驚喜＊蝴蝶灣

先講幾句黑仔今日狀況，精精神神，唔肯食藥，但最後比我迫佢食左，摸到佢條腸仲係脹左未收縮番，但食左藥排到便我有信心可以慢慢復原嘅，多謝各位關心黑仔嘅朋友

﹣﹣﹣﹣﹣﹣﹣﹣﹣﹣
上星期六，因為黑仔未知幾時出得院，及未知需唔需要做手術，帶住不安心情去影相散心，今次去蝴蝶灣

蝴蝶灣位於屯門，搭巴士去到屯門碼頭，行出去有個海濱公園，向右行就到蝴蝶灣。。。


喜﹣原來沙灘好大好靚喎，有D布吉風情喎，椰樹真係有一抽抽椰子喎，會唔會有人投訴驚中頭獎而要摘哂落嚟呢？
以前成日話水質唔好，唔知而家有無改善呢？


驚﹣海濱公園行去蝴蝶灣途中有棵樹長滿果子，但引來大堆蜜蜂，仲要係巨形果隻㖭


喜﹣沿途都好多花呀，靚呀，好就手就影左幾張滿意嘅


驚﹣隔離有個石灘，好多人釣魚，但石灘上好多死魚死蟹，有D核突，無影；但，呢堆蟻做乜成班喺度游水呢？好奇怪喎，蟻識游水架咩？


驚﹣今日高潮位一，呢位人兄釣魚釣到出海中心，唔驚架咩？係咪水退時行出去架呢？點番嚟呢？出D真係多D魚咩？一個浪冚嚟點走呢？一堆問號係一個謎呀～


喜﹣沙灘後面係個好靚嘅公園，真靚架喎，D樹唔會種到亂糟糟，幾悠閒喎呢度


驚﹣今日高潮位二，唔使多講，睇相，我見到都嚇一嚇呀；我諗要列為發現屍體案囉！


完