Monday, May 31, 2010

鳴門廚房﹣香芹豆乾拍黃瓜

呢個好呀,又易整,當沙律食,食完第二朝你就知有幾好

材料1﹣西芹四份一棵,切幼條,切幼D,無得懶


材料2﹣青瓜一大條,切幼條;蒜頭一細粒,切細粒;加糼鹽撈埋一齊


材料3﹣五香豆乾一磚,切幼條


半個鐘後青瓜會出水,隔走水後將所有材料撈勻加小量幼鹽,蔴油,幾滴辣椒油醃同埋雪佢兩粒鐘,食得


一睇就知呢個係排毒餐啦,效果如何,自己試啦!

Saturday, May 29, 2010

去旅行作好準備

話去旅行都話左幾個月,由諗住陽光海灘嘅泰國,轉左去日本,最後成行嘅係台灣。。。

星期四﹣﹣﹣confirm
訂機票先

星期五﹣﹣﹣plan行程
去5日,無奶油剩係玩台北啫,決定行遠D;多謝老師同意粉提供資料,自己下晝出去買左本書,左度右度,變嚟變去,最後行程係咁。。。
台北*清境*烏來就一定架啦;十分/朱銘美術館就仲有時間度度。。。

星期六﹣﹣﹣揀酒店
清境酒店又平又靚,烏來都有選擇,台北反而爆到嘔C,好彩終於都book左喜瑞
book完酒店,諗起相機得一張sd card,出去買多張,驚影相唔夠用

天氣預測:
哇!全台灣都落雨,太陽之子都無力反抗啦!

濕喂

記得加拿大食過,一般啦

泰國見到,唔吼

英國見到,唔吼

香港見到好多年,都唔吼

終於因為要食個快嘅兼無選擇下幫趁左。。。

呢間喺中環天星碼頭,因為由第二邊行過嚟,miss左佢門口張易拉架廣告,入去,見一個飽要成$30以上,無飲品喎,唔怪之得得兩個客啦

叫左個ham,飽原來有得揀,咁就honey oats啦

配菜都有得揀,咁我唔客氣啦。。。。全部吖唔該

我喺雪櫃攞礶可樂,佢問我食乜曲奇,因為個餐包埋。。。。我先知原來出面做緊$29一個餐

麵包酸瓜辣椒火腿都好味,但扣分位係個飽係凍嘅;曲奇好肥仔,仲要有兩塊,食唔哂,包走番屋企慢慢食,都得架喎!


全店得三張枱,我揀左window seat,跟住就多客到排哂隊,無哂枱;我化身招財貓呀~~喵

Friday, May 28, 2010

幫工

老豆一年一度嘅籃球耆英盃又開始啦,今屆在北京舉行;阿媽陪佢上京,所以老家無人,又到我出動每日一次淋花餵魚餵龜。。。

先睇佢地隻寶貝“小靈龜”,放左喺水盆,無得週圍行啦


同龜唔同命,呢隻係無改名嘅,“小靈龜”食鮮蝦新鮮豬肉靚蕉,呢隻食乾糧架咋


好,睇下老豆D魚樂無窮,右下果條乜鬼羅漢,成兩千蚊條,我真係有D壓力


最後,睇下我阿媽個花園,種得咁靚,點解我唔得嘅?

Thursday, May 27, 2010

舊地重遊﹣珍寶海鮮舫

見到blog友寫,先知原來珍寶海鮮舫原來仲生存兼係有茶飲嘅;

而我樓下仲有車直達佢香港仔或者深灣個碼頭㖭,即去食個妟先;

我細細個屋企成日嚟,但係當時係去佢隔離嘅太白;睇下張舊相。。。


香港仔上駁艇,最好玩就係呢個環節,好遊客feel呀!今次當然又係快獸做導遊啦


好,飲茶啦,食物唔差,附近大部份係遊客,但奇怪喎,大部份係南亞/鬼佬遊客,無乜內地團喎~~


呢個係佢嘅皇牌菜,碼頭已經掛左海報,咁啱隔離枱有人嗌,可以睇住佢煮啦


原來連爐都唔使,剩係落玫瑰露點火跟住炒呀炒,都炒好耐,會好食咩?個部長想上碟,班遊客先輪住嚟扮厨師炒蝦影相,實過哂時啦。。。


睇完炒蝦,睇下D裝修,同以前相差無幾,原來太白雖然仲泊喺隔離,但係無開架,但我坐果張櫈寫住太白喎!!
遊客就梗會影張龍椅相,個個影得鬼咁開心


咁我又影啦,有個部長叔叔長期喺度幫人影,期間同佢搭下爹,問佢知唔知以前曾經有張好經典嘅黑白相,係美人魚嚟嘅,但係魚頭人腳喎,掛喺太白嘅樓梯位架,佢話記得,但而家無左啦,仲話早幾個月D漁民有謠言講條人魚會番嚟㖭(唔係吖!)
張相印象深係因為當時無photoshop,整張咁嘅相真係難好多架嘛~

傾完,佢同我影相,點知。。。唔係我做嘅效果,係真係影成咁。。。


影完相返嚟,快獸飽死左



﹣﹣﹣﹣﹣﹣﹣﹣
今日識郁啦!

Wednesday, May 26, 2010

7:00-8:00am

因為通宵,因為打波太劇烈,因為哂太陽,攪到時間亂哂,噚晚10:00pm已經攰到想瞓,加上無左janet bin同扑扑扑,即瞓;撻落床時諗,如果聽朝起到身,又有太陽嘅話,可以影下晨曦喎。。。

點知一睜大眼已經6:45am,都唔晨曦啦,即刻洗面刷牙收mail,put都唔out就仆左落去行個圈兼影下相。。。

西環位於西面,加上太多高樓,原來唔多斜光

第一張﹣地鐵地盆原來7:00am已經開緊工


第二張﹣見內街無光射到,行向海方向,終於去左貨運碼頭


第三張﹣最搶眼就係呢堆紅礶


第四張﹣行過D就係呢堆雜色嘅


第五張﹣墩船,真係好金黃呀


第六張﹣起重機,天藍成咁,剪影實無失手


第七張﹣竹棚


第八張﹣葉,時間唔同,影出嚟嘅效果會好唔同,呢張,下畫就一定無哂野睇


第九張﹣樹根,原來要咁早佢先有陽光


第十張﹣西環邨,今日至愛


第十一張﹣海邊


第十二張﹣屋企樓下


﹣﹣﹣﹣﹣﹣﹣﹣﹣﹣﹣﹣﹣
咁早(而家先至8:00am咋),嘆個早餐至開工,終於試左大X樂個奶茶,都真係幾好味~


聽日預告。。。。

Tuesday, May 25, 2010

咁好天,梗係蛇王曬太陽啦

2010年最好天嘅一日呀,上晝見個天藍成咁,咋咋林做左D急野,下晝去左淺水灣,曬太陽上下色先。。。


兩三年無嚟,原來麥記同超市都無埋,得番pizza hut,7-11,獨市呀。。。

兩三年無嚟,內地遊客都係一樣,一車一車咁車嚟,跟住輪住由灘頭行去灘尾;嚟海灘但係著西褲皮鞋担遮都無變,其實明知嚟海灘,點解唔帶對拖鞋換條短褲呢?


兩三年無嚟,外國遊客就唔同呢,裸曬呀~~


好,入正題。。。個天藍到寶礦力咁,仲要有微風,好快就瞓著;3:00pm曬到5:00pm,舒服到呢~
原來由香港仔有巴士入淺水灣,咁我下次嚟就方便D啦




-------------
噚日答案

”區 歐 歐陽 宗親會“

Monday, May 24, 2010

密密廢 (招牌)

1/
好咸濕


2/
有個人瑞住喺軍營樓上


3/
A:"根"次落"坑"港住乜酒店呀?
B:領事酒店
A:咁“近”?
B:係呀,我同領事好熟架。。。


4/
maymay賣童裝喎


5/
發達太太。。。係發達靠太太吖定係發左達嘅太太開嘅呢,但係英文名係yes lady,中英文九唔搭八

樓上個加州紅招牌已成絕響,三躹躬;家屬謝禮,有心


6/
最後一廢,係個問題:”區歐歐“究竟係咩野招牌?(攝於銅鑼灣)聽日開估

Sunday, May 23, 2010

今日睇芭蕾



*今次主題係光影步,分5 part,都係鍾意傳統嘅芭蕾,所以最鍾意第一, 二part


*得四場,但今日2:30pm果場都唔滿,得八成左右;但其實宣傳都無乜,點滿吖!
(呢張入場即影,唔係得咁少人)



*今日D觀眾質素比起上次差左好多好多﹣好多人咳,可能真係流感高峰期,

*今次多左細路﹣喊嘅又有,傾計唔停咀又有;第三part無音樂,現哂形,個舞者跳呀跳,下面咳呀咳傾呀傾,點專心跳呀,我又點專心睇呀~

逢係呢類劇,都係遲到就無得入,要跳完一part先可以入;跳完一part開門,竟然有超過50人遲到;香港D觀眾質素,好羞恥

以為我又會好似上咁跳番part開心舞?點會重覆吖,今次派個弟子出手。。。


Saturday, May 22, 2010

做到通頂呀~

上星期五,突然接到一個job,一架24座van嘅廣告設計,急件。。。

最特別(麻煩)係星期六要過新蒲崗附近啟德機場舊址嘅一個停車場自己度尺寸,得個車牌號碼逐架搵,有D大海撈針;

都叫順利啦,好快搵到,幾驚要過隔離泊左好多垃圾車個場呀,好彩咋。。。

度完,行經新蒲崗條大坑渠,影出嚟其實幾唔香港架喎,幾靚㖭,有人釣魚,釣到都唔食得啦,下哇?


再過D,見到有個阿叔企左落水清理渠底,無著制服,得一個人,好用力咁掃掃掃,應該係自發架,好偉大呀!


以上係寫定,諗住今晚出;點知刺激嘅跟住至嚟料。。。

﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
星期一交設計,星期二晚confirm左,出output;噚晚有工人“痴車”,佢地7:00pm開工,我就9:00左右到,預計12:00前收工,點知...

唔做過都唔知,發生大量意外,真係心血少;關我事嘅係車頂呢舊野,我度嘅時候跟本見唔到,要行到好開先見到,咁構跨喺上面D字咪斷哂囉,想暈~


最後都攪得掂,但用多左舷時間囉,加埋其他突發事件,結果話咁快就兩點
喺工廠嘅停車場,好熱,真係“叔”哂,好攰



3:00am,就得啦(我以為)


結果,走嘅時候係5:00am,真係多謝幾位工人阿哥,又學到野啦!!


飛的,番到西環,天光啦~~~嗚嗚
Related Posts Plugin for WordPress, Blogger...