Thursday, September 30, 2010

發惡夢

早兩晚嘅事。

發夢間中會夢見過左身十幾年嘅阿公,唔係同佢最親,但佢出現卻係最多。。。

今次個夢係咁嘅。。。

我同友人(唔知係邊個)一齊搭巴士上層,去到灣仔警署落唔到車,但去到六國飯店附近有個站,於是落車。

六國飯店門口變左用好多紅布掛住嘅帳簾,撥開入到去,見到三間餐廳,其中一間五個字,上至下頭三個字用金線銹,最底兩個字係白底毛筆字後釘上去,都係掛喺紅布帳簾上面;

作到去燈光陰暗,我行埋一張枱到,見到坐左幾個人,最右係阿公,我當時心諗:你咪死左架囉,點解。。。

再望向最左,係叔婆,都係已經走左嘅;有D驚,望埋阿公隔離果兩個男人,覺得佢地都係走嘅(但我唔記得係邊個)

仲有一個人,係三姨;我當時諗:三姨未死架喎

我就嚇醒左

點解D惡夢咁真架,仲係記得哂D detail位;醒時係連招版果五個字都記得架,最後一個係雞字,似餸名但解唔通嘅字;個紅色,真係咩野pantone都噏得出;

唔想發夢,諗晚瞓落床都有壓力

Wednesday, September 29, 2010

我在堆填區的日子

講嘅係位於屯門嘅“環保園”,今年三月開幕;網上見到有人介紹,見好天就去左,去到至知原來要預約喎!好彩都比我入去參觀。。。


“環保園”分室內展館同室外花園,原意係摩登嘅建設同大自然係可以並存,但原來花園仲維修漏,唔對外開放。。。


我跟著果團係一班女學生,已經唔算嘈,但見兩個miss每個指令都要講幾次至有反應,就知而家做老師真難為;
館入面最壯觀嘅“景點”,一個模擬堆填區;當見到高過自己嘅垃圾山坡,真係會提醒到自己要更加更加環保;
呢三個”RE“,睇就簡單,要做到就要加油啦;好,我先嚟減廢,減少廢。。。。話


見班女學生未殺到,見有野玩,同快獸狂玩先


參觀完,行番出嚟,附近雖然多靚嘅花草,但其實隔離就係一個真嘅堆填區;導遊有講,呢個堆填區嘅垃圾係D膠樽,keyboard等等嘅垃圾,所以唔臭,但係已經就飽和,飽和又要再搵地,真係救命。。。


大家出分力啦

Tuesday, September 28, 2010

鳴門厨房﹣煲老藕

先講噚日答案

1.相中嘅冷氣機係倒轉裝架/2。高達答案係一升/3.頻果係報紙嚟架,問你死未?


煲老藕
簡簡單單,豬肉+蓮藕+雪耳+眉豆+烏豆+南北杏;


煲兩粒鐘,攪掂
瘦肉點頭抽, 一流
個湯好好味,又甜又潤
蓮藕雪耳好好𡁻

以後一星期要煲一次湯,人都潤D呀!



今日金句:
得閒煲下湯,個人唔會乾。。。

Monday, September 27, 2010

三個問題

第一。。。
睇唔睇到呢張相有乜問題?



第二。。。
關於量詞;貓量詞係一隻,水可以係一杯;咁高達呢?
A/一個;B/一座;C/一升;D/一條;E/一篤



第三。。。
咩野係頻果?


聽日開估

Sunday, September 26, 2010

小南國

繼續食評。。。。以前成日食(中環店),但越做越差,無去好耐;

對上一次食北京果間,好好食;路過沙田要食晏,見有間喺度,就食你啦!


小籠包OK,肥油略嫌多;
炒麵又係,油實在太多啦
担担麵呢,都係喎,又係衰油多喎
腐皮素卷,最正係你,全靠有你,先可以清左口入面肥冧冧嘅感覺

中國菜之中我最愛上海菜,我鍾意小籠包,酸辣湯,炒拉麵等等,但好多時都係太肥膩;


各位,有好食嘅上海菜,唔該話我聽。。。

Saturday, September 25, 2010

新景園 - 咖喱豬扒飯

睇blog嘅樂趣,其中一樣就係睇下其他blog主
﹣去邊度玩(好似意粉,老師去清境)。。。跟
﹣去邊度影相(好似I.minor去坪洲)。。。跟
﹣去邊度有好野食(又係I.minor,推介灣仔新景園豬扒)。。。又跟,睇下我嘅評語

上openrice見好多人推介咖喱豬扒飯同乾炒牛河,就食呢兩樣

例湯,正常野
碟菜,正常野
乾炒牛河,網上話好少見牛河可以炒得咁少油;但我呢碟,相都睇到,好肥呀
跟住到主角,咖喱豬扒飯;咖喱好香,唔錯,豬扒粉漿夠薄,咬落唔油,抵讚;但明顯用大量鬆肉粉,扣分;

但最失分係,食到一半牙肉已經開始腫,夜晚開始生飛滋,一係太熱氣,一係太多味精,我頂唔到呀!

所以乾炒牛河肥佬,咖喱豬扒飯我只可以比合格咋!

Friday, September 24, 2010

港島南區 - 瀑

原來南區唔止華富邨有瀑布,仲有呢個;位於香港仔網球及壁球中心對面,工業學校隔離


呢個瀑布比較細,得幾層樓高,而佢隔離有條樓梯,所以試下上瀑布頂先。。。


1.上山啦
2.幾分鐘就行左一半啦
3.到頂啦到頂啦
4.原來瀑布頂係一個淺水灘,要行都仲有得行架
5.得我一丁友,梗係回頭啦;落山時要小心,樓梯太耐無人行,好多青苔
6.從瀑布頂望落嚟,係咪靚呢?


唔知有呢個瀑布啦啩?無人上過去啦啩?今次唔使做鄉下仔啦啩

Thursday, September 23, 2010

大C第

(1)。。。。我想要一本,但更想自己出番本



(2)。。。。喺西環街道上,竟然有人遺棄馬生,馬生口腔內仲要滿佈XX;大家買馬生之前真係要三思呀!要定期同佢地清潔呀,一家人嘛!




最後,中秋節快樂啦~

Wednesday, September 22, 2010

與卡臣的對話

卡臣宣佈暫時封筆後,睇blog悶左好多呀,唯有去佢最後一篇blog果度留言撩佢快D出山啦,留留下,越留越廢,睇下今日講D乜。。。好睇過平時寫野呀真係。。。

前文。。。無啦啦講起伊索寓言>姨索寓言>姨索預言,睇下以下精華版,無刪剪全文請到呢度觀賞。。。


繼續。。。



真係廢鬥廢

Tuesday, September 21, 2010

風波下的風波

一號波時。。。。阿伯打架

唔知之前發生乜事,只係見到西裝伯落緊車,突然回身起腳踢後個阿伯,兩個摟作一團,我即刻走近D。。。。影相

拖拉左近一分鐘,開唔到車,C機幫口勸交。。西裝伯又唔落車,搵位坐喎;跟住開左車,唔知結局,我好失落



三號波時。。。。豐收呀
與老師,maymay,rempi,萊,largeheadboy,劉鄧做節,禮物成籮,多謝咁多位~好重(手)呀!

Monday, September 20, 2010

想月

中秋先嚟打風,無月賞啦,大家一齊想月算啦!

今日想講下月餅廣告...

有無數過一晚出現幾多個月餅廣告?多到吖,證明呢舊餅有幾好賺;代言人仲越嚟越多,但今年唔見左家燕媽媽,有D失落㖭!

蹈香無明星,sell溫情,我buy喎!


美心呢,kelly繼續做代言人,但單睇呢條,同舊年真係無乜分別,除左舊年佢大肚


冰皮拆開第二個廣告,仲要分三條,真係多budget,勁呀!呢三條走攪笑形式,你buy唔buy呢?


鉅記殺埋嚟爭餅食,蔡瀾出手,會搶走幾多客仔呢?


大班冰皮,其實係舊片,呢條同老豆打機,仲有條翻版麥玲玲玩跳舞機,concept同個image我都唔buy,話唔老餅,但拍到咁娘,買就真係老餅


奇華,遲左70年我真係唔明乜解;但電車廣告用黑底托志偉,心悠就真係影得幾靚


聖安娜今年有蘇絲黃,我又覺得幾搶同中market,應該會搶到一批師奶客源


冰皮,我好buy佢果句(D餡咁騎呢,點食),冰皮餡有時有D得pat jam,好難食


講左咁耐,投票啦;以上邊個廣告最吸引你去買?


邊個廣告睇左反而唔想買?

Sunday, September 19, 2010

笑笑小廣告 續集

咁都有續集。。。

1/食字。。。。hot榨,咁都作得出,難聽!阿winkie見自己張相隔離寫住豪華臀唔知有乜感覺呢?


2/老師。。。。又係補習老師;一個補習老師,竟然以鬼馬作招徠,咩野世界呀?


3/蚊患。。。。張poster講食環署職員滅蚊,下,用手捉?真係辛苦哂!咁就知佢地效率有幾高!


4/見工。。。。可能我講過:雖然做freelance,但如果有份工有挑戰性嘅,都會番工架﹣﹣﹣ karvitz send呢張野比我;

wow, good job!

講到呢度,唔講啦,我去見工!

Saturday, September 18, 2010

免費戲

我鍾意抽獎鍾意睇免費戲可能已經係人都知,所以朋友,blog友有飛都會預埋我,講下呢排睇左乜?

星期四晚,龍鳳店首映;多謝馬田生叫埋我睇,同幾個後生仔食飯,我由大叔升級變大伯,多謝哂。。。現場見到任賢齊向生JJ狄易達阿叻醜DJ BOB同一班dididada模,唔知有無人認錯我都係星呢?

因為多模,現場多左一班攞住相機嘅宅男,真係額頭"jot"左個宅字咁,見到呢班等模男,真係聞者傷心,見者流尿;

講番套戲,任賢齊大S羅家瑛阿叻,其他主要角色全部交比內地演員;笑料真係非常港式,非常密集但略嫌舊;但我笑得幾開心;

睇完後C癮大發:睇戲好開心,多謝馬田亨


上星期五睇左﹣ 殺手靚太唔易做 優先場;成套戲同之前湯告老師嘅有八成似,但果套勁好多,呢套呢,兩個主角又後生好多;但個故仔好犯駁喎;最大開心位係有Tom Selleck ,80's Magnum果位



星期日,朋友抽到霍金唔知咩嘅,去太空館睇,以為去佢個天幕展覽廳睇,點知原來去個細廳仔;入場有枝太空人筆送;本來前面留哂位比傳媒,最後0出席,慘!
原來只有25分鐘精華片段,但都悶到打喊露;講嘅野軍曹都有講啦!
睇完仲要訪問下D博士,悶出煙,見有人走,即刻跟隊


Friday, September 17, 2010

笑笑小廣告

1/文化中心攞嘅宣傳單張。。。挪亞方舟

基督教而家真係勁呀,連粵劇都撈埋,主角仲要係文千歲;
但好似唔啱feel,九唔搭八喎!




2/都係文化中心攞嘅宣傳單張。。。黑柴﹣浪人之歌Dark Root of the Scream
唔好意思,呢張,資深讀者先識笑。



3/免費報紙廣告
補習社老師個個都執到自己明星咁,但有D野真係勉強無幸福,請睇以下例子。。。我諗起朱咪咪

Thursday, September 16, 2010

銅鑼灣有條秘密通道



又睇下呢樹你嚟過未?
1。世貿旁有個停車場入口
2。再落有條隧道,有好多喉管,又有人放狗,去邊架呢?
3。究竟係乜喉管嚟架呢?
4。SEA WATER RETURN... 咪即係酒店return嘅海水,咪即係C水?
5。到出口啦
6。扶手用鐵做,有扭花,英國貨喎!


出嚟,原來係避風塘,隔離係炮台,原來有條咁嘅通道架~


其實係咪好少人知?定係我大鄉里?

Wednesday, September 15, 2010

轉行?

兩個星期前,阿fun問:有個國際性選美要佢幫手,搵一個澳門小姐過去參加,budget有限,想我幫佢影張造型照寄比大會放網頁;
我:錢唔係問題呀,我無架撐,張相又咁重要,驚喎!(但其實我好恨影)
心諗:以前做美指跟影相,燈點放,放幾多盞就識,但真係用啦喎,盞燈點開都唔識喎。。。



結果,我嘗試搵攝影師朋友借器材,佢唔止肯借,仲教埋我點用,兼可以到場幫手set野,仲話一早覺得我可以入行;

話咁快就星期六,上晝攝影師先到中環holy brown影相兼拍片,人對我好,我對人好,我去義務幫手,原來最大幫忙係。。。食物一拎上嚟影兩張就變垃圾,食得就食左佢啦,結果係我好飽。。。。拍攝其間已經知佢套燈點用,下晝就到影靚女啦!


本來攝影師叫我操刀,佢後面執生,但諗過,為澳門小姐前途著想,佢做主,我做副,佢先影到“中”嘅相,先到我上場,咁樣會安全D。。。。。

太緊張,阿女亦太green,自覺表現麻麻;但番嚟睇番D相,又OK喎!下次可以膽粗粗自己嚟;係時候添枝燈啦!


諗番起,其實畢業後第一份工係見攝影助理嘅,但無請;如果做左,條路會唔會唔同哂呢?



阿女參選詳情請留意隔離選美台(即係阿fun個blog)

Tuesday, September 14, 2010

噚日答案 / 9月功課﹣城市密碼 K-R

噚日答案。。。
一執毛髮/駁髮;唔通同司機講:“司機,頭先個女人漏低(執)毛,如果佢番嚟搵,你比番佢啦,咁咩“




繼續"城市密碼"。。。


O/可樂。 O/水喉。 O/淺水灣街燈。 O/海港城天花燈(呢張係參考某人果張“人散”嘅)


P/西環路牌。 P/消防局外牆。 P/小童遊樂場設施。 P/市政局羽毛球場。


Q/辣椒醬。 R/大廈之間。 R/磚牆。


S/白泥士多嘅窗花。 S/小童遊樂場設施個影。 S/海港城嘅地磚。


T/呢個concept嘅源頭,第一張就係佢,天水圍舊居。 T/中山紀念公園。 T/華貴邨街燈。


T/今日至愛,梅窩沙灘。 U/華富邨石牆。


V/大圍蝴蝶。 W/西環某大廈天台。 W/我樓下公厠外牆裝飾(呢張相講完添左D風味)


X/電車電線。 X/向上望。 X/上山頂途中嘅野草


Y/大澳孖樹。 Z。IFC


*已經做緊第二個功課,預計十月出街;

*有無好玩idea提供?

“城市密碼”全部播影鉛筆,多謝收看,晚安。

Monday, September 13, 2010

噚日答案 / 粗心大意嘅乘客 (問題篇)

噚日答案。。。出人意表,係一架可樂車

答消防車嘅,咪就係信哂眼前嘅野,諗多D都懶,即係又天真又懶,呵呵~
答其他車嘅,無比眼前景象矇蔽,醒!
答中可樂車,你喺可樂做架?咁都估到?


﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
今日嘅推理題。。。。
粗心大意嘅乘客(真人真事嚟架)

一個下午,搭小巴由西環去旺角;

上車,等客;突然前面有一乘客同司機講:有人漏左電話呀!

司機接左部電話,call總台話:我架車執到電話,如果有人打嚟問,話佢知個電話喺我架車度啦!

我諗:你都叫好彩啦,遇到好心乘客 + 司機。。。。

同一時間,隔離坐左個潮人打扮嘅廿來歲女子;

小巴如常開車到旺角,中途站時,女子落左車;小巴繼續行;呢個時候,我發現女子坐過嘅座位上有野遺下。。。

問題嚟啦。。。你估佢漏左乜呢?(小貼士:我最後無同司機講,怕醜;亦無執起佢,我唔會貪D咁嘅野,執左都無用)


(圖片中失物形狀經特別處理,本來唔係呢個shape嘅!)
Related Posts Plugin for WordPress, Blogger...