Thursday, October 14, 2010

鹽田梓半day遊

呢度我極力推介,事後睇左無線嘅“香港事情”見到村長嘅故事,更加推多兩野。。。簡單講兩野,村長自細呢度大,移左民,條村無人村二十年,番到嚟面目全非,決心憑自己回復當年面貌+保育;勁,我佩服


先講點去,去到西貢碼頭,通記海鮮對出就見到,賣飛嘅就係村長,親力親為架;街渡來回$35,船期睇相啦。。。


15分鐘就到,一上碼頭會見到間好靚嘅舊屋,跟住就係村公所,村公所D後生仔好好人,會送你的一張地圖,方便你搵景點
而村公所係兼營士多架,招版貨係四色茶粿,係咪好靚呢?必食架!($20四件)


呢度有個優點就係景點密集,村公所行兩分鐘,就到敎堂同學校啦
教堂就巴閉啦,係天主教香港發跡嘅地方,而家係文化遺產,感動位係入得去參觀架;我呢個讀左11年天主教學校嘅梗係唸番趟經先啦,都仲識唸~


行5分鐘,就到左活泉井,好少見D井無遮無掩,井水好清,你可以望到井入面,係好深架!
另外一個特別位係,井附近好多濕泥,係紅色架,同埋勁多蜻蜓;我都係第一次影到咁近嘅蜻蜓


沿途嘅路都好整齊好靚,節目講係村長同幾個後生仔逐少逐少開出嚟,諗到都知幾辛苦,兩旁好多高樹,好寧靜,呢隻靜係去南Y島長洲感受唔到架!
平時少見嘅植物呢處特別多,D芒生到半個人咁高,仲要多到成塊田咁大,仲有假菠蘿㖭

到達觀景台,望住滘西洲高爾夫球場,空氣都唔同D


另一個賣點係玉帶橋,橋旁有片紅樹林,可以親身接觸架

島上面有兩片紅樹林,除左呢度,另一片5分鐘就行到


重頭戲,叫得鹽田,呢處以前真係曬鹽架,第一次親身見到鹽田,原來係咁架,村長話會修復番佢,等香港人知點樣曬鹽,其實我想幫手囉


最後一班船只係5:00pm,睇唔到日落;原來島上夜晚係無人架喎~

鹽田梓,我會再嚟

資料查詢:www.yimtintsai.com,tel: 2791-6226



預告:聽日睇我鹽田梓影到D乜

後話:呢排好忙,個blog無哂存貨,隨時停刋呀,呵呵

16 意見:

Tee said...

讚!!

不過,景點不是好多。

至於無貨應該唔會發生,我覺得你厄到blog嘅

largeheadboy said...

至於無貨應該唔會發生,我覺得你厄到blog嘅 x 2

仲有邊度未去呢網主?
呢度好得,今年之內要去一去~

naruto said...

Tee:
島仔細細,我1:20pm到,4:00pm走,勝在夠集中,無冷場,易行

今晚出相就無問題嘅

largeheadboy:
下一站未去嘅應該係橋咀島

去啦,感受下人地嘅努力,自己都有動力D呀

supageti said...

支持保育工作!佩服村長既毅力!:)

其實好多時內心好矛盾,少人去又驚佢無收入無錢支持落去,多人去又驚搞污糟/亂/爛晒 ~~~ @@

大澳都有幾大規模既鹽田,以前逢年初一都會入去靈隱寺食齋,之後就徒步落大澳搭車/搭船走,途中會經過鹽田,依家唔知咩狀況。

卡臣 said...

睇完有心曠神怡之感!

無貨?
咪玩啦
一定變到出嚟嘅

naruto said...

supageti:
大澳有鹽田?我唔知喎,近邊便?

卡臣:
真係無貨啦,捱唔到你復出呀

l.minor said...

呢度我曾經想去影相,因為知道有間教堂好靚(見人d相影得好靚),一路以為要自己搵船過去,原來係有駁艇過去架?你唔講真係唔知,有機會要去睇下,不過多唔多蚊先?

行一陣咁小?因為要趕尾班船?不過呢度一定會黎睇下,原來去係咁簡單,另外我見有人釣魚喎?正呀!!!真係要黎考察下場地先!

另外,提議你放張鹽田梓地圖係度,我更加非常誠意你同唔介意你整張更靚嘅地圖俾人(我)做下reference....wakakaka...

p.s. 我估你今晚一定有教堂靚相!!!

l.minor said...

另外,你係呢兩三日去架?藍天黎喎!

TY said...

我都有睇果個"香港事情",個村長好有毅力呀! 等我去完個米埔, 再搵個時間黎先!

btw, 狗狗可唔可以上船呀?! 如果係,可以帶埋我個仔去影下相喎!

陳娃 said...

咁你真係忙得好緊要喎.. 你明明有好多存貨架..

naruto said...

l.minor:
10月2號去,無時間拖到今日至出

ps:今晚係無教堂嘅

呢個係有求必應blog,已加地圖

TY:
毅力真係唔係個個有架

狗狗嘅問題,你打去問下。。。2791-6226

www:
你見我仲未約K你就知啦
唔覺得我呢排無攪屎棍咩?

存貨。。。出哂啦

supageti said...

依度

ayclui said...

出相啦, 正呀~ 我就無咁好心機影相...果日鬼咁熱...張樹丫相蝦子餅都有影~ ^^

TY --> 狗狗可唔可以上船呀?!
係可以嘅, 我去程同回程都同人地D狗狗一齊搭船, 有爹利仔,又有貴婦(叫Bo Bo 添~)

supageti said...

上次搭船入南Y島,都有好多人帶住狗狗,不過一定要搭樓下。

naruto said...

supageti :
大澳我又真係少行果邊喎


咁你下次都可以帶魚魚喎!

ayclui:
我其實影鹽田時熱到踎低起身見頭暈,後尾去左茶座飲可樂

supageti said...

院長 )))) 食藥呀 )))))

Related Posts Plugin for WordPress, Blogger...