噚晚同姐夫個妹詳談，講番舊年佢同義工西環捉貓嘅事，原來有新進展。。。既然心結解除，呢幾張相可以再post啦
因為放呢幾張相上facebook，一班愛貓之人決定要救隻貓B
結果，佢地捉到左面嘅老豆同阿B，剩番貓媽
最新故事原來繼續。。。。當晚，老豆走甩，喺石塘咀由三樓跳落一樓簷篷，之後一樓嘅住客肯餵佢，但捉佢唔到；而同時，班貓義工因為三樓位愛貓者嘅大意，喊到豬頭兼嗌哂大交，三樓愛貓者話捉到想養但唔肯裝貓窗紗，貓義工就話你唔裝就咪養，大家不歡而散
一樓呢，又話想養喎，但貓義工要佢辧手續，佢又堅持唔肯，結果又嗌交收場，而最後消息係佢捉到隻貓但遺棄左喺附近公園，我為此好唔開心，但原來班貓義工更唔開心，call齊20人，包括識“潛心術”嘅“專家”（呢個位好好笑囉），不下十次重返公園附近，為嘅係搵番隻貓，但上兩個星期，佢地發現三樓裝左貓窗紗。。。
我樂觀地理解為，一樓根本講大話，佢同三樓夾埋，佢地其實養左隻貓，但唔想比你班貓義工煩，呃佢地掉左隻貓
﹣﹣﹣﹣﹣﹣﹣﹣﹣﹣﹣﹣﹣﹣﹣
到阿B，呀，叫阿Bu至啱，佢主人幫佢改左名啦；經姐夫妹駁線，facebook見到佢主人兼阿B近照；收養佢頭幾日，有晚佢突然全身抽哂筋，女主人即帶佢去太平道睇醫生，使左＄8000，醫生話佢先天癲癇，無得醫，當時聽到我又係超唔開心；但噚日得知，收養8個月，無再復發，兼肥肥白白，主人當正佢係公主(原來女嚟架喎），睇下佢近照。。。
見佢有人錫又健康，心結解除，我開心到失眠呀
.JPG)
