牛の近距離接觸

十月時，上網見到康民署有個免費導賞團遊天文公園，西貢有專車接送，出發前見好天，出發。。。

原來地點係“西貢萬宜水庫西壩”，隔離係創興水上活動中心，果然如導遊所講，好山卡啦，除左行嚟，只可以搭的士，最近都要搭$4x，你話平時點會嚟點會嚟～

既然人地免費車我嚟，點都要介紹下，現場有幾件觀星儀器，有方便你瞓低睇星嘅座椅，同埋大量腳架，比你自携望遠鏡時set上去。。。。
睇左一陣，悶呀～


突然見到隻怪蟲，即刻離隊，影佢九條街，原來佢隻翼爛左呀，唔怪得之剩係行唔飛啦!因為想截停佢影，用對鞋截佢去路，點知佢爬上我隻鞋，輕輕帶返佢落地之際，聽到隔離有個約十歲𡃁仔weewa鬼叫，問：你唔驚咩？跟住仲驚到走埋，而家D細路係咪咁屎呀；我就唔驚兼覺得非常靚啦!

話時話，呢隻係咪蜂嚟架呢？有無人識呀？


既然離左隊，就一去無回頭啦，見到個靚草地，走去影啦；原來美麗嘅背後係左左右右都係牛屎


有牛屎就即係有牛啦，行左一陣，見到啦，好大群，有幾十隻，牛就真係有D驚喎，離遠影啦，但得枝wide angle影唔到，胆粗粗行埋D；現場好多白鷺，如果有長鏡影白鷺企喺牛背就好啦，就係咁，我決定買番枝長鏡

盡量走近D無角嘅細牛嚟影，點知有隻突然走過嚟，似乎係想玩，但反而嚇左我一野


原來牛同人一樣，有D離群孤令令一隻嘅孤獨精，呢隻黑牛，不停食食食，見佢過馬路，去邊呢？我梗係跟啦，原來係去湖邊飲水呀


喺香港，我諗都好難有第二片呢D牛間靜土呀，呢度人唔犯佢，佢又無阻人，又一大片草地加個湖，牛間天堂啦～

睇下，係萬宜水庫西壩頂望番落去，環境幾正


ps:出去時明明好天，去到變左陰天，激死呀

完