東京．伊豆．輕井澤の旅﹣day4（噢,雪） （上）

最後決定去輕井澤，一來直接上野站出發，二來只需要65分鐘，三來朋友未去過，四來上次我嚟大部時間大霧兼落雨

想搭八點幾果班，得番一個位（咁邪），遲一班九點幾至有位，無所謂啦，上野影個圈先
咦！sky tree喎～


呢程車好貴呀，張pass真係賺到突哂呀


車上食早餐，第四日由我至愛嘅腐皮壽司開始，加埋一個靚薯仔麵包，yummy~


到輕井澤時，我嗌左出嚟：吓！雪山？有人滑滑滑雪？
雖然知會凍過東京，我上網check話佢有兩度，但天真嘅我無諗過有雪囉～


第一站係我上次嚟因大雨去唔到嘅雲場池，步行需要30分鐘，有得上網，用google map,（好似）方便左
街上有積雪，屋頂有樹掛，婆婆著到隻糉咁


有太陽曬住反而唔算太凍，沿途都係森林，人影都無個


到雲場池入口啦，真係靚喎，原來佢分左右兩條步道，我揀右，從地圖上睇行到尾轉右可以去舊區銀座，good喎（點會咁順利吖）


又係好多水鴨喎，影呀影，結果踎低時跣到坐左喺度


沿住步道行，景係靚嘅，但相影得唔多，點解呢？


因為步道舖滿雪，好難行，有段直頭要扶住欄杆嚟行，顧住行又好難影相；唉呀，又坐喺度


好啦，行完步道啦，見番馬路，轉右嘅路結哂冰，行左一小段發覺唔對路，向左行google map顯示出番車站，情願出番車站啦
點知，行行下又係呢種結冰路，結果半個鐘嘅路程行左一粒鐘，跣到飛起，鞋都濕埋


幾經辛苦，行左去。。。。竟然係雲場池入口，都好，至少唔使再行冰路
跟google map去舊區銀座，行左作D小路位，見到間靚酒店，乘機問路借廁所兼暖番野

到舊區銀座，哇！好似西部片咁，大部份無開門，有舊草吹過；
見到呢間賣類似旺旺嘅舖頭，即刻買舊醫下肚先，原來可以入去飲茶坐下，狂飲呀，好暖呀，呢130円好抵呀


喂！我要食飯喎，午飯時間喎，無餐廳開門嘅？有雪糕，食左先；
另外，曾經見過當年飲過嘅牛奶機，諗住就嚟食飯唔飲，橫掂車站都有，結果又係衰左
連美術館都唔開，我又興起又扮凍到咀歪左嘅蒙婆麗莎


究竟黑仔嘅小明有無飯食呢？怕凍嘅小明出番馬路係咪可以避過一刧呢？
點解頭頂黑雲越嚟越大呢？請留意下回分解～