黑仔康復的進度

好多人關心黑仔，感激，寫下佢呢兩日嘅進度啦～

呢兩日，日日都抽時間過去餵藥比黑仔食；睇下D藥先。。。
藥丸兩隻，藥水一隻；我同醫生講，只可以做到每日食一次藥咋！


出院前，醫生喺我面前示範過點餵藥水，用針筒吸30ml，隊落佢個口度，因藥水甜嘅，佢lamlam脷就飲哂。。。
呢幾日到我餵啦，飲得果一啖就唔飲，滴番出嚟，仲掙扎走佬㖭；你隻死野吖～
我唯有將藥水藥丸混入貓礶頭比佢食，D藥丸整碎佢搵D魚肉冚住，攪掂，食哂；哼，同我鬥～


星期日出院，星期一去，佢明顯仲係攰，玩一陣瞓一陣，但肯食野又無咕咕叫，但從上面睇佢，見佢個腩左右唔balance，因為條腸仲係脹；
星期二，已經balance番好多，生猛左又食多左；
見唔到佢大便，但因為醫生剃左佢patpat同後腿D毛，見到隻眼週圍有C漬囉，黑仔，人做貓你做貓咁鬼污糟嘅？但證明佢有屙，我又心安D！
玩完又走去瞓；哇！瞓喺路中間，仲要冧成咁，真係懶瞓貓～


可能天氣熱，隻隻都瞓；
左邊隻豹貓越食越多，唔知同閹左有無關係，比初見佢時大左兩個碼，變左肥婆，但毛色靚左，D毛仲軟身左㖭！
右邊隻貓媽生左仔超大食，見佢靜雞雞走左去D隱蔽地方，應該係走去睇貓B啦，唔攪佢，希望今次貓B可以順利成長啦～


另外，呢兩日落去都撞唔到人，但見貓碗有飯／乾糧，即係有人幫手餵啦，咁我都無咁大壓力：D