貓の打擂台

第一次上觀塘個客嘅office，佢建議去北角碼頭搭小輪。。。

去到，啱啱走左班船，而下一班要等半粒鐘，好彩有5隻貓咪比我影相


同養佢地嘅職員阿姐搭訕，知道左下角果隻係新成員，得兩個月大，超百厭，見其他貓D貓尾就玩。。。


有幾百厭，睇片。。。


阿姐好有愛心呀，一路收錢一路同貓R肚腩，呢度D貓咪就係幸福囉

黃韻。。。材演唱會

唔係黃韻玲，唔係黃韻詩，係黃韻材演唱會呀，有份做陸小鳳果個呀


哇！個樣同三十年前一樣喎，無變過喎，髮型都無變過喎，好勁喎！

但佢有咩野手本名曲開演唱會呢？我好疑惑喎。。。

爛片大對決

繼上星期睇左套得兩分嘅“叛諜反擊”，今晚挑戰極限，睇左“天凶之城”


睇網上影評一窩蜂勁彈天凶之城，幾年難得一遇呢D人氣爛片，速睇。。。。

演員：全片得9個演員（全部B級演員）＋十幾個名都無嘅過鏡演員，做足個半鐘
佈景：一間屋嘅單位拍左半套，加埋天台，泳池，停車場就攪掂
特技：呢瓣係強嘅
元素：有驚嚇＋友情大考驗＋一條愛情主線（就係漏左鹽花）
故事：基本上真係無故事
史撈緊：海報最低果句。。。11月18日筒全球震驚；係真架，無講大話

難忘場面：
1:怪獸好勁，核彈都唔死，但男主角赤手空拳竟然可以打死一隻，我笑到反肚
2:爆核彈，個單位係咁震，但只係跌左兩塊窗簾(我懷疑係借個示範單位嚟拍，唔可以整爛玻璃呀）
3:有個鏡頭影到香港，真光榮，咁都有份
4:最後一場，擺明話你知套戲未完，有續集呀；勁
5:開場前，竟然有個阿聯油廣告，長達5分鐘（可能仲長D，播極唔完），個女嘅配音直頭係金口獎果種，打哂冷震（呢套先係爛片王）

咁我比幾多分“天凶之城”呢？我比25分喎！（100分滿分）

點解？當拍得好認真，但一切過哂火嘅時候，爛片最後就會變成經典，呢套我覺得有機喎

究竟去邊好呀

話去旅行講下講下就講左幾個月；

日本一向係首選，但滙率真係好貴，擱置

泰國一向係我鄉下，但對D紅衫軍間中又攪攪鎮，有D不安全感；但蘇梅都仲係想去嘅

以為益哂台灣啦，一打風幾架車失踪，又驚驚地喎

菲律賓D島仔本來屋企人大讚，又發生恐佈人質蠢總統事件，擱置

本來都對韓國麻麻，但見友人去韓國話都幾好玩喎，點知即日就打仗啦，使唔使咁邪呀

我而家想去西班牙，我睇下嚟緊西班牙係咪有事發生(但講得嚟都出年啦）

大家仲有無其他推介呀（大陸唔諗）

獅子會自然教育中心-相簿（愛藏版）

話明自然教育中心梗係影下大自然啦

1。蝴碟;今日D蝴碟幾好喎，走到咁埋都唔走


2。蝴碟二號；蝴碟對翼實在脆弱，呢隻對翼又係爛嘅


3。草蜢仔；保護色強到吖，咁都比我搵到呀


4。草蜢仔二號；咁多草蜢嘅？西貢開演唱會呀？


5。蜻蜓；呢隻藍色係咪好靚呢？就係影佢，差D比蜜蜂圍呀


6。蜻蜓s；影影下，多隻紅色飛埋嚟喎


7。特大蜘蛛；真係好大，連腳大過我個頭


8。蜘蛛網；食正陽光，點織嘅呢？咁鬼複雜嘅


9。怪葉；我覺得好有聖誕feel喎


10。怪花；倒吊，好型


11。風雨蘭；背光，花瓣透光，今日至愛


12。荷花池；平衡位放喺上三份一，黑位佔三份二多，綠葉係咪反而出D呢？


13。快獸賞花；快獸唔執輸，影張𡃁模相


14。快獸怕醜；無地方換衫，快獸lay喺塊葉後面換，被偷拍


15。波鞋；係咪同我一樣咁型呢？

獅子會自然教育中心

一個用前影，而家至寫好，今次去嘅係西貢嘅獅子會自然教育中心


呢度幾好玩，超大，要戶外又有戶內，行到熱可以入戶內嘆陣冷氣先再出發，又可以放狗，又有條輕鬆行山徑(不過勁多蚊），有D似嘉道理農場架
最吸引我嘅係有三個大大小小嘅荷(蓮）花池


最大果個唔啱季節，花都無朵，但其餘兩個勁盛放呀


最愛有三張

大近鏡


原來荷花好多蟲架


太陽射到葉面發哂光，好靚呀


頭先提到有戶內，其實係D魚類館，石頭館，貝殼館之類，特別推介昆蟲館，入面有好多標本

牛糞金龜，不文泰山入面經常出場，原來真身係咁架，哇，係咪睇相都聞到陣陣牛屎味呢？


咦！呢隻咪係小強，咁都要展覽？


預告：聽日繼續

小狗的故事

故事大綱:小狗跟住主人去公園，玩到喪哂，自己一隻走開左;
與主人失散後，努力千里尋親嘅故事，究竟佢會遇到D咩野呢？


舒服哂


完～

Fair Game 叛諜反擊

星期日晚，朋友抽到戲飛，又有免費戲睇啦，今次係Fair Game 叛諜反擊，Naomi Watts and Sean Penn主演




睇左好耐，哇，咁悶嘅？睇錶，原來只係過左15分鐘，套戲剩係講講講，又加插下“布殊”D真片段，令我諗起福祿壽佢地D玩阿九姑娘，楊怡D片段，中段瞓左一野；套片未完，已經有觀眾走人

睇到個半鐘，心諗究竟你幾時反擊架？

終於完場前一分鐘先反擊，反擊都係得個講字，又係靠講講講講，跟住完場

開燈時，前後D觀眾都話悶Q，所以呢套係絕對唔好嘥錢入場

呢套我比2分（100分滿分）

觀鳥

第一次正式去觀鳥；見雜誌有廣告免費帶你去觀鳥，試下報名，得左


活動由STEINER贊助，咁我梗係要比張大相同佢賣下廣告啦，佢地嘅望遠鏡觀鳥一流呀，德國貨嚟架!


原來南生圍錦田河有咁多雀，真係而家至知，仲多過米埔呀；見到白鷺，池鷺，鸕鷀，翠鳥，班鳩，加加埋埋有十幾種呀：）
雁形飛行嘅係嚟過冬嘅鸕鷀，一群群咁飛嚟，好壯觀呀



有幾多，呢張相入面企喺樹果D全部都係，後排D樹都掛滿，但影得唔清呀，有成千隻呀


無長鏡，透過望遠鏡影，叫做影到D






呢張相重點係新娘個粧


呢張相重點係話你聽真係有好多雀


有位團友太太發現一隻珠頸斑鳩倒吊，我用望遠鏡見到佢比風箏線纏住，叫領隊嚟睇，我問可以可救佢架，佢即打電話。。。


事後漁農處消息話隻斑鳩無事，但送左去上水狗房，領隊話上水狗房通常未必放生架喎，佢話可能又好心做壞事（點解唔放呢，真係唔明）


呢次經歷唔錯，都真係有D愛上觀鳥，係有部份團友煩D，由頭講到尾，non-stop，唔攰架咩，導遊講野佢又講野，到行動時先問做乜野，見隻斑鳩倒吊，竟然問：佢唔係專登架咩？點解咁多奇人架？
到佢老豆，大家放個望遠鏡盒喺自己坐位上，我去厠所遲過佢上車，發現唔見左個盒，原來佢攞左我個，有number對架，醒少少啦，呢D咪一家人囉

多謝steiner,旅行家嘅安排，令我心情好番好多

一日三個獎

作為tvb fans，tvb生日即係我生日，所以19號果日我（本來）真係覺得好幸運

上晝約11:00，收到milk magazine email,我又中寵物相啦；其實對上一期都借相比朋友參加，佢都中埋。（似乎無乜人參加）

估下邊張相係我嘅？


下晝5:00，收到消息，抽中左“天凶之城”戲飛兩張


晚上8:15，出席一個小型攝影比賽活動，竟然有得上台攞獎，季軍呀，有獎金呀，$800呀，呵呵呵


完場，接到sms話朋友走左，時間就係8:15，心情好似坐過山車咁。。。

真係好化學

今日本來接二連三收到好消息，但夜晚一個sms。。。

知道舊同事兼好友已經走左，由入院到而家只係三星期，哼，三星期；

你唔想朋友探你，我明嘅。。。安息

希望新邊每一個家人朋友健健康康，我其實頂唔順

尋寶

屋企附近有條厚和街


喺西環高速發展嘅年代，依然有間經營左幾十年嘅香燭文具舖迄立不倒，同老闆傾計至發覺，原來我細個幫趁買文具波子棋果間，就係呢間，不過佢地喺廿年前搬左過嚟，而以前我口中嘅老闆伯伯，係而家嘅老闆嘅爸爸；仲要原來以前係鄰居㖭。。。


佢間舖細細間，但其實收埋好多好野，我都未細心摷，但見佢仲有紙盒嘅波子棋賣。
今次，我買左幾本超袖真筆記簿，3-4吋一本，賣幾毫紙咋!拎出去開會都型爆啦～

廢話四部曲﹣第三集

靈感特厚，寫多篇

1.捏骨都要買套票，買2000送2000，買100000送100000？

捏十萬蚊骨，係咪有病呀？

2.第一行由左至右，排／拉／標／社(瀉），哇!好有feel呀

話時話，排排舞係排乜架呢？

3.收龜？似乎有D野喎！正常點會咁寫架？

會唔會係紅花會嘅暗語呢？會唔會係收歸國有咁解呢？

4.以前灣仔有個阿伯企喺婚紗街附近賣玉，但佢背後幅牆寫住阿伯賣假玉，唔知有無人記得呢？

今日由我細佬親身演釋