Sunday, September 30, 2012

達仔生日?

舊年嘅10月11日,係達仔入屋嘅日子,既然唔知佢嘅正確生日日期,就將入屋日訂為生日啦;

舊年醫生估計佢4-5歲,咁今年生日就當做6歲慶祝啦;

買乜生日禮物比佢好呢?

Saturday, September 29, 2012

Skinhead

噚日有人提議不如剪skinhead,其實十幾年前已經試過一次 

當時啱啱甩,髮型師建議不如剪一次光頭或者skinhead,等頭髮重新嚟過,新出會健康D喎 

咁咪剪囉,都想睇下會變乜樣,因為我個頭好扁,驚好醜樣

結果都叫做OK喎,頂得住
摷相簿搵到唯一一張skinhead相,當時出席朋友婚宴,副眼鏡咪就係而家配返鏡片又帶過果副囉,原來咁耐之前架啦喎~

ps:另外一提,老豆阿爺都禿,阿媽亦唔算多頭髮,所以都唔使諗有奇蹟架啦~

Friday, September 28, 2012

頭毛

27歲,開始發現甩頭髮 之後試過X種防脫髮洗頭水,人地話“防”咋嘛,無再甩多D啫,唔會多返架 三十幾歲時,跟一個有同樣問題嘅同事打賭,邊個甩哂先;今年年頭見佢,禿禿地囉,我覺得贏左一仗呀~ 早兩年,試過針灸,真係多過一排,但之後又好似打回原形 髮型師每次剪頭,要keep住睇落自然OK樣,每次只可以剪短短髮型 噚日,即將出戰國際小姐嘅cherry同隔離台嘅fun嚟到我屋企樓下會所練習,女仔扮靚梗係多道具啦; 襯佢轉造型行開之際,拎左執前蔭假髮嚟試。。。 喎,久違嘅感覺返哂嚟呀,fing頭,前要有頭髮fing下fing下,好感動呀 後生幾年咁呀真係。。。

(細細聲:喂!cherry,邊度買架?)

Thursday, September 27, 2012

跟u magazine去試samsung機

今日相片全部samsungNX20無photoshop直出影像 接噚日。。。

去到集合地點,雜誌工作人員話:入隔離間餐廳坐陣先,我地會有導師講解,大家可以叫一杯飲品,呢個活動包嘅。。。

睇餐牌,見飲品價錢分別都頗大,我第一個叫,老馮係凍檸茶架啦我(除左汽水最平係佢)


 
朋友嗌薄荷雜果賓治;我細細聲話:你都幾老實不客氣架喎(貴我十雞左右)  
跟住其他人嗌,第一個跟薄荷雜果賓治, 跟住有位女士嗌:薄荷朱古力奶昔加雪糕;接住果幾個話:我都係,我又要,一樣啦; 伙計:即係四杯薄荷朱古力奶昔加雪糕 (我睇下menu,飲品欄最貴架) 跟住第一個嗌薄荷朱古力奶昔加雪糕女士嘅同行男友:一杯stella (哇!原來大家都勢凶夾狼呀真係,我會唔會比人當儍瓜呢?) 從呢幾張相可以睇到,就咁用auto,層次出得好靚,鏡頭夠wide,顏色景深都唔錯  
分機,我地派獲一部NX20,部份團友獲分派NX1000;明顯NX20質素高兩班(價錢都係)  
另外,仲分發多一部平板電腦,導師嘅notes放哂入去,咁就更易聽易明,雖然教嘅都係基本野,但偶爾溫下書都係好事嚟嘅;(但用慣ipad,呢部野反應真係慢吞吞呀) 
行去海豚廣場,天氣慢慢轉差,太陽比好多雲層遮住; 導師講解日落拍攝方法,我地就繼續試機,但影日落反而效果麻麻 試下轉白平衡,D色咁騎呢嘅? 當時已經頗暗,用auto都影到咁,夠sharp,noise亦唔算多,唔錯,但顏色就真係怪怪地喎 影完呢張,開始落雨,急急還機,越落越大,急急散水,果度亭都無個,速逃~ (想轉機,但係唔知轉乜好㖭~) 完

Wednesday, September 26, 2012

熱辣辣。。。黃金海岸 海豚廣場

我心郁郁想換機,見u magazine有得試samsung相機,試下抽,又抽中喎 但試機係影黃昏嘅,自已提早幾粒鐘入去影住相先 當日係9月1日,仲係好夏天嘅感覺,太陽曬落嚟果種赤熱感覺,同而相距很遠呀,無啦無啦,又要等十個月啦  
哇!好天到呢!靚到不得了呀,點解有人會唔鍾意夏天架呢?  
原來黃金海岸幾似愉景灣架喎  
今年無去過海灘游水曬太陽,遺憾呀~  
浮波外反哂光,浮波內波平如鏡
最右邊果張,遠睇以為一堆大岩石,埋到去先知原來係麻包袋
 
嚟到海豚廣場,梗係影佢地個地標海豚像啦; 
睇佢D告示話,果樹以前睇到海豚架喎,咁而家呢? 
香港而家D人連貓貓狗狗牛牛都容納唔到,100歲龍躉就食完一條再一條,你覺得仲會有海豚咩?
   
影到全身濕透,行返去麥記飲大可樂,跟住入酒店hea番陣用廁所兼換埋衫,佢地呢期原來有聰明苯伯喎~  
夠鐘,去會合u magazine大隊啦 預告:聽日繼續

Tuesday, September 25, 2012

屬於我嘅夏天又少了一個

最愛嘅夏天走了,夜晚變得陰陰涼涼,羽絨被放喺窗台都未得閒收埋,點知今年夏天遲到早退,又拎返出嚟冚啦~

噚晚,約朋友食晚飯,行出酒樓時,覺得大脾痺痺地,以為坐到腳痺。。。

瞓覺時,覺得條腰又酸又無力,無理,照瞓。。。

半夜紮醒轉身,條腰痛到我叫出聲,呢種感覺咁熟嘅?同春天果次一樣,係風濕又來了

朝早瞓醒,痛到落床,坐塔都辛苦,好彩今日唔忙。。。

近午飯時間,落大雨,無咁痛喎

晚上,上朋友A屋企餵貓,上車無雨,落車落狗屎

點知去到竟然。。。無帶鎖匙

一凍就係咁,記性都無埋,飛的返去攞鎖匙,條街水浸兼大雨到睇唔清前面

終於入到去見到阿仔阿妹,今日係罐頭日,點知一開罐。。。
X(粗口都講埋)  
雨越落越大,唔想我走咁,但發現,落左大雨,唔痛啦喎~ 真係好憎秋天,唔該快快skip左秋冬,變返春天,多謝~

Monday, September 24, 2012

本週廢相。。。乜解呀?

呢位律師究竟想點呢? 呢個廣告究竟想表達D乜呢?

Sunday, September 23, 2012

困擾左成個月,終於鬆一口氣

一個月前,突然收到法庭傳票,話我在“天水圍”非法經營公司喎。。。 原因係我自三月起無交商業登記費; 我好疑惑,因為每年都係佢寄嚟我就交,今年無收到喎,無收到我真係無意識到期交喎 同埋佢寫明係“天水圍”舊址喎。。。。。。???? 我記性真係超差,搬左嚟西環三年,完全唔記得當時有無通知商業登記署改地址,但我記得兩年前我去過商業登記署架喎 而我西環地址亦收過商業登記署嘅信架喎,但去到商業登記署check record話我無改地址,但又解釋唔到點解其他信又識寄嚟西環喎,最神奇嘅係佢話我舊年有交喎,但我又搵唔到舊年張商業登記喎;我搬左嚟三年,如果無改地址,點解舊年我識交呢?到而家都諗唔明 好彩嘅係,遇到嘅稅局職員都好好人,最後稅務主任教我寫左封求情信希望唔使上庭。。。 等左三星期,收到佢地通知,撤消起訴,總算鬆一口氣 好憎自己記性咁差,應記唔記,D師奶廢噏就記得,無交商業登記就完全無件事。。。

Saturday, September 22, 2012

阿仔阿妹。。。又嚟啦

blog友孖A”又“去旅行(兩個個blog都停左,仲算唔算blog友呢?),今次仲兩星期㖭,又到我出場啦~~ 呢一年見得貓多,睇表情喵兩聲會知佢講乜,阿仔表情係。。。悶呀 摸佢OK,但摸都無嚟心機呀

 

阿妹就反而活潑左,任摸任抱,第三日已經咕咕聲
一出按摩,乖乖就範,原來又係鍾意R格勒底  
睇嚟可以開間按摩院,幫貓貓按摩賺下錢

Friday, September 21, 2012

床底寶箱之史前 漫畫﹣學生公主

小時候,家姐少有地睇漫畫喎(佢好勤力讀書架),佢買左我自然唔執輸睇埋,印象中我追左兩套少女漫畫,一套小甜甜,另一套就係呢本學生公主(又名淘氣學生妹) 我幾鍾意“學生公主”架,作者庄司陽子畫工靚,分鏡出色,唔多唔少因為佢,令我知道自己對美術設計有興趣架~ 成套本來係齊嘅,又係搬屋時決定掉哂佢,又唔知點解地掉漏一本,第29期,當時係84年,每本賣三蚊
 
大家有無睇過呢?

Thursday, September 20, 2012

京香餃

睇電視介紹,睇完兩位老人家幾十年嘅奮鬥史,有D感動;而我又特別鍾意食餃子小籠包,而地點喺堅道,對我嚟講交通算方便,今晚趁有事去開果頭,會一會佢。。。
 裝修格局好喜慶feel呀~  
食物我嗌左 窩貼。。。略為淡口左,但皮脆,點豆瓣醬一流 “九”菜餃。。。呢個滿分 雞絲拉皮。。。好夠味,好滿意 打鹵麵。。。以前廣州工作經常點嘅一個麵,係蕃茄同蛋做主角,呢一個味道完全唔同,唔算特別好食
四樣野$137,價錢絕對合理啦 會再嚟,因為未食小籠包,酸辣湯,仲有土豆絲

Wednesday, September 19, 2012

咦!做乜又上雜誌呢

跟u magazine去黃金海岸影日落,試用samsung相機呀~ 果日我影嘅日落呀,不過係GF1嘅 其他仲影左乜?samsung影日落嘅相?寫唔切,下次先

Tuesday, September 18, 2012

美食紀錄

我有個客戶係賣黑松露嘅,上星期幫佢跟影相,個松露刨靚嚟影相,一路刨一路食,hehe  
另一日,同一個客,上到去試新野,黑松露macaron  
成日話唔食海鮮,其實聖子我係食嘅,但當然要新鮮唔腥啦,好似上星期同老豆食飯嘅呢隻8"長大聖子,好爽呀  
另一個客賣海味,成日會叫我試味;其中一樣我大讚嘅係佢。。。  
糟鹵鮑魚,即係酒浸鮑魚,真係好好味呀,呢樽佢送嘅,hehe,得三隻,但我order左一樽大嘅同屋企做節呀~
   
去親佢公司,總有野食,呢個係無花果做成嘅千子糕,好清甜  
食極都未完,仲有奶皇月餅,好飽~
有張月餅券,今晚甜品係半個雙黃蓮蓉月  
今朝,見到舊老闆,佢話:肥左喎你 我:係呀,糟肥D準備冬眠啦

Monday, September 17, 2012

哇!師奶爆料呀

又係搭小巴嘅見聞,搭親都有野寫架真係。。。 一向都好怕D人長頭髮洗完頭濕廸廸咁出街,太烏where 亦怕人兩手戴哂水晶手鏈,總係覺得呢個無嚟信心,要借外物幫忙,仲要戴到兩手係,即係無信心兼貪啦 更怕人不停口講電話講足全程 今次嘅主角三樣犯齊 星期日中午,旺角至西環嘅小巴上。。。 喂,你做緊乜呀? 吓!瞓緊覺(以為佢會唔講啦,點知佢係唔理人要瞓,繼續講) 做乜仲唔起身呀? 啊!今日派成績呀,派完鬆哂,咁唔休息?(明明人地休緊,你嘈醒人,真係好意思問出口架喎) (跟住話題由八人地拍拖到中國反日示威事件。聽到原來對方現在身在廣州),繼續 你果邊好亂喎 我就唔信佢地咁好國情啦 又無錢派嘅 係呀,我呢邊有錢派架,唔係邊有咁多人吖 成日都叫我去架啦,每人有$300架,企頭位果D有$500,但係會比人影囉 阿邊個叫過我好多次啦,我唔去呀,一陣比人影呀 ﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣ (究竟呢位師奶參加乜野示威遊行會有錢收呢?我唔信係國民教育或者六四果D囉,你地話呢?)

Sunday, September 16, 2012

唔行唔知身體好

今日參與一個慈善活動,地點係一個特殊學校,無電梯,地點喺七樓; 終於上上落落行左6轉,第5轉前行得輕鬆,真係唔行唔知身體好呀 當時直頭有回春嘅感覺呀,勁 不經不覺,呢篇原來係第1818篇

Saturday, September 15, 2012

梁醒波有落

搭小巴真係好多笑料,睇下以下呢單,不過可能要熟西營盤至識笑

小巴由旺角經西隧去到西邊街時,有個四眼佬大大聲咁嗌:梁醒波有落

我心諗:吓!未聽過果頭有人咁嗌過喎,即係邊樹呢?附近有間鉄打叫“趙醒楠”係咪嗌錯呢?錯得咁離譜呢?

司機上西邊街到第一街紅綠燈時問:頭先位先生邊度有落話?

四眼佬繼續大大聲:梁醒波呀

從倒後鏡睇到司機皺哂眉,口噏噏咁(疑似講粗口)

到“趙醒楠”,司機再問,你邊樹落呀?

四眼佬keep住繼續大大聲:呢度落呀

司機開門,比四眼佬更大聲話:呢樹叫梁醒波咩?睇清楚個牌吖你

四眼佬𤓓爆咁落車,見佢真係望住個招牌,hehe



Friday, September 14, 2012

多一份溫柔?

死啦,原來用左呢隻”棵突“嘅女仔趕男友出街瞓,比張被冚下已經當自己好溫柔架啦?

Thursday, September 13, 2012

中獎紀錄

呢期中左乜?

前排有套卡通上畫,戲飛抽唔到,抽到隻錶
 
抽到一套護膚品  
抽到兩包漢保扒,話用乜乜靚肉做成,但一煎,猛出水,最後無哂肉汁,鞋十十 下次試下焗會唔會好D
   
仲有D喺Facebook襟個like就有嘅,好似呢枝。。。好細支  
仲有呢包,最正係寄埋嚟,唔使去攞  

係得咁多啦~

Wednesday, September 12, 2012

星期日檔案

我夜晚先去投票,日頭周圍影下相。。。影到乜呢?

 一個甩色大足球
 
 白鷺生擒泥猛  
一口鯨吞  
城門河上單車相遇
呢樣係乜野新玩意?
好夢幻呀,但。。。枝鏡好多塵
 一隻靚靚白貓
   
最後,見明珠台訪問人喎,你認唔認到佢係邊個?
貼士:見佢健健康康,好開心~
Related Posts Plugin for WordPress, Blogger...