Monday, September 30, 2013

上上落落

為大家揭開佢地點跳上櫃頂,阿妹借sofa一跳就上左去啦

阿妹上
























阿仔落

佢地今早已回家,佢地走後,達仔竟然試跳,唉~又唔知自己肥,跌返落嚟,撞跌我盞燈囉~好彩無跌親咋

Sunday, September 29, 2013

終於和平共處

試下放達仔出嚟

阿妹:fea fea fea

阿仔: fea fea fea



















達仔唔理佢地,拎轉C忽


















和平期處左一粒鐘,期間各有各瞓


















咁咪幾好;但關係好D嘅時候,明早佢地返屋企啦













Saturday, September 28, 2013

阿仔失踪事件簿

講返噚日嘅“意外”。。。

一早起身,開房門出廳,一隻貓都唔見嘅?

確認門,窗無開,即係lay埋啫,搵左一陣,喺電視櫃嘅內格搵到阿妹;

摷sofa底,電視櫃底,廁所浴缸都無,行嚟行去好似個儍佬咁搵左15分鐘

再搵,放埋達仔出嚟,諗住靠佢fea返阿仔出嚟,達仔無反應喎。。。

驚,越嚟越驚。。。

化身金田一,諗起今朝起身,原本放喺書櫃頂嘅揸揸冰跌左落地,即係有貓跳過上櫃頂啦;

(張相係之後影嘅,之前佢地無跳過上去,平時達仔亦跳唔到,令我忽略左呢個位)


再諗,死,個CD架深度短D架喎,即係好面有個洞,阿仔唔係跌左落去呀?

因為無梯,拎張櫈企高都唔夠高,搵相機影落去睇下先,影出嚟一pat黑,唔似有喎


又過左10分鐘,達仔索下索下嚟到書架附近,跟住聽到櫃後面傳來微弱“碰碰”兩聲。。。

我個心真係碰碰啦,即係阿仔真係跌左落後面,諗起個櫃成七尺高,阿仔又唔出聲,個人亂哂,call佢老豆,叫佢即刻飛車嚟搬櫃救貓,我會先搬哂D書同CD出嚟先,佢飛的嚟。。。

同一時間,我落大堂搵看更借梯,返去行上去櫃頂照電筒,見到阿仔喺最底,但個位超窄,只見到佢個背抖氣

搬書搬CD,試下一個人搬個櫃,搬唔郁,醒起當年個櫃做左mounting,解鏍絲再搬,逐寸逐寸移,終於阿仔自己行返出嚟

呢個時候,佢老豆都到啦,阿仔無事,但我攰到無哂力啫

事後朋友嘅意見係,阿仔唔係跌落去,而係驚得滯搵地方lay,咁窄嘅位佢又真係無可能跌落去囉,但當時心都亂埋,邊識咁諗吖。。。

睇下,佢鬼咁易就上左去,我諗當年如果阿達仔都係咁,我會唔敢養貓囉

Friday, September 27, 2013

三隻不和的貓

三隻野,阿仔見貓就fea,即使係阿妹,互fea程況嚴重,但佢地識自己喺廰分配位置,不過似係阿仔避阿妹多D 

達仔呢,我要佢跟住我,我喺書房做野就關門,瞓覺就迫佢入睡房,盡量唔比佢地“交手”。。。 

好幾次,達仔一出去,阿仔就fea,我都分隔佢地,但今晚,睇漏眼之下,比阿仔入左房,我趕佢出廳時,唔為意達仔已經快過我,追住阿仔一野爪埋去,實爪中啦,阿仔又fea到癲,我趕返達仔入房後睇下阿仔有無損,好彩無事,全靠我早兩日幫達仔剪左腳甲,好彩。。。

睇下相,阿仔輸哂謝哂皮,我呵返都無用;唔好以為阿妹好溫柔,對住達仔,惡樣盡現,fea fea fea,達仔走開,佢又擺出一副無辜樣。。。



















預告:今朝其實發生左件大事。。。唔見左阿仔,最後要叫佢老豆幫手,而我攰到無左半條人命,今晚無力寫(仲要開工),聽日寫

Thursday, September 26, 2013

兩隻小朋友借宿三宵



Wednesday, September 25, 2013

引力邊緣 GRAVITY

放心,唔會爆劇情。。。 

有時,真係覺得行狗屎運,見到呢套片嘅trailer已經覺吸引,點知真係抽中優先場,美國都要十月至上畫呀。。。 

原來早過美國上,入場係好嚴架,電話ipad唔準帶入戲院,要查袋㖭。。。 

可能打風關係,星期二下晝先收到戲飛,原來即晚已經係,即call friend睇,點知佢又去check下信箱,佢都抽中,咁就益左隔離台嘅blog友啦~~ 

去到排隊先知,套戲係3D架,好彩有眼鏡派,喎,賺盡呀~~ 

講下套戲,以我嘅耐性,好少會讚一套劇情片囉,呢套特技好得,故事雖然好簡單兼慢吞吞(喺太空乜都慢動作架啦),但係幾個高潮位都超超緊張

故事有幾簡單。。。一個師奶(山楂姑樂)去到太空掂乜爛乜嘅故事囉,唔爛D野點會3D飛埋嚟呀~~

呢套。。。我比足十分,係滿分

Tuesday, September 24, 2013

北角遊

去完勵德邨,仲有大把時間,去左北角影街市,因為有個比賽嘅題目係街市,但影得麻麻地。。。 影下街影下人影下電車反而幾有趣

Monday, September 23, 2013

達仔的森林

因為打風,騎樓D盆栽搬哂入廳,八公覺得阻住佢囉

Sunday, September 22, 2013

勵德邨

見網上有朋友推介影勵德邨,今日趁個風未到,即去。。。 

為嘅係呢個屋邨內向上影嘅奇特影像,但原來要入大閘,跟人尾入左去影左兩分鐘就比實Q趕走啦~~~

好彩影到呢張。。。


















外圍都幾好影喎,圖案感好強,但張張都向上影,頸好攰~~

Saturday, September 21, 2013

好耐無去赤柱

應該都有三幾年無去赤柱,連商場都變左樣,今日中秋正日,好多人呢~~ 


以前入嚟,會摷下CK剪牌底底,A&F tee,而家,乜都無,D貨純粹賣比遊客

Friday, September 20, 2013

“look”柚的故事

























張相係今晚落街賞月影嘅~~

 ﹣﹣﹣﹣﹣﹣﹣﹣﹣﹣﹣﹣﹣﹣﹣ 
今晚同阿媽老豆食飯,佢堅持要我買個"look"柚,話今晚對住月亮開佢嚟食,就衰野走哂,開心哂喎~ 

跟住各自返左屋企,佢又打電話嚟,叫我whatsapp家姐提佢今晚要對住個月亮搣“look”柚(家姐早兩日已從阿媽屋企攞左“look”柚) 

我whatsapp家姐後,家姐回字:“look”柚一早食左囉喎~~ 

我:咁無計,你對住月亮搣開你自己個“law”柚啦

完~~~

Thursday, September 19, 2013

家賊難防

我以前唔會諗到,一隻貓識得開廚櫃攞野食囉~ 

最近經常發生,因為罐頭同貓糧放喺廚櫃入面,佢自己學識用手拉開個櫃門(今次拍唔到)

 條片係我見佢開門入左櫃之後拍嘅。。。  

睇下佢,樣衰衰咁捐逢出嚟~~

Wednesday, September 18, 2013

綵燈

病好lu,出去賞月先。。。 以前唔會去維園綵燈會,睇果D十年如一日嘅紙紮公仔,今年就唔同,有個藍月亮,要去捧下場。 今日叫做唔算太多人,迫到埋去影個全倒影
月亮入面人太多兼無乜野影
加燈籠倒影都唔錯
有大量吊燈,又可以玩fing機,fing呀fing呀
未fing前係咁嘅,送個真月亮添
另一影相靚景係燈籠,呢張我好like
影返張香港燈籠高高掛先,有D放天燈feel呀~~
要去就趁早,一來越近中秋越多人,二來可能打風呀~~~

Tuesday, September 17, 2013

主人病了

靚仔主人冷親,一轉天氣就感冒發燒,睇左醫生食左藥就瞓到死左咁,我好悶呀~~

Related Posts Plugin for WordPress, Blogger...