今晚搭巴士968由元朗出上環，上車時接近滿座，我坐左喺下層最後位置；
下一站，有個”賓姐“攞住一個巨袋坐喺我對面，佢將個袋放上隔離座位時個袋掂到我，佢即講sorry，我笑住答it's Okay；
再一站，一對父子上車，後排剩番兩個散座，個老豆叫個仔坐低之餘，問都唔問一手拎起”賓姐“個袋，自己坐落去；（當然，賓姐個袋霸個位係唔啱，但問都唔問就攞人個袋落地又實在過份D喎）
又再一站，一個頭髮白哂瘦弱阿婆上車，前排幾行居然完全無人讓座，我起身讓座，當時啱啱開車，見阿婆企都企唔隱，要扶住佢，而阿婆亦話：唔該呀，但係我腳痛行唔到埋去；跟住佢同前排一個賓／印姐講：姐姐，你坐後要吖，我埋唔去，比我坐呢度吖，賓／印姐起身讓位，我叫佢坐後排，佢笑住話唔駛叫我坐，而同一時間，企喺阿婆後面嘅師奶用心急嘅眼神兼已經攝埋嚟想坐最後面個位，我當然坐番埋去啦，但。。。
原來頭先我行出去期間，果個老豆已經即叫個仔坐左我個位，即係比個倒頭位阿婆座，有個巨袋嘅賓姐望住我苦笑住咁搖頭，我再睇下個老豆個樣，好醜樣，真係好醜樣，我絕對相信相由心生囉
再睇下前排有D乜野人，有老人家，有賓／印姐，有師奶，仲有兩個廿零歲港女喎，一個瞓左(可能係扮嘅），一個講電話未停過口唔講野會死果隻。。。。對住呢班唔讓位仲想搶你位嘅人，我真係覺得你地羞恥！
而家D香港人乜事呀？學校／家長無教要讓位比長者，大肚婆架咩？
阿媽都話：而家D後生唔好話要佢地讓位，佢唔同你地搶過已經好啦～
其實睇我blog嘅你地會唔會讓位架？有讓嘅唔該留個言話我聽，如果呢篇無留言嘅，就大劑啦～
大爺youtuber
12 hours ago
.JPG)
41 意見:
大叔大叔, 我有讓o架~ 因為我唔係八/九十後. 不過有10% 時間可能無讓, 例如攰到無命/拎住幾大袋o野, 自己都差D碌低果陣囉, 我認o架~
而家D香港人乜事呀？學校／家長無教要讓位比長者，大肚婆架咩 --> 就係無囉, 你見果個核突老豆就知啦. 有一次我喺地鐵見到個家長以身作則讓位比老人家, 幾鬼感動呀~
我會讓位畀比我更有需要既人。不過我好少乘搭公共交通工具，對香港都無乜貢獻。
唔係扮嘢，我真有讓座
以前我搭地鐵，我一定企,諗住讓俾有需要人士坐啦
而家我有位一定坐，霸住個位先，等我可以讓俾有需要人士坐嘛
而家啲後生仔無腰骨,唔坐會死咁
我讀小學都已經讓位啦﹐企一陣有咩所謂。
無人格無公德先叫可悲。
老吾老以及人之老。
弱傷病孕亦然﹐將心比心。
有次搭九巴,經過九龍塘站
見到都好嘔血...
已經無位坐,個細佬只係掛住打機
個菲嫞"對"個麵包俾佢,就將開個口
好似個菲嫞應該俾佢食咁囉(細佬啲態度)
(個菲嫞係攞住佢嘅書包+重嘅物件)
依家啲細佬讀名校"又如何呀!!!!"
自己都唔識照顧自己
唉...(灰...)
我...我...我都會讓架，不過坐地鐵除非好攰又或者根本大把位喇，否則我都會企，因為我好唔鐘意我坐喺度嘅時候啲人一衝入嚟好似打獵咁四圍目及住邊度有位坐~
唉..我係大肚婆,我都讓座畀老人家啦~因為呢幾日過年實在太多自由行,佢地唔撞低你搶位都真係偷笑(我尋日先畀個拖篋既自由行中年男人撞左一野,惟有一腳踩落去佢隻腳洩憤)
之前未見肚仲危險,都唔奢望人地無啦啦會估到你大肚讓座畀你,不過有d年紀介乎阿叔與阿伯之間既男人仲賤,佢地完全唔似有需要坐,但又要畀說話你聽,話咁後生都唔讓座畀佢wo~
報名，我有讓架~
年初一，大家姐一見到我，就話搭巴士同人嗌交。原來有兩個C奶，全車滿坐都霸住兩個吉位，我家姐同另一乘客想坐，佢地就話要留番俾過兩站上車嘅親友喎，結果係點，梗係嗌交啦~~
學你話齋，而家D香港人乜事呀？！
To 邪小姐:
依家啲細佬...自己都唔識照顧自己--> 同感呀, 但我覺得好大程度上係因為有怪獸家長, 用幾個金鐘罩cup住個細路...攪到佢地喺自理能力上好似舊飯咁...我對香港嘅未來好灰...
其實香港都有唔少人會讓位，之但係唔讓座既人係更多。呢方面我覺得台灣做得比香港成功多，有愛心之餘又有人情味。怪就只怪屋企唔教，學校唔教，唔通真係天生天養？
Jun
死喇！我第一個諗法好邪惡，等同打人個導遊一樣，係唔係又係新移民累事？
而家D人真係唔同你搶位都偷笑啦.. 仲讓座! 如果身體機能當日無嚴重不適或者攰到就黎瞓低既話, 我都會讓座既!
to maymay,
我真都試過呢個情況呀!!! 都唔知D人諗乜!! 我從來都無聽過巴士可以reserve留座架囉!!!!
學校真係無教要讓位比大肚婆喎！
ayclui:
我搭地鐵，成日都無得坐；有時見D公公婆婆上車，我都遲兩秒至出手，睇下有無人讓，咁間中都有嘅，但都係同我差唔多年紀果班囉
supageti：
咁無搭就無得讓係正常嘅
卡臣：
我想話呢，留言果班呢，好似都唔係80後呀。。。
best actor：
就係將心比心囉，點可以叫阿婆企半粒鐘以上呀
邪留丸~：
有人“賴”而家後生一代菲傭凑，但我唔認同，個仔又唔係個工人嘅，自己唔教架咩？
largeheadboy：
仲乜漏口嘅？
啲人一衝入嚟好似打獵咁四圍目及。。。唔係要讓嘅範圍我係唔會理架，佢望我我當佢望靚野架咋
瑤姑：
大肚要小心D；著得似D大肚婆，等人知你係大肚嘅，應該有人讓卦
maymay：
唔好又話我鬧C奶，咪就係佢地會做D咁嘅野囉
以前公司安排上果D管理課呢，有一樣野我信有用架，叫影響圈，自己覺得啱嘅，做比人睇，運用自己嘅影響力擴大個影響圈。。。我寫呢篇blog都係想咁，唔想見到香港變成咁
ayclui：
我都灰
Jun:
我就係唔明點解屋企學校會唔教；我唔信學校無教囉
Ellen老師：
下？真係無教？O左咀㖭
我有！
另外，大年初一坐西鐵，我見到一對青年情侶讓座，個男仔望到隔離車廂個亞伯老態龍鍾，就特登行過去拖亞伯過黎坐自己個位，我見到都超感動。
其實，唔係上下班時的繁忙時間，我都好多時見到啲好心師奶讓位畀老人家同大肚婆ge，不過就真係好少見到後生仔讓座囉~
lau2tang：
讓位嘅佔左一半係好心師奶又真架喎，3X-4X果班囉
我都有讓呀!地鐵通常有位都唔坐,俾其他人坐
其實我見d賓賓,印印,好多時係車都會讓位俾d老人家/大肚婆呀,又好守規排隊,相反就好多香港人踩你都有味...
不得不提,啱啱大阪返黎,重好記得坐subway,佢地又會讓人過,唔會死都唔出去,又會排隊等人落哂先上車,香港就好似成班殭屍咁, 一開門就衝閘
我個故事未完架，
過左兩個站，果D親戚真係上左車，一男一女，結果又係點？加入戰團囉，車上面有乘客睇唔過眼，又加入戰團囉！
果家人完全唔覺得自已錯，而家D香港人乜事呀？
Karvitz：
無得賴哂人，咁除左新移民，都仲有好多土生土長卦；新移民都唔會個個係咁卦
TY：
maymay個case又真係離譜
maymay:
乜年紀架個班人？司機有無出聲？
我有讓呀，我係7Ｘ後XD....
但有時會遇到一兩個比較有傲氣的老人家，
讓坐他們也不坐，他們好有性格。
zyeung：
做左應做嘅佢唔要。。。無所謂啦
老弱婆婆？一定讓位啦！果位酸樣阿叔真係好核突囉！我諗我會叫佢比反個位婆婆坐，反而外傭重識大體，唉！香港幾時變成咁！
漏口係因為有時太需要坐無讓到位。當然見到真係有需要嘅我一定會讓位~
係呀，啲外傭好好禮貌架通常都。同佢地搭 lift 佢地會咁住部 lift 等人出晒先至自己出，香港人就話之你喇！
實際年紀就唔知，淨係知後來上車果兩個係其中一個C奶嘅仔同新抱，個仔勁惡，反而個新抱自知吃虧，叫佢收聲，但係我家姐同另一乘客坐左個位之後，個新抱怒啤佢地囉。
個司機冇出聲喎，不過我諗如果佢地動口又動手，司機會報警囉。
我諗，我鍾意住喺日本嘅其中一個原因，就係絕少會見到呢d場面。
P.S. 補充尋日「肥筆」。我揸肥筆揸得耐，虎口位同手指公關節會好痛，所以要用幼筆。
l.minor:
日本呢樣野就真係好好多啦
ps:快D比日本相嚟睇啦
聶秀康：
果個肉酸佬，影衰哂，佢個仔睇見老豆係咁，大個都唔方好野
largeheadboy：
台灣，泰國，日本都好好多，得番大陸托底
maymay：
影低佢放上嚟嘛
black lab：
日本呢。。。好凍，哈哈
大叔，呢Ｄ野自己盡咗力就算啦，睇唔過眼又無補於事的。好似我朋友個女咁，見到人都唔會叫聲，我曾經同我朋友講，佢俾我的答案係：人地Ｄ小朋友都係咁啦！其本上話佢個女有乜唔妥(例如唔識揸筷子)，佢都照樣用同一答案。
講番讓座，其本上讓到咪讓。不過曾經遇上一位孝順女，佢同佢媽媽上車，企係我旁邊的玻璃，佢就好直接咁問我可唔可以讓位俾佢媽媽坐，咁我咪起身。
Tat:
我個姨甥三歲半﹐半唐番﹐佢老竇老母都會教﹕入屋要叫人﹐有人客o係客廳自己一個人唔可以上房玩﹐人客走時要講再見﹐收禮物要講多謝﹐講野唔好大聲......。仔女唔識分好壞﹐父母都要識。細個唔教幾時教﹖ :o)
其實最好係身教。仔女見到父母讓座﹐見到父母有禮貌﹐日復如是﹐總會有影響。
Tat:
我就覺得唔可以算，教得一個得一個啦
best actor:
係呀，做好自己最緊要
琴晚係返到香港後第一次睇d相,哈哈~唯有今晚努力啦~
l.minor:
我通常好心急架喎，你無架咩？
好認同你嗰句: 而家D後生唔同你搶位坐已經好好。如果好彩有位坐我會讓座。
有呀,可惜今次急唔黎~返到黎太多野攪,特別係新年,又要周圍去~ 呢兩日應該好d
啱啱睇到d野,
http://www.uniqlo.com/ut/naruto/hk/
星若:
唉!大家都係咁諗，悲哀
l.minor：
等睇相啦：）
我買左兩件啦
我唔敢話我次次都會讓，因為真係要睇情形，我會搭 968，以前亦住過大埔，最初發現啲人唔讓位，都好似你咁諗，但後來知道，有啲人為咗有得坐（因為車程長），會早成十幾二十分鐘（尤其是是早上，早成二十分鐘係好多㗎喇），由之後的站專程到總站排隊，而早上亦會有兩條“龍”，一條係“正常”的，即係要坐的話請排隊，冇位你可選擇等下一班；另一條係上滿坐位之後，如果願意企就唔駛等下一駕車都可以比已經排緊隊嘅人先上車。
我有時都會特登去總站上車，如果咁做，一來一回，最少最少要早二十分鐘，如果係咁嘅情形，我係唔會讓嘅！尤其是果啲大住個肚而排我以上形容的“第二條龍”嘅人，原因好明顯啦！
但搶人位，我又真係好少見倒，咁樣教仔，佢第日可能有排受呀！
如果搭 MTR，西鐵等，我好多時都唔坐...
補充，我今日喺元朗站搭西鐵去尖沙咀，上車時已經冇晒位，但即時有人起身讓座比兩個老人家，而另一個老婆婆亦喺下一個站有人讓，正明世界重有啲正常人...而我亦發現搭鐵路比較多人讓，可能企得冇咁辛苦掛！
SKII：
地鐵企位多個坐位，企好似係“正常”，巴士呢，企位本來就唔多，又搖得緊要，梗係無人想企啦，明嘅
我是80後, 我有讓的XDDD
已經訓練成一看到老人家即彈起了XDD
樓上：
有個80後答真係感動：）
Post a Comment