笑話

1/ 去7仔買野，前面個阿婆從手袋攞出一個吉salem light煙包，
跟住話：要一包
年青男青衣(trainee)從後取出一包Salem Light,
阿婆發惡：都唔同嘅，專登拎個煙包嚟架啦！
男青衣的女同事好直咁問：阿婆你要爛腳呀？
男青衣補多句：其實一樣架喎，得張相唔同；
阿婆：啊！一樣架，跟住比錢走人

咁如果下次張相係乳癌，咁女同事唔通話：阿婆你要乳癌呀？定係佢以為除左有人儲小丸子，仲有人儲煙盒Ｄ相呢？


2/呢牌搭多左電車，見到呢單料。。。

我拎好多野，企左喺車尾，見個Ｃ拉開住把遮就咁“中“上車，咁梗係上唔到啦！佢想關遮但又關唔到，擾攘左十秒，最後攞住把只係關左ＤＤ嘅遮上車，坐電車擔遮，我諗起小芙蓉；

我望住佢係咁笑，真失禮

3/巴士上，一個妙齡少女上樓上，一坐低即發揮香港女性特式，即打電話，仲要係大聲啦當然；
講左幾分鐘，聽到佢話：我而家喺巴士，去到水街。。。
吓？你喺邊呀？近樓梯？

見佢向前行，原來佢個電話friend喺同一架巴士到。

拍戲都無咁巧合啦

仲要原來巴士上兩個噪音機係識嘅！

4/最後一單關於我姑丈姑姐。。。
姑丈退休前係政府高官，姑姐係名校副校長，年頭都退埋休；最近佢地個賓賓走左，呢牌無賓賓用；
姑丈話：今日我負責洗地洗厠所，你就洗衫洗碗啦！

幾個鐘頭後，姑長問姑姐進度；
姑姐：洗左白色衫，曬好，準備洗顔色衫，跟住洗碗
姑丈：咁我幫你放Ｄ顔色衫入機，落埋梘粉啦
姑姐大叫：乜要落梘粉架咩？

呢個姑姐真係幾十年都無洗過衫呀！勁
﹣﹣﹣﹣﹣﹣﹣﹣﹣
第二日，表妹問姑丈：點解Ｄ衫有陣厠所味嘅？
姑丈醒起原來佢用“沙粉“洗地，洗極都好多泡，佢用條“地布“去抺Ｄ泡，但又將條地布掉入洗衣機同Ｄ衫一齊洗，所以Ｄ衫成噚厠所味！


快Ｄ請番個賓賓啦！呢家人好危險呀！

西環snapshots。。。

星期日晚上，第一晚過新居瞓，因為今朝一早要趕ＪＯＢ；

開左窗瞓，今早突然聽到電車開行嘅聲；記得小時候都係住西環同一條街，早上都係聽到電車聲，好有親切感！


工作比預期順利，十二點已攪掂第一part，見好天，落街影下相；


見碼頭有兩父女釣魚，釣到哨牙妹，埋去影，點知地下有青苔，跌低；
起身行無兩步，一個浪冚過嚟，濕左半邊身；


第一次西環攝影之旅只得十分鐘，提早結束！

日與夜

新居騎樓景觀

投訴

一個月前打電話約定netvigator星期四11:00am-2:00pm將寬頻搬往新居，到1:20pm都無影，打電話去問，對答如下：

我：我約左今日搬寬頻，但未到，想check下幾時到

Ｃ小姐：睇紀錄無你呢個order喎！有無人re-confirm你呀！

我：吓！我點知confirm完仲要re-confirm架

Ｃ小姐：咁邊個同事同你做架？

我：我點會記得你地邊個同事聽電話呀？


Ｃ小姐：我地每個一聽電話都會講自己個名嘅！

我：你自己會唔買野記住個sales名呀？點會專登記住你個名吖。。。咁你而家幾時裝番呀？

Ｃ小姐：無哂時間喎，要下星期

我發火：你同事要我今日搬個電腦過嚟，仲提我帶埋架寬頻盒，點都係你公司問題吖，你今日嚟唔到，聽日都好嚟啦，仲要下星期！

Ｃ小姐：做到我幫你做格，無位嘛，咁點啫？

我發火：唔該駁去投訴部

Ｃ小姐：我係做埋投訴架

我發火：我唔要同你講，你轉比其他同事

Ｃ小姐：咁你要打過啦！我地無飛線架

我發火：你叫咩野名？

Ｃ小姐：我叫ＣＸＸＸＸＸ Chan

﹣﹣﹣﹣﹣﹣﹣﹣﹣﹣﹣﹣﹣﹣﹣﹣

我再打，第二個同事即時做到星期六安裝。

之後再打，投訴呢位姓陳嘅八婆，接電話嘅同事話會跟同比個回覆我，都唔記望佢地會認真處理投訴，但都等緊佢比個咩野回覆我！

嬲爆！

傢俬來了，搬屋還會遠嗎？

訂左嘅傢俬陸續送嚟！因為層樓over budget，所以傢俬都要慳住買，最後分別去左最正路嗰三間傢俬中心攪掂。。。

買得最多始終係“姨媽傢俬“，個款後生Ｄ，無咁娘；

呢堆野咁就皮幾野（唔計梳化），肉痛呀！


衣櫃係最後卜鎚嘅一件，一裝好間房即刻細哂！


其他“姨媽傢俬“因為慳錢會自己裝，但書枱已有小意外，不過救到！


張飯枱來自“食蕉中心“，優點係細(無相）

梳他同床，床褥係“實吠“，張梳化算係最早揀定嘅一件


仲欠燈，電視，新電腦，工作椅，但已過兩皮，暈！

已經住得，下星期約搬屋公司

完

好爛口

家姐推介：



真係好輪粗口，搵啱代言人！

今次到我條Ｘ

噚日又係打波日，日頭比心機清左Ｄjob，但下晝開始頭痛，但食左晚飯又無事喎！
但打完波，條頸開始“且“住“且“住，起身變左類似瞓“矮“頸，而家打字都唔拎得條頸。。。

經驗話我知係Ｄ火上左頸，咁好火梗係易發脾氣啦！

一陣要落去隊杯廿四味啦！

唔病得架，聽日同星期四要等及砌傢俬，星期三同五就係工作嘅deadline,點都要撐！

我諗。。。我要靜心

近日神不守舍。。。

今日本來諗住屋企做野兼執野，突接通知去“鄧“腳，第一舖已經小相公，跟住仲有三舖叫錯死"胡"，最後只係輸少少，執身彩！



早幾日，上左巴士應要在西隧口轉車，諗野竟然無落車，又side一粒鐘

做稿，有個日期要改，個客寫27/6,我竟然打左27月6日，不可原諒，好醜！

隔個星期卜羽毛球場，今朝竟然無左件事，夜晚至發覺，番到屋企，本來個場當然無，最後take左另一個場，總叫補到"獲"

下星期勁忙，幾個job加搬寬頻＋等傢俬，一定要醒醒定定！

完

雜崩冷

＊我做乜都要有schedule，一break個schedule就會精神緊張，呢個禮拜因為Ｄ傢俬／工作問題，day day發脾氣；我同自己講，聽日一定唔可以再發

＊天氣已踏入全年最舒服嘅溫度，但因忙於搬屋，今年只係喺兩個月前曬過一次，而家仍然白雪雪，激氣！

＊呢個係新居最初構思，但跟住一路變，白嘅少左,反而越嚟越黑


＊又想變咁樣，但白傢俬難打理，唯有攞個中間位


＊今日去宜家訂埋最後幾件傢俬，總算大部份攪掂，只欠燈，電視同工作間張椅，仲有一啲ＤＩＹ嘅物體！

＊傢俬送貨約好，搬寬頻約好，全部下星期；固網亦約好，要七月頭，搬屋公司報左價，攪掂，食burger king自己慶祝下先；應該六月尾正式郁身！

噪（闇）男

加左門部係因為講粗口鬧佢，一入嚟就開始non-stop咁呱呱叫，講幾句就嚟一野大大聲笑，連佢Ｄ朋友都ＳＨU佢，但佢依然發癲；
以為佢講咩咁好笑，聽到其中一段：有個大陸人買電視機要電視框，原來要discount，哈哈哈。。。
嘩！時光倒流呀？


近年想食餐安靜少少嘅飯真係可遇不可求，點解香港變左咁嘈嘅？
我又發現，通常嘈嘅人外型都係呢類質素，我覺得佢地已經放棄，所以攪成咁，橫掂都已經係咁，就更加唔駛理其他人啦！
但有兩個朋友分別覺得，就係佢地已經咁，所以先要draw attention，唔係咁，你都唔望佢啦！

真係咁？

金雀餐廳﹣Lam Lam脷

好耐無去銅鑼灣金雀，我鍾情呢一類港式西餐，即係豉油牛扒；

佢個餐好多野食，頭盤廿年不變，都係ＤＸＸＸ石班，但佢舊魚我係食到架；不過今次差左Ｄ，有少少魚腥味！

羅宋湯＋牛油多士係指定動作，牛扒夠諗，仲有雪糕，好滿足。


但後面張枱有條Ｘ男好嘈，我地會探討呢個問題，聽日新聞透視見。。。

未完

期間限定﹣我的冼樸頭

咁都做得出，死未？


送多隻冼樸手


期間限定，直到套戲落畫。


完

星空奇遇雲露娜

"星空奇遇記"算係今年最好睇嘅一套,特技正,武器同曲線轉移都同以前一樣,有D low tech....

冼樸造型超正,我都想剪個冼樸頭;

睇戲時突然諗返起一段遺忘的記憶,我細個喺阿婆屋企睇電視版"星空奇遇記",我以為冼樸係叫"史樸",笑得好開心,算唔算係三歲定八十呢?
另外,好驚喜係見到winona ryder,已經做冼樸阿媽;同行朋友唔信係佢,比D証據大家

新居裝修進度

斷斷續續油左七日，終於完工，比想像用多左時間，主要係因為想其中一幅牆同其他唔同色，我揀左一隻中灰，其他白色，但原來灰色同白色嘅交接位想油得靚係好難架！

總算油完，開始買傢俬，約搬寬頻；傢俬大致揀完，未confirm嘅係衣櫃；
原來想喺香港買衣櫃得幾個選擇，IKEA﹣尺寸唔啱；實惠﹣個款麻麻；直銷 ﹣個款麻麻之餘質地差；海馬 ﹣Ｄ貨同直銷實惠一樣樣，B&Q ﹣都係一般囉；跟住只有訂做啦！大家有無好提議？

人寫我又寫 ﹣ 我的體育生涯

見artman寫佢嘅體育生涯，呢牌無創意嘅我照跟，由小學寫起

放小息一窩蜂走落操場霸場／枱，我就霸臘波機；
真係拿手架，最叻用龍門開波直接入球，水準應該可以參加東亞運動會


逢暑假會跟做水球教練嘅表舅夫學游水，好快就學哂動作又游大人池，但點都學唔識換氣，但吸一口氣夠游半個塘，激死表舅夫，同我阿媽投訴足咁多年。直至到讀設計同同學游水，覺得瘀諗番表舅夫教嘅方法，即時攪掂

中一入左射箭班，算係當時最有成績嘅運動，開頭學都係因為佢型；最後讀書成績退步，被迫停學

從此除左體育堂再無掂運動

讀設計時代，開始玩保齡，智富，美孚，太古城，南華會都係常去嘅聖地，約十多年前成日冒認朋友代佢打南華會嘅比賽，因為係四個入面最渣嘅一個，但係分數最平均，但都要迫打到160-180，因唔想比其他隊踢出局，真係要四人平均180以上（但我嗰陣仲係用house ball)

直至到長註廣州工作，先買私家波打發時間

十幾年前，公司文化係網球，個個禮拜打，打到終於搵教練，我一開始已被安排打雙打，同女同事拍檔打足兩年；
缺點係唔識打單打，早幾年同佢拍檔打咗一場，默契依然！

打網球嘅腳漸漸走哂去打golf，而我亦去左廣州工作，又學人打，打左一輪driving range,落場真係不知所謂，放棄

近兩年轉打羽毛球，進步甚慢（關年紀事），但keep住郁吓都係好事

是日追加﹣烏雲蓋頂

今日六點幾，天水圍上空出現一團前所未見嘅黑雲，方向由內地急速飄過嚟，直頭似一個屎塔蓋般蓋住整個天空，好迷呀！

索女你去邊啫

多謝友人Ｒsend咗呢封令人開心一日嘅e-mail，有好野梗要同大家share la

＊索女你去邊呀？
＊我去選港姐（設計對白）



好期待今年港姐呀！

細佬與隱型眼鏡

我屋企一家五口，除左阿媽，全部四眼；
但從來無人帶隱型眼鏡喎，我自己就覺得個眼鏡已經係個樣嘅一部份，家姐就覺得要撐大隻眼塞Ｄ野入眼好核突；
細佬最近被迫佩左隱型眼鏡，原因係佢打籃球定足球嗰邊話戴眼鏡無得落場，所以上兩個星期佢喺佢老婆同家姐陪同下去左眼鏡公司；
驗眼員教左好耐，佢話要用手將眼皮拉開，眼珠四邊都要見眼白，跟住放眼鏡落去；
但佢對眼細過呂方，點撐都做唔到，結果驗眼員叫佢番屋企練習。

佢喺屋企試左好多日都唔成功，佢老婆笑到碌地，仲個個禮拜向我地��報，全家人都好開心呀！

呢個禮拜佢有比賽，戴唔到就無得落場啦！點知真係比佢成功左，可以落場啦！

我要脫苦海

星期日晚如常去打隔個星期嘅羽毛球聚會，咪又係咁打，無特別賣命，怪就怪無熱身；
點知今朝直頭連起身都有困難，條腰硬哂駄，慢慢試下動作，彎腰做唔到，連坐低脴塔都要扶實，令我諗起將來老左係唔係都會咁！

藥櫃有兩片Ｎ年前唔知邊度贈送嘅脫苦海，貼左好過無啦！
希望聽日鬆番，仲要去新屋油油呀！

輪到我啦。。。大戶屋

之前見咁多人推介，星期六晚銅鑼灣睇完燈，決定食佢一野。。。

點左薯仔沙律／漢堡扒／炸雞飯＋喬麥麵

薯仔沙律。。。滿分，薯仔混左蘿蔔絲增加口感，點睛地方係加左好細條嘅生洋蔥，再加埋黑醋沙律汁，正

漢堡扒。。。好得，凍蘿蔔蓉配多肉汁嘅扒，減咗肥膩，但用凍嘅蘿蔔蓉令塊扒變凍速度加快，要扣Ｄ分啦！配菜全部好味到震

炸雞飯。。。雞好味但，略肥膩大量幼絲椰菜又係減炸物嘅油膩，椰菜超新鮮又帶甜，連飯都好食過人

喬麥麵。。。麵質唔錯，但個湯汁用左柴魚，唔啱我胃口



我會再嚟架！

某人話佢幫趁時有大聲港女，今次都有喎！唔通佢地無走過？

另外，請睇箭咀呢家人。。。


話說我搭lift時，去到二樓魚一丁，有人出lift，關門時，呢個女人喺魚一丁閃出嚟好似想入，我同佢議上架喎；
同門關緊，見佢好cool咁行入嚟，幫佢㩒返開架lift啦，原來一家三口，但佢無講唔該甚至乎唔講野亦無任何表示，我以為係遊客唔識聽啦！
到大戶屋啦，我地出佢又出，跟住坐左喺附近，佢開speaker講電話，仲係問Ｄ銀行野，係講廣東話架；

原來只係上幾代嘅港女，佢老公成餐飯都無出過聲，呢家咩野人嚟架？

星期五零碎事件簿

星期五下晝，去左灣仔做野，見有時間剩，入去藝術中心行過圈，見到呢幅牆，覺得好靚，影低同大家分享！


喺Ｂ仔戲院嗰層，得閑去睇下啦！


跟住約左朋友唱Ｋ，原來1:30pm已經無Lunch食，變左Tea K，即刻點飲歌先！


完

報章頭條

今朝起身，諗緊今日報紙會用六四做頭條吖定會用堅叔做頭條。。。

結果，蘋果第一版用六四，第二版爆左阿梁洛施，咁呢單野咁震撼，實賣到紙都仲算無可厚非；

但太陽同東方就真係離Ｑ哂大譜，少女露胸／F2仔索Ｋ暈Ｑ左都做頭條，簡直侮辱150000港人，侮辱堅叔呀！



呢舖真係比人話係左報都無野講啦！

新居＊graffiti

睇下我幾錫細佬，連間房都要畫佢個嘜頭喺度呀！

旅行*快樂回憶

天水圍舊居掛住呢幅相做裝飾，全部係前幾年旅行嘅快樂回憶。。。


左至右，上至下
東京廸士尼／曼谷的士塞車途中／布吉椰樹／箱根湯本駅／盧芝湖天鵝船／箱根彫刻之森x1／箱根彫刻之森x2
東京酒店外／京都﹣廟／京都﹣鴿／京都﹣紅葉／八景島水母／布吉海灘／箱根彫刻之森x3
Karbi酒店門外／大阪／箱根彫刻之森x4／京都﹣禁煙／箱根彫刻之森x5／布吉沙灘椅／箱根彫刻之森x6

搬新屋，呢張相都會轉，改做一張大相過掛喺sofa後，又或者保留呢張但哂Ｄ新相代替佢掛喺走廊！
相就離唔開過去兩年旅行嘅相；
呢兩年去過立山／倫敦／巴黎／曼谷／高雄／墾丁／東京／長野，好多相，哂邊張好呢？

新居樓下有好野食

油完油雖然只係六點，但係又攰又餓；

西環有好多餐廳食肆，揀間近近地，事旦入左食餐飽；

呢間食泰菜嘅，叫泰尚，環境唔錯，食物直頭一流，一個禮拜食左兩次，老豆阿媽食海鮮科都話得，會自己再嚟咁話


我諗有朋友嚟西理探我嘅話，我都會帶佢嚟呢度擦餐飽

完

第一次睇演唱會

佢都係其中一個我齊碟嘅歌手，對佢唔算特別瘋狂，但兩個第一次都係比左佢

第一次睇嘅演唱會同第一次睇嘅紅館演唱會都係佢。。。葉蒨文


睇得最多演唱會嘅歌手係林憶蓮

百發百中開親都睇（其實得兩次），係梁詠琪，仲要坐第一行

你地第一次睇嘅演唱會係邊個？