夏季日劇

每季都會睇一兩日劇，春季睇左幾套頭一集全部無追，夏季開左鑼，睇下呢季我睇乜？

揀邊套，除左卡士，戲種，通常都會上網睇下佢地喺本土嘅收視嚟選擇，今季第一套揀中嘅係佢。。。

東野圭吾懸疑故事。。。推理題材加上強勁卡士，以為無走雞，第一集嘅演員係唐沢寿明加田中麗奈，睇左半集，悶到C左，byebye～


跟住睇“無法呼吸的夏天”。。。。武井咲、江口洋介、木村佳乃，卡士ok啦諗住，點知睇左一集，又係悶C，又bye


天空的診療所。。。向井理，呢個當紮，就睇你啦；
故事犯駁，睇左都唔明做乜要喺山頂整間診所，我會比喻為如果發生喺香港，鳳凰山頂整間診所？有事call直升機啦吓哇！
女主角唔吸引兼黑人憎，但睇左三集，向生幾好睇，總算合格，會繼續睇


GTO。。。又拍？仲要係從頭拍起，男主角我唔識佢，上網睇原來係exile嘅隊員，唔怪得之咁“鴨”，節奏明快，娛樂性豐富，難怪高收視，但我呢個漫畫大叔，熟讀劇情，變得無驚喜呀

睇左一集，未必再睇


遺留搜查2。。。無線播過第一輯，OK嘅，雖然D演員唔多識；
第二輯睇左兩集，兩集劇本都唔錯，係我今季首選
值得一提嘅係，今集多左個女上司，戴個假髮，攪到怪怪咁，但又好似好熟面口，上網查，原來係斉藤由貴，已經變左嬸嬸呀～


因為深夜食堂影響，見呢套“走馬燈株式會社”都係深夜先做，而收視得2%，咁少嘅，睇下乜料；
半個鐘一集，第一集無個演員識，但條橋好勁（又係漫畫改篇），半驚嚇半懸疑，睇到有D打冷震；但可能太低收視，網上只係搵到一集咋


當然，仲要睇VS vs arashi啦 :)