病到眼花？

噚日開始，喉嚨有D痛，食左成藥＋食橙＋狂飲水＋狂瞓，今日都係無起色。。。

今日唔出街，屋企食飯，拎雜誌“gin"枱。。。

吓，我係咪病到眼花呢？。。。“隻foundation有如下體”


一定係病矇左，都係去瞓下好過

鳴門厨房﹣咖喱香腸八爪魚飯

日劇“深宵食堂”，每集半小時，講一間深宵先營業嘅食堂，客人想食乜，叫老闆煮就得，碟餸背後嘅故事嘅人情味係呢套劇嘅賣點

無乜大星，得小池澈讓仲會間中客串，好型仔


受佢影響，我都好想食香腸八爪魚


但原來雞肉腸好“林”，一切會崩，煎起嚟又唔夠彎，無咁靚呀，但加左日式咖喱，煎蛋，同芝麻醬椰菜絲沙律，oishii



有無人知，應該用乜腸呢？

藍膠桶。。。答案／本週廢相。。。大快活食粥？

半個藍膠桶答案。。。我以為好淺，會好快比人估中，點知錯哂喎

答案係拜神


﹣﹣﹣﹣﹣﹣﹣﹣﹣﹣
本週廢相。。。大快活食粥？

睇下我喺大快活食乜？食皮蛋瘦＋糭呀，係咪好特別呢？

半邊藍水桶

有野估，呢張相大澳影嘅。。。

埋喺地下，半邊藍桶，有乜用架呢？



聽日開估

怪人系列之。。。。怨婦

西環美心快餐開張，新屎坑食個晏

隔離枱坐左一個師奶（箭咀）同一個阿叔，阿叔買飛兼送餐埋嚟



師奶：乜碟菜灼得咁醜樣架，灼菜都灼到咁醜樣，叫佢灼過碟嘛。。。。（重覆呢堆說話三次）
﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣

師奶：嗌外賣咩？做乜杯檸茶比紙杯呀？
阿叔：佢可能做得快無聽清楚啦
師奶：點篤啫，軟lineline，你話點篤呀？咁做野都有嘅。。。。
最後走左去問人攞隻杯，話：我喺度食呀，做乜比紙杯我呀，點篤啫，軟lineline，你話點篤呀？
﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣

師奶：D風dou頭吹過嚟，點食喎，D設計差呀，點會dou頭架...
師奶：D野都唔熱嘅。。。
阿叔：整好“畢”出嚟架啦
師奶：大家樂都嫌佢唔夠熱，美心仲衰，唔熱仲吹到凍哂

唔怪得之師奶成日望住我個位啦，原來“喉”住我個位，我個位真係無風喎

成餐飯係咁投訴，但阿叔（疑似係老公）好淡然，擺明慣哂

其實食飯食得咁辛苦，食左都唔消化啦；另外我想睇佢煮飯會煮D咩野出嚟囉

小可憐

兩星期前，行經西區某店舖，見到呢隻B，細到似一個月左右，問師奶店員，佢悔氣咁答我，係佢養架，無阿媽架，已經食貓糧架啦；

當時我諗：咁快無奶，得唔得架？

早兩日，專登去睇佢，見佢比人縛喺門口，瞓左覺，埋去摸下佢，體型同兩星期前差唔多，好似無大過咁


仲好似睜唔大眼咁，有貓瘟呀；但有主人，可以做得D乜喎。。。


番屋企諗，都係唔得，點都要做D野，打左比貓義工，搵師奶對師奶，希望可以叫佢地帶隻B睇醫生啦


﹣﹣﹣﹣﹣﹣﹣﹣﹣
4月2日最新消息：愛協及貓義工跟進中，義工每日幫佢滴眼藥水及食藥，據說康復中

鳴門廚房﹣皮蛋瘦肉粥

有人問我最近係咪無煮野食喎，個blog完全無寫嘅喎，咪就係稿擠吖嘛，邊寫得咁多喎

好啦，寫一篇啦；呢排出街食得多，滯滯地吖，前晚瞓到半夜，胃氣谷到起左身，要摷胃藥食呀

今日，成日坐喺屋企做野；夜晚決定煲粥食，於是落樓下雜貨舖買左一隻皮蛋（$2)，一隻咸蛋($2)（但每樣用半隻咋喎），煲皮蛋瘦肉粥

舊咸瘦肉之前腌落（阿媽比嘅），切細舊出嚟食（幾鬼慳），包米係之前遊戲獎品（免費），呢隻日本米，煲粥好綿架


半粒鐘，攪掂；加埋咸蘿白，今餐好平但好好味喔～