跟U﹣magazine去濕地公園

朋友報名參加左u-magazine同濕地公園舉辧嘅“愛享受，愛自然 綻放濕地花卉導賞團”，叫埋我去，星期六朝九龍塘出發

我純粹諗住可以免費入去影下相，仲有車接喎，點知原來個團有攝影及問答兩個比賽

攝影有三個獎，獎品係$500超市禮券，問答得一個獎，全年濕地公園通行証；咁我覺得攝影機會大D囉，下哇～


但原來時間好緊迫，全程一粒鐘咋，又要聽書又要影相又多人（共16組），有壓力～唔慣咁影相呀

外憂：
團友入面有好進取嘅師奶同佢老公，導賞員一講朵花即仆埋去影影影影影，唔夠佢搶
又有揸長炮嘅阿叔，仲有學生哥小情侶；中途佢地已經話：好靚呀，贏梗啦
哇！好多勁敵呀

內患：
1/先跌左鏡頭蓋，直插落木地板空隙，無得執，影響心情；

2/有客遲唔打早唔打電話嚟，要傾合作事宜，咁工作緊要D囉，咁又無左十多分鐘
3／慣性影相番嚟會裁相，可以拉下contrast，而家乜都唔比做，好原汁原味呀
4/每組只可遞交一張相參賽，用我定朋友嘅呢？佢D相都好靚架喎，佢呢排仲連環攞獎，計運，似乎揀佢有so喎
5/就算揀我嘅，咁多張，揀邊張好呢？

最後，都用左我嘅相，從呢三張挑選
1／螞蟻與花，2／蜜蜂採蜜／3／荷花
你地會揀邊張呢？


因為係比賽，我咁諗。。。
朋友嘅相最靚果張係野生菊花仔，相好靚，但人地宣傳公園嘅花，無理由揀野菊仔
本來覺得荷花好，但頭先個個都狂影荷花，一定好多人出荷花，荷花競爭大，唔敢博呀
最後二揀一，唔識揀；就螞蟻啦


交相嘅時候又有小插曲喎，前面位嬸嬸襟錯制，用左raw，PC機睇唔到，攪左好耐，佢又好緊張喎，最後要靠睇佢相機嚟評分，我排佢後面，心諗：你咁有信心？又覺得我係U都唔比你啦

結果。。。。
問答遊戲由好進取嘅師奶贏左

跟住，螢幕上突然打出我張相，見到時呆左一野，朋友叫我準備攞獎

跟住佢話三張相不分先後，第一張係。。。（我已經想起身）阿嬸，我諗我當時O左咀；佢張相因為開唔到，所以無打出嚟
第二個係我，而第三個係一路都唔起眼嘅後生女，佢真係荷花相，而D阿叔，小情侶無哂
但我好想知阿嬸影左乜呢？


禮券同朋友對分啦，多謝佢比機會我出賽呀


每人仲有個福袋，好多禮物呀，賺突呀真係


之後，有車車我地返九龍塘，但我地決定離隊，繼續影，都影得幾好，過幾日再寫

我諗今期書會見到我囉，希望影好樣D啦

好，今日問題：原來放大張蜜蜂相，有D古怪野，佢腳有花粉啦，翅膀一粒粒係乜嚟架呢？（我有拎張相問導賞員，有正確答案，聽日開估）