜓,藍眼藍身,最特別係對翼係反轉架喎


8/呢樹嘅黃蜂好巨型,圖案仲好靚㖭


9/呢張個氣氛我like喎


10/貓B。。。貓揀左呢張,想睇請留意我個香港貓貓blog


11/似唔似嗌投降呀?


最後一組。。。蜘蛛

由第一次佢突然出現,嚇左一野,而家,越嚟越覺得佢靚,呢幾張我覺得滿意呀

12/奔向太陽


13/織織復織織。。。個網係咪好靚靚呢?


14/呢張係我今天日最滿意之作,like唔like?


鍾意邊張?

大家得閒去郊外探下佢地啦
Related Posts Plugin for WordPress, Blogger...