Saturday, April 30, 2011

意外收獲

行河背時,見到一棵樹長滿嫩葉,埋去影,見到有好多甲蟲仔,當然唔放過狂影啦。。。


佢地行得好快,又識飛,所以影得sharp嘅得好少


番到屋企,喺電腦揀相兼將out focus嘅掉左佢,發現,點解D葉咁多毛嘅,原來。。。


成棵佈滿芽蟲呀,我仲挨埋去㖭。。。


右下角果隻好肥美呀


本來影樹,發現甲蟲,影甲蟲又影埋芽蟲,意外收獲呀,但。。。

好痕呀好痕呀,好痕呀好痕呀,查查查查查,快快查D無比膏

Friday, April 29, 2011

河背。水塘美景靈氣遊

4月24日,見書介紹河背水塘,決定去會一會佢


12:00由元朗出發,元朗泰衡街搭71號綠色小巴,約30分鐘就到河背村,第一個景點就係育英學校,行20分鐘就會到一處紮營嘅平原,向上行就去到水塘,但係。。。


比左邊嘅水聲吸引,向左邊行,見到個小瀑布;決定向前行,以為行行下會有路上番去水塘,結果一去無回頭;十分鐘後,見到西鐵車廠


再行會見到兩個堤壩,可以行落去,好有氣勢


堤壩望出去靚到爆呀,但呢個水塘唔係叫河背,佢叫上清潭灌溉水塘;四週比樹包圍,空氣好到不得了,吸多幾口至走呀


為左呢個景都值得行嚟啦


行嘅都係石屎路,有樹蔭,唔難行


影左呢盤大雜錦;但行下行下已經四點半,GPS又睇唔到仲要行幾耐,剩係知前面有間牛奶公司,開始急啦,因為樽水飲哂啦;個心剩係想一陣飲枝牛奶補充下


去到4:45pm,見迎面有個放狗少年,問佢幾耐至出到去,原來只需10分鐘,真係GOOD NEWS;
呢隻花第一次見,呢個山頭有好多,好似一條裙,幾盞鬼


到啦,到啦,到農場牛奶公司啦,點知,勁多人。。。
原來好多情侶,一家大細專登上嚟飲奶兼餵羊架;結果排左15分鐘至到我買野,換嚟老闆話牛奶賣哂,布甸唔凍,得餐蛋麵。。。結果我只係要左礶可樂。(個牛奶盒係上手飲完可執嚟影架咋,好垃圾佬呀)


但我推介大家嚟喎,因為真係有個小牧場,可以餵羊喎(餵羊嘅草兩蚊,果日係連草都賣光嘅)


行出去大路原來去左石崗,靚靚夕陽陪我等車,好完美呀~

Thursday, April 28, 2011

我叫崩單單,我嘅志願係AV女星。。。

以下內容含有不當行為,驚嚇,色情,令人不安,請家長陪同觀看,仲有仲有,內容純屬虛構,如有雷同,實屬巧合。

大家“巧”,“喎”叫單單,姓“崩”架;“喎”嘅志願係。。。



“喎”嘅志願係一個“撮”名嘅AV女“腥”;單單,第一個單係單純,第二個單係最叻單打,多謝~


“喎”今日第一日”hi“工,而家要番工啦


第一場"hea"係”壞“景呀,落香“廣”呀~影多D自拍放上微博先


當街當巷就嚟,我怕“臭”架嘛,噢!也媽嗲~


咩野“難”主“腳”嚟架,“喎”咁索,拍拍下佢竟然瞓左,影你相先


D相同套“hea"出左街,我仲唔飛上”豬“頭變”瞓“凰?哈哈哈~


原來今日都係一個”誰家灶頭無癲婆“嘅故事,完~

Wednesday, April 27, 2011

開倉派米?/雜談

財爺,快D開倉,派米啦。。。。。咦!原來係開倉派咪至啱

糧倉竟然係賣爸爸?勁呀~

﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
雜談
22/4
一早去左文武廟拜山,喺公公婆婆爺爺面前跳左part開心舞,相信佢地應該睇得開心又放心

晚上,去左高山捧朋友場,“曹震豪A day in metropolis音樂會”,呢位新人好得喎~


23/4
抽中左“樹欲靜而心不息”戲飛,約朋友睇時講左:“一樹梨花壓海棠”,朋友問:咸片嚟架?

朝早雖然上左yahXX.com嘅電影網check上映時間先去戲院,但原來唔準,去到麻麻地百老滙先知摸門釘,結果去左elements睇人換C片


24/4
去行河背水塘,結果行左去石崗軍營

25/4
一早要去開會,午飯同屋企飲茶;同細佬講我中左“樹欲靜而心不息”但講左“一樹梨花壓海棠”嘅笑話,我話我好文化人架,出口就係七字詞啦,佢叫我講多一個,我隨口噏:“點解阿sir係阿sir",佢話:你果然好文采

下晝,睇戲,套戲想講乜Q架,睇到我一舊雲呀;好彩有蝙蝠青蛙螞蟻同袋鼠過下場咋

Tuesday, April 26, 2011

天下糧倉

今日問題。。。”天下糧倉“,賣乜架呢?

Monday, April 25, 2011

睇住佢換片,嚇呆左

地點:圓方

時間:4:00pm

人物:一個阿嬋,小妹妹,阿B同埋我

去圓方行下高級商場,扮下上等人,行到腳軟?唔怕,圓方係有好多靚櫈比大家休息嘅。

坐低飲啖水,見隔離個阿嬋嘈喧巴閉,個小妹又嘈埋一份,原來佢地幫阿B換C片呀,會唔會有野彈埋嚟架?我嚇到呆左兩秒,舉機影左呢張相


阿嬋,隔離有廁所架,都唔明點解幾步都唔肯行;呢D人要重罰呀

Sunday, April 24, 2011

test

唔使多講,睇“片”


呢兩隻野,喺行人路都嚟,該煨囉


隻公仲要笑淫淫㖭


睇“片”啦


睇住佢撞車,嚇呆左

地點:尖沙咀中間道

日期:23/4/11

時間:5:10pm

人物:粗心大意嘅懵丙司機,同埋我

啱啱去完廁所出嚟,鬆哂,正想過馬路往訊號山,兩架車喺我面前轉彎,見架賓士已停低,但外圍嘅貨車仍撞埋去,一聲巨響加埋玻璃碎片彈到飛地,我就嚇到呆左兩秒,跟住舉機影左呢張相


其實條街由撞車到之後幾分鐘,後面都無車,都唔明架貨車爭乜?等唔切警察嚟,需唔需要証人呢?


喺細街都開咁快,呢d司機要重罰呀

Saturday, April 23, 2011

誰家灶頭無癲婆

星期四,下午5點幾嘅放工時間,從灣仔上車番西環,無乜位,坐左喺上層最尾;之後陸續有人上車。。。

去到金鐘,一個肥佬嚟到上層,慢慢行埋嚟,原來前面已經全滿,剩低我側邊個位,佢行埋嚟坐低後我發現,原來佢後面緊貼一個四眼師奶(真係緊貼,完全比肥佬遮住);佢見無位,嘴“藐“左一野,跟住由左至右怒睥一番(當然先睥個肥佬),跟住竟然係企喺上層最後唔肯落番去喎,我都係第一次見有人企上層仲要企到最後架咋!


跟住,見佢好似好煩燥咁,眉頭夾得死烏蠅,成日整佢頂大黑帽,再唔係就R痕或者連環睇錶(10秒睇3次),每隔兩分鐘就轉下企果個位,行前兩步又行後一步。


架車行到中環交易廣場對面,呢個站之後就上highway直飛西環(呢段路需時只係5分鐘),突然有個空位,佢緊張地仆倒埋去坐低,但當架車上左highway只係兩分鐘左右,佢又神經質地行去落車(但未有站架喎),佢又變左企喺樓梯位囉~

點解而家真係咁多怪人嘅?真係癲婆多過7/11呀

Friday, April 22, 2011

又插喉,次次都好準

阿伯,你個肚臍都好大喎,會唔會入風呀?


蘭子,你做乜扮家燕姐呀?


小姐,我諗你最重要唔係抗老化而係脫墨喎

Thursday, April 21, 2011

新奇好玩又刺激嘅相簿

噚日講到,由烏蛟騰行去三椏村,影到D好野。。。

1/新奇-耳屎都識行
呢團好似耳屎咁係乜嚟架呢?識行架喎;我估係好多隻蟬嘅幼蟲痴埋一齊


2/新奇﹣蟻多“嬲”死象
美麗嘅鮮花下面,竟然係殺戳戰場



3/好玩﹣迷你蛛
超袖珍都比我影到


4/好玩﹣大隻佬
隻黑蟻成1cm咁長,好大隻呀


5/刺激﹣登登登櫈。。。蝠倒
行過一間荒廢小學,操場變左牛場,課室變左蝙蝠房,兩間房加埋過百隻,十個震撼呀


鍾意新奇好玩定刺激呢?今次夠卡娃依啦啩?

Wednesday, April 20, 2011

荔枝變阿sam

幾年前,曾經相約朋友去荔枝窩,點知中途落大雨,結果中途折返。。。
上星期五晚,揭下本本地遊嘅天書,見到荔枝窩,佢係咁寫嘅,從烏蛟騰去荔枝窩,約兩小時,而且只係評為“兩個力”(最難係五個力),見有小小攰,兩個力OK啦,結果。。。


12:10pm烏胶騰開始行,前後同三班人,沿路無乜路牌指示下,三班人一齊行錯路,越行越崎嶇,D路似無乜人行過,我同朋友決定回頭,其他人見我地回頭,佢地都跟。。。結果行番正路已經1:35pm;

行行行,最吸引係有個大竹林,同有條河


仲有好多牛屎,即係有好多牛啦


沿路無乜特別,呢隻花成個山頭都係


仲有濕地,但濕地唔濕,好乾,好耐無落雨


呢D梅花摏,方便過溪澗用,但幾條溪都乾左


紅樹都嗌救命啦


又話行兩個鐘到荔枝窩,唔計行錯路果個零鐘,我地都要行兩個半鐘至到三椏村(4:05pm);幫趁三椏村間士多餐廳仔,老闆娘話去荔枝窩仲要行45分鐘,仲要沿路出番嚟三椏村再行番烏蛟騰,天黑前唔夠時間出番去,唯有放棄唔去荔枝窩。老闆娘仲點條快D嘅路出番烏蛟騰,但又上又落,雖然真係個半鐘出到去,但好X攰呀!


荔枝窩,我地無緣呀~點解標題係阿sam?睇下圖


相簿。。。
三椏村士多個魚缸


凌空嘅花仔,其實係有個蜘蛛網


仲影到紅葉㖭


行到日落,攰呀;而家對腳仲痛緊呀~


預告:仲有相簿?新奇好玩又刺激,聽日一次過滿足你三個願望
Related Posts Plugin for WordPress, Blogger...