Monday, April 30, 2012

開估。。。鎖住乜呢?

比人答中㖭。。。

山腰上有D抖涼嘅地方


用單車鏈鎖住乜呢?


答案係呼拉圈,有人會偷呼拉圈咩?

大家一齊嚟幻想一下晨早有班靚姐姐喺度玩集體呼拉圈嘅情景


(最好著啦啦隊衫啦,著住啦啦玩呼啦,wow)

Sunday, April 29, 2012

有野估。。。鎖住乜呢?

上星期行上粉嶺蝴蝶山,近山頂涼亭有好多單車鎖鏈,估下鎖住乜呢?



聽日開估

Saturday, April 28, 2012

本週廢相。。。噏乜春呢?

第一眼你會以為佢係一個乜野廣告呢?


我以為佢收舊酒囉,下哇~

Friday, April 27, 2012

舊相﹣心愛嘅毛衣

應該四五歲左右啩,記憶中星期日經常會到兵頭花園,聖約瀚教堂附近打羽毛球

而呢件衫我好鍾意,出街自已揀嚟著,早幾年刻意買番件差唔多嘅,著番屋企食飯,換嚟老豆話:歲月真係殘酷呀。。。。。。


Thursday, April 26, 2012

怪人系列之。。。。怪客3

前言:怪客,即係我嘅客,喺我心目中佢係一個正宗港女,同佢合作,心情好就笑爆咀,心情差就真係XXX。。。

佢公司嘅job,budget細,book唔起影樓,所以解決方法就係上我屋企影

第一次上嚟,遲大到,嚟到唔係開工架喎,似睇樓囉;

期間知道攝影師主職影婚禮人像,原來佢就結婚,chur住問減肥方法,點先至上鏡等等,但我地做緊野,佢話:唔好影住啦,結婚相緊要D呀

跟住,我地有我地影,佢打去book做機美容,一傾半粒鐘,叫佢嚟睇相佢都唔理,勁呀~~~~

跟住,因為要用我部電腦send相比客,佢話借佢覆mail喎。。。

之後,佢竟然話:我見你開左facebook,幫你add左我呀,我accept埋架啦

真係妖,好X熟咩而家,真係無禮貌成咁都得架喎

Wednesday, April 25, 2012

鳴門廚房﹣涼伴薄瓜瓜

天氣開始和暖啦(雖然我仲冚緊羽絨被),我又開始想食番野啦

成日食零食唔係辦法,就整“薄瓜瓜”啦


材料:青瓜兩條,蒜頭兩粒,醋適量,砂糖兩包(快餐店奶茶每次都比兩包,每次都拎一包番屋企,而家有用啦),辣椒油少量,兩茶匙鹽


出面食譜通常叫你拍碎青瓜或者切件,我就鍾意切薄片,一來餣嘅時間縮短,二來一啖十幾塊,口感好過癮架


薄切後放落闊口碗,搵兩茶匙鹽抺勻等出水


半小時後,倒左D青瓜水,加切碎蒜頭,醋撈勻,落一包糖,幾滴辣椒油,放入雪櫃等兩粒鐘


兩粒鐘後,雪櫃攞出嚟,隔走醋水,再放一包糖;食時一啖瓜混住粒粒未溶砂糖,冰冰凍,係男女消暑嘅妙品,妙品

Tuesday, April 24, 2012

羊碲甲

日本,韓國,台灣,全部都識用花嚟做旅遊推介;日本最叻,呢期櫻,下期銀杏,跟住紅葉;香港呢,其實都有好多靚花樹,但係D公園永遠,係永遠都係好似我地打邊爐咁,雜崩ung,乜都種幾棵,仲要種到鬼咁密喎,驚死用唔哂納稅人D錢咁

其實羊碲甲開左都好靚,有深有淺,仲有的色,部份開花時無或者少葉,遠睇真係成棵櫻花咁,種滿一排咪好靚囉;


早兩個星期,經過東涌,原來近碼頭有個長廊,旁邊種左約十棵羊碲甲,當日未滿開,天氣唔靚,但感覺唔錯架;咁咪幾好,係咪叫區議員做下野呢?




係喎,區議員剩係識紅綿開花時,有人投訴幫手剪Q佢架咋喎

Monday, April 23, 2012

床底寶箱之史前 “達明一派石頭記地鐵廣告牌”

床底寶箱之史前XX,簡稱”床史“。。。呢個系列無寫好耐,最近執床底,又搵到寶啦,又可以繼續寫啦:)新讀者可能唔知,我其實係擅長寫”床史“嘅,唔好攪錯係床屎喎

呢幾日Facebook比達明一派演唱會洗板呀,佢地出道25週年,石頭記係第二隻碟,呢塊係地鐵車廂嘅廣告牌,當年我係一個(小)學生,有晚搭地下鐵見到呢張廣告牌喺地下喎,喺地下應該係垃圾嚟嘅,咁我就執左佢啦


24年後由床底出土,石頭都發左毛


睇下歷史嘅見證,當年做稿仲係用植字咪紙,人手貼上個稿度,睇下石頭記個記字,明顯貼低左,係而家電腦做稿唔會發生嘅mistake


摷下床底仲有乜寫先

Sunday, April 22, 2012

好難聽喎

近期最難頂嘅廣告之一。。。

想點呀,難聽,起哂雞皮;(寫嘅時候,一播youtube,達仔瞓左都扎醒呀)

個空城想表達D乜呢?(4“)

chok住走樓梯又乜解呢?(14")

個紅衣女鬼出一野夠哂驚嚇,究竟想點呢?(20“)(雜誌話劉華獨裁,要cut走個女人喎)

舉高枝茶做乜春呢?曬番變熱茶好味D?(23”)

下次影番企鵝馬騮算罷啦

Saturday, April 21, 2012

日本寄來的舖屎咭

多謝老師,去旅行都有我同達仔心,寄來一張靚靚舖屎咭

你問幾時帶達仔去花見?咁啱嘅,佢啱啱去完喎。。。


達仔之花見喺下面



































Friday, April 20, 2012

怪人系列之。。。。怪客2

前言:怪客,即係我嘅客,喺我心目中佢係一個正宗港女,同佢合作,心情好就笑爆咀,心情差就真係XXX。。。

好,繼續講佢,應該可以寫好多集

話說第一次見面,我同攝影師都以為佢係一個三十到尾嘅師奶,後來至知佢原來三十未滿(佢自己facebook嘅資料,可能係假嘅)

今日要講嘅金句係。。。

怪客:D人成日話我個樣生得細呀,似十幾歲呀(吓,唔係四十幾咩?);我個老公同之前幾個男友都細過我架,我無隱瞞我大過佢地架,佢地個個都係ABC,真係ABC果隻喎,唔係中學先過去讀書果隻喎(係啦係啦,知啦知啦);真係整定架,總係要姊弟嘅;

當時係佢有佢講,我都唔知比乜反應好呀

Thursday, April 19, 2012

舊相﹣第一次去旅行

忙完一日,攪掂三個job,超速完成

執下櫃,睇番D舊相,想趁仲有記憶寫低當時嘅感覺,今晚就scan呢張啦,陸續有嚟~~

當年小弟十八歲,呢張相果時,百一磅左右咋,仲係一個學生,最鍾意影相,成績最好果科都係影相,第一次旅行當然要影相

跟團,同家姐兩個去日本,睇博覽會,當日超高溫,最記得係去麥記買最大杯果隻可樂,飲完都唔夠喉,要即時encore

張相係喺戶外曬完一日,曬黑兼攰到嘔嘅時候影

雖然跟團,但溫泉酒店果晚都係“懶”豐富果隻,結果我只係食左好細件(得一件)嘅和牛,其他係海鮮,導遊見我唔食,同我問旅館攞左個杯麵,我記得旅館表現得好唔好意思,亦記得個杯麵好好味

酒店頂樓有溫泉,導遊講鬼故嚇人,話溫泉有鬼喎,我唔驚呢家野,未浸過溫泉喎,梗係去啦,浸住熱水望住窗出面,話係個湖,但係黑到乜都無,浸完,果晚瞓到出哂汗,但好好瞓,自此愛上浸溫泉


寫住咁多先,下次繼續

Wednesday, April 18, 2012

太忙,今日暫停

Tuesday, April 17, 2012

古董

呢期多左幾個新客,其中一個最近攪左間音樂店,叫我上去開會兼比下意見

除左有樂器,仲有大量黑膠賣,問佢有乜經典野推介,佢即刻攞左呢三隻。。。


哇!雜誌介紹就見得多,實物真係第一次見呀,而家變左古董呀;我有D興趣囉

你地會唔會有呢幾隻碟呢?

Monday, April 16, 2012

白泥﹣新發現

上星期一去左白泥,天氣麻麻,但發現一種未見過嘅花


好似一個雀籠咁


又有D似皇冠,又似吊鐘


白中帶粉紅,好靚喎


佢真身係一棵唔起眼嘅樹,花好細朵,但超多,有無人識呢棵係乜樹呢?

Sunday, April 15, 2012

十面圍城

朋友告知港島某地方多貓貓,叫我去影,結果。。。


而家真係掂呀,有陣貓”除“呀,唔驚我架喎

Saturday, April 14, 2012

鄭則士與鄭嘉穎

記得某一年台慶,好似係亞do姐講過,視帝候選人個個都演技精湛,所以即使交換角色都難唔到佢地,於是,陳述要做黎耀祥角色,而黎耀祥又做番陳豪嘅角色(大意係咁)

如此類推,今年實入侯選名單嘅鄭則士同鄭嘉穎都應該可以交換啦

我想睇鄭嘉穎做狄仁傑喎


但更想睇鄭則士做拳王,好考演技呀,好想睇佢同黃德斌對打喔~~~

Friday, April 13, 2012

怪人系列之。。。。怪客

怪客,即係我嘅客,喺我心目中佢係一個正宗港女,同佢合作,心情好就笑爆咀,心情差就真係XXX。。。

呢期拉動我條神經線嘅金句係。。。

佢啱啱去完某小島旅行,post左好多相上Facebook;噚日印尼地震,佢竟然加句話:”如果今個禮拜先去,咁就麻煩啦“

唔係咁講野架下哇,真係。。。頂~




ps:怪客係有續集嘅

Thursday, April 12, 2012

鳴門廚房﹣芥菜胆炆燒肉

口淡淡,但胃口好好,煮下飯仔啦

前幾日拜山分左一條燒肉,就整自細拜完山會整嘅”芥菜胆炆燒肉“啦

用油,薑起”獲“,爆香D燒肉,跟住放芥菜胆,少少鹽,胡椒粉,一湯匙糖(中和芥菜胆苦味),冚蓋,炆15分鐘,撈飯好食



D藥食完好眼瞓,加埋瞓左12個鐘,有job都唔想做,寫緊呢篇,眼皮已經dup左落嚟,早抖~

Wednesday, April 11, 2012

睇醫生

3號已經喉嚨少少痛,食左成藥,狂瞓,食橙,好似好番

7號,喉嚨無事,變左有鼻水,繼續成藥,狂瞓,食橙

9號,鼻水收左,變左少少痰,出去影相明明大太陽,但頭頂竟然冰冷,唉,出事

10號起身,又變番乜事都無,但喉嚨少少痛;唔玩啦,都唔好玩嘅,雖然精神無事,都睇醫生啦

10:20am,去到診所,迫滿人,姑娘登記後,叫我11:40am再嚟,走去歎早餐,番屋企做完野再嚟

11:40am,原來都係要排,期間有個歲“令”B不停用海豚音嚟喊,而佢阿媽只係識話:乖啦,唔好喊啦,啦足半粒鐘;

12:40am...排一粒鐘至到我,醫生見面第一句竟然係(好誠懇):唔好意思,要你等咁耐。。。

3分鐘睇完,接住我入去嘅係果個唔識湊仔嘅師奶

隔左一陣,佢出嚟,抱住一隻海豚,同另一隻仔塞喺攞藥果個位度,自言自語:唔好喊啦,忍多陣啦(係咪同我地講架呢?),我都趕時間啦,走架啦;我心諗,我同我前面果個都未攞藥,你塞喺度做乜呢?

等好耐都無藥攞,明明之前嘅速度係一個睇完,上一個攞藥,點解會咁耐呢?結果。。。

姑娘“開窗“,原來整左海豚師奶D藥先呀,梗係佢話趕時間,諸如此類啦,我見到我對上果個都O咀呀,我直頭O埋鼻啦,但師奶喎,件事點會咁易完吖;佢竟然話:吓,無簽咭架,我無cash喎

good,慢慢出去襟錢啦,bye~~即刻到我上面果個,跟住我都即時有藥攞啦

番嚟食左藥,瞓左三個鐘午睡,好舒服,又好似好番哂啦

Tuesday, April 10, 2012

廣告時間﹣CIRCLE K TORTILLA WRAP

呢個job呢,跟得辛苦囉,過程亂糟糟,而家終於出左街,味道唔錯架;點解我知?因為影相嘅版每隻味有十條,最後影相果條係攝影師同自己包嘅,堆版比哂我,原本有三隻味,共三十條,我至少食左十條,飽哂;我推介韓國粉絲卷,辣辣地,幾特別

買枝試下啦:)

Monday, April 9, 2012

怪人系列之。。。。沙bu沙bu

吉野家食牛肉飯,見到隔兩張枱個師奶沙bu沙bu,食食下,佢突然從自己個袋攞出一pack超市買嘅肥牛,加料沙bu沙bu

呢D野,真係師奶先做得出架咋

Sunday, April 8, 2012

復活節快樂

Saturday, April 7, 2012

食水太深

一盒16粒特強傷風感冒必理痛,三個地方,三個價



惠康:$53

萬寧:$47.9

藥房:$38

惠康貴足$15,使唔使食水咁深呀?

Friday, April 6, 2012

有我果期u-magazine終於出左啦

米埔同濕地公園一期出哂

米埔OK啦,濕地公園呢張,做乜咁烚,揀張合埋眼嘅?


仲有,得獎張相放中間呀,yeah~

亦睇到阿師奶張相(左),原來都係荷花,證明我策略成功呀,咦!原來佢叫翁美玲,呢個係咪勝出原因?

而我張呢(中),吓,名都打錯,難得上雜誌,但個名唔係我,想暈呀~原來我合埋眼張相係無眼睇咁解

Thursday, April 5, 2012

病到眼花?

噚日開始,喉嚨有D痛,食左成藥+食橙+狂飲水+狂瞓,今日都係無起色。。。

今日唔出街,屋企食飯,拎雜誌“gin"枱。。。

吓,我係咪病到眼花呢?。。。“隻foundation有如下體


一定係病矇左,都係去瞓下好過

Wednesday, April 4, 2012

鳴門厨房﹣咖喱香腸八爪魚飯

日劇“深宵食堂”,每集半小時,講一間深宵先營業嘅食堂,客人想食乜,叫老闆煮就得,碟餸背後嘅故事嘅人情味係呢套劇嘅賣點

無乜大星,得小池澈讓仲會間中客串,好型仔


受佢影響,我都好想食香腸八爪魚


但原來雞肉腸好“林”,一切會崩,煎起嚟又唔夠彎,無咁靚呀,但加左日式咖喱,煎蛋,同芝麻醬椰菜絲沙律,oishii



有無人知,應該用乜腸呢?

Tuesday, April 3, 2012

藍膠桶。。。答案/本週廢相。。。大快活食粥?

半個藍膠桶答案。。。我以為好淺,會好快比人估中,點知錯哂喎

答案係拜神


﹣﹣﹣﹣﹣﹣﹣﹣﹣﹣
本週廢相。。。大快活食粥?

睇下我喺大快活食乜?食皮蛋瘦+糭呀,係咪好特別呢?



Monday, April 2, 2012

半邊藍水桶

有野估,呢張相大澳影嘅。。。

埋喺地下,半邊藍桶,有乜用架呢?



聽日開估

Sunday, April 1, 2012

怪人系列之。。。。怨婦

西環美心快餐開張,新屎坑食個晏

隔離枱坐左一個師奶(箭咀)同一個阿叔,阿叔買飛兼送餐埋嚟



師奶:乜碟菜灼得咁醜樣架,灼菜都灼到咁醜樣,叫佢灼過碟嘛。。。。(重覆呢堆說話三次)
﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣

師奶:嗌外賣咩?做乜杯檸茶比紙杯呀?
阿叔:佢可能做得快無聽清楚啦
師奶:點篤啫,軟lineline,你話點篤呀?咁做野都有嘅。。。。
最後走左去問人攞隻杯,話:我喺度食呀,做乜比紙杯我呀,點篤啫,軟lineline,你話點篤呀?
﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣

師奶:D風dou頭吹過嚟,點食喎,D設計差呀,點會dou頭架...
師奶:D野都唔熱嘅。。。
阿叔:整好“畢”出嚟架啦
師奶:大家樂都嫌佢唔夠熱,美心仲衰,唔熱仲吹到凍哂

唔怪得之師奶成日望住我個位啦,原來“喉”住我個位,我個位真係無風喎

成餐飯係咁投訴,但阿叔(疑似係老公)好淡然,擺明慣哂

其實食飯食得咁辛苦,食左都唔消化啦;另外我想睇佢煮飯會煮D咩野出嚟囉
Related Posts Plugin for WordPress, Blogger...