Wednesday, March 14, 2012

東京.伊豆.輕井澤の旅﹣day5

第五日,第一站係湯島天神宮睇梅花,喺酒店行過去只需15分鐘

中途會經過上野公園嘅不忍湖。。。好多伯伯嬸嬸喎


又係鴨,乜日本咁多鴨嘅,由伊豆輕井澤到上野,鴨鴨鴨鴨鴨鴨。。。
湖底仲有好多鯉魚喎


經過D細間廟宇,牆上面嘅貼紙係乜架呢?有三田喎,佢嚟打掃?


湯島天神宮啦,第一眼望到嘅係呢D“許願牌”,多到吖,會唔會冧架?D牌會唔會recycle架?唔會咪好嘥?


睇下牌上面,有唔同圖案,睇下條龍,再睇下賣”許願牌“嘅巫女,仲有佢隔離嘅箭。。。犬夜叉呀


好,到主角。。。梅啦;以為櫻花未開啫,上網嚟睇又話開哂,原來又係開得一棵,其餘零星一兩朵咁,算啦,呢幾日都影左唔少


經上野公園番酒店,一早聽聞上野公園多貓,果然名不虛傳,唔驚人但唔肯望鏡頭,擺明比人影到煩
(貓。。。遲D再寫)


點解咁急番酒店,因為約左長駐東京嘅blog友black lab呀,今日有佢做導遊,乜都唔使帶lu(包括個腦)
上晝本來大陽光,影貓開始陰,即凍,番酒店時又要著番件羽絨
black lab帶我地去食Saizeriya,香港都有,但開哂喺邊皮位,終於要嚟上野食
估下邊碟係我嘅?
哇!飲品任飲呀,缺水嘅我飲完汽水飲綠茶


食飽去左隅田川,為嘅係離遠影sky tree,個天越嚟越暗,越嚟越凍越嚟越凍越嚟越凍
black lab話河邊嘅係櫻花樹,佢會再嚟影櫻花+skytree比我睇喎;喂!仲未有嘅?


現場有D古怪健築,可以捐入去睇對岸,呢張相我鍾意喎,夠低能


跟住去明治神宮,途中順路去埋上次食過嘅蛋糕店MarRisa,上次嚟好味到lam埋張錫紙,今次再嚟,我點嘅係朱古力蛋糕配薄荷茶,壼茶有個沙漏架,漏哂先飲得架!
發生左一段小插曲。。。蛋糕餅櫃揀,飲品女侍應遽上餐牌,佢問日文餐牌有無問題,black lab答佢無問題;我以為佢咁問有英文餐牌,於是問佢攞,換嚟嘅係。。。。靚女厨師;佢話冇英文餐牌,佢英文比較好(其實好過我囉),所以佢出嚟講解;靚果個就lay喺厨房,“無咁靚”嘅反而做門面喎,錯配呀~
跟住有個男人埋嚟問我地點識嚟呀之類問題,呢個又係非常流俐英文喎,原來佢係老闆個老豆,相入面果個,原來已經62歲,保養得咁好嘅
佢仲送上一件佢地舖頭嘅皇牌(中下),一件餅幾種口感,好食到暈左
相入面另外果個就係老闆即係佢個女,反而講日文架喎,睇樣都知佢一定係好鍾意食蛋糕啦,我意思係佢好甜咋~


跟住行去明治神宮,天太陰又掛住傾計,無乜影相


跟住去井之頭公園,經過呢檔紅豆魚,新鮮出爐好正呀,今日真係好口福呀


到井之頭公園,啋,五點咋喎,做乜黑哂架,日蝕呀~唯有提早開飯啦


居酒屋呀,燒呀燒呀,有個火烘住唔怕凍呀,可以除低羽絨呀,幾日嚟第一次呀,差D變左我第二層皮膚呀


食得嘅同我攞哂嚟,burn burn burn,火中的一個草原


食飽,去行超市,仲買左士多啤啤做消夜,好甜呀~~~~~


第五日美食之旅結束,第六日番香港前去邊好呢?

13 意見:

largeheadboy said...

呢日終於食返夠本喇!
你要牛扒煎蛋囉~

lau2tang said...

好囉!明仔唔使再趙包飽囉!
一碟係明太子意粉,另外嗰碟係?? 肉醬??
我估你揀肉醬意粉。

TY said...

哎呀..終於有日好食啦!!! 唔使飢寒交迫啦!!!

我都估肉醬意粉!

搵次要去試下果間餅店,好似好好味!!! 但係咪好隔涉??!

l.minor said...

呢日食野好好多,餐餐飽點得架?

black lab said...

對比起前幾日,原來呢日係最得到溫飽,哈哈!

櫻花仲未開呀!所以仲未有相。今年凍咗好耐,到呢兩日先至叫做暖返少少,睇嚟今年會四月頭先開。

black lab said...

吖吖,漏咗講,係『不忍「池」』呀老友。

Cat said...

你張相好搞笑,好似將個頭擺左落隻碟度。

supageti said...

D 牌唔會 recycle,應該係會火化畀神明。

Ebenezer said...

食食食食食食食食食食食食食食食食....

因住食滯!

naruto said...

largeheadboy:
錯啦

lau2tang:
唔係肉醬意嚟架,好似係cheese and ham

TY:
佢個名連住條link,自己check下

l.minor:
我夠知啦,我想架咩

black lab:
喂,但係梅花宮個網影出嚟開得好勁呀,你有時間可以去睇

不忍池錯左,你知我記性架啦,唔係點會落錯站吖,我都唔敢寫出嚟啦

Cat:上菜嚟架。。。我

supageti:刮左面果層咪寫過囉,燒左成棵樹果度

Ebenezer:幾日都食唔夠,再唔食,無屎屙啦

lau2tang said...

吓!咁講法你咪即係揀咗明太子意粉?

naruto said...

我食cheese and ham啦,明太子,我情願食番包啦

lau2tang said...

lau2tang:
唔係肉醬意嚟架,好似係cheese and ham

你誤導呀!
你食咗落肚,都唔知個碟係乜!

Related Posts Plugin for WordPress, Blogger...