四和菜

第一道菜：滿肚腸肥
團年飯收到嘅禮物都未食到一半，開年飯又多幾盒，想唔變肥仔都幾難啦
多謝ellen,水仙花好靚，兩個頭有11枝槍，今日都仲好香，一朵都未謝；女兒節餅我會帶去影相食架啦
多謝maymay，蛋卷我會優先食左佢，驚佢遲左唔新鮮呀
多謝劉鄧，個十勝紅豆糕過年時我分兩日清左啦
多謝薯嘜，朱古力都清左
多謝大頭，不過呢，我唔識飲酒架，枝酒比左好爛飲嘅家姐
多謝萊，好大礶曲奇，唔肥至奇


第二道菜：虎虎生威
白泥遇到呢隻小貓貓，見到佢有三兄弟，外表全部一個樣，但睇真D，呢隻兩隻眼唔同色架，一隻彩藍一隻黃架


第三道菜：大“加”大利
蘋果頭條話大家樂大快活加價，其實，你細心D睇下，間間茶餐廳同酒樓個餐牌，一係就新印嘅，一係就貼哂貼紙改價錢，有人天真咁問過左年會唔會撕番個貼紙喎，你話呢？
西環間間加價唔在講，連我一向買開平菜果間菜檔，以為佢過年休息，今日睇真D，原來執Q左，已經係半年內第二檔；

大家準備好一齊捱呢個加價潮未呀？


第四道菜：家宅平安
約6-8個月前，隔離新住戶入伙，開頭以為係一雙年輕男女，後來證實只有個女嘅住喺度；
佢D鞋亂咁pat喺門口，即係阻住我；因為屋企好扯風，所以關門要用手拉住道門，唔係就會“鵬”一聲，佢永遠唔拉，經常嚇親我
佢喺屋企就講國語，但平時又講廣東話架喎
連隻狗都衰過人，行過就亂吠，但其實咁耐未見過隻狗，可能係錄音機嚟架咋
過年前，佢門口比人貼左紙，我問樓下D護衛，原來唔交租，比人迫遷；原來係租覇
過兩日，張紙撕左，但膠紙連4隻角一路喺度喎
過年靜哂，我估佢返鄉下過年
前晚，我去完阿媽屋企，見到有個男人喺佢門口撕番果4隻角，而地下有樽啤酒；
跟住聽到佢地嘈左幾句，隔一陣，個男人又番嚟猛襟鐘，跟住仲爆埋樽，我門都唔敢開呀，剩係聽到個男嘅猛咁講對唔住，而女嘅就講你冷靜D啦，咁鬼tvb D對白嘅

同管理處備左案，睇實D麻煩鄰居，唔交租就走啦，咪攪事啦～