Friday, September 30, 2011

怪人怪事系列之雞公嶺離奇事件簿

今日帶大家去元朗嘅雞公嶺,上山條路又高又斜


呢D路段有梯級


呢段係跣腳嘅沙石


有D呢,路唔似路,手腳並用先行得過


行左40分鐘,呢度路都無埋,但係離奇事件就喺呢個山腰發生啦))))))))))


點解唔棟埋禁止泊車呀,唔好亂過馬路呀,禁止轉左轉右呀,掛埋成功爭取海報吖笨

Thursday, September 29, 2011

浪奔浪流大口環之怪人怪事怪叔叔

9月25星期日,網上見到一張大口環斷橋嘅相,之前去過幾次大口環都唔覺,決定去睇下。。。


去到,落雨㖭,仲好大浪,轉影浪啦梗係,見到出面有個人“游水”喎,但用水泡架喎,佢比D浪沖到搖左又搖右,上吓又落吓,開頭無用長鏡唔知佢喺出面做乜?

你地估下佢做乜?(下面開估)

.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
原來係釣魚,睇佢比大浪沖嚟沖去,真係“鄧”佢驚,再睇下上面張圖,離佢十零尺有舊紅色野,咩野嚟呢?


原來佢縛住個魚籠喺水泡再縛喺腰,釣到魚就放落去呀


以為故事就咁完?

原來有個嬸嬸坐喺沙灘樹蔭等佢上岸,佢見到阿叔,跟住話:得兩條細魚咋~
好慘呀叔叔

至於影浪影成點,遲D寫啦:)

Wednesday, September 28, 2011

佐敦谷公園第三集﹣fusioncam

因為覺得無野影,於是摷下D iphone app,fusion cam download左好耐,但一路都無正式用,原來好好玩架

影一張,顏色濃過相機好多


可以重疊幾層


又可以純黑白


熟左就開始玩野,好有升仙嘅感覺呀


同一個位行前一步玩重疊


好大霧呀


down嚟玩下啦,不過免費期已過,而家要$1.99

你地有乜好玩影相app介紹下呢?

Tuesday, September 27, 2011

我在山頂看林憶蓮演唱會

星期日,突然有朋友通知有即晚$180飛多左,問我去唔去;作為fans咁多年,去啦。。。

好似好奇,作為fans,做乜唔一早買飛呢?係喎,點解無衝動買飛呢?一來無人約我睇,二來噚日諗,應該係佢唱左隻亞視歌,潛意識扣左分


坐喺山頂呢,咪即係戲院超等囉,好野嚟架,舞台燈光一眼睇哂,坐前座係睇唔到架;好多人彈呢個演唱會D音響,坐山頂呢,無呢個問題架,D聲唔錯;


開場唱枯榮,咦,走走地喎,對佢要求係高D架啦,我諗係近10年第一次見佢走走地囉;第一part睇得唔投入,D歌編排怪怪咁;套歌衫造型,坐山頂睇唔聽聲以為係蘇珊


第二part,唱rock,唔識欣賞,好嘈好嘈,要用個忍字嚟形容;套歌衫,旺角中心買架?
呢part,音響冚過憶蓮把聲,個電結他咁大聲做乜义jet


第三part開始,正常番,好睇好多,唱番正路野咪好囉;無頭兩part,個演唱會會完美好多


白色套衫果part係good架,因為我專心聽,無影過相

呢條粗黑皮帶想做乜呢?


encore果part好好睇,倫永亮揀歌,隻隻好聽;唱哂一早應該唱果D啦,擺上part 2好過啦;咦!似乎佢個服裝指導係旺角中心vip喎


對佢要求高,除左第一隻失準外,其餘其實超水準

預告:因為突插寫林憶蓮演唱會,佐敦谷公園第三集聽日至出啦

Monday, September 26, 2011

佐敦谷公園第二集﹣相簿

話無乜野影,但又可以寫多一篇相簿喎,睇下影到乜。。。

1/風車+大廈


2/賽車場


3/屙尿(啦!開始無野影搵野影啦)


4/烏蠅(以前係堆填區,有烏蠅有乜奇呢?)


5/太陽(影到我盲左)


6/雲邊


7/兩朵風雨蘭


8/三姊妹


9/三兄弟


10/好痛(無野影搵野影示範作)


11/日落小黃菊


我就最鍾意7號,你呢?

下回預告:佐敦谷公園第三集,勁呀~

點去佐敦谷公園:鑽石山地鐵站荷里活廣場下面巴士總站搭91M,順利消防局落,向上行

Sunday, September 25, 2011

佐敦谷公園第一集﹣公園怪人

先介紹下佐敦谷公園

面積大,草地大,條跑步徑好靚,除此之外,有乜景點呢?


寫哂喺度,自己睇


模型賽車場最多人談論,又真係幾正嘅!


風車得一個,做樣架?夠電比成個公園架啦?點解唔做多幾個呢?


好大片草地呀,無人真係嘥呀,睇真D,有個雕像喎


原來係個大叔,點解要瞓喺花盆中間曬呢?點解要擺D咁攞命嘅舖屎呢?


又睇下呢邊,又有個怪人喎


原來係個師奶,怪喺邊?要瞓草地曬太陽嘅就咪擔遮啦,怕曬你就去番D涼亭,賽車場遮下陰啦!仲要怕曬到縮起腳都唔走,咩野心態呢又?


未完,仲有兩集:)

點去佐敦谷公園:鑽石山地鐵站荷里活廣場下面巴士總站搭91M,順利消防局落,向上行

Saturday, September 24, 2011

本週精選相片

急需救援?唔通跌左落屎坑?

廁所入面有平安鐘?喺邊架呢?襟左會著燈定會閃定會叫呢?好緊張呀~

Friday, September 23, 2011

發現﹣香港神級秘境(新清水灣道高架天橋)

上星期六,揀左去佐敦谷公園影相,覺得無乜野影之際,見隔離有座小山,有路上又唔係太高,諗住上去影下日落啦;行錯路,結果。。。


行左上天橋,好大風,行到中間,望出去,眼發光呀,好靚好靚好靚好靚好靚好靚呀~好鍾意左面個cityline呀,香港我未見過囉,右邊仲見到獅子山,加埋向西,暈呀~


除左比眼前美景迷暈外,暈,仲有一個原因。。。好高呀!雖然我無畏高,但都真係腳有D軟,因為除左高,當有大型貨車行過你後面,條橋係搖到八彩,搖到有離心力架

(條路係咪好靚呢?係咪好高先?)


加埋D車行得快,D沙石打落隻腳度,係㓤㓤痛架;你想專心影相?咁要睇下你有幾大膽先:)

(咁睇好似平地無乜野囉,係咪?)


下面望上去又如何呢?從網上搵到嘅料,佢係香港最高嘅天橋呀


上網搵料無乜影相人講,講親都係跳橋自殺,點解呢?

極力推介大家去影呀~

點去新清水灣道高架天橋:鑽石山地鐵站荷里活廣場下面巴士總站搭91M,順利消防局落,行去佐敦谷公園正門,向右行上橋

Thursday, September 22, 2011

開心A。B。C

開心A:
呢兩個星期,工作排得滿滿滿,星期二去廣告公司坐定定做兩日兼職,點知個job出哂事,結果番10:00am,放第二朝嘅7:30;
攰到喊,但星期三變左唔使番,偷番一日做自己野,開心

(am730@中環)


開心B:
星期三下晝接到餵貓阿姐的電話,佢話喺佢果頭捉到一隻灰貓,似我地舊年唔見左果隻貓爸,雖然機會渺茫,但夜晚會過去睇下;意粉講過奇蹟在身邊,我呢刻信架~

(左邊果隻就係貓爸)


開心C:
星期一,去搵黑仔,見佢健康活潑,於是開始無餵藥;佢食完最愛貓礶頭後同佢玩,跟住開玩笑講話:喂,屙篤屎嚟睇下好喎,表演下吖。。。
佢真係走去草叢,搵個C眼對住我擺出屙C的姿態,點知。。。屙唔出;我緊張,諗住餵番藥,佢完全唔肯食囉,激死~

(影黑仔,貓媽走嚟要按摩,阻住我影相呀)


星期三,偷來兩粒鐘,同你慢慢玩,先將藥混落貓礶頭比佢食,食哂,再摸佢肚皮,發覺唔算好脹啫,安心左好多;幫佢搓下肚波郁下D腸;引佢去草叢同佢講:喂!黑仔,表演下啦,屙屎啦,好無?

佢真係擺出高姿態,見佢夾左幾野都好似無野出,突然見佢瞓低,原來有舊屎唔出唔入呀,佢用口咬一咬,屎先屙到出嚟;
可能仲係未好哂啦,但見你屙到屎,我好開心呀~所以呢段係開心C

(養貓人士,一齊嚟品評下,我搵樹枝篤過,質地偏硬,顏色偏深,成粒蠔屎咁,係咪正常架?)
Related Posts Plugin for WordPress, Blogger...