Saturday, July 20, 2013

暫停

最近發生左好多事,已經無精神時間去打理呢度,所以只可以同大家講聲要暫停啦;

待處理好事情,我會返嚟,多謝各位~

Friday, July 19, 2013

最後一批相

最後一批相啦,最驚喜係用架casio機仔影海豚,反應快,一跳就影,影到好多張 另外,最底嘅魚缸,好有feel呀~
 

Thursday, July 18, 2013

水母

海洋公園最謀殺“菲林”嘅地方,水母館呀,真係好靚,精選左呢四張,張張鍾意~





Wednesday, July 17, 2013

企鵝雪狼湖

夏天去海洋公園,真係好熱架,想抖涼,梗係去全園最凍嘅地方,去睇企鵝啦。。。 

有個小插曲,入企鵝館前都會有工作人員拎住個牌寫住關掉閃光燈,但每分鐘都有強國遊客閃閃閃,館內得一個工作人員,不停走來走去叫人(用國語):要關掉閃光燈(真係幾無奈)

之不過咁,強國人喎,你叫我關我偏唔關;有個強國師奶竟然大聲鬧返佢:太黑啦,關掉怎拍呀?

工作人員:拍不到也辦法的,都要關掉。。。 

但實在太多人閃,終於我朋友睇唔過眼,竟然幫口叫人關閃光燈;

我真係“鄧”做呢個館嘅工作人員慘,捱凍不特只,聲都沙埋

好,睇相;企鵝館係好好影架,我將相機放在水平線,同時拍攝水面同水底,效果唔錯  

呢張係有D撞彩,見佢跳過嚟,即襟,又幾得意喎  

佢地遊來遊去,慶幸環境雖然好暗,但架機仔都影得唔錯  

啦,唔使開閃光燈架,都影到  

跟住睇下隔離個雪狐居,好可愛呀  

其實都幾似狗仔架喎  

總括呢幾次去海洋公園,淨係影到呢幾張,已經心足; 但靚相點會得咁少,仲有D正野,聽日繼續

Tuesday, July 16, 2013

床底寶箱之史前功課﹣梁朝偉畫像

以前讀設計時做嘅功課呢,大部份都掉左;

但原來有部份係有影低相片做紀念,呢張係其中一張。。。 

我記得呢份功課呢,係用marker畫人像,攞明星嚟畫絕對係死蠢嘅,因為係人都知佢乜樣,除非你畫到好似好似。。。

呢張,我記得係好低份架;其實咁多種油彩入面,廣告彩同marker已經叫控得好D,油畫同pastel先係災難; 

亦因為咁,第一年下半年開始,全力攻攝影,hea上drawing,畢業成績表都係靠攝影一科拉起咋~

而家睇返,真係畫得好醜樣~

Monday, July 15, 2013

放生

香港仔碼頭遇到呢一幕。。。 

一個男子企喺碼頭,賣魚工人推住車仔,每次一籃魚送到男人面前,跟住男人將魚倒落海放生,車仔來來回回,至少七次;

每一籃都頗多魚,魚種都有數款,我認識嘅在石斑,有雞魚,估計都頗貴囉。。。 

好多人都會話放生其實放死,我就一半半啦,魚市場D魚本來已經死期將至,比個機會佢,可能真係生存都呢?都算一線我機吖! 

我又諗,呢位先生做乜咁大手筆呢?做錯事?發左達?為家人祈福?

但,有樣野我覺得佢係錯架,香港仔個碼頭係個內港,有排都未游到出大海,附近又多人釣魚,真係過十關先出到去囉,用左咁多錢,點解唔租埋艇仔送佢地一程呢?





Saturday, July 13, 2013

拎達仔去參加比賽

最近有個攝影比賽﹣一念之間,大概講一念間嘅決定影響左人同事嘅發展。。。

要交一組兩張相片,一念間有乜轉變。。。

我拎左達仔去參賽,直覺覺得呢個題材無勝算,但真係一念間收養佢改變左佢一生;

呢次唔係淨為獎啦,如果多D人留意街貓嘅故事,多D人幫到街貓,少D人虐貓,贏嘅就唔止係一份獎,我係咁諗嘅~


大家都去睇下,順手投一票啦,雖然唔係計票數,但推高D,曝光率會高D嘛~


Friday, July 12, 2013

離心力

唔知大家幾耐無玩過機動遊戲呢?我就幾年無玩過啦~ 

近個半月,去左三次海洋公園同一次廸士尼(贏返嚟,免費),玩完發覺,原來兩個樂園D機動遊戲掂左好多喎 

每個人嘅接受能力唔同,我最怕就係洗衣機果類,fing到你反胃;最愛就係離心力;海洋公園嘅跳樓機,大家都知,無料到,唔驚嘅。。。  

但動感快車好掂喎,呢架過山車,範圍大,斜坡多  

一定有大迴旋啦,但最勁嘅係速度,你玩完佢玩隔離另外一架過山車,簡直變左小學雞  

但我都唔係乜都敢玩,呢架,我嚟三次都唔敢挑戰  

到廸士尼,對上一次嚟係開張,而家擴建左,推介灰熊山莊,佢係一架過山車,呢,廣告會倒後果架呀~
原來OK喎,夠快,離心力夠多,但係當日係完全唔使排隊架~  

仲有,絕對嘅推介,完全唔知佢會咁激,玩前相都無影,玩後high左唔記得影;
就係胡廸後面有個U字果架,其實係海盗船變種,但係快好多,兼個U字係垂直架,最高果一野衝落去,感覺係垂直跳樓,但係時間非常短,只fing七野,最高位只得兩野,好快玩完  

之後玩space mountain,又變左小學雞,完全無感覺了

喺到執緊兩個樂園D相,下星期出街:)

Thursday, July 11, 2013

得獎相片-上半年小總結

每年我都會set個目標比自己挑戰,年頭果陣無寫出嚟,驚瘀。。。就係玩攝影比賽啦;

2013年咁就過左一半,除左三月,個個月都中到喎,hehe;

今日主要睇下D相
以為影得好果D,贏唔到;平平凡凡嘅,又反而贏左喎~  

見呢期做乜都無動力,下半年,set高左個target,要贏一個大獎:) 

我呢D好勝人,都係要咁先有動力架啦

Wednesday, July 10, 2013

粗口店

攝於石澳

fuck lee store?

咁嘅店名都得?玩野?

返嚟睇相時諗,會唔會其實係fock lee store(福利),比人玩野括甩左D呢?

Tuesday, July 9, 2013

愛靚可以係一種病。。。

做結婚相簿,睇相見到一個新娘。。。

新娘好瘦,另外明顯地,塊面做左D手腳,假假地 

但佢竟然要求張張相都執尖D塊面,執瘦手臂,但其實膊頭已經露哂骨 

喺我覺得靚嘅程度下,盡哂力做左,希望佢會滿意 

但其實已經化哂大眼娃娃裝,仲咁樣大執,我相信我喺街撞到都唔會認得佢 

愛靚可以係一種病。。。

Monday, July 8, 2013

星期日開工。。。

今日,去左個客屋企跟拍攝工作,但今日唔係想講個工作。。。 

我第一次喺香港識得人係住"house"架囉,幾層果隻,有天窗,有花園(大果隻),有泳池囉;影到成身汗我真係想游個水先囉。。。

但無lift囉,我行上行落左幾次,喘哂氣囉真係

我真係好鄉下仔囉~

ps:有無人識得朋友喺香港係住house架?

Sunday, July 7, 2013

無心機

呢期工作上做野無乜心機,其實呢期多挑戰,但總係tart唔著,靠經驗過關 

影相都無心機,呢樣就真係大獲啦

連攝影比賽都無心機,有幾個比賽就截止都未影到相 

達仔都無心機,食少左但瞓多左呀佢,勝在瞓得”冧“,反哂肚,好舒服頂啦  

講返我,寫blog都無心機,所以寫左呢篇。。。
Related Posts Plugin for WordPress, Blogger...