Monday, September 5, 2011

黑仔。。。住院了

呢篇係寫比自己嘅日記。。。


約兩星期前,黑仔開始食少左野,仲對住我發出一D似投訴嘅咕咕聲,以前最鍾意玩,而家玩兩野就做孤獨村,企喺屋頂繼續咕咕聲


上星期一,去到唔食野;摸上手發覺佢瘦左好多,繼續對住我咕咕叫

上星期二,專登帶D腥味重嘅礶頭去餵佢,佢又食番多左

上星期三,佢對住D腥味礶頭都係食少少;但可能係天意,突然落大雨,我唯有唔走住,陪左佢地粒幾鐘,發覺黑仔成日走去草地擺出大便動作,但屙唔出,半小時擺左四次。。。

我知道,再唔做野就太遲,咕咕聲其實係向我求救

上星期四,約左貓義工阿姐借個細籠,我想帶黑仔睇醫生

話咁易就自己入籠,不過之後嘈到拆天,我搬佢上山離開時,”豹媽“竟然纏住我腳,猛咁喵,好似同黑仔一唱一和咁,邊個敢話貓無感情

去到醫院,佢驚到唔出籠,垂直個籠佢都唔出嚟,我唯有捉佢雙腳夾硬拉佢出嚟,佢又唔爪我喎

醫生聽我講完,一摸,就話佢個膀胱脹得好緊要,即刻照超聲波。。。醫生出嚟,隻手損哂,佢話我走左黑仔就唔乖,出手爪佢,但佢話無所謂,慣哂

睇片,原來佢條腸脹大左三至四倍,入面載滿大便,仲見到好多碎骨,應該係亂食野消化唔到


要住院啦,灌腸幫佢清哂D嘢出嚟,但擔心佢條腸撐壞左,驚佢失去功能,OMG;如果要做手術就好大劑

上星期五,收到醫生電話,經灌腸後,已經排左三分二出嚟,但喺深處果三分一,佢想睇下黑仔自己屙唔屙到出嚟,屙到就一天光哂;即係要住多晚;我六點過去探佢,醫生話佢原本好靜,我一嚟佢就喵喵叫,真係認得我喎
麻醉過又瀉過又吊鹽水,佢攰到郁都唔想郁,喵左一陣就瞓左



上星期六,知道佢靠自己屙左舊大屎,當晚可以出院;但因貓義工阿姐唔得閒(有佢我先有折),亦想佢地餵佢食多一日藥兼觀察,決定再住多晚

星期日,約左兩點半過去,心急,兩點二就到左,助護話佢啱啱又屙左屎,同佢清理好至叫我入去睇佢

我入去,佢又係即刻喵喵叫,明顯精神好多,但手仔剃左毛吊鹽水,一忽忽㖭


但摸唔夠五分鐘,突然唔喵,走去挖沙,對住我屙左好大pat屎,好臭但我好開心,仲同佢講:goodboy,屙到屎啦:)

同助護講,佢嚟倒左D屎啦,當時先2:28分,阿姐未到,同助護傾傾下計,黑仔再屙。。。助護話因為佢食左軟便藥,兼佢真係食左好多野喎;助護越講越開心,話星期六朝番工時,黑仔已經靠自己屙左。。。。一盆,屙滿個盆呀,我聽完O左咀(大家請睇上圖個盆有幾大)

阿姐嚟,我捉黑仔入籠,同佢講走啦番屋企,佢竟然自己入籠,真係乖得好緊要呀





埋單,連貓糧藥水藥丸盛惠$3480,黑仔,你篤屎好貴,我好肉痛,要狂接job先補得番啦!

送佢番原居地,一出嚟,豹媽即刻走埋嚟同佢kiss,溫馨到呢

呢幾日,我要日日去餵藥兼觀察,點忙都要抽時間去啦

但。。。如果呢套係連續劇,咁劇情實在太豐富太急啦,因為貓媽啱啱生左BB啦

而更壞消息係,喺果度每朝餵佢地個阿伯有病,以後都嚟唔到,星期日見到佢,佢話佢嚟唔到餵貓啦,但呢幾日我見貓碗有貓糧,而家朝早邊個餵,佢都唔知啦,我要搵日早D去溝通下先得啦。。。

阿伯,知你重病,祝你早日康復

36 意見:

邪留丸~ XD said...

係黑仔對眼到,見到你喎~
大叔~

naruto said...

邪嬸:
黑仔對眼度見到嘅係明仔嚟架

maymay said...

嚇得我吖,以為係你入左院添~

黑仔遇到你真幸運!

最欣賞你有好心腸,仲身體力行,出錢出力,佩服!

Tee said...

貓貓有情,明叔更有情!
呢遍好感動,祝黑仔同你個荷包早日康復。

naruto said...

maymay:
我叫黑仔咩?我叫明仔呀,點會以為我入院架

出錢出力。。。無錢又無力啦~

Tee:
黑仔同我個荷包康復嘅話我會好感動

Bean'z Lam said...

你不如接佢番屋企養啦

30 Something said...

Naruto,你真係好有心,獸醫真係好貴!

L L said...

真是一個有情有義的愛貓人,敬禮!

l.minor said...

我初時都以為你入院,原來係黑仔...貓

你真係有愛心,怪唔得d貓咁鍾意你啦~

好心有好報,你d job接到你做唔哂~

largeheadboy said...

你不如接佢番屋企養啦 x 2
同你住少啲病痛年中你慳好多架~
祝黑仔同阿伯早日康復!

black lab said...

難怪 maymay 同 I.minor 誤會。
我嘗試解畫啦:你個 title 寫嘅「黑仔」,唔睇落去都唔肯定係你自己定係乜嘢,再加上第一句「寫俾自己嘅日記」,更加令人容易誤會。

ayclui said...

呢篇睇到我眼濕濕...大叔你真係好人呀~
好心有好報,你d job接到你做唔哂 --> 加多個:做 job 得心應手一take 過, d 客個個笑呵呵~

Karvitz said...

都係那句,好心有好報。
祝你接多 d 好 job及中埋六合彩.... 喇

naruto said...

豆:
你估我無諗過咩,但佢地幾隻好友friend架,你教我拎走其中一隻定養哂?仲要佢地住慣山邊,未必鍾意入屋架

30 Something:
真係好貴,但睇到佢地好有愛心幫D貓貓狗狗

laulong:
無計,隻貓當你朋友,你唔可以唔幫朋友

l.minor:
咁呢排D job係夠多嘅,唯有出多兩分力搵錢啦

largeheadboy:
我噚日見阿伯瘦哂同捉住我交待要餵貓,我好難過:(

black lab:
我唔會用黑仔形容自己架,靚仔就會

ayclui:
得心應手一take 過。。。。有咁順利就好囉,多謝

karvitz:
我想講呢,送左黑仔入院行番屋企,都知一定要幾千蚊,六點幾行過投注站諗住買張博下運氣啦,佢竟然貼紙話休息,星期四喎。。。。你話幾邪呢

Ebenezer said...

好感動!!

TY said...

好心有好報,祝你d job接到你做唔哂! x3

明叔,有咩幫到手,出聲喎!

naruto said...

Ebenezer:
有人睇左感動我都好感動

TY:
多謝先,應付到,有需要先出聲啦:)

supageti said...

阿伯咁有愛心,一定會吉人天相。

錢財身外物,洗左搵得番,但生命無 take 2。

明仔哥哥心地好、人靚聲甜、創意無限,以後一定接 job 接到手軟、中獎中到開晒巷,哈哈 ~~~~

supageti said...

題外話:最近我地去大埔墟都見唔到貓貓,個心有啲 up up 地,驚佢有咩事。尋晚忍唔住問對面眼鏡舖啲人,佢地話貓貓係肉食舖養嫁,日日都見到佢,仲話佢最鍾意走出黎曬太陽添,安樂晒!

naruto said...

阿粉:
我都係覺得條命緊要過錢先去幫佢啦

明仔哥哥心地好、人靚聲甜、創意無限。。。你終於講出心底話啦,呵呵呵

有人養嘅就唔使太擔心嘅,至少保得住兩餐喔

卡臣 said...

祝黑仔早曰康復

naruto said...

卡臣:
我當佢康復架啦,一陣做完野去睇佢,希望佢OK啦

ayclui said...

明大叔, 睇完黑仔話我地知佢情況呀~

naruto said...

ayclui:
好吖,會架啦

新鮮人 said...

你真係好有愛心和耐性,
出錢又出力,
好感人!
讚!

不過係咁生真係唔掂呀,
你幫得幾多隻呀,
要搞搞佢噃!

unknown said...

希望吉貓天相!

naruto said...

新鮮人:
愛心耐性人人有,只係好多人唔記得擺左去邊

馬田亨:
北京D街有無貓貓呢?定比人食哂呢已經?

meow said...

欣賞你!

Lazy Smurfette said...

睇完呢篇覺得好溫馨﹑好舒暢﹑好感動~

除左阿伯﹐有冇其他人餵貓架?

naruto said...

meow:
多謝

Lazy Smurfette:
好舒暢就好啦,我都係望亞黑仔好舒𣈱咋:P

阿伯話無,但我觀察多幾日先,因為今日去D貓貓唔算好肚餓,似有人餵過

phyllis said...

好心有好報架! 給力、支持!
希望阿伯同黑仔早日康復!

naruto said...

phyllis:
多謝哂:)收到

Bean'z Lam said...

貓貓的性格五時花六時變
可能初頭入到屋未慣
但比d時間佢地就ok啦

養幾隻唔係問題架,我都有兩隻啦

naruto said...

阿豆:
佢地而家開心嘅,我唔會去攪佢囉;佢嚟左住唔慣先掉番佢出去咪仲衰

星若 said...

沒來這裡3星期,一來便嚇我一跳。很高興黑仔已漸漸康復。

naruto said...

星若:
做乜唔嚟三星期呀?哼~

Related Posts Plugin for WordPress, Blogger...