Tuesday, January 31, 2012

星光夢裡人

過年前睇優先場,入場至知係默片。。。


年尾好忙,個人好攰,張櫈又舒服,套戲又無對白,坐左一陣就。。。。。瞓左

好彩起身都接得番個故仔,其實娛樂性頗豐富,男主角真係十足當年男星模樣,我撐佢攞獎呀~

查實呢套係用默片包裝嘅愛情喜劇,易睇易明,容易消化,值得推薦

我比70分

Monday, January 30, 2012

初七﹣我約左嘉道理

新年嚟嘉道理農場已經變成習慣,今日我又嚟啦~

嘉道理你好,做乜對住我咁開心呀,未見過靚仔咩?


過年呢幾個星期,都會留意住佢個網址,睇下梅花幾時開。。。

今日盛放中。。。


鐘花櫻桃呢?又係盛放中。。。


行上觀音山,1812尺,初七登高行大運呀~


大家想睇梅花同鐘花櫻桃,好捉緊呢幾日去欣賞啦~

未完~有下集

Sunday, January 29, 2012

預告:天際100又食又拎

話說新假期抽獎抽到天際100入場券2張,要喺1月尾前去,之前日日陰天,今日太陽出來了,即去呀

詳情下星期至寫,今日先睇我點免費作場仲要又食又拎,快獸都有份去架~



有美女賣糖,有得試食,熱情果味,幾好味,$48一包,食完走佬lu


又有美女開檔,叫你玩下apps,又免費有隻保溫杯啦,yeah~


未完~

Saturday, January 28, 2012

犯駁

又係香必飄嘅廣告,話廁所唔通風喎(0:05),但轉頭睇下佢個窗,廁所有咁大個窗都話唔通風?

香港嘅樓真係無幾可有咁大個窗囉,有嘅請舉手

Friday, January 27, 2012

賀年廣告

初一初二都係坐喺屋企打下牌睇電視,今年電視有乜睇呢?

聽嚟聽去都係“貢C貢屎貢屎le吖,貢C貢屎貢屎le”,唔係就係呢隻“你個籮柚響千遍,聲聲送舊年”,聽到都覺臭呀真係

另外,今年有D另類野喎,以前唔覺有呢類貨品初一賣廣告架

例如有。。。前列通祝你路路暢通
仲有。。。成人紙尿片褲,祝你大富大貴

我一聽就笑到反肚,可能就係咁分哂心,打牌咪輸囉:(

另外,每年都比人鬧嘅特首賀詞廣告,今年好似無人講,等我講。。。



點解班細路畫條龍(39秒),會自動無左四隻腳仔變左條蛇嘅?(40秒);有乜隱喻呢?唔通係跛腳嘅政府?好驚喎~

Thursday, January 26, 2012

暖流版

今日,天寒交迫,初一初二輸左二十四底無左$1200嘅初三,食乜好呢?


過年前,隔離台意粉問我,達仔想要乜野禮物,我隨口噏話回鍋肉,金寶湯同茄汁豆,點知佢真係搵速遞send嚟。。。

多謝善長意粉嘅回鍋肉,令獨居長者明仔有餐溫飽呀~

無野做,食飽瞓lu

Wednesday, January 25, 2012

初二

先講下麻雀大戰,初二再下一城,輸多7底,兩日輸左24底。。。

打麻雀梗係傾廢計啦,老豆話初一時無線個記者妹離譜唔識做人,(大意)問一家準備坐遊輪旅行嘅人:最近有遊輪意外喎,唔擔心咩?仲去嘅?。。。老豆覺得初一有d野應該避忌下。。。


我講起話全盒d食品如角仔係金元寶,咁瓜子係乜呀?媽話yau銀,老豆話:係啦,瓜瓜聲其實可以係。。。
我:又話要避忌下嘅?

下晝,家姐嚟啦;講到我最憎嘅賀年餸。。。蠔屎,我話真係睇你點釋架啫,你話好巿,我就覺得係好屎,食左就好屎啦

我:其實d酒樓過年總係將d菜名改做乜野大吉大利呀,白玉金環呀咁,咁你知唔知發財元碲寓意乜野呢?

姐:唔知

我:財元(裁員)

姐:暈,即係豉椒炒魷條新版

我:咁不如諗夠十樣一圍啦

姐:咁唔小得苦瓜同梅菜啦喎

我:諗到,人到撈下撈下叫撈起;整番碟炒粒粒,即係豆呀瓜呀肉呀全部切成粒,跟住用手食。。。

姐:即係乜呢?

我:用手執嚟食,即係執笠



今日初三,咪鬧我呀

Tuesday, January 24, 2012

初一

早上,聞到另類氣味,當然知係達仔大左便,新年開始就執金,好意頭呀(唯有呃下自己啦)

晚上,同老豆阿媽打三腳麻雀,完全無招架之力,打八圈,直落輸清櫃桶,再借再輸,破紀錄輸足17底,嗚~

打完牌番屋企,開門,又聞到有異味,一睇,達仔屙爛C,,有D仲要屙左落個格仔桶度,另外大量舖喺沙面,金沙嘅呢個秘密,唔覺意流左落凡間,連我都分享到。。。


醒起噚日餵左新牌子貓糧,可能食唔慣啦,唔寫住啦,又要同達仔“敏”屎啦,bye~

Monday, January 23, 2012

新年啦

每年嘅年三十晚都好恨食原味出前一丁,因為以前去阿爺屋企食團年飯,又魚又蠔屎發菜乾瑤柱蝦米,結果無野食,我會走去加料煮個出前一丁,變成習慣,今晚即使食左飯,消夜都要隊番個,唔食唔舒服。。。


祝各位龍年身體健康啦,行運行到腳趾尾啦,心想事成啦,萬事勝意啦,笑口常開啦,出入平安啦同埋。。。日日有屎屙,呢個祝福好緊要架~

Sunday, January 22, 2012

團年

我係潮州人,呢間,由細食到大。。。

女部長我識佢時佢係第一份工,我呢。。。小學雞

呢樹,都算係我屋企過年過節嘅飯堂囉。。。百樂潮州海鮮酒樓

睇下噚日食左乜,基本上幾十年都係食呢幾樣野

左/花蟹。。。我唔食
中上/沙爹牛河。。。我至愛,但要走方魚碎(不過部長好醒,唔講都識走架啦)
中中/四寶蔬。。。正
中下/臘味飯。。。噚日賣哂臘鴨喎
右上/杏汁豬肺湯。。。好香好香,十級推介(要預早電話訂)
右中/蝦蟹棗。。。呢種蟹我食到
右下:滷水。。。我清哂碟


一開始先上花蟹,即係我發吽豆嘅時間,部長知我無野食,私人送上一碟佢自己入厨房揀哂D芯嘅咸菜,真係好鬼錫我架啫,呵呵~
睇下我果碟同正常嘅分別~~~


最後,仲有壽包,大家又起哄要我表演正確食法,無計啦,娛下賓啦就~


大家新年快樂啦:)

Saturday, January 21, 2012

兔年最後一擊

兔年,真係抽中左好多獎,年尾都抽多份正野。。。

好野,可以去天際:)

Friday, January 20, 2012

剪髮前的準備。


大家去髮廊,剪髮前都會瞓低洗下頭;通常大家會合埋眼吖?定係望下週圍或者望住個洗頭仔(妹)呢?

又有無諗過,從洗頭仔(妹)嘅角度,佢又想唔想望住你,或者會望到D乜野呢?

我做過一次洗頭仔,當年公司辦公室喺商場,隔離舖正正係髮廊,因為近近地,就喺隔離剪頭髮,跟住同D髮廊朋友混熟左啦;

熟嘅程度,去到成日過去搗亂,於是有一次走去做洗頭仔;

原來,從上面望落個客度,係見到個鼻哥“洞”架,睇得好清楚架

所以以後我去剪髮,我都會做剪髮前的準備。。。。。撩鼻屎


Thursday, January 19, 2012

收爐 狂擦一餐

今日,跟完一單難應付嘅食物shooting後,個客話星期五要layout喎,但其實layout之前已做好,放番張相落去,星期五send出去就攪掂,當收爐架啦,呢兩日開下單追下數hea下就算lu

夜晚,朋友生日,揀左𠿬西營盤嘅momo食自助餐,對我嚟講好OK架啦,有沙律有牛扒有意粉有湯麵有雪糕有蛋糕,最緊要係無嘈嘅師奶,亦唔會有大聲阿叔囉



朋友嘅爛gag。。。
佢食左啖牛扒,跟住話:雞嚟嘅
我:下?
朋友:塊牛扒好雞
我:O

其實塊扒本身唔差,但唔夠熱囉真係,唉~



另外我亦要投訴,雪糕櫃太凍,雪糕好難“畢”呀,我好辛苦至畢到六球呀


靜靜地,最好傾下旅行料,住邊區好呢?呢間平D,果間就方便D,住唔住溫泉酒店好呢?住幾多晚好呢?終於度好,聽日開始book啦:)

Wednesday, January 18, 2012

輕鬆小品

噚日篇怨氣大,今日寫篇輕鬆小品啦。。。。


今日午餐走左去食車仔麵,一個年約30嘅大肥佬走埋嚟搭枱,佢嗌5餸麵呀,哇~

未完嘅。。。

除左碗麵,佢仲嗌左杯凍檸茶呀

碗麵同茶送到,佢打開載砂糖個樽。。。(我心諗:咦!凍飲都加糖?)

佢放兩匙糖落。。。。碗麵度呀

哇!真係估佢唔到呀,唔怪得之咁肥啦

Tuesday, January 17, 2012

X記糖水舖

西環因為即將有地鐵,舖租勁升,好多舊式舖頭因為捱唔起貴租要執笠;

報紙前排都有報道話西營盤出名嘅X記甜品因為貴租結業,話係好多大學生嘅回憶,報道好正面,但背後呢?


貓義工知佢地舖頭有隻貓,養左12年,問佢地會點安排,佢地竟然話鎖埋佢喺舖有得佢喎,唔會帶佢走;

貓義工見咁情況,話送佢去貓場搵人養啦,想老闆至少比車費啦,因為要送去荃灣區,佢話只會比$300,隻貓比左義工,比人養定劏左嚟食,佢都唔會理

真係咩野說話嚟架~~隻貓幫你捉老鼠,又逗得客人開心,最後竟然係咁。。。

一隻12歲嘅貓比人遺棄,根本唔會有人會收養囉,真係好陰公。。。

今日因為要還人情債,幫一間貓屋影D靚貓相,原來X記貓就係喺度,佢變到好自閉,唔同其他貓玩,剩係面壁。。。

Monday, January 16, 2012

soyjoy

當年,去日本旅行時,見到藥房超市貼左好多田中麗奈嘅海報,賣嘅係新產品。。。soyjoy,即買枝當零食,覺得味道一般,之後香港推出都無買過。。。


今日,當我plan緊再去日本時,收到通知中獎,中左12枝soyjoy同兩隻膠碟;今次唔會當零食,會變成我嘅早餐啦:)

Sunday, January 15, 2012

廢人廢語

廢話一則

同朋友行山中途。。。

我:隻膝頭落樓梯又有D酸㖭
朋友:咁要食曾江果隻啦
我:美源髮彩呀?

Saturday, January 14, 2012

決定去旅行


好耐無旅行,終於落實出發;買左東京機票,只需$15XX(未連稅),早機去晚機返;2月18日出發,6日5夜;

多謝大頭,阿粉,老師三位達人嘅資料;日本果位帥哥,我等緊你嘅推介架:)

初plan,會去伊豆,鎌倉,江之島

係咪咁最好呢?仲度緊。。。

Friday, January 13, 2012

麥當勞之所見所聞

地點:麥當勞
人物:師奶與她的一歲小孩
時間:2012嘅某一個下午

事發經過。。。

師奶到櫃面買野期間,佢手抱嘅小孩攪個飲管箱,終於整跌冚住飲管箱嘅透明阿加力蓋落地,咁,個師奶執起個蓋,唔係比職員清潔,而係就咁將個阿加力蓋放番落個飲管箱。。。


最精彩還在後頭,佢走去隔離個飲管箱攞飲管。。。。我O咀了

Thursday, January 12, 2012

咁多人,可以影乜呀?

繼續清水灣郊野公園;噚日講到,個公園堆滿人同垃圾,但一場嚟到,點都舉下機啦,有乜影呢?

呢個公園其中一大賣點,對正青洲(中),同果洲群島(左)


名就聽得多,睇過實物未?呢個view,幾靚架喎真係


青洲嘅右邊,係哥爾夫球場


呢個公園可以帶狗嚟架,佢有工具比你掃屎,好體貼


年青男女帶埋天葵鼠“金金”出嚟玩,小朋友見到開心到抱嚟影相;其實我都想抱下囉~


人多到嚇死,想避開影唔到人係妄想,決定影埋佢地做構圖一部份,呢張我like


成班人行過嚟,正,影;出嚟效果唔錯,呢張我又like


走嚟走去吖啦,影埋你,呢張我又又like


離開嘅時候,經過停車場,見到呢隻巨貓瞓左覺,借車身樹影做構圖,呢張我又又又like呀


最後呢張,我取名眼睫毛:)



﹣﹣﹣﹣﹣﹣﹣﹣﹣﹣﹣﹣﹣﹣﹣
點去清水灣郊野公園? 鑽石山地鐵站搭91號巴士至清水灣大坳門道迴旋處下車,往大坳門路步行二十分鐘

Wednesday, January 11, 2012

郊野公園之淪陷

星期日,去左清水灣郊野公園,又名大澳門;


行去時,相距仲有15分鐘路程已聽見喧嘩聲;

去到,見到差不多全部係疑似印度人,無一千都有八百個,男女老幼有個共通點。。。講野好大聲兼大嗌


成個山頭都企滿人,全部放緊風箏


樹上掛滿七彩風箏嘅奇景


雖然遍地垃圾,但佢地又喺度野餐喎;D細路呢,互掉垃圾同石頭


佢地唔知係乜組織,帶備大量風箏,放之不盡,個包裝仲係印度文㖭


四點鐘,佢地陸續離開,奇怪現象出現啦,好多港人走去執人地跌落嚟唔要嘅風箏玩,唉~


通山風箏又唔可以全部賴哂人,當日仲有幾個阿叔玩𠝹風箏,玩到好high㖭


班“旅行團”走後,效野公園變成咁。。。


變成咁。。。


變成咁。。。


變成咁。。。


變成咁。。。


唉~~~~~~~~~~

Tuesday, January 10, 2012

四台(唔)頒音樂大獎

今年嘅樂壇頒獎禮話咁快就完左,係時候總結一下各歌手嘅成績,唔係睇邊個最多獎,係計下邊個最少呀~

四個台加埋超過260個獎,剩係新城派豬肉都138個,連”李紫昕“都可以憑《星光下的思念》攞到新城勁爆原創歌曲,裕美都可攞新城勁爆躍進歌手,果個晚晚賣廣告咩野"umbrella"乜又加都攞幾個獎嘅時候,果D都叫有D名嘅,先分得一個半個甚至一個都無唔通真係得罪人多?

(以下歌手全部2011都有出碟,亦無宣佈話自己唔攞獎)

先睇第一個,得一個獎。。。鄧穎芝《Boom Boom》 。。。新城勁爆跳舞歌曲;
04年出道架啦,唱左咁多年都咁霉,都真係陰公



第二個,得一個獎。。。 鄭融《Kiss Kiss Kiss》 。。。新城勁爆跳舞歌曲;
歌其實唱得唔錯,但新聞永遠係臭寸不和比人雪,睇嚟都玩完


第三個,得一個獎。。。 MC Jin 。。新城勁爆人氣歌手;
em,連無線都分唔到豬肉,唔通以後真係要主力拍戲?


第四個,得一個獎。。。張繼聰。。新城勁爆創作歌手;
著足件道士袍大半年,終於換到一個獎,恭喜哂


第五個,得一個獎。。。野仔。。。叱咤樂壇組合(銅獎)
自己友力撐下,分得一個獎,其他台啋你都儍


第六個,得一個獎。。。BOYZ 。。新城勁爆跳唱組合
復出後,連英皇都爭唔到獎,好危~


以下三個單位,出左碟但一個獎都無

JW。。。舊年金曲金獎得主,今年變白果王


鍾嘉欣。。。連無線都唔比獎,有D野喎


JUNO。。。碟名可以改為。。。無獎



ps:如有錯漏,幫手糾正
Related Posts Plugin for WordPress, Blogger...