潮州粿

去開海味街做野，去附近嘅街市買左潮州粿，今日有齊我至愛兩隻味呀～～

我係潮州人，食野嘅口味就唔係好潮州啦，最愛嘅潮州食品就係呢樣

長條形果隻，其實餡料得花生，但點辣椒油同食，人間美食（對我嚟講）；細個時，阿爺佢地嗌佢做金條，我呢，嗌佢做屎條，當然又比人鬧

圓形呢，九菜餡，細個到而家都係幫趁呢檔，最正宗，九菜粿係無蝦米架，唔似出邊食亂嚟乜都落蝦米

蘿蔔粿就有蝦米啦，一向都唔掂，好多時經過想買，都係買哂屎條同九菜，剩返蘿蔔你就知，其實蘿蔔都咪鬼落蝦米啦

東京の秋日限定快閃黨 - day1

呢個旅程係賺返嚟嘅。。。

因為航空公司出錯，北海道之旅泡湯；北海道之旅會改期到出年，航空公司願額外賠償短程機票

12號下晝四點接到通知，可以13號出發，有以下選擇。。。

1.東京，13去16朝返
2.大阪，13去18返
3.台灣，時間任揀

大阪其實係好選擇，但諗到環境唔熟，卜酒店問題，最後揀左比較熟識嘅東京

12號晚上網卜酒店，發現差唔多full哂囉，暈～～

終於喺神田區搵到APA HOTEL，當然貴左，但既然機票係免費嘅，無所謂啦

﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
好，出發。。。（今日嘅相全部係iphone 5s）

去到神田已經天黑，搵酒店過程順利，加錢加大張床嘅決定係啱嘅，但都係唔夠位開喼

極肚餓，今次飛機餐好差兼難食；見到酒店附近舊式蕎麥麵，即仆入去，但味道一般

喺神田區行個圈，感覺好上野feel；睇下，有演唱會聽喎，真係求其喺街都好聽過好多香港歌手

用腳可以行去東京站或秋葉原，都係20分鐘，我地是但揀左一邊，東京站或秋葉原都無所謂（好hea)，結果係點呢？
入左露宿者地頭，成條街都係露宿者，仲黑蚊蚊，快步行。。。

呢張係今日最滿意嘅：）

行左廿幾分鐘，嚟到東京站，終於裝修完啦，好靚喎

呢日其實係我生日，搵間好少少嘅慶祝下先；揀左呢間，比佢門口塊大豬扒吸引，大過我塊面多多聲，薄薄嘅，底舖椰菜一齊食，好爽呀～～
另外，綠茶紅豆蛋糕非常鬆軟，好得呀

返酒店，商量明天行程，目標係想影銀杏，正揀緊地方之際，隔離台大頭whatsapp告知某處有紅葉及銀杏盛放，聽唔聽佢講好呢？


第一日完

揀相中

兩日三夜都影左2300張相，好濫

揀相中，如無意外，第一日遊記聽晚出場。。。

返來啦

行程很短，第一日到酒店已經四點幾，已經開始天黑

第二日超級靚天氣，靚相主要來自呢日啦

第三日，上晝陰天，下晝落雨，夜晚陰天

第四日，天未光已check out

遊記過幾日啦，整理相片需時呀～

今日由快獸打頭陣，佢真係得呢張咋～～～

失而復得的假期

“航空公司”出錯，令北海道之旅泡湯；

最後，航空公司賠償多一程。。。東京之旅

聽朝出發，星期六朝返，好過無

今晚，即卜酒店，無乜選擇囉，爆哂囉

最後揀左住秋葉原，扮下電車男先

ps:呢樹休息幾日啦：）

原本北海道之旅嘅第二天

之前連續三晚都係瞓得4-5粒鐘，噚晚終於一覺昏迷左9個鐘

起身，諗起無旅行去，但又無野做，有D無聊，出去歎早餐

跟住，客人A打嚟話要改稿，我問佢：你唔奇怪我聽你電話架咩？

A：係喎，長途嚟架？
我：唔係，飛唔到（解釋。。。）
A：啱啦，份稿有大改。。。。。。。
我：咁我而家做啦

﹣﹣﹣﹣﹣﹣﹣﹣﹣﹣﹣﹣
跟住，客人B，send whatsapp嚟話send左要改嘅資料我，又要改稿囉，但呢個係儍嘅，通知左佢好多次話會飛，但佢無反應架，到我開佢份資料，得半份，whatsapp返佢，佢話轉頭比埋我，但夜晚都未見囉

﹣﹣﹣﹣﹣﹣﹣﹣﹣﹣﹣﹣
自動打比熟客C個秘書，話比佢知飛唔成，有野做出聲（佢呢期有新舖開，旅行前果日都係趕佢D野）；隔左兩個鐘，秘書打嚟，駁比佢老細，佢係咁笑：哈哈，真係飛唔成喎，果晚比我咒你話飛唔成，留低幫我做野，真係飛唔成喎，哈哈哈哈哈哈哈哈哈哈～

我：你做may姐上身呀，開心到你呢，毒呀你

熟客C：哈哈哈哈哈哈哈哈哈哈哈哈，哎呀，要做野啦，唔講啦

我：你好似淨係打嚟幸災樂禍咋喎

熟客C：哈哈哈

（我好似從未見佢咁開心囉）

hea下hea下又一日，聽朝去見客，跟住好似又無野做㖭。。。。

旅行。。。取消

先講點解會去北海道。。。

朋友年頭參加“某航空公司”攪嘅攝影比賽，贏左冠軍，頭獎係雙人來回機票，佢揀左去北海道，叫埋我去。。。

一切領獎手續跟足指示，但今早去到機場竟然話。。。唔齊資料喎，有我地名單，但欠左部份資料喎，但今日星期日，office嘅人無返工喎，補唔到資料就無得飛

就係咁，拗都無用，由妹妹仔，到佢阿姐，再阿哥，再大阿姐，最後都係唔得，so，唯有歸家先啦

夜晚，終於有office嘅人搵返我地，而家講緊可以點解決，北海道就飛唔成架啦，因為我已cancel酒店嘅booking（無理由拖住酒店囉），但十一月其餘時間我又full哂job，可以點做，我都唔知囉。。。

決定嘅野交返比朋友啦，因為佢係得獎者嘛

ps:成件事最開心得達仔