Monday, December 31, 2012

今年最後一篇

兩隻野有野同大家講

達仔:多謝各位厚愛,明年我會繼續做model

快獸:我無出場好耐,比達仔搶哂風頭,出年我會起哂踭出多D鏡架啦






我:今年寫左363篇(雖然好多都係無無聊聊),出年見啦:)

Sunday, December 30, 2012

PSY的停車位

勁啩,比我刮到PSY喺香港有個停車位呀。。。

Saturday, December 29, 2012

認景

今日影相期間,客戶攞左一本catalogue出嚟話鍾意果張相個背景(鬆郁矇果隻),我問係咪要去先?因為個景點就喺一個街口對落咋。。。 

去到景點時,搵埋個位比佢地參考,化粧師問點解可以睇一眼個矇查查背景就認到個位喎?。。。 

我又真係唔識答喎,認visual我又真係強架喎,認字就弱過弱雞,無得解架喎

 ﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣

咁比兩個景大家認下,要有睇TVB先答到架

易題。。。呢個係乜劇個景?  

難題。。。呢個呢?某套劇只係出左一集

Friday, December 28, 2012

總結今年工作

年頭忙到年尾,年尾更加係爆哂 因為多左新客,終於可以踢左兩個怪客走,開心

其中一個怪客最後個job,一份job煩足幾個月,又lee又lo;煩到不堪,份job完哂收哂錢仲繼續煩煩煩,煩到我要唔聽佢電話,我都係第一次咁對客。。。 

12月識到兩個新客,呢個星期就係忙緊其中一個job;做返以前嘅專長,攝影師要影一輯product相,我就美指兼編排,即係搵location,幫models執styling買衫,幾點影邊個product咩野造型乜野location,一腳踢安排好,好玩但好X攰 

一枝公去買女裝買legging,同班師奶搶衫咁,已經唔會面懵,一次比一次習慣 

另一個客做賓館生意,賓館都有野我做?做D乜?比較特別,要完成先講得 

今年初次踩過界做product design,第一批製成品已經出街,而家著手設計第二批,開始摸到門路,第二批應該會更好玩;做乜野product,又係未講得住,遲D有機會先。。。 

ps:多左機會,工作好玩左,要學下人講聲:感恩呀(真心的)


睇下,忙到唔夠瞓兼感冒死唔斷尾,樣都變埋呀,陰公~

Thursday, December 27, 2012

無人估中,玩多日

噚日盞交通燈位置無人估中,比多一張相做貼士玩多日。。。 睇下,地下識升起架喎,我都係第一次見咋,乜野地方呢?  

---------------

同場加映。。。D師奶係咪講少陣野唔得架呢? 

26號都要開工,已經夠哂燥,想靜靜地食個早餐啫,睇下,個師奶大大聲係咁講唔停,做乜要咁大聲呢?  

因為佢個傾計對手唔係坐佢對要個阿婆,而係隔條走廊嘅另一位師奶呀,唱山歌咁呀;

要傾計點解唔坐隔離呢?師奶嘅構造真係好有研究價值架~  

真係好想講聲:八婆,收聲啦!

Wednesday, December 26, 2012

可能係最矮嘅交通燈

聖誕日,著到紅噹噹出街,見到呢盞交通燈,知唔知呢樹係邊度?

Tuesday, December 25, 2012

聖誕快樂:)



幫達仔揀緊相做座枱月曆,有無人想要?

Monday, December 24, 2012

射呀射,射它吧

平安夜,先祝大家聖誕快樂;喜慶日子,今日寫D開心野啦。。。

星期六, 一日遇到兩個可愛尿廁呀 

下晝飯,某餐廳個尿廁,竟然裝有電視機,分明叫大家瞄準“啡”個電視;睇下電視入面個籃球員,跣腳喎,呵呵~

咁好玩,出去飲多D水嚟多次先


跟住去左天際100,睇下佢個尿廁,有個golf洞喺度喎;

哇!樂而忘返呀~
 

寫呢篇嘅時候,我突然大嗌一聲,醒起。。。點解唔睇埋個屎塔呢?可能仲好玩呀,呢舖蝕呀~

Sunday, December 23, 2012

換過個牙醫啦

每次睇都覺得對白應該改成咁。。。



當我知道有人有敏感牙齒

想第一時間解決

我幫到佢

方法可以好簡單

換過個牙醫










Saturday, December 22, 2012

好多禮物

今日收到好多禮物。。。

臣臣寄嚟嘅包裹,除左有佢嘅肖像月曆咭,仲有貓草同和菓子,咁客氣呀,見字比個回郵地址我回禮好喎


 

舊老闆約食tea,用上朱古力一盒,哇,靚野呀~  

舊老闆媽媽搵人由溫哥華帶左袋拖肥糖送比我,比我老闆鬧佢揀埋D又重,仲要香港買到嘅野返嚟;超級感動呀~~


加上今日工作順利。。。

上晝搵location﹣搵到啱嘅景 

下晝見客(1)﹣本來鑊左諗住要蝕錢嘅job竟然死唔去,心情靚返哂 

見客(2)﹣新客嚟嘅,設計嘅logo佢非常滿意,進入color combo階段,已相討第二三四個job,開心但有D暈

客人比錯膠袋size,但要响4:00pm前(做冬喎)急趕歸家攪返掂佢,結果3:45pm完成,順利拆鑊

呢個末日原來對我幾好喎


Friday, December 21, 2012

阿媽覆診

今日陪阿媽去瑪麗覆診,好彩有阿姨同表妹幫手,去一趟,用哂一日嘅energy

唔熟地頭唔知程序,去到一樓交費,前面排左超過100個人,決定我排隊,阿姨同阿媽先上七樓等睇醫生

排完隊交錢上七樓登記,原來又要帶阿媽落返一樓照X-Ray,行就行得耐,但15分鐘就排到,好快喎,開心

照完跟住又要由一樓上返七樓,但架架電梯都爆滿,坐住輪椅都無人會讓架,大家係鬥迫架原來,結果選擇搭落嘅電梯去到地面再上去七樓,行一轉,老左幾年

上到七樓,等15分鐘又排到,真係好順利喎。。。 

醫生話康復得好好,骨生得好靚,六星期後覆診,另外,要開始約做物理治療。。。 

送返阿媽返屋企,阿姨陪佢傾下計,我就再出發去戴麟趾康復中心預約時間,終於約左兩星期後上第一堂

 一齊順利,還得神落;即歸家繼續趕job,年尾呢幾日,除左週六,日,排滿工作,針都插唔入

真係多謝客戶嘅支持,但我已經支持唔住,寫完呢幾隻字,又係時候講:早抖了

Thursday, December 20, 2012

2012總結

2012話咁快剩返11日,又係時候回顧下。。。

一月:原來抽到免費去天際100已經係本月重點

二月:東京.伊豆.輕井澤の旅。。。今年搭得一次飛雞咋~

三月:跟U﹣magazine去濕地公園。。。贏到$500禮券,happy:D

四月:原來無重點,最重係我病左睇醫生

五月:好友走了

六月:又無重點

七月:澳門包食包住免費兩天遊2012。。。朋友贏到澳門酒店,有得玩仲影到“北極光”

八月:我是一個飛機師。。。又係朋友贏返嚟,有得去模擬揸飛機/達仔腸塞了。。。擔心死我呀,衰仔

九月:比稅局告,好彩最後武士

十月:達仔慶生日。。。達仔入屋一年,點都算係大事/媽媽入院了。。。更更更大件事

十一月:攝影比賽嘅得獎作品。。。yeah,贏到$2000禮

十二月:阿媽出院了。。。鬆一口氣/試機﹣Fujifilm X10。。。買左新機,但無乜時間影囉/病,今年睇嘅第二次醫生,到今日都未清得哂

﹣﹣﹣﹣﹣﹣﹣﹣﹣﹣﹣﹣﹣
總結:

工作。。。今年好忙,好好忙,全年好似無乜停過;寫blog時間少左,睇有幾多篇廢噏就知

運氣。。。今年其實幾好運,都中左唔少獎,心足

健康。。。我病,達仔病,阿媽跌親,成日都話,健康係最梗要,真嘅,希望來年自己,家人(包括達仔)同大家都健康:)




Wednesday, December 19, 2012

門常開外的海濱長廊

之前嚟過政府總部門常開,對海外圍圍哂板,今次再去,原來已經部份開放,多左條海濱長廊。。。

呢個景點其實真係靚架喎,草地仲可以任踏㖭  

靚靚觀景台對正維港,暫時好少人喎;相信呢樹會係新嘅睇煙花熱點啦  

喺灣仔望過九龍,海換左草地,感覺係咪好新鮮呢?  

可以影到IFC同ICC兩雄對峙嘅畫面  

影返去灣仔,又好有都市感覺喎  

咁沿住海濱長廊,行去邊架呢?起到咁靚。。。  

原來轉個靚灣,已經係天星碼頭嘅十號碼頭  

十號碼頭人少少,影相一流。。。  
﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣

點解成篇我好似自己同自己講野咁,因為聽日我會sell個客呢個location影catalogue shooting,練習下先sell自己一次

Tuesday, December 18, 2012

頒獎禮

我呢種 TVB fans呢,雖然今年追劇少左,但每套劇至少都有睇一兩集嘅~,梗係有盡公民嘅義務投票啦~

今晚坐定定同達仔睇頒獎禮,睇下有無估中先

達仔好唔俾面,用後眼嚟睇only



我投左邊個呢?

男:黎耀祥。。。中左

女:我投左佘詩曼。。。五強都唔入喎 

劇:天與地。。。其實呢,今年無乜邊套真係好爆好好睇囉,講真 

你地有無投呢?投比邊個呢?

﹣﹣﹣﹣﹣﹣﹣﹣﹣﹣﹣﹣﹣﹣﹣﹣

ps:林峰年年比人話會攞,但年年都食白果,其實都幾慘情 

--------------------------
再ps:感冒菌死唔斷氣,朝朝都以為好返,但越夜越有鼻水,睇完電視,又要早抖了,goodnight~

Monday, December 17, 2012

穿煲

呢個牌子嘅煲有乜特色呀?  

特色係。。。佢穿咕窿架喎,點煲野呢?

Sunday, December 16, 2012

2011年11月一篇blog嘅下集

請先重溫上集第三篇

因為有師奶嗌牛牛牛,麵檔借勢推出“牛牛牛牛”,等D師奶多個選擇,好周到


Saturday, December 15, 2012

底褲出陣味來

病病地,食左藥,做野做漏野,思維亂jojo; 

發呆睇名媛,賣廣告,明明係奶粉廣告,聽到底褲兩個字㖭,仲要出眾(陣)味來㖭

我都係早抖啦~

Friday, December 14, 2012

病嘅時候靈感特別湧現

一早起身,覺得感冒好返好多,喉嚨唔痛,鼻唔塞,於是買埋早餐探阿媽,點知去到開始流鼻水,唔敢逗留,食完即走,傳染阿媽就大獲。。。

但仲要去見兩個客,因為又接到兩個job 

回家途中,又有個新客打嚟話要設計logo,加埋聽日仲要set工展會場,仲係咁流鼻水唔掂,終於都係要睇醫生,快快攪掂感冒,同醫生講要D唔眼瞓嘅藥呀,無咁多時間瞓呀。。。

但,食完D藥又昏睡左個半鐘  
--------------------

另外,今日收到意粉寄嚟嘅包裹,先講聲多謝,拆開。。。 

mmm....使唔使咁隆重其事寄阿馬生過嚟呀?  

------------------------------ 

八點幾,瞓醒食完飯開工,瘟下瘟下咁做,只係用左兩粒鐘,做左一份幾靚嘅設計出嚟,病嘅時候靈感特別湧現架原來

 寫到呢度,要食藥瞓覺啦,早你個抖

Thursday, December 13, 2012

試機﹣Fujifilm X10

噚日果篇展覽嘅相係fujifilm-x10影嘅,有無覺得同之前有分別呢?
攝影師朋友知我想轉fuji,佢話佢有部x10,問我要唔要,平平地賣比我,於是我拎左嚟試機  

新機當然好多野未熟手,但效果大致OK喎,睇相。。。(今日全部原色出,無加無減)

張相闊D,以前係40,而家係28  

試張背光,自動測光,唔錯喎


顏色嬌左,我like  

花瓣透光都好易掌握


話就話超級微距,但可能未用熟,同之前差不多  

唔夠光環境都影到,無手震,微粒可接受  

總結。。。仆鎚,多件玩具,yeah~~

Wednesday, December 12, 2012

創意城市*detour2012

2012係香港設計年喎,”創意城市*detour2012“係其中一個較大型嘅展覽

最吸引嘅係展覽場地,舊灣仔警署呀,平時無得參觀架~  
場館入面分開唔同設計家嘅作品,呢堆係比較鍾意嘅,睇下我影左乜。。。

1/紅公仔


2/摺紙牆

3/模型


4/相片牆

另外仲有戶外展品,記得行過對面睇埋。。。 

5/全場最吸引一定係佢,但欄哂紅繩兼痴住紅紙真係大殺風景,設計原意一定唔係咁囉

6/睇埋其他相....


7/


8/


9/


10/


11/


展覽期至到16號,有興趣去睇下啦~

ps:有無人發覺輯相同平時有乜唔同?

Tuesday, December 11, 2012

休息過後。。。

仲衰,病埋。。。

星期六晚打完邊爐,星期日朝喉嚨痛,仲走左去睇展覽+週圍影,大把料可以寫啦諗住。。。
(睇住一張先,唔似喺香港囉,呢樹係邊度呢?)

 

星期日晚見仲係痛,一整晚係咁飲水/煲菊花茶/咸金桔/啪埋藥,再係咁瞓 

星期一朝略好D,但繼續啪住藥,8:45am起身,11:30am再瞓,2:30pm起身,4:25pm再瞓,5:15pm起身,8;30pm好眼瞓,諗住今晚都係唔寫blog,瞓左佢。。。 

瞓到大昏迷,比達仔打醒,以為係半夜,起身食藥兼餵下佢,原來11:30pm only,醒左D,喉嚨唔痛啦,就寫埋呢篇啦

 聽日先寫睇展覽啦,早抖
Related Posts Plugin for WordPress, Blogger...