
真係有D大鄉里,香港有個會展,廣州有成個區做展覽,大過香港X倍,經過時見到真係大到哇左一聲
呢個係其中一個會場咋~

到我地展覽個館啦,客人話呢個只係細展,睇門口唔錯喎,但入到去,原來遠睇就靚靚,入,面牆又甩油,廁所有渠味,最攞命係。。。人
準備落車,已經見到呢個掛工作人員牌嘅姐姐踎喺度,到我地落車,佢走埋嚟講講講,但真唔好意思,我無喺廣州好耐,D國語嘅聽力已經得番啲啲架咋,但原來佢講廣東話,死囉,廣東話都唔識聽㖭;之後陸續有人走埋嚟講野,真係聽唔明喎,直至第四個左右,先知佢地係話可以幫手搬野(當然要比錢啦),我D野都唔重,唔使啦~

到我地個攤位,又有另外幾個阿姐輪住走埋嚟,佢地好叻架喎,會問你使唔使加大個招牌,加枱加櫃,甚至話幫個櫃配色。(哇!咁專業嘅,撈埋我果瓣喎)

但最驚嘅都係佢地嘅安全意識,佢地會用扶手電梯搬貨,巨型木雕啦,展覽架啦,我驚過你囉,你跣手後面D真係仆街啦
好似呢位姐姐,佢地真係咁搬野架喎,都好好力吓喎,佢見佢真係二樓搬上三樓喎(呢件叫輕架啦,其他D嚇死人)

set到一半遇到少少阻滯,停工其間食左個現場嘅飯盒,總係形住乾唔乾淨,係咪地溝油之類,食左半個就放棄啦~
咦!大型玻璃打爛聲喎,追去睇(hehe),原來有人D玻璃層架跌左落嚟,壓爛哂成層嘅玻璃貨呀,但佢地又好野喎,無人尖叫(香港少少事都有人嗌:嚇C我啦。。。之類),無人鬧,例如:(你點做野架,少少野都做成咁),又或者無人喺堆爛貨面前舉個V影相放上微博;幾個人只係靜靜掃玻璃碎
離開時見到呢座建築物,好奇特,香港係無可能,非常嘥地方,但真係幾型(遠睇,近睇唔敢講,入去可能都係甩油果隻)

夜晚,客人請食飯,好靚嘅飯店,怕羞,無影相,淨係影左呢舊鎮店之寶。。。黑叉燒
好肥但好好味,但可能太油,第二日我痾左四次,係晏晝果餐定夜晚果餐呢?

客人賣茶,當然有好茶飲啦,呢隻“昆侖雪菊”,作香,滑,純,顏色仲帶橙,係今日嘅亮點呀

聽日繼續,正經完聽日梗係講衰野啦
11 意見:
那位女士大力過我
內地特色是:
大、粗、野、求其。
日本特色是:
細、幼、精、緊密。
我講做事啊,
不要想別的!
d阿姐又幾大力喎
之前去過深圳置地(好似係),外邊睇好靚,商場都好靚,不過一去toilet經過佢地走廊,就見到甩油之類嘅野
有得食,有得拎,又有錢賺,Good呀~
卡臣:
你點會呀,咁大隻
新鮮人:
求其vs細心囉
大細唔緊要,最緊要功夫好(你都唔好諗左第二樣喎)
l.minor:
有野拎咩?拎個展覽架就有份
d 相用 iPhone 影.... ?
karvitz:
係呀,好醜樣呀?
昆侖雪菊<- 我有興趣呀...
好似好正!
都唔係,但點解唔執小小先出街?哈
祖國人民力拔山河,我地呢D南方小鬼比唔上呢
棟樓型就型,但係講浪費都算數一數二
Chiseenjai:我都想要呀,聽講好貴架
卡卡:橫掂唔靚,唔執
三千:下面起多楝都得
見到盒茶雙眼發光!
Post a Comment