Friday, December 31, 2010

總結

今年寫左365篇

觀賞人數約264500

Followers有50個

寫到第三年,今年先摸清楚自己想寫乜,都係相簿加D廢噏;另外新嘗試係每月交一篇影相功課,呢樣野應該會繼續啩!

今年係咁多,祝大家新年快樂,事事如意,身體健康。。。多謝:)

最後,播我今年選嘅金曲金獎,All C Star。。。呀唔係,係C AllStar 嘅 “天梯” 至啱,出年見啦!

Thursday, December 30, 2010

開P

唔係我啦,我無去P好多年啦(實情係年年都無人叫我去)

去港島南區行個圈,見到呢一幕。。。。你見到咩野呢?


我未見過咁多街貓囉,十幾隻都有呀,我行埋去嚇走左幾隻呀!排哂隊開大食會呀~


幾耐無開餐呢?係咁“趙”呀


睇下左邊果隻,都幾肥噃,一定有人定時餵啦


毛色仲有光澤㖭,呢隻四蹄踏雪幾靚仔


唔知係咪關野生事呢?個樣都似豹D架,呢隻畫埋黑眼線,似鬼妹


放大睇,成隻山貓咁,話係豹都有人信呀真係

Wednesday, December 29, 2010

香港大學上山頂﹣相簿

舊年已經行過一次,由大學經龍虎山徑行上山頂,今日主要睇相簿。。。

1/大學﹣比起上次,轉左GF1真係靚好多呀!(但係GF2出左啦,有無人買左呀?)


2/和平獎﹣係呀,我擺明玩野


3/打碟﹣大學入面竟然勁多蝴碟,學人打下碟,都唔錯喎


4/打蟻﹣已經完全控制影蟻技巧,無難度


5/成蟲﹣仲打埋蟲,呢隻蟲成左年,係成蟲


6/紅葉﹣香港少紅色楓葉,呢隻都唔錯呀


7/紅葉2﹣呢種就第一次見啦,好有聖誕氣氛


8/仲有好靚嘅茶花(有無人知呢種茶花全名?最低開估)


9/爛葉﹣除左靚花靚葉,仲有爛葉


10/雲霧﹣上到山頂,一大堆雲飄過嚟,形成呢個奇景,變左灰色


11/雲霧2﹣似唔似國畫呀?


上邊答案開估。。。笑到肚痛呀!

Tuesday, December 28, 2010

12月27日

12:30pm,本來去中環食九記/勝香園,無開,轉軚去九如坊食江仔記,得幾個C奶看舖,結果佢地不停犯錯兼超咸,真係離哂罩
﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
1:30pm,行過H﹠M,無心買野架,結果。。。。之前睇中果頂帽減到$10,係$10,我好豪咁買左兩頂

﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
3:30pm,中環影下相,行下行下去左金鐘,食下元氣先;假期三點幾嘅金鐘元氣得幾枱客,最O咀嘅係輸送帶得幾碟野咋!個waitress仲要繼續唸書話:如果輸送帶無你要嘅就落order啦;咁環境可以唔落order咩?

﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
5:00pm,夜晚銅鑼灣睇戲,“換”左飛,有個幾鐘頭剩,過去避風塘影黃昏

﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
5:50pm,唱咁耐K,終於夠分換到戲飛,換嘅係宅男必睇,“娜姐同謙謙担正嘅”婚前試愛“;
哇,屎到不堪呀!班女邊個化粧架,咁醜嘅?
羅仲謙條眉修到好硬呀?
娜姐使唔使做”乜“都帶住對假眼睫毛呀?衫就識除,眼睫毛就死都唔除
個浸大carol使唔使咁醜呀?
連除衫果part都拍到完全無feel;
個半鐘嘅戲使唔使仲要不停回憶重播呀?
其實係咪災難片嚟架?
但竟然有7成滿喎,驚呀~~
香港電影,唉!


成套戲唯一OK係首歌

﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
8:15pm,好幾年無睇聖誕燈飾,但見到新鴻基呢個燈飾,好似小學生作品咁,想點呢?

Monday, December 27, 2010

西環街市名物推介

中國除左有范冰冰同李冰冰,今年仲送嚟冷冰冰;凍到手凍凍,一枝公坐喺屋企,食乜好呢?


對自己好D,買西環街市名物。。。安格斯肥牛;睇下,雪花分佈幾咁平均,熟左唔會好似超市果D咁,有條白邊架;
雖然,面頭果幾塊永遠係靚過入面冚住果D,但係價錢只係$34一包咋喎,夠我食兩餐㖭呀!食過人人讚呀!

凍肉老闆話呢幾日個個打邊爐,刨唔切呀佢!勁抽!

Sunday, December 26, 2010

廿四號上山頂,有乜睇呢?

廿四號,放自已假,由香港大學行上山頂;

上到去,攰呀,搵野食,食burger king,burger king出面有個小露台,可以對住個香港全景食餐,好多遊客都會嚟影張到此一遊,但呢幾個內地遊客就。。。

四個人, 一到埗,即攞四盒野出嚟喺張枱開餐,睇真D,鏞記喎,但搭車上到嚟,點都凍哂啦!見佢地一開盒飯影影影相,影自己喺山頂食鏞記
(我就影慢左啦,三個轉左位, 一個繼續喺枱食)


食左兩分鐘,因為太大風(其實凍㖭架),頂唔順,轉左去後樓梯地下;係咪睇到都覺委屈呀~


又食左5分鐘,可能自己都覺得嚟山頂為乜啫,於是又上番去張枱食(啦,又係有選擇困難症架),但越嚟越大風囉!


睇下個男士凍到,咁樣食鏞記真係嘥鬼哂(其實鏞記幾錢一個燒鵝飯?)


佢地仲有袋壇島蛋撻架,不過我食完,等唔到,走先啦~

所以呢,睇網友D blog呀,寫自己去邊食乜野嘅背後,可能真相係咁架,陰公!

Saturday, December 25, 2010

聖誕老人

呢個係我近年覺得最靚嘅聖誕裝飾

從細到大所認識嘅聖誕老人都係獨身嘅,今年置地廣場嘅裝飾,竟然有聖誕老婆呀,仲玩咀咀㖭呀,咀佢咀佢~


另外想講,置地佈置用上至少幾十棵真聖誕樹,見到棵棵比人斬左落嚟,感覺悲涼呀!

裝飾用真樹又唔見D人話唔環保嘅?

Friday, December 24, 2010

我想去補習




祝大家有個開開心心嘅平安夜

Thursday, December 23, 2010

東平洲相簿

精選十張,去片

1/天水圍城-船上影,對面應該係馬𩣑山


2/紅牆樹影-幅牆好似隨時裂開兩半咁呀


3/螞蟻偷情-呢兩隻唔跟大隊,EE泣泣,有D野呀


4/螞蟻上樹-基本上行上山每行一步都踩死蟻,實在太多,呢張,今日至愛


5/更上一層樓-無野影時就自己整D野嚟影啦,呢D天然嘅,好玩過玩具反斗城層層疊啦


6/一片寂寞的心-寂莫到無野寫


7/飛呀,飛呀-呢D疑似蒲公英物體通山都係,吹呀~


8/十字架?-其實係指示牌,呢個角度影好似墳場


9/鳥居?-香港有鳥居,仲要咁大個?其實又係指示牌


10/吹水畫-大家有無玩過將D油彩潑落畫紙跟住用口吹呀,咪就係咁嘅樣囉!


11/完“結”﹣全程最後一張相,回程船上影

Wednesday, December 22, 2010

東平洲生態一日遊

星期五,凍到便秘,郤決定星期六硬闖東平洲


果日得一班船9:00am由馬料水碼頭出發,提早去買飛,8:00鬆D就已經到左碼頭;來回船飛$90


船程要個半鐘多D,去到已經10:40am,上岸,無風喎,唔算凍喎,發達啦;睇地圖,環島全程要四個幾鐘,而番馬料水嘅船得一班,係5:15pm,夠哂時間


之前未嚟過,嚟到梗係睇石先啦


乾左嘅石邊好多白色點點,係鹽嚟架


行左兩個幾鐘,到達出名嘅斬頸洲


另外,東平洲有三多
一。沙灘好多好多珊瑚,好靚
二。行上山好多好多蟻
三。係呢樣。。。。

一路行上山都聽到D動物行過撥草嘅聲,終於見到佢地走出嚟,係老鼠定田鼠呢,一路行都聽到佢地D聲喎!


沿路好多生物,先睇下呢三樣,不過佢地死左。。。魚/蟹/特大水母


仲有D正野。。。蟹/海膽/(應該係)鮑魚;唔比攞走架,咪諗住入嚟食海鮮餐


另外,見到呢條螢光肥毛蟲,好卡娃E呀!


仲有隻白色黑點甲蟲,全程見到兩隻,倒轉好似骷髏架~





呢班係途中遇見嘅龍友,佢地話自己喺度“打蝶”,即係影蝴蝶;
見佢地好緊張嗌哂話:嚟啦嚟啦,有機啦,交尾啦,交啦,交啦,哎吔,隻乸都肯架,都交唔成呀,點解呀?(我就知點解呢,你咁大聲,乜都走啦)


小貼士:自己帶備乾糧同水,因為島上唯一士多近碼頭, 一行就無野食架啦~

點去東平洲:搭港鐵到沙田站,沿天橋行去宜家果邊,天橋腳底有27號綠van,搭去馬料水碼頭,再搭船前往

預告:聽日東平洲相簿
Related Posts Plugin for WordPress, Blogger...