Friday, August 31, 2012

驗眼

近年,舊同學聚會,都會講到阿邊個就關節痛,阿果個就膽固醇

但原來好多個都已經有。。。。。老花

我本來覺得我無,但可能形住,如果環境暗(例如某D餐廳矙menu)睇字真係睇得差過以前,睇細字辛苦兼眼攰

咁,話配新眼鏡都講左幾個月,但window shopping左幾個月,都無一副覺得要入去試戴喎

但,戴緊果副,戴得最順眼,斷斷續續戴左十幾年,鏡都換過幾次,而家鏡片又花哂,個架戴到甩油呀原來,一定要換啦

結果,落樓下間眼鏡舖認真揀,再驗眼

check完,驗眼師話未有老花跡象,呦我唔使擔心,yeah~

近視進一步淺左,已經去到無近視,散光雖然無深,但軸心唔同左,係令我睇細字辛苦兼眼攰嘅原因

你有無老花jet?

Thursday, August 30, 2012

又係南蓮園池

又係南蓮園池,去過咁多次,仲去?

因為落雨,唔知去邊好呀,行下公園算啦

咁去到,都影下相啦,既然落雨,就影D陰濕野啦

1/塔門


2/小莫小於水滴


3/鯉們在一起


4/滴滴仔


5/蜓蜓


6/蜓蜓個friend


落雨真係超級唔好玩,但今個夏天每逢週末日,唔好天多過好天,掃X慶

Wednesday, August 29, 2012

八月功課。。。戒煙

大家請望住張相



Tuesday, August 28, 2012

食餐好嘅

辛苦完食品展,點都要食D好野;

我個客做海味,開會時成日有得試食,有D位好神奇,雖然海參同鮑魚我未去到反感,但唔會主動去食囉,但次次佢整果D都好味架喎

於是,食品展人地飽魚兩隻兩隻咁賣,我成樽買哂,孝敬老豆同阿媽,點知家姐好狼死,係咁食~


我自己呢,一向麻麻地食羊,但今次呢,佢地賣羊架,以前只有雪藏一pack pack賣,今次賣煎好嘅;每次開會又叫我試味,原來好嫩好滑,仲唔“騷”㖭

於是又買左幾pack同家人朋友分享

買嘅係佢預先餣好,已經慢烤到7成熟


只需將羊架切開一件件


每面煎45秒,灑上黑椒粉,食得;果少少嘅肥油,好味到不得了呀~


另外,上次罐甜到過火嘅果汁,加左有氣礦泉水,好味好多,送羊架一流~


食完,又要比心機做野搵錢錢啦

Monday, August 27, 2012

床底寶箱之史前 影樓証件相紙袋

終於得閒D啦,決定寫返“床史”系列,仲定實逢星期日晚出一篇,都要迫迫自己寫,因為床史係仲有貨可以寫幾十篇嘅,死未?

今日先睇睇呢樣。。。

上兩個星期,屋苑貼出告示話某晚有攝影公司嚟幫居民影証件相,十幾蚊有一打,我正要新相伸請passport,去馬

影嘅時候,個後生女攝影師係咁要我“及”低個下巴,影完又無得睇返兼揀相,心諗都唔慌好樣;佢有得揀將file燒落碟同執相(當然要加錢),我見佢咁求其,慳番

但今日攞相覺得OK喎又

講咁耐其實係想講小時候上影樓影証件相,相片會用個紙袋仔入住,大家睇下,係咪可以列入古董啦


再睇下張相,真係童年現在一般可愛呀~呵呵呵


Sunday, August 26, 2012

煩客

喺呢個經常出現嘅記者妹呢,而家開厨房開班授徒㖭啦,但係佢做野亂咁嚟嘅作風係無變嘅,仲越嚟越亂㖭

之前最憎佢半夜打電話嚟問野,自從鬧佢兩獲金之後(係呀,鬧一獲之後繼續呀竟然),而家無啦

另外佢最拿手攪到有咁亂得咁亂,佢會將同一份job嘅資料,呢個email send兩野,果個email send兩野(我有兩個email account),電話講三野,sms 加多野,結果我想摷資料辛苦過做設計。。。呢個都直接係我唔想開whatsapp嘅原因,因為我知咁即係會再多個平台比佢求其掉D料過嚟

但呢個世代唔可以無whatsapp架嘛,結果比佢發現我有whatsapp,前排佢竟然喺10分鐘內連環send左17個,但係打嘅野一個好簡單嘅mail或者電話正常人兩句都可以講完

早兩日,早上我send左幾版新嘅網站設計過去,跟住佢打嚟,傾完幾版設計有乜要改動後。。。

煩:呀,你仲有幾版未做喎?

我:你比嘅料我做哂架啦喎

煩:等我諗下先;呀,product果版未做呀你

我:邊版product,做咩野架?

煩:唔知呀,我都未諗

我(谷哂火但心平氣和聲):咁叫做我未做呀?

真係火都嚟埋呀


Saturday, August 25, 2012

細佬的手信

細佬去左九州旅行,返嚟送上一包提子乾。。。

原來佢都係買呢包野返公司做手信

佢同同事講:送你一包巨峰提子
同事睇下個包裝,話:喂!係巨粒提子,唔係巨峰提子喎
細佬:吓~


有會咁懵嘅,睇真D,原來唔係日本貨,來自智利,真係山長水又遠呀


但呢個咁懵嘅細佬,佢公司竟然派佢去斯里蘭卡training一個月,係train人,唔係比人train,仲要係做阿頭果個,我真係好“鄧”佢公司擔心呀

諗下要乜手信先,就巨峰提子啦~

Friday, August 24, 2012

咦!咩野嚟架呢?

上星期上道風山,行經山坡護土牆,見到出水位入面好似有D野,咩嚟嘅呢?


用閃光燈影張先;睇相。。。錯哂focus;但閃果下我覺得係條蛇


用人手較較focus,再閃。。。。咦~~,好核突呀


係咪鼻涕蟲呀各位?

Thursday, August 23, 2012

大澳的古老大屋



間屋近百年歷史,入到去陰陰地架,因為長期關窗關門,兼柱,牆,地板都係木材,好大陣噏味

但處些係寶藏囉,筷子筒真係細個麵檔果種,個招牌直頭係古董,騎樓門係一條木橫鎖果隻,電視先有得睇呀,樓梯,樓上地板都係木做,行上去咦咦兀兀,一步一驚心,騎樓扶手都係木做,但唔穩陣架


呢間屋仲有個故事,下面棵樹有乜特別呢?

間屋當年借比人拍過戲,套戲叫哥哥的情人,呢棵樹梁朝偉爬過上去架

Wednesday, August 22, 2012

大澳美食巡禮

屋主一家早一日入左去過夜,整好哂午餐招呼我地;一早,佢比電話嚟,叫我買法包入去,大澳買唔到法包。。。

一行人約都無咁準時全部一齊到,開餐,原來係海鮮大餐。。。。

法包係要嚟夾蟹羔豬肉餅架原來

嗚~又話識左廿幾年,幾好朋友,嗚嗚嗚~覇番個包先,好彩仲有雞同青瓜


食飽出去行,嚟到大澳,梗係要掃街啦

先食上次推介過嘅沙翁(今次無相,太餓),位置係吉慶後街,新鮮炸起,perfect

跟住行去舊碼頭方向,近消防局,食眉豆茶果(都無相,仲係好餓),次次都食,正到不得了,其實呢檔好食過巴士站果檔架

我買茶果時,同學走去買冰菠蘿,本來無諗住買,但太陽好勁,想食凍野兼問我同學好唔好味時,佢平時唔多野講嘅考公走哂音咁話:好正呀,一定要食呀;咁誇,好即買

咬啖先。。。哇,好正呀~~涼透心,好清甜,曬住食一流呀,賣$5咋
(呢張相有個重點。。。我隻手大過隻腳好多架)


再行再食燒魷魚(屋主唔喺度),我同學話:你都賤啦,又話唔食海鮮,拎轉頭食燒魷魚


再趙砵仔糕;同學又講野啦:你肯停口味呀?但轉頭佢走去再買沙翁,換嚟我一句:超
佢話:頭先我地一家三口share一個,我分得好少咋


最後,見有新野,買左兩枝四季桔茶(左)同羅漢果茶(右)返屋企飲,四季桔茶大家大讚,羅漢果其實都好味(兩樣都推介);
但原來屋主煲左腐竹糖水。。。


有我喺度,腐竹糖水幾大煲都清哂,放心

Tuesday, August 21, 2012

今日做艇家

相約往舊同學大澳“別野”聚舊,佢屋企對住個湖,十級靚景嚟架


見佢隔離屋嘅表哥出湖收蝦,我自告奮勇出去幫手,因為想影張成班同學同佢地D老婆仔女加間屋嘅全家福


出到湖中心,原來“表哥”今朝落左籠,而家只係去收籠;第一籠上船,得幾隻,“表哥”嫌大隻,原來佢捉嚟第二朝釣魚用;而家部份可以白灼蝦自已食


第二籠我幫手拉,好緊張呀,結果大豐收呀


將佢地“凳”哂落桶


魚唔要,放返落湖


蟹都唔要,放生


回程lu


最後四籠加埋有幾十隻呀,同學的兩歲外甥女望下桶蝦又望下我講:哥哥好叻呀~呵呵呵,好開心呀


呢間屋太多少年回憶,已經再約秋天再入去,但我就想搵日平日佢地唔用嘅時候入去避下靜,喺露台望住呢個景就夠,hehe


預告:聽日繼續大澳

Monday, August 20, 2012

開估+今日大澳嘅笑話

第一張係沉香,貴野嚟架

第二張係outlet,當D譯音譯到唔知係乜,要睇番英文之明,仲有乜意思呢?


----------------
星期日,約左班舊同學入大澳,其中一個係原居民,有屋架,今日睇住佢間屋個景先



另加兩個笑話。。。。

我:阿邊邊(舊同學)個老婆聽講好靚架喎

W(女同學):唔靚架

我:我X又話好靚嘅?會唔會後生果陣好靚,而家老左呀?

W:睇到D輪廓架嘛,唔會囉,真係唔靚架

我:係咪各花入各眼呀,阿X講到好好好靚架喎

W:信我啦,真係唔靚架,好似我咁嘅樣架

我:你講到咁辣,我真係無得唔信你喎
﹣﹣﹣﹣﹣﹣﹣﹣﹣﹣﹣﹣﹣﹣﹣

朋友兩公婆帶住外國返嚟嘅兩歲兒甥女嚟玩,回程時坐私家車走,途中非常high,自己猛唱ABC同不停講野,佢舅父叫佢收聲。。。

舅父:喂,靜D

兒甥女:唱歌ABCDEFG。。。。

舅父:靜一靜呀,睇下出面幾靚

兒甥女:唱歌ABCDEFG。。。。

幾次勸喻之後

舅父發火:喂,收聲呀,靜D呀,八婆

兒甥女:hehe,靜D呀,barbie

舅母:有無攪錯呀,好彩佢唔識聽啫,以為你嗌佢barbie咋

Sunday, August 19, 2012

再估/開估噚日答案

請勿嬉水。。。諗爆頭都應該無人估到


原來係畫講野講到噴哂口水喎


無人估中四個,獎“金”累積至12"

今日問題
1/三級難度問題。。。一舊舊啡色嘅係乜嚟架呢?


2/十級難度問題。。。奧特萊斯。。。乜解呢?


Saturday, August 18, 2012

有野估。。。畫乜春呀?

指示牌上面嘅“公仔”其實好難畫架,要簡單一睇就明就好考功夫嘅,而香港D牌呢,好多都睇唔明,試下估呢個。。。





1.一級難度

2.兩級難度

3.三級片嘅難度

4.難度達四仔級別呀

最快估中哂四個答案,有達仔黃金一條,保証6"以上

Friday, August 17, 2012

美食展真係迫到踩死蟻

今朝,繼續會展set場,今朝挑戰更大,噚日有set場公司set,我只係跟手尾,今日,因為設計上比噚日簡單,所以我只係嗌個朋友幫手,賺埋人工錢嘛~

算順利,但set set下三樓,又比客call落一樓改野,上到三樓又發現一樓某D剩餘物料可借用,行上行落再行上行落,而家攰到條腰唔係自己架~

做到攰,老闆娘請食鮑魚,好好味,但得一隻咋?不如比哂成樽嚟吖~

一樓food expo今日已經開始左,我終於都買左野。。。

$20四罐,點解會買,因為唔記得帶水,個人又唔夠糖,呢檔又喺正對面。。。哇!真係甜到喉嚨痕,剩餘兩罐決定溝梳打水


客戶好客氣,飯盒預埋我地,但好難食,於是走去買胡椒餅($12),都叫幾好味,勝在熱辣辣


好多人好多人,師奶群大舉出擊,拉哂車仔,喼,嬰兒車(載貨用),甚至書包(有得拖住行果隻),水泄不通


仲裁有大量旅遊車載強國遊客嚟掃貨,佢地真係行到邊踎到邊兼隨地走廊中間開餐架喎,我想行快D都行唔到呀


set場前,可以打橫行,開場後,多人到我想即走呀

Thursday, August 16, 2012

美食節工作事件簿

又到美食節,又要幫我個客設計展覽場,每次都戰戰兢兢,因為一定有意多外,大定細咁解架啫。。。


首先,本來約10:00am,運送物料嘅公司大遲到,遲左45分鐘,唯有影下相,先睇相。。。




大家快手D,終於準時完成;但我發現現場竟然同我睇嘅圖多左一幅牆嘅?點算?最後用剩餘物料+明天先用嘅物料(明天仲有一個場要set)執生,個客未嚟得,send張相佢睇,佢有野想改,急急再印補救。。。

最後,客戶來到非常滿意,鬆一口氣,但望下錶,已經8:00pm

好攰,野都唔想食,最後咬左個麵包,返來趕第二個job,而明天繼續set第二個場,早抖了

Related Posts Plugin for WordPress, Blogger...