Sunday, January 23, 2011

旅行習慣


1/旅行前,永遠緊張,驚帶漏呢樣,又驚無帶果樣,個心成日數住,passport,身份証,外幣,visa card,機票,訂酒店嘅收據,义電器,藥,插蘇等。。。。真係未出發,已經鬼咁攰

2/會帶D舊衫去旅行。。。會專登帶D舊tee,舊褲,舊𧙕,舊底底去旅行,著完跟住掉喺酒店,咁個喼就吉哂,有位買新野;幾年前試過有同行朋友話我著得肉酸㖭,激死!
又試過有同房見我日日掉底褲同𧙕,我解釋話果D係鬆哂頭或穿洞嘅
佢問:點解你咁多穿洞鬆頭嘅底嘅?
我好認真答:我好辛苦儲番嚟架。。。。。跟住佢仲週圍唱,比佢地笑到面黃

但今次我又遺棄左三條穿洞鬆頭嘅喺曼谷啦,呵呵~

3/除左爛底,仲會帶果D用剩少少嘅洗頭水,牙膏洗面膏,食剩半盒嘅薄荷糖,總覺得喺果邊用哂掉埋係一件好爽嘅事嚟嘅;所以酒店垃圾筒好多時都比我用到滿瀉

4/又,每次出發前都會買本旅遊書睇下,即使對果個地方幾熟,唔揸住一本又好似唔安心;近年,又會上網摷定一堆料,諗住搵D新奇好玩D嘅地方;但今次,去左書局幾次,拎起本曼谷天書,真係覺得無乜新野喎,要去嘅都去過哂,係第一次出發無帶旅遊書咋~

5/平時早餐明明食量唔多,但去台灣曼谷等有自助早餐架呢,就會死唔蝕章兼胃口大開,食量仲大過午餐囉

6/可能食得太多,去厠所次數密到驚人,起身先去一野,食完早餐太飽,要番上房,D新貨迫D舊貨出嚟又一野,分分鐘遊完水仲有貨賣,驚呀~

你地有無呢D習慣呢?

21 意見:

新鮮人 said...

無,
除了去前找當地資料!

看見你話好辛苦咁儲啲穿窿底褲時,
我笑了!

black lab said...

about #1
冇!因為我有張清單,係累積多年經驗列出嚟嘅,每次執行李就照單執,一定唔會漏;若果旅途中發現帶漏嘢,就即刻加番落張清單度,咁下次就唔會再漏同一樣嘢。

about #2
近年我都會帶預備要掉嘅嘢去旅行,旅途中掉舊嘢真係好爽。而且近年我為咗減少屋企雜物,實行「一物換一物」,即係買一樣新嘢,就要掉屋企同樣性質嘅舊嘢,旅行就係執行嘅好時機。

naruto said...

新鮮人:
儲穿窿底褲呢個習慣到而家都繼續,呵呵

black lab:
減少屋企雜物... 我都做緊

largeheadboy said...

大頭仔︰我每次上咗車去機場,都仲會檢查多一次有冇護照、身分證、外幣,的確係好大壓力,然後又開始擔心熄晒燈未。
邊有咁多爛底底呀真係~
去旅行嗰朝如果無野出,成日都好愁架!

L L said...

喂 naruto, 你好有旅行智慧喎!

不過若我同人一間房,就唔敢食太多,你知喇,啲聲呀氣味呀惡頂架嘛!

supageti said...

我上機前至執野,所以成日都帶漏野,慣晒啦。

Ellen老師 said...

我都係上機前少於20小時之內至執野,所以帶漏野都預左,至緊要唔好帶漏$$$$$$$,未去到先買囉!

有時甚至特登唔帶,去到先買囉!

上次去広州出張,就帶左用剩少少嘅洗頭水,牙膏及洗面膏去。帶D用剩野,其實我好少咁做!

ayclui said...

#1 - 我都有張checklist, 所以好少帶漏野

#2 - 同道中人啦, 不過我D 係舊嘅, 無穿窿...我唔鍾意帶住D著過嘅底底成十日八日, 一路著一路掉真係好爽, 個喼多D位...
祙就一定唔可以穿窿, 因為喺日本成日要除鞋, 唔可以失禮呀~

P.S. 大叔, 點解你同房會知你掉底底嘅? 你無搵個膠袋包實佢嘅咩?

naruto said...

Largeheadboy:
係呀,出左門又驚無熄燈呀,煤氣電視咁呀

Lauding:
同得房就無得避架啦

Supageti:
慣哂仲要好威咁

Ellen:
乜都買過咪好貴,哼

Ayclui:
就咁掉落垃圾桶咋喎

Ogake said...

-會帶贈品類既旅行裝用品instead of 用剩少少的...
-旅行前執野我都會怕帶漏野~ 但無你咁緊張
-我點都要有本書係身邊~ 唔係唔識行~

>>>>> 好想去~

naruto said...

Ogake:
放假咪去下旅行囉

卡臣 said...

我去旅行必帶紙底褲。

naruto said...

卡臣:
紙底我試過流汗過多溶溶地,唔會再著

Tee said...

用即棄布底,唔會溶。

我都係雀仔肚,如果我跟你去旅行一定掙廁所。

largeheadboy said...

以前我都會帶紙底底,依家就好少,因為如果去得耐嘅話通常中途會洗衫。

naruto said...

Tee:
爭廁所?落去lobby用酒店公家果個好過啦

Largeheadboy:
洗衫?煩呀

ayclui said...

紙底底唔得O架~ 話說我朋友嘅朋友係大汗人, 有一次去旅行著紙底底, 一路行一路有紙碎由褲管趺出, 返到酒店得番3個橡筋圈喺身上咋~ 真係經典呀~

naruto said...

Asylui:
我都聽過呢個笑話

Karvitz said...

我諗我遲咗,但照回。

1. 愈來愈唔緊張自己有無帶漏嘢,自己有信心帶咗 passport 、銀包及袋旅行資料的包包就無問題。

2. 爛底好少帶去旅行,舊衫反而會帶,但試過有一次諗住帶4件扔4 件,最後唔捨得,帶返 3 件返香港,只係扔左 1 件。哈哈

4. 旅行書一向都少帶,而家就連 print 出來的地圖都好少帶,走失就走失,呢種都係旅行的一種經歷。但就係因為咁,上次為左搵間鋪頭而摸黑行咗成個鐘頭,幾佩服自己的大膽。XDD

5.好耐無食過自助早餐喇!

聽你咁講下講下,你朋友有無嫌你煩呢?哈

naruto said...

Karvitz:
梗係無人嫌我煩啦,頂你呀

Maisy said...

以前帶好多舊衫去旅行,用完即棄,但所謂舊衫,仍然好新下,阿媽話唔好浪費,咁咪少左帶舊衫。
舊底、舊襪都有架,都係儲左好耐,去旅行用完即棄。

Related Posts Plugin for WordPress, Blogger...