忙，休息兩天

醫院病人的故事﹣1

阿媽住院期間，差不多每日都會去探佢，見到好多病人，每個人都有佢地嘅故事，又真係每個都好“特別”。。。 

隔離床嘅女仔，本來日本讀書，腦生瘤，日本做左一次開腦手術，返嚟香港又要做多次，由四月住到而家； 

初期見佢好辛苦，膊頭好痛，痛到自己加止痛藥，比醫生鬧；後期同阿媽熟哂，互相鼓勵，佢最鍾意食，知道有機會聖誕前出院，已經卜哂聖誕連續幾日嘅餐廳酒店茶樓，食好野係佢康復嘅目標，見到佢咁積極兼康復，我都好開心；

從佢身上學到，喺乜野環境下都要樂觀，幾難捱前面都有開心嘅事等住你

 ﹣﹣﹣﹣﹣﹣﹣﹣﹣﹣﹣﹣﹣﹣﹣
另一個，我未見過，佢其實住隔離房，但阿媽同其他院友對佢就非常多怨言 

阿婆嚟架啦，近80，講上海話搭國語，話佢做物理治療果陣，係咁鬧人

食早飯，四人一張枱，佢食完，將隻污糟碗放個隔離我阿媽佢地張枱，其中一個女人細細聲講：咁都得？換來佢連環話佢地麻煩，計較。。。。

姑娘護士物理治療師照鬧。。。 

咁，究竟佢乜事送入院呢？原來就係成日鬧人，有日比人打斷佢隻腳 

又學到野啦，呢個世界唔係你惡哂架，當遇到過更惡嘅時候，你真係會埋單架

 ﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣

狀態

狀態呢家野，越凍越差。。。 

噚晚瞓左七粒鐘（即係唔夠瞓），今早本來買早餐比阿媽食，點知突接電話阿姨已經煲埋粥上埋去，我變左買午飯，清job先。。。 

做完去阿媽度，食完飯，阿媽話瞓覺，叫我走先，兩點已經返到屋企，做左一陣野，突然。。。

唔掂，真係唔掂，好好好眼瞓，撻落床即瞓著，期間知道達仔鑽埋入被竇 

瞓左陣，唔知幾點，電話響，熟客打嚟，我直頭話瞓左，轉頭call佢 

終於五點，又有電話響，另一個客打嚟，要扮把精神聲同佢傾 

我諗我其實唔係瞓左，直頭係暈左兩個幾鐘囉，夜晚寫呢篇嘅時候又開始眼瞓啦，聽日唔該暖D吖，我仲有一堆野未做呀～

還我太陽

最討厭嘅冬天幾時走架？

太陽幾時至肯蒲頭？

今日“恰”眼瞓“恰”得好勁，本來捱唔住下晝撻左落床，點知一瞓著就比客電謝嘈醒（其實全日得一個客嘅電話囉，使唔使咁準時呢？），瞓得五分鐘，跟住又瞓唔返。

夜晚（即係而家）鼻水長流，眼又腫，執拾下電腦D相，對上一張有靚太陽嘅係11月22日，究竟幾時先有太陽同溫暖架？

 阿媽一好返，睇嚟又要學候鳥飛番轉泰國避寒至掂～

阿媽出院了

終於都出院啦 老家已準備好輪椅（要用多兩個月），添左沖涼椅，四腳枴杖，浴室裝左扶手。。。 

為左避開大堂嘅幾級樓梯，搵左一條最方便嘅回家通道 ，停車場入口入電梯大堂，自己行過試過度過，無問題

點知，千計萬計，計漏一樣野，廁所門雖然夠輪椅過，但略窄，地腳嘅門“杉”，原來足以令阿媽入唔到廁所。。。 （我試過坐輪椅入，我對手夠力，佢唔夠力）


明早老豆要搵相熟師傅拆走門“杉”同度廁所門，等佢出入自如

見老媽康復進展理想，返埋屋企；話唔吃力就呃你嘅，始終要顧住自己D job架嘛～佢過一關時我都過一關啦，又再鬆多一口氣啦～

 ﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣ 見到醫院同房病人嘅種種百態，我嘅領會又多左，真係真係要同自己講，玩多D，食好D，對人對自己都要好D

亦都要多謝麥理浩嘅物理治療師同姑娘護士，真係好好人，幫左我好多，感激～

改變左我一向覺得政府醫院護士冷漠嘅印象，好人真係靚D架~

﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
預告：有機會再講我見到嘅病人種種百態

我認我係怪人磁石啦

點解我附近咁多怪人架？你地附近都有嘅，無講啫，吓哇？ 

星期日晚，旺角搭紅van返西環，我坐單人位尾二果個，有對年約三十左右嘅男女坐雙人最後果行。。。

開始留意佢係因為個女嘅突然大聲話：做乜買呢隻呀？我唔用呢隻洗頭水架 

男（仲大聲）：有件八婆頂住吖嘛，咪買左呢隻囉。。。 

我望過去，個男嘅攞住一個藥房膠袋袋住枝綠色RExxxxx洗頭水 

隔左一陣，個男嘅打電話（好大聲）：喂德X呀，叫幾個餸，一陣嚟攞。。。 

繼續講：一碟鹵水鵝，一個蠔餅，一碟青口。。。咩野話？青口賣哂？

同女人講：青口賣哂喎

女：er....er.....er....er

男：喂，快D，唔好阻人咁耐

女：咁，要蒜子浸豆苗啦

男：要蒜子浸豆苗。。。吓，豆苗賣哂？

女（發爛渣）：又賣哂，啱啱開門就買哂 （但其實8:10pm架啦喎）

男：咁要乜呀？

女：呢度淨係推介呢幾樣咋嘛。。。（原來佢用電話上網睇食家comments) 

男：我老婆問你有有乜好食呀？。。。川椒雞球喎

女嘅又無反應喎

男人同電話講（大聲）：要住兩樣先啦，轉頭再落，電話係XYZXYZ。。。我姓X，我一陣嚟攞，我揸緊車嚟架啦（吓？）

之後女嘅想要烏頭，男嘅唔食；

男嘅想要沙爹芥蘭炒牛肉，女嘅唔食牛；

男嘅想要豬肚湯，女嘅話叫啦，我食一件啦；

女嘅想要蝦蟹棗，男嘅又唔要

女嘅重提要烏頭，男嘅妥協話一人叫一樣啦，女人嘅又話食唔哂

女（大大聲）：一生一世啦，天荒地老啦，再唔嗌天荒地老都無得食啦；事實係呢程車全程20分鐘，仲有5分鐘就到德X架啦

最後結果係上湯浸時蔬（咪就係攪野囉，之前話無豆苗，正路都係問下有乜菜架啦，玩咁耐，玩到兩個上哂火）

男（電話）：喂，我加碟上湯浸時蔬。。。

之後，突然傳來大聲打機聲，原來個女嘅唔上網就打機，仲要開大聲打果隻，但又繼續大聲傾計架喎

講到最尾又係問，點解而家D人質素差左咁多嘅？（包括個樣。。。）

星光下求婚？

星期六晚，沙田新城市廣場，Starlight garden已經開左幕，影相先。。。 

原來好易影，用auto襟un幾級已經見得人  

一片藍色星海，好浪漫架呢，但。。。  

D相好正路，開始開下野先，試下失焦先。。。咦！好得喎  

繼續再繼續。。。  

好玩到停唔到手，放三張上嚟啦：）  

好，跟住較慢個快門玩手震。。。  

癲哂，我諗隔離D人以為我係癲嘅，不停fing部機，fing到呢4張靚野。。。  

仲有最滿意兩張，大旋轉。。。轉左幾十張，最後得到呢兩張，yeah~



﹣﹣﹣﹣﹣﹣﹣﹣﹣﹣﹣﹣﹣﹣﹣

好，今篇主題講求婚喎，乜事呢？ fing緊機玩得正high嘅時侯，見現場隻熊公仔突然求婚。。。

 

好真係冧爆喎，個男友專登扮隻熊嚟求婚；最後都成功喎。。。睇片 都有諗係咪戲嚟架？但係班friend好“業餘”，連B仔都帶埋出嚟，又無打燈，似堅野喎 新郎事後仲繼續比我地影相喎，係咪真係為求婚做兼職呢？  

返屋企，FB見到新城市廣場嘅ad，條橋一樣喎，撲朔迷離㖭～