燈燈燈櫈。。。2008大事回顧

鳴門2008最愛。。。

電視劇。。。神探伽利略，贏千秋王子一個馬鼻
電影。。。特務卡啦蘇，好感人
漫畫。。。犬夜义結局篇，總算大團圓
動畫。。。火影忍者，捱眼瞓都要追
運動。。。羽毛球，貪佢夠狠

十大歌曲，咦！今年轉哂人喎
10.分手要狠，吳雨霏
9.永遠幾遠，王苑之
8.I miss you，陳柏宇
7.最後的三分十六，周柏豪
6.就算世界無童話，衛蘭
5.撈月亮的人，楊千嬅
4.給愛惜的人，吳浩康
3.甜蜜蜜，FIONA
2.ＬＯＶＥＳＯＮＧ，方大同
1.神呀，求求讓我睡，劉浩龍

08年正經寫blog,無諗過識到咁多人，仲接到ＪＯＢ有錢賺，多謝咁多位，09繼續！

三個半

星座話我呢個禮拜有橫財，走去買張六合彩啦！真係中咗三個半字，有$160,扣除成本$55，仲有＄１０５落袋


希望下年中大獎啦！

聖誕聽乜歌

華納孖寶﹣Fiona & Khalil


先講Fiona。。。SMILE
等咗好耐，終於出廣東碟啦，我實買格，佢唱乜我都話架啦！
七首新歌方大同作曲佔四首，暫時最鍾意“甜蜜蜜“，聽到心都軟哂


今年我心目中嘅女歌手三甲全執位，可能中年危機，三個都年齡下降，其餘兩個係王苑之同衛蘭

方大同。。。ORANGE MOON
每次買佢碟第一次聽都會覺得怪怪，但聽多幾次就會完全投入，走唔甩；今次聽咗一次，商業咗，易接受咗，其實佢喺台灣而家成績仲好過香港，香港市場窄，可能佢真係主力打台灣市場多Ｄ，入面嘅相好靚，但點解咁似casper嘅？


方大同都係我男歌手三甲，其餘係ＥＡＳＯＮ同ＤＥＥＰ，係咪有Ｄ怪呢

老翻“吸血新世紀“

如果睇咗“吸血新世紀“，記得click嚟睇，最後10秒好正，推介

床底寶箱之黑膠（四）。。。白版

好耐無寫床底，以為我已經無貨？趁聖誕得閒Ｄ，再寫過

今次講一堆白版碟，唔係咁易買到架

劉天王嘅金中金，一起走過的日子／愛不完




王菲（當時仲叫王靖雯）：可否抱緊我


我當年嘅偶像﹣林珊珊：為瑪利亞哭㕸的啞巴


葉蒨文：憑千個心


而家邊隻最值錢呢？你又最鍾意邊隻呢？

今年第365篇﹣反思

聖誕大家玩到癲，出一個問題比大家反思




化糞池點解要吸呢？滿得滯？點吸呢？用吸管？呢個行業有幾多人呢？點入行呢？會唔會睇“ＣＬＩＣＫ入（黃金）屋"呢？

聖誕快樂呀！各位

鳴門教室﹣食壽包的正確次序

細個同Ｄ表弟妹見親壽包都會係咁笑，因佢似身體某部位；現公開小時候食法供大家參考；

一。一定要趁熱，如果唔係效果會唔理想


二。先用筷子隊穿一個洞


三。切記要大大力


四。跟住輕按包面，啦，嚟喇嚟喇！


五。係唔係好正呢？如果用蔴蓉，效果更佳


如果有讀者用蔴蓉或其他材料，歡迎投稿，薄酬

我的工作-2

繼續華星

自從ＥＡＳＯＮ過咗檔，華星剩低梁漢文，何韻詩同區倩兒，好快就財困，要不停出精選

張國榮都做過兩張，乜料都無，神仙難變，第一張仲可以攞Ｄ舊碟加加埋埋，仲過到骨


第二張就真係技窮，budget又無，相都無，唉！得兩張細相仔，放大又鬆，Ｄ歌又唔精，真係無眼睇！


許志安又做咗兩隻，又係相都無，但係又堅持要大頭喎，最後衰到要我落信和買相，比朋友笑我做老翻


鄭秀文又係兩隻，情形同許志安一樣，都係要自己刮相，右邊嗰隻簡簡單單，我幾鍾意架


最後一張。。。做得最唔安樂嘅一張“羅文精選“
話說有一朝起身見報紙話羅文病危，佢地即刻打嚟話要急做，動機簡單不過，就係想刮死人財，我短時間做好，佢地亦等“消息“先安排出碟，結果羅文嗰次死唔去，佢地個算盤打唔響。




華星講完。

Holiday Mood

返多三日工，
連放四日假，
Holiday Mood，
好想去旅行.

床底寶箱之史前廢物﹣２

作為無記死硬派ＦＡＮＳ，見到最近亞記嘅鬧劇，其實睇得好開心；
被炒嘅寸寸貢黑人憎，睇見都心涼。



我對無記有幾ＤＩＥ ＨＡＲＤ呢，我屋企係無任何收費電視嘅，基本上係唔會轉台，只有開機同關機；
而我個電視係無亞記架，一號台無記，二號台本來SEARCH咗係亞記，比我人手較到變咗“電梯台“，即係電梯台都好睇過佢；
三號明珠，四號亞記英文，雖然亞記英文有得留低，但係一年都係開到一至兩次啦


完

我的工作-1

好少講工作，今日放假坐喺屋企，剿少少舊作放上嚟，大家比吓意見，可能你地屋企都有我做嘅野架！

見到最近華星被收購，成班歌手開演唱會，其實華星執粒前我一直有幫佢做ＣＤ封面設計；
主打永遠無我份，剩係比Ｄ炒冷飯嘅精精精選嚟做，到佢話下隻新人碟比我由頭跟起嘅時候，佢已經執粒。

我幫佢地嘅第一隻碟，“eason精選“，當時佢已經離開華星，呢隻碟主要打佢喺英皇嘅第一張碟，所以一知對方出碟日期，就趕住出，只比我一日時間，相來自之前佢幫雜誌Ameoba影嘅相，配合埋廣告，應該係我做嘅最好賣嘅一隻。



第二隻係梁炳演唱會，將Ｄ相撈撈埋埋就攪掂



第三隻喺梁炳＋eason DVD，比足心機做，當年自己都鍾意，今日睇番又無特別





講住咁多先，仲有下集，估吓有邊個？

簽名

預早知道工作上會見到蘇絲黃，講笑問朋友有無人想要簽名，竟然有三個人想要喎！

頭兩個我講名，阿蘇就好認真寫埋名同祝福句㖭！


第三個唔記得咗邊個話要，阿蘇又堅持一定要寫名，咁就寫咗林auntie喇，事後先知原來第三個係"朱朋"，啦！林auntie,
你嘅！

病況＋老了十歲

討厭冬天，
天氣乾又凍，
天氣凍，個鼻就塞同流ＢＴ，
個鼻塞，瞓覺變咗用口抖氣；
但天氣乾，半夜喉嚨就乾醒，
乾多幾日，就變咗咳。
今日下晝喺公司係咁咳，
咳到自己都煩，終於早走去睇醫生，
但聽日仲要開會，無得請假，但我已連踏咗十日，
希望星期四走得甩。。。

終於要用張醫療咭，對上份工返咗三年都未開齎，呢次未夠半年已經要用


藥入面有敏感藥，正；藥水幾好味;
準備咗口罩聽日開會用，費時比人話。


夏天，精神體力思考能力似廿歲，
冬天，連個樣都變咗五十

床底寶箱之史前廢物

你有幾耐無去過圖書館？

幾耐無借過書？

呢隻圖書証無咗幾耐呢？

而家係點借書架呢？

家姐唔生細路嘅原因

十幾年前嘅一日，阿媽摧家姐同姐夫生番個孫，我幫口話生啦生啦!再擺出一副cute樣話:外甥多似舅呀;佢地望一望我，dead air咗幾秒，跟住話....都係唔生啦！
佢地真係到而家都無生呀，咩野態度？

黑人“曾“

同老狗傾最近香港大事，講到包機呀，雷曼呀，的士長嗟短嘆時，突然發覺，原來我覺得樣衰口臭食野唔做野做野打爛野嘅巧合地竟然有個共通點；

曾蔭權
曾鈺成
曾德成
曾憲梓
曾俊華

姓“曾“嘅真係比佢地影衰哂

禮物

今日收到一個客人嘅來電，話下午佢個工人會有份禮物交比我，我左推右推都推唔甩。。。

呢份就係份禮物。佢話：“平時可能無乜用，但我喺公司一定有用“，咁玄，咩嚟呢？


包得好靚喎


dunhill，唔駛咁重手呀？


盒內仲有盒


原來係呔夾，係咪暗示我要打呔呢？定係要我喺公司再爬上一級呢？

原來數碼港Ｄ客真係重手Ｄ架

我Ｄ舊相

我當年扮過學友呀！

快有鬼用

睇完睇下覺唔覺有咩問題？

。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
隻貓嗌肚餓，訂咗貨，懶快咁，送大包狗糧嚟！快有鬼用咩？

做冬

上星期六下午提早同屋企人做冬，去咗Inter continental食自助餐，其實近年每次做節都係一樣

今次食少咗，就係得咁多，有Ｄ蝕本呀！最勁係食咗炸魚兩件，無魚味，正！


捧住個肚跟住仲要開工，仲要擺出一副開心樣，其實飽到隨時ＸＸ，真辛苦！

喂！睇戲啦

見到戲院下期上畫嘅海報，好多正戲

紅點嘅都有興趣，最期待“崖上之波兒“，同"吸血新世代"，你地會睇邊套？？

雜料

＊雜誌缸
雜誌缸嚟咗我屋企，仲一住數載㖭！佢有藍色嘅外表，同一個四方頭


＊好Ｑ凍
個個話唔凍，真係鈍，我就凍到死死下


老闆？
九龍灣發現有餐廳叫鳴門，係唔係我開架呢？

我的爛gag

接上期

我問番我細佬，咁如果eason牌橙汁出士多啤梨汁，咁叫咩野名？
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
果粒士

artboard day，係咁上下水準架啦！

來自細佬的爛gag

我細路以前好正經架，返銀行工，結埋婚，成淥葛咁，最近竟然攪爛gag...


1/佢問：麥當勞賣雞叫麥樂雞，佢而家想搶茶餐廳生意，賣菠蘿油，咁會叫咩野名？

2/又問：eason賣廣告嘅果汁叫果粒橙，而家想賣西柚汁，個名係咩野呢？
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
麥蘿油／果條柚

講真吖！好爛

床底寶箱之史前功課（結局篇）

儲低又post得出嚟嘅唔多，呢篇已經係最後啦

呢張係第一年嘅作品，搵咗小學同學做model,佢小六移民後相隔幾年回港旅行，捉咗佢上山頂影咗呢張相，用咗tungsten film,所以偏藍


呢兩張用咗特別技術將影像移到水彩紙上，係我最鍾意嘅一個系列




呢張澳門影，用咗sepia相紙，我記得沖菲林時加多咗時間令影像contrast D,就係呢野，又多一張98分


最後出場係我第一張用相機影嘅功課，相機問阿叔借，完全唔識用，當年成班柴娃娃一齊出街影；話哂第一張，所以都有儲起


跳起嗰個，熟又熟過，交又打過，而家以經係眾人偶像ＬU！

完