執一個森林回家

我有個(壞）習慣，行山去郊外，如果見到棵植物靚又有種子呢，我會執左佢番屋企試種，成功例子之前寫過，有兩棵木棉；佢地本來生得好靚，點知早兩日翻風，打爛左幾塊葉，遲D生番靚先post佢地嘅相


大概三至四星期前，因為影貓去左華富村，見D羊碲甲種子跌哂落地，隨手執左約廿粒番屋企，用濕棉花浸住佢發芽，竟然差不多全數成功，買左新盆仔種靚佢，大得好快
有個小夢想，後山有個位係私人嘅，但無人打理，種哂落去，兩年後會唔會開哂花，好似櫻花森林咁呢


羊碲甲都唔算癲，呢個就癲啦；上次去三椏村見佢地跌哂落地，又執左幾枝；插佢落泥，刻意淋多多水，又加左沙，真係成功出左葉喎，好開心呀!
有個小夢想，仲有個位係私人嘅，但無人打理，近海，但都有淡水從山上流落嚟，試下整個人工濕地先，呵呵

另外，原來食唔哂舊薑發左芽，掉落花盆就出葉啦喎，種埋薑花先


唔使去花墟買啦：）

求助﹣就嚟貧血

以前，可能體溫偏低，只要附近有其他人，無乜蚊咬我

今年呢，上星期去後山探貓，噴哂萬寧牌蚊怕水，都咬足咁多日，仲要係咬噴滿蚊怕水嘅地方

呢個假期，星期六去愉景灣，無帶蚊怕水，第一輪咬左11粒，第二輪再9粒，查完白花膏都好X痕呀～


星期日學精左，噴咗蚊怕水，可能大汗，又咬11粒

本來美腿生暉嘅我，而家傷痕累累呀，陰公!

有無人推介邊隻牌子蚊怕水or蚊怕貼好呀？有無其他計㖭呀？我就嚟貧血啦

家常廢話

星期二晚，如常番老家食飯，同家姐阿媽打三腳牌，一邊打一邊廢話。。。

講緊我表妹，佢地係孖女，而家都廿幾啦。。。

媽：個大嘅本來係細，個細嘅先係家姐嚟架

我：點解呀？

媽：佢開肚架嘛，個醫生咪將上面果個捧出嚟先囉，就係咁，家姐變阿妹啦

姐：佢地係肚識唔識爭位架呢？

媽：梗係識啦

姐：你又知？

媽：你個細佬（即係我）咪識囉

我：我係孖胎嚟架咩？

媽：唔係，只不過你臨生果兩星期，醫生照到你用個pat頂住個出口，醫生就喺我肚皮“查”滿爽身粉，跟住用心慢慢移番啱個位，點知第二個星期，你又自己掉番轉，個醫生(鬼佬嚟喎）都話呢個係naughty boy

我：哦！都係想個腦出先啫

媽／姐：。。。。。。。。。。。。

貓女與貓B的故事

接上回，春天番去探貓媽，見佢身邊多左兩隻B，一隻大D，一隻細D，大細相差都幾大，其實係咪同一胎架呢？

以我呢幾個月影貓嘅經驗，大果隻應該係女，細果隻係仔嚟架(雖然未証實，但我都係叫佢阿女同阿B


先講阿B，睇下相，佢個樣超可愛啦，上面三張係三月影，當時仲好baby，好驚人；下面果張係四月影，呢張相等多好耐，琴高“僕”佢好耐先影到，我好鍾意，相片睇佢已經大左一個碼

佢個樣同之前被貓義工捉走嘅貓爸同貓BB成個餅印，一定係佢老豆被捉前留嘅種啦


頭幾次見佢好跟貓媽，所以直覺佢地係兩母子


睇下貓女，佢係啡色架，成隻豹仔咁，驚覺性超高，永遠離你十尺；細個時同細佬唔係太似樣。。。


佢又係痴住貓媽，所以無懷疑過佢地嘅關係


但自從新貓媽五月突然出現仲長駐之後，影左好多相，發現。。。阿女直頭同新貓媽成個餅印，連尾芯D pattern都一樣，尾都係間條紋（貓媽係剩色），阿仔就55波啦，究竟係各自生一隻，定係新貓媽生一雙呢？呢個係一個謎


呢兩張相係今個星期帶長鏡影嘅，兩隻野已經變左一樣大，但拉瘦左，始終係住喺山區，多左一份野性，成隻山貓咁呀而家

下星期繼續，第五隻登場，眼利嘅你喺今日呢堆相見唔見到佢呢？

做足100分的模art

最近有無搭小輪過海呀？


侯船室有個廣告display櫃，擺左好多香港交通工具模型


模型手工精細，真嘅一樣呀，簡直係藝術呀


有幾精細？睇下呢架我至愛嘅巴士模型，連車頂有雀屎都做埋呀，仲唔係藝術？


完

隱灘﹣烏溪沙海星灣

真係一個隠藏左無乜人講嘅地方，港鐵搭去烏溪沙總站，面向海向右行，會出現一條向下行嘅小路，自己搵路行出沙灘，沿途無路牌指示，上網睇番資料，佢叫海星灣，以前真係好多海星，而家只有小量


呢度好多蟹仔，佢地好過癮


成個灘都係，好震撼


當日，仲有一隻小白鷺，用長鏡影左幾張寫真


雖然係星期日又好天，但人唔算多；佢地會做乜呢？有人放狗



有人划艇，有人玩獨木舟，有人捕魚，同埋好多親子家庭摸蜆


仲有人。。。喂，自殺呀？自殺唔使擔遮架


好多天然野睇呀;喺沙灘見到兩隻海膽，有D乾乾地，影完相放番落海，希望未死啦
條雞泡係個男人撒網捉到架，原來落網只需10分鐘就有收獲，見佢都捉到十幾條魚仔，條雞泡放左生
仲見到有人浮潛，捉到幾大袋帶子，但後來有釣魚人話係“泥賊”，但至少表示呢度D水靚啦


個灘好大好大，沿路都見到D水筆仔飄左去沙灘，但奇怪嘅係，其實果度係無D長大嘅水筆仔喎，我行過，咪逐枝幫佢插喺石灘囉。。。
但原來，係沙灘另一邊有個小小嘅水筆仔樹林，好明顯係人為，因為全部都好整齊，一尺一棵排哂隊；咦！原來有人同我一樣喎


叫得海星灣，點都要搵D海星影下，但嚟遲左，佢死左


最後，樹上開滿花，好奇特，好靚


呢度方便易去，得閒去摸下蜆啦，但記得著(帶）拖鞋，但如果好似我咁行埋過左邊石灘，就要小心D，石頭有蠔殼，好似我咁，一野踢埋去，就𠝹損左啦。。。

ps:問下意見，呢篇玩下野，咁樣出相O唔OK？

西九睇波波

接噚日；喺W食完自助餐，點都要行下幫助消化，一於去西九。。。睇波波


其實我想搭一次囉，有無人陪我搭呢？睇下，隔離仲有個“高達”基地，換套馬莎造型嚟搭都好喎


但當日太大風，喺地面見佢升空之後斜得好交關，三分鐘後就降落啦；咁就唯有影下其他啦。。。


咦！咩野造型嚟架？黑執使？


時間唔多，但都影到幾張滿意相片，睇相。。。
1/黃花地


2/兵分三鷺


3/蒲公英


4/蝸牛


5/波呀，波波呀


6/阿蛾



西九點去：搭西隧巴士，西隧口落車，會有路牌指示，so easy

完