Tuesday, April 23, 2013

估下我係邊個

大家真係要小心D“猜猜我是誰”嘅騙徒,近一年,家姐外母接過一次,中哂計,好彩佢個女喺屋企,見阿媽驚驚青青喊哂,話阿哥出事,拆穿左無事

阿媽接過兩次,無中計

上星期,老豆接到,故事如下。。。 

老豆接到一個大陸號碼嘅電話,佢聽,果個人問佢知唔知係邊個,老豆答唔知,但最後估左一個佢打波嘅波友(A)(因為果個人會上大陸) 

把聲即刻話係自己A,話佢上左大陸,轉左號碼,有事搵佢就打呢個號碼,同埋以後會用呢個號碼搵我老豆 

第二日,A打嚟話比大陸公安拉左,問老豆有無相熟嘅人幫佢,老豆話有個波友上面識得人多,話打比佢啦。。。

A話唔想太多人知,肉酸喎,話會自己解決 

A下晝再打嚟,話可以用錢攪掂,問老豆借,要$25000,但佢共有四個人比人拉左,借$100000喎

老豆到呢刻先醒水,話等佢check下錢先,轉頭再聯絡 

原來老豆同A根本唔係咁熟,連佢電話都無喎(激死),要另一個朋友B搭上搭先搵到真A,佢又真係喺大陸,但無事發生

B速打比老豆叫佢千祈咪上當,老豆仲話當然唔會上當

假A打嚟時,老豆拆穿佢,假A即收線 

﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣

為左呢件事,兩老吵左一場,阿媽覺得老豆要到第三個電話先識醒,好危險,老豆就梗係唔認啦

但我想講。。。

第一,而家D賊識分幾次電話引你落搭,變奇陣,又高招左 

第二,點解佢地識打比老人家,我地又未接過嘅? 

我咁睇,有時候,我都會接到無來電顯示兼無聲電話,可能係我第一句通常係hello,或者把聲後生,所以佢地唔開聲收線,遇著老人家就先mark低你號碼

老豆就咁睇,佢話之前有個電話話係保險公司(咁又真係大把),sell老豆買保險,老豆講左句,我老啦,你唔保架啦,跟住人地食住上問佢幾歲,佢又答人喎(阿媽聽到又火),所以知佢號碼兼係長者喎

所以,大家都要提醒屋企長者,寧願長氣,千祈咪中計呀

13 意見:

卡臣 said...

警訊時間,多謝柯督察

Cat said...

家姐外母接過一次--->係咪姐夫個啊媽,或者家姐個奶奶呀?

Cat said...

其實呢篇係猜猜你講誰?

Ebenezer said...

唔估就難D上當啦。

Anonymous said...

"原來老豆同A根本唔係咁熟,連佢電話都無喎"睇到呢句真係暈低......

江湖散人

l.minor said...

之前有幸接個一次,玩咗一分鐘佢就收我線,唔開心囉~

naruto said...

卡臣:叫我高倫布,或者布布都得

Cat:你啱

Ebenezer:當然啦,唔接電話都得

江湖散人:使唔使call白車?

l.minor:你把聲好阿伯架?

ayclui said...

我無接過,因為我無大陸朋友/ 親戚.
就算有都唔會啋佢~

L L said...

我最近都收到一啲冇來電顯示嘅電話,我仲懶醒諗住係傾慕我嘅女人打黎,想聽吓我把聲,哈!

PanLa said...

我都用"HELLO"呢招,嚇走左D人~~不過依然收倒好多打黎"喂"左唔出聲+收線,呢D想鬧都唔得 /_\

naruto said...

ayclui:
未必一定要有大陸朋友架

laulong:
可能真係呢

PanLa:
通常都係3字頭

Beat in the box said...

收倒好多打黎"喂"左唔出聲+收線 x2
可能真係好似大叔咁講:佢地聽聲,係老人家先出聲

naruto said...

Beat in the box:
呢D真係要防架,有時一下分神就比人有機可乘

Related Posts Plugin for WordPress, Blogger...