黃色暴雨下 兩條茂利去白泥

留學嘅blog友上星期番嚟香港“旅遊”，佢話想去白泥，原定22/6去，打風，咁改期啦，29號再出發，點知。。。

早上都唔係落得好厲害，佐敦食完飯開始落狗屎啦，但我地都決定博一舖，博入到去停雨；喺車上就停雨，一到埗，痴線咁大呀，根本落唔到沙灘


咁就四圍行個圈啦，好多好多生果，荔枝龍眼菠蘿蜜芒果提子全部都好靚，滴哂水咁囉，無可能全部影，因為顧得個袋同把遮又顧唔到部機，好"呢hea"


喺厠所巧遇螳螂兄，佢話入嚟避雨喎，但我屙完尿要洗手，唔該借借吖


再行去觀音寺，見到奇蹟啦，觀音顯靈呀。。。。條魚喺路上爬行，其實想捉番佢落河，但望下週圍，無河喎，諗緊點幫佢之際，佢已經行左去草堆失踪左，但原來後面仲有第二條行緊噃


呢個時候，發現網友個背脊有約三十隻烏蠅痴住佢，原來我背脊都係同一情况，趕極唔走，結果行到嚟荷花池，終於有瓦遮頭，影住相先，唔理D烏蠅


行番出去，準備搭小巴番元朗，但兩人身懷60烏蠅，點上車呢？我地一路彈自己件衫，跟住即狂奔，如是者每次少5隻左右啦，過左20分鐘，終於(好似）無哂；但上車先發覺，原來最後都係有兩隻死跟呀，激死

探探阿仔與阿妹

因為佢地主人呢，就嚟又去旅行啦，所以今日同artman打完波就上去佢屋企探下阿仔與阿妹，驚佢地唔認得我呀，聯絡下感情，照顧起上嚟都易D

睇下阿妹先，大隻左D喎，擺明好食好住啦


仲係鍾意瞓住我個袋，一D生保都無，任摸任摷，仲嗲過以前


又睇下阿仔，都大隻左喎，好英呀～


似乎認得我喎，都係任摸任摷喎，呵呵


我施展呢幾個月學成嘅按摸手，佢開心到反個肚比我摸呀


之前已經食左正餐，但當artman一開貓礶頭，阿仔雙眼即發光，仲開聲喵不停，連平時食野懶懶行嘅阿妹都即食呀


阿妹食唔哂唔緊要，阿仔仆埋嚟同佢清碟


artman又洗乾淨個貓厠所，兩隻野企定喺度爭先入去。。。最後阿妹勝


出嚟時露出勝利笑容


8月佢地主人去旅行時再update佢地D新相啦

嚇親

今日去馬灣影相，行左去條荒廢左嘅村，行上山,突然。。。

突然有條蛇快速喺我前面行過，我嚇到嗌出嚟，好大聲果隻，因為條蛇好長，好粗，至少四尺半

好驚呀

7月係快獸月

睇到條banner都知，7月係快獸月呀

今日先送上第一波。。。jesus loves 快獸

滴屎嚟見聞錄

廸欣湖行過嚟要15分鐘，行過嚟做乜，純粹帶快獸嚟踩場囉，原來就咁喺門口唔入去都好多野睇架


有同胞大模C樣喺度瞓覺喎(一影佢即刻郁呀，嚇到我吖）


哇，好靚呀個舖屎


咦！走佬公主喎


仲有水舞間米奇版㖭


攪攪震，無幫趁都謝謝光臨喎，呵呵～

廸欣湖影到乜呢？

1/望向天，藍天白雲藍飛機


2/踎低D，發現小香菇


3/樹底下，有把小雨傘


4/聰明葉上有滴淚珠


5/呢棵似點滿蠟燭的蛋糕


6/蝴蝶用飲筒飲緊花蜜


7/仲有綠色金龜子


8／四腳蛇肥肥“得得”，無尾架喎


9／荷花池除左有荷花，仲有蜻蜓，呢隻係紅色嘅


10／呢隻係黃黑色，但眼睛係綠色架，好型


11/仲有，水蚊喺度游蛙式，蛙出漣漪


12／荷花盛放，影左好多


13/呢張齋影個花影


14/呢張鍾意個構圖


15/點解要夏天出動影相，無勁太陽影就影唔到D花瓣透哂光啦


16/背景似幅畫,呢張我鍾意呀


17/呢張我又鍾意喎


預告：廸欣湖影到6:30pm，行去隔離嘅滴屎嚟樂園，見到乜呢？

秘密花園﹣廸欣湖

你去過廸欣湖未呀？我真係未去過喎


話就話喺廸士尼隔離，行過去要15分鐘，搭車仲要$3㖭，玩完廸士尼都夠鐘啦，仲點會嚟廸欣湖吖！

終於，上星期六，帶埋快獸專程去影相廸欣湖，睇下佢有幾inspiration


咪講笑，真係靚喎，大草地，大湖，超大空間，種嘅樹唔止品種特別，仲唔會有香港其他公園嘅通病。。。隔幾尺就一棵，棵棵唔同種，密麻麻之餘又亂糟糟；人又少，夠哂靜，真係唔似喺香港呀，以為去左外國旅行呀


花又多，影到唔停手啦


草地特大，我就未試過喺香港可以踏上咁靚嘅草地啦，維園果D比你行上去都禿頭啦，呢D軟霖霖架～


成個公園好大，感覺仲大過廸士尼；荷花池D荷花又係開花季節，狂影一輪，行哂一個圈，攰到爆炸


今次影相有番D feel，聽日出相簿

ps:成個公園得一間7/11喺正門，補足倉買多枝水至好開始行，唔係好易中暑


點去廸欣湖：
交通：於青馬收費廣場站車站，轉乘R8巴士(10分鐘就到）